കുട്ടിയുമായി സ്ത്രീയെ കണ്ടിട്ടും പൊലീസ് 'കണ്ണടച്ചു'? ദൃശ്യങ്ങൾ തടഞ്ഞു; ഈ 10 ചോദ്യങ്ങളുടെ ഉത്തരമെവിടെ?

കൊല്ലത്ത് കാണാതായ കുട്ടിയെ തിരികെ തിട്ടിയെങ്കിലും, നഷ്ടപ്പെട്ട അഭിമാനം ഇപ്പോഴും പൊലീസിനു തിരികെപ്പിടിക്കാനായിട്ടില്ല. അതിനു കാരണവുമുണ്ട്. ഓയൂരിൽനിന്ന് ആറു വയസ്സുകാരിയെ തട്ടിക്കൊണ്ടു പോയ കേസിന്റെ അന്വേഷണത്തിൽ ഒന്നുകില്‍ പൊലീസ് ഇരുട്ടിൽ തപ്പുകയാണ് അല്ലെങ്കിൽ എന്തോ ഒളിക്കുന്നു. കുട്ടിയെ കൊല്ലം നഗരത്തിലെ തിരക്കേറിയ ആശ്രാമം മൈതാനത്ത് പട്ടാപ്പകൽ ഉപേക്ഷിച്ചുപോയ പ്രതികളെ പിടികൂടാനോ, തട്ടിക്കൊണ്ടു പോയ വാഹനം കണ്ടെത്താനോ പൊലീസിന് ഇതുവരെ കഴിഞ്ഞിട്ടില്ല. 

കുട്ടിയെ കണ്ടുകിട്ടിയ ശേഷം സിസിടിവി ദൃശ്യങ്ങൾ പരിശോധിക്കാൻ പോലും പൊലീസ് തയാറായിട്ടില്ലെന്നാണ് ആരോപണം. എന്തുകൊണ്ടായിരിക്കും ഇത്? ഇതിനു മാത്രമല്ല, ഉത്തരം കിട്ടാതെ ഒട്ടേറെ ചോദ്യങ്ങൾ ഇനിയുമുണ്ട്. ആ ചോദ്യങ്ങളുടെ ഉത്തരം തേടിയാണ് പൊലീസ് സഞ്ചരിക്കുന്നത്. എന്നാൽ ചില ഉത്തരങ്ങൾ കണ്മുന്നിലുണ്ടായിട്ടും പൊലീസ് എന്താണ് അതിനു നേരെ കണ്ണടയ്ക്കുന്നത്? മാധ്യമങ്ങൾക്ക് സിസിടിവി ദൃശ്യങ്ങൾ നൽകുന്നതിലെ വിലക്കു പോലും സംശയം ജനിപ്പിക്കുന്നതാണ്. 

1) വാഹനം പൊലീസ് കണ്ടില്ലേ?

കുട്ടിയെ തട്ടിക്കൊണ്ടുപോയവർ കൊല്ലം– തിരുവനന്തപുരം ജില്ല വിട്ടുപോയിട്ടില്ല എന്ന് പൊലീസ് ഉറപ്പിച്ചു പറയുമ്പോഴും കാർ കണ്ടെത്താൻ പോലും പൊലീസിനു കഴിഞ്ഞിട്ടില്ല. കുട്ടിയെ കണ്ടെത്തുന്നതിന് നവംബർ 27നു രാത്രി പൊലീസ് വ്യാപക പരിശോധന നടത്തുമ്പോൾ തട്ടിക്കൊണ്ടു പോയ വാഹനം റോഡിൽ ആയിരുന്നു. ഒരു കിലോമീറ്റർ അകലമുള്ള സിസിടിവി ക്യാമറകളിൽ ഒരു മണിക്കൂർ ഇടവേളയിൽ ചിത്രം പതിഞ്ഞിട്ടുണ്ട്. വാഹനം റോഡിൽ നിർത്തിയിട്ടതോ ഇതിനിടയിൽ ഏതെങ്കിലും വീട്ടിൽ കയറിയതോ ആകാം. 

