തെലങ്കാന കോൺഗ്രസിനെ പടക്കുതിരയാക്കിയ രേവന്ത് റെഡ്ഡി; ബിആർഎസിനെ മലർത്തിയടിച്ചത് 2 വർഷത്തിനുള്ളിൽ

ഫലത്തിൽ കോൺഗ്രസിന് ഒരു സീറ്റ് കൂടി നഷ്ടപ്പെട്ടിരുന്നു. ഹുസുറാബാദ്, ദുബ്ബക് തുടങ്ങിയ മണ്ഡലങ്ങളിലെ ഉപതിരഞ്ഞെടുപ്പുകളിൽ ബിജെപി അട്ടിമറി വിജയം നേടിയതിനു പിന്നാലെയായിരുന്നു ഇത്. പിന്നാലെ ഹൈദരാബാദ് മുൻസിപ്പൽ കമ്മിഷൻ തിരഞ്ഞെടുപ്പിൽ തങ്ങളുടെ നാല് സീറ്റ് 40നു മുകളിൽ വിജയിപ്പിച്ചു കൊണ്ട് ബിജെപി വീണ്ടും നേട്ടം കൊയ്തു. അവിടെയും നഷ്ടം കോൺഗ്രസിനായിരുന്നു.

എന്നാൽ‌, സംസ്ഥാനത്തെ കോൺഗ്രസ് പ്രവർത്തകരുടെ വാക്കുകൾ കടമെടുത്താൽ രേവന്ത് റെഡ്ഡി അധ്യക്ഷനായതിനു ശേഷം പാർട്ടിക്ക് ‘ചോദിക്കാനും പറയാനും ആളായി’. സംഘടനാപ്രവർത്തനം ചിട്ടപ്പടിയാക്കുക എന്നതായിരുന്നു സംസ്ഥാനത്ത് കോൺഗ്രസ് ചെയ്ത പ്രധാന കാര്യങ്ങളിലൊന്ന്. അതുകൊണ്ട് മറ്റൊരു ഗുണമുണ്ടായി. രാഹുൽ ഗാന്ധിയുടെ ‘ഭാരത് ജോഡോ യാത്ര തെലങ്കാനയിൽ‌ മികച്ച രീതിയിൽ നടത്താൻ കോൺഗ്രസിനായി. ഒരുപക്ഷേ, കാറ്റ് മാറി വീശിത്തുടങ്ങിയത് അന്നുമുതലാണെന്നും പറയാം. തെലങ്കാനയിലൂടെയുള്ള രാഹുലിന്റെ 12 ദിവസത്തെ പദയാത്ര വലിയ വിജയമായാണ് കണക്കാക്കുന്നത്.

ബിആർഎസിനും ബിെജപിക്കും പിന്നിൽ മൂന്നാം സ്ഥാനത്തേക്ക് തള്ളപ്പെടുമെന്ന ഉറപ്പിൽ നിന്ന് വലിയൊരു തിരിച്ചുവരവ് കോണ്‍ഗ്രസിനുണ്ടായത് ഭാരത് ജോ‍ഡോ യാത്രയോടെ ആണെന്ന് നേതാക്കൾ പറയും.തളർന്നു കിടന്ന കോൺഗ്രസിനെ ആ യാത്ര ഉയർത്തിയെടുത്തു. പദയാത്രയോടെ അണികളും ആരവവും ഉയർന്നു. പിന്നാലെയായിരുന്നു കർണാടക തിരഞ്ഞെടുപ്പിലെ തകർപ്പൻ വിജയം. ഇതു കൂടി വന്നതോടെ അതിന്റെ പ്രതിഫലനങ്ങൾ തെലങ്കാനയിലും കണ്ടു തുടങ്ങി.

∙ നേതാക്കൾ തിരിച്ചൊഴുകുന്നു, കോൺഗ്രസിലേക്ക്

മുനുഗോഡെ മണ്ഡലത്തിൽ ഇത്തവണത്തെ കോൺഗ്രസ് സ്ഥാനാർഥി ആരാണെന്നറിയാമോ? കോമതിറെഡ്ഡി രാജഗോപാൽ റെഡ്ഡി. മുനുഗോഡെ എംഎംൽഎ ആയിരിക്കെ രാജിവയ്ക്കുകയും ഉപതിരഞ്ഞെടുപ്പിൽ ബിജെപി സ്ഥാനാർഥിയായി മത്സരിച്ച് പരാജയപ്പെടുകയും ചെയ്ത അതേ കോമതിറെഡ്ഡി രാജഗോപാൽ റെഡ്ഡി തന്നെ. അടുത്തിടെ കോൺഗ്രസിലേക്ക് തിരികെ വന്ന പ്രമുഖ നേതാവിന് കോൺഗ്രസ് അതേ മണ്ഡലത്തിൽ തന്നെ വീണ്ടും സീറ്റു കൊടുത്തു. 