കുട്ടിയെ കണ്ടെത്തുന്നതിന് ആയിരുന്നു പ്രഥമ പരിഗണന എന്നായിരുന്നു എഡിജിപിയുടെ വാദം. കുട്ടിയെ പൊലീസ് കണ്ടെത്തുകയല്ല, തട്ടിക്കൊണ്ടുപോയവർ ഉപേക്ഷിച്ചതിനാൽ തിരികെ ലഭിക്കുകയായിരുന്നു. അപ്പോഴും പ്രതികളെയോ, തട്ടിക്കൊണ്ടു പോയ വാഹനമോ കണ്ടെത്താനോ കഴിയുന്നില്ല. കടയിൽനിന്ന് ബിസ്കറ്റും റസ്കും തേങ്ങയും വാങ്ങിയെങ്കിലും നവംബർ 27നു രാത്രി കുട്ടിയെ താമസിപ്പിച്ച വീട് കണ്ടെത്താനും കഴിഞ്ഞില്ല. 28ന് നീല വാഹനത്തിലാണ് കുട്ടിയെ കൊണ്ടുവന്നതെന്നു പൊലീസ് പറയുന്നുണ്ടെങ്കിലും ഈ വാഹനവും കണ്ടെത്തിയിട്ടില്ല. ഇടയ്ക്ക് കുട്ടിയുമായി യാത്ര ചെയ്ത ഓട്ടോയുടെ വിവരങ്ങൾ ലഭിച്ചിട്ടുണ്ടെന്നും പറയുന്നു. പക്ഷേ എന്തുകൊണ്ട് ഇത്രയേറെ സിസിടിവികളുള്ള പ്രദേശമായിട്ടും, സമൂഹമാധ്യമങ്ങളിലൂടെ ഉൾപ്പെടെ കുട്ടിയുടെ വിവരങ്ങൾ പൊലീസ് നിരന്തരം നൽകിയിട്ടും വാഹനങ്ങൾ സംബന്ധിച്ച തെളിവ് ലഭിക്കുന്നില്ല?

2) എവിടെയാണ് തട്ടിക്കൊണ്ടുപോകൽ സംഘം തങ്ങിയത്?

ആറു വയസ്സുകാരിയെ തട്ടിക്കൊണ്ടുപോയ സംഘം രാത്രി തങ്ങിയത് കൊല്ലം നഗരത്തോടു ചേർന്ന‍ാണെന്നാണു വിവരം. 27നു വൈകിട്ട് കുട്ടിയെ തട്ടിയെടുത്തു സന്ധ്യയോടെ ദേശീയപാതയിലൂടെ കൊല്ലം നഗരത്തിലേക്കു കടന്നെന്നു പറയപ്പെടുന്നു. നഗരത്തിലോ നഗരപ്രാന്തത്തിലോ ഉള്ള വീട്ടിലാകാം തങ്ങിയതെന്ന് സംശയിക്കുന്നു. കുട്ടിയെ തട്ടിയെടുത്ത ഓയൂരിൽ നിന്ന് 5 കിലോമീറ്റർ ദൂരെ പകൽക്കുറിയിൽ നിന്ന് വേളമാനൂർ, കല്ലുവാതുക്കൽ, ചിറക്കര, ഉളിയനാട് തേമ്പ്ര പ്രദേശങ്ങൾ വഴി  6.20 ന്  കോതേരി ജംക്‌ഷന് സമീപം എത്തിയ കാർ 6.21ന് കോതേരി ജംക്‌ഷനിൽനിന്നു ദേശീയപാതയിലേക്കുള്ള ചാത്തന്നൂർ റോഡിലേക്ക് തിരിയുന്നതിന്റെ സിസിടിവി ദൃശ്യം ലഭിച്ചിട്ടുണ്ട്. 

കോതേരി ജംക്‌ഷനിൽ നിന്ന് ഒരു കിലോമീറ്റർ അകലെയുള്ള ശ്രീനഗർ ജംക്‌ഷനിൽ ഒരു മണിക്കൂർ കഴിഞ്ഞാണ് സ്വിഫ്റ്റ് കാർ എത്തിയത്. പിന്നീട്  കെഎസ്ആർടിസി ഡിപ്പോ റോഡിലേക്ക് പോകുന്നതായി സിസിടിവി ദൃശ്യത്തിലുണ്ട്. ഇതിനിടയിൽ ഒരു യുവാവ് രണ്ടു തവണ ബൈക്കിൽ കോതേരി ഭാഗത്ത് നിന്നു ശ്രീനഗർ ജംക്‌ഷൻ വരെ എത്തുകയും മടങ്ങിപ്പോവുകയും ചെയ്യുന്നുണ്ട്. ആദ്യ തവണ ശ്രീനഗർ ജംക്‌ഷനിൽ എത്തുമ്പോൾ മൊബൈൽ ഫോണിൽ കോൾ വരുകയും ഇതി‍ൽ സംസാരിച്ച ശേഷം മടങ്ങിപ്പോവുകയും ആയിരുന്നു. 