മുൻ ബിജെപി എംപി വിവേക് വെങ്കടസ്വാമിയാണ് ഏറ്റവുമൊടുവിൽ കോൺഗ്രസിലേക്ക് തിരികെ വന്ന നേതാവ്. നിരവധി പാർട്ടികൾ മാറിയ ശേഷമാണ് ഒടുവിൽ അദ്ദേഹം കോൺഗ്രസിൽ തിരികെ എത്തിയത്. കോൺഗ്രസിൽ നിന്ന് ബിആർഎസിലേക്ക് പോയ വെങ്കടസ്വാമി പിന്നീട് കോൺഗ്രസിലേക്ക് തന്നെ തിരികെ എത്തി. എന്നാൽ അധികം വൈകിയില്ല, കൂറ് ബിആർഎസിനോടായി. 2019 ലോക്സഭാ തിരഞ്ഞെടുപ്പിനു ശേഷമായിരുന്നു അടുത്ത ചാട്ടം, ബിആർഎസിൽ നിന്ന് ബിജെപിയിലേക്ക്. പ്രമുഖ വ്യവസായി കൂടിയാണ് അദ്ദേഹം. ഇപ്പോൾ വീണ്ടും കോൺഗ്രസിലേക്ക്. ഇത്തവണ മകന് സീറ്റു നൽകും. ലോക്സഭാ തിരഞ്ഞെടുപ്പിൽ വെങ്കടസ്വാമിക്കും സീറ്റ് ലഭിച്ചേക്കും. 

ബിആർഎസിൽ നിന്ന് കോൺഗ്രസ് വഴി ബിജെപിയിലെത്തിയ മുൻ ചലച്ചിത്രതാരം കൂടിയായ തീപ്പൊരി നേതാവ് വിജയശാന്തി, തെലുങ്കു നടി ദിവ്യവാണി തുടങ്ങിയവർ കോൺഗ്രസിലേക്ക് മടങ്ങിയത് അടുത്തിടെയാണ്. കുറച്ചു കാലമായി തിരഞ്ഞെടുപ്പ് അടുക്കുമ്പോൾ കോൺഗ്രസിൽ നിന്ന് മറ്റു പാർട്ടികളിലേക്കുള്ള നേതാക്കളുടെ പ്രവാഹമാണെങ്കിൽ തെലങ്കാനയിലെങ്കിലും കുറച്ചു വ്യത്യാസമുണ്ട് എന്ന് നേതാക്കൾ അവകാശപ്പെടുന്നു.

കർണാടക തിരഞ്ഞെടുപ്പ് വിജയത്തിനു പിന്നാലെ ജൂലൈ ആദ്യം രേവന്ത് റെഡ്ഡി തെലങ്കാന ജന ഗർജനസഭ എന്ന പേരിൽ ഖമ്മത്ത് വലിയൊരു പൊതുയോഗം വിളിച്ചു ചേർത്തു. സംസ്ഥാനത്ത് കോണ്‍ഗ്രസിന്റെ പ്രധാന ദളിത് നേതാവായ മല്ലു ഭാട്ടി വിക്രമാർക്ക സംസ്ഥാനത്തുടനീളം നടത്തിയ പദയാത്രയുടെ സമാപനമായിരുന്നു ഈ പൊതുസമ്മേളനം. അതിൽ പങ്കെടുത്ത രാഹുൽ ഗാന്ധിയെ കാണാനും കേൾക്കാനുമായി അവിടെ എത്തിയത് വൻ ജനക്കൂട്ടമാണെന്നാണ് റിപ്പോർട്ടുകൾ. ബിആർഎസിൽ നിന്നുള്ള മുൻ ഖമ്മം എംപി പൊങ്കുലേറ്റി ശ്രീനിവാസ റെഡ്ഡി, മുൻ മന്ത്രി ജുപ്പള്ളി കൃഷ്ണ റാവു ഉൾപ്പെടെ 35–ഓളം നേതാക്കൾ അന്ന് കോൺഗ്രസിൽ ചേരുകയും ചെയ്തു. 

∙ പിന്നാക്കക്കാരെ പിടിക്കാൻ മോദി, കോൺഗ്രസിനും പ്രശ്നം

തെലങ്കാനയിലും ആന്ധ്രയിലും കോൺഗ്രസിന്റെ പ്രധാന വോട്ടുബാങ്കായിരുന്നു റെഡ്ഡി സമുദായം. എന്നാൽ ബിആർഎസ് ഇത്തവണ 39 ടിക്കറ്റുകൾ റെഡ്ഡി സമുദായത്തിനാണ് നൽകിയത് എന്നതിൽ നിന്നു തന്നെ ഇവർക്ക് സംസ്ഥാന രാഷ്ട്രീയത്തിലുള്ള പങ്ക് വ്യക്തമാണ്. അതുപോലെ, ഈ സമുദായത്തിലേക്ക് ബിആർഎസും കണ്ണുംനട്ടിരിക്കുന്നു എന്നതും പ്രധാനമാണ്. തെലങ്കാനയിലെ ജനസംഖ്യയുടെ 52 ശതമാനം വരും പിന്നാക്കക്കാർ. പ്രധാനമന്ത്രി നരേന്ദ്ര മോദി  ഹൈദരാബാദിൽ അഭിസംബോധന ചെയ്ത പരിപാടിയുടെ പേര് ‘ബിസി ആത്മ ഗൗരവ സഭ’ (പിന്നാക്കക്കാരുടെ ആത്മാഭിമാന കൂട്ടായ്മ) എന്നാണ്.

ബിജെപി അധികാരത്തിൽ വന്നാൽ സംസ്ഥാനത്ത് പിന്നാക്കക്കാരനായ ഒരു മുഖ്യമന്ത്രി ഉണ്ടാകുമെന്ന് ആഭ്യന്തര മന്ത്രി അമിത് ഷായും പ്രസ്താവിച്ചിരുന്നു. സംസ്ഥാനത്തെ അതീവ നിർണായകമായ പിന്നാക്കക്കാരെ കൂടെനിർത്താൻ ബിജെപി എല്ലാ ശ്രമങ്ങളും നടത്തുമ്പോൾ അത് ബിആർഎസിനും കോൺഗ്രസിനും ഒരുപോലെ പേടിസ്വപ്നമാകും. 

ഇത്രകാലവും ഒട്ടുമിക്ക സമുദായങ്ങളേയും തങ്ങളുടെ കുടക്കീഴിലാക്കിയായിരുന്നു ബിആർഎസിന്റെ പ്രവർത്തനം. എന്നാൽ പിന്നാക്കക്കാരെ ലക്ഷ്യമിട്ടുള്ള ബിജെപി പ്രവർത്തനം ബിആർഎസിനേയും കോൺഗ്രസിനേയും ഒരുപോലെ ബാധിക്കും. (എന്നാൽ ബിജെപിക്കുള്ളിലും ഒരു ‘പിന്നാക്ക ആഭ്യന്തര കലഹം നിലനിൽക്കുന്നുണ്ട്. ബിആർഎസിൽ നിന്ന് ബിജെപിയിലെത്തിയ മുതിർന്ന നേതാവ് ഈട്ടല രാജേന്ദറും ബിജെപിയുടെ സംസ്ഥാന അധ്യക്ഷനായിരുന്ന ബണ്ടി സഞ്ജയ് കുമാറും പിന്നാക്കക്കാരാണ്.

സംസ്ഥാനത്ത് 100ലേറെ പിന്നാക്ക വിഭാഗങ്ങളുണ്ട് എന്നാണ് കണക്ക്. ഇതിൽ ഏറ്റവും കൂടുതൽ ജനസംഖ്യയുളള മുന്നുരു കാപുസ് സമുദായാംഗമാണ് ബണ്ടി സഞ്ജയ്. മറ്റൊരു പ്രധാന സമുദായമായ മുദിരാജാസ് അംഗമാണ് ഈട്ടല രാജേന്ദർ. ഇവര്‍ തമ്മിലുള്ള കലഹം പാർട്ടിയിൽ അതിരുകൾ ലംഘിച്ചതോടെയാണ് ബണ്ടി സഞ്ജയ് കുമാറിനെ മാറ്റി പകരം കേന്ദ്രമന്ത്രിയായിരുന്ന ജി.കിഷൻ റെഡ്ഡിയെ ബിജെപി കേന്ദ്ര നേതൃത്വം സംസ്ഥാന അധ്യക്ഷനാക്കിയത്).‌

∙ മുസ്‍ലിം വോട്ടുകൾ, ഭിന്നത ഇതൊക്കെ കോൺഗ്രസിനും ബാധകം

ഇതുപോലെ തങ്ങൾക്ക് കിട്ടേണ്ട മുസ്‍ലിം സമുദായ വോട്ടുകളും കൈവിട്ടാൽ കോൺഗ്രസിന്റെ കാര്യം പരുങ്ങലിലാകും. എഐഎംഐഎം അടക്കി ഭരിക്കുന്ന ഹൈദരാബാദ് മേഖലയിലെ ഏഴു സീറ്റുകളിൽ കടന്നുകയറാൻ കോൺഗ്രസ് വലിയ  ശ്രമം നടത്തുന്നുണ്ടെങ്കിലും അത് ഫലവത്തായിട്ടില്ല. പൊതുവെ ബിആർഎസിനോട് ചാഞ്ഞു നിൽക്കുന്ന പാർട്ടിയാണ് അസദുദ്ദീൻ ഒവൈസിയുടെ എഐഎംഐഎം. ഈ പാർട്ടികൾ തമ്മിൽ വോട്ടുകൈമാറ്റമുണ്ടെന്ന് പ്രതിപക്ഷം ആരോപിക്കുകയും ചെയ്തിരുന്നു. ഇത്തവണ മുസ്‍ലിം വോട്ടുകൾ ആകർഷിക്കാനുള്ള ശ്രമവും കോൺഗ്രസിന്റെ ഭാഗത്തു നിന്നുണ്ടായിരുന്നു. എന്നാൽ ചില മുസ്‍ലിം സംഘടനകൾ ഇതിനകം തന്നെ ബിആർഎസിന് പിന്തുണ പ്രഖ്യാപിച്ചു കഴിഞ്ഞു. കോൺഗ്രസിനെ സംബന്ധിച്ച് ഇക്കാര്യങ്ങളും തിരിച്ചടിയാണ്.