ചാത്തന്നൂർ കെഎസ്ആർടിസി ഡിപ്പോയ്ക്ക് മുന്നിലൂടെ ദേശീയപാതയിൽ കയറിയ സംഘം കൊല്ലത്ത് എത്തിയിരിക്കാനാണ് സാധ്യത. റോഡ് വികസനം നടക്കുന്നതിനാൽ ദേശീയപാതയിൽ സിസിടിവികൾ പ്രവർത്തിക്കുന്നില്ല. നഗരത്തിലെ വീട്ടിൽ കുട്ടിയെ ഒളിപ്പിച്ച സംഘം 28ന് ഉച്ചയ്ക്ക് കുട്ടിയെ കൊണ്ടുവന്നു ആശ്രാമത്ത് ഉപേക്ഷിച്ചതാകാമെന്നും സംശയിക്കുന്നു. കുട്ടിയുമായി യുവതി വന്നുവെന്നു പറയുന്ന കെഎസ്ആർടിസി ബസ് സ്റ്റാൻഡിനു മുന്നിലെ ലിങ്ക് റോഡിലെ സ്ഥാപനങ്ങളിലെ സിസിടിവി ദൃശ്യങ്ങൾ മാധ്യമങ്ങൾക്കു നൽകുന്നതു പൊലീസ് കർശനമായി വിലക്കുകയും ചെയ്തു. 

3) ആ വീട് ആരുടേത് ?

തട്ടിക്കൊണ്ടു പോയ കുട്ടിയുമായി സംഘം നവംബർ 27നു രാത്രി തങ്ങിയത് ഇരുനില വീട്ടിലാണെന്നായിരുന്നു ആദ്യ നിഗമനം. എന്നാൽ ഏറ്റവും പുതുതായി പൊലീസ് പുറത്തുവിട്ട വിവരം പ്രകാരം അതൊരു ഓടുവീടാണ്. ഏതാണ് ഈ വീട്, അത് ആരുടെ ഉമടസ്ഥതയിലുള്ളതാണ്? തട്ടിക്കൊണ്ടുപോയ സംഘത്തിലെ സ്ത്രീക്കു പുറമേ ഈ വീട്ടിൽ മറ്റൊരു സ്ത്രീ ഉണ്ടായിരുന്നുവെന്നാണു കുട്ടിയുടെ മൊഴി. വീട്ടിലെ ലാപ്ടോപ്പിൽ കാർട്ടൂൺ കഥകൾ കണ്ടുവെന്നും കുട്ടി പൊലീസിനോടു വെളിപ്പെടുത്തിയിരുന്നു. കുട്ടിയെ തട്ടിക്കൊണ്ടുവന്ന സംഘത്തിനു സംരക്ഷണമൊരുക്കാൻ മറ്റൊരു സംഘം ഈ വീട് കേന്ദ്രീകരിച്ചു പ്രവർത്തിച്ചുവെന്ന നിഗമനത്തിലാണ് പൊലീസ്. 

കുട്ടിയെ വിട്ടുകിട്ടാൻ 10 ലക്ഷം രൂപ ആവശ്യപ്പെട്ടു വിളിച്ച സ്ത്രീ രണ്ടിൽ ആരാണെന്നു വ്യക്തമല്ല. ‘10 അറേഞ്ച് ചെയ്യണം, കുട്ടിയെ വീട്ടിൽ തരാം. ഞങ്ങളുടെ ബോസ് പറഞ്ഞത് നാളെ (നവംബർ 28) 10 നു കുട്ടിയെ കൊടുക്കാനാണ്...’ എന്നാണ് ഫോണിൽ വിളിച്ച യുവതി പറഞ്ഞത്. ആദ്യം 5 ലക്ഷം രൂപ ആവശ്യപ്പെട്ടു കടയുടമയായ സ്ത്രീയുടെ ഫോൺ വാങ്ങി വിളിച്ചതിനു ശേഷമായിരുന്നു ഈ കോൾ. ഈ കോളിന്റെ ടവർ ലൊക്കേഷൻ കണ്ടെത്തിയാൽ ഫോണിന്റെ ഉടമയെ കണ്ടെത്താനാകും. ഈ വീട്ടിൽനിന്നാണ് 28നു കുട്ടിയുമായി യുവതി കൊല്ലം നഗരത്തിലേക്കു തിരിച്ചത്. നീല നിറത്തിലുള്ള വാഹനത്തിൽ കൊല്ലത്തെത്തിയെന്നും അവിടെനിന്ന് ഓട്ടോറിക്ഷയിൽ ആശ്രാമത്തെത്തിയെന്നുമാണു കുട്ടിയുടെ മൊഴി. ഈ നീല വാഹനവും കണ്ടെത്താനായിട്ടില്ല.

4) സംഘത്തിലെ സ്ത്രീകള്‍ ആര്?

തട്ടിക്കൊണ്ടു പോയ സംഘത്തിൽ ഒന്നിലധികം സ്ത്രീകളുണ്ടെന്നാണു വിവരം. രാത്രി താമസിപ്പിച്ച വീട്ടിൽ ‘2 ആന്റിമാർ’ ഉണ്ടായിരുന്നുവെന്നാണു കുട്ടി മൊഴി നൽകിയത്.  സംഭവദിവസം കണ്ണനല്ലൂരിന് സമീപം പുലിയിലയിൽ ഒരു കുട്ടിയെ തട്ടിക്കൊണ്ടുപോകാൻ ശ്രമിച്ച സംഭവത്തിൽ പ്രതിയെന്നു സംശയിക്കുന്ന സ്ത്രീക്ക് ഓയൂർ സംഭവത്തിലും പങ്കുണ്ടോയെന്നും അന്വേഷിക്കുന്നു. രണ്ടു യുവതികളുടെയും രേഖാചിത്രം പൊലീസ് പുറത്തിറക്കി. തട്ടിക്കൊണ്ടുപോകാൻ ഉപയോഗിച്ച കാർ കൊല്ലം, തിരുവനന്തപുരം ജില്ലകളിലെ ഒഴിഞ്ഞ സ്ഥലങ്ങളിലോ പറമ്പുകളിലോ കിടപ്പുണ്ടോയെന്നും പൊലീസ് തിരയുന്നു.

5) ആശ്രാമം മൈതാനത്ത് ആ സ്ത്രീ എങ്ങനെ ആരുമറിയാതെ എത്തി?

മൈതാനത്തിന് അടുത്തുള്ള റോഡുകളിൽ പകൽ വാഹനങ്ങൾ ഒഴിയാറില്ല. രാവിലെയും വൈകിട്ടും നഗരവാസികൾ നടക്കാനിറങ്ങുന്ന സ്ഥലം. അവിടെയുള്ള നടപ്പാതയ്ക്ക് ഏകദേശം രണ്ടര കിലോമീറ്റർ ദൈർഘ്യമുണ്ട്. പകലും തണൽ തേടി എത്തുന്ന യുവാക്കൾ ഉൾപ്പെടെയുള്ളരുടെ ഇഷ്ട സ്ഥലമാണ് ആശ്രാമം മൈതാനം. ഡ്രൈവിങ് ടെസ്റ്റ് ഉൾപ്പെടെയുള്ള പരിശോധനകൾ നടക്കുന്ന സ്ഥലവും. പിങ്ക് പൊലീസ് അടക്കമുള്ള സുരക്ഷാ സംഘം സദാസമയവും റോന്തു ചുറ്റുന്ന ഈ സ്ഥലത്താണ് കുട്ടിയെ ഉപേക്ഷിച്ച്  യുവതി കടന്നത്. ആളൊഴിഞ്ഞ ഭാഗത്തല്ല, നല്ല തിരക്കുള്ള സ്ഥലത്താണ് കുട്ടിയെ ഉപേക്ഷിച്ചത്. എന്നിട്ട് നടന്നു പോയത് തിരക്കുള്ള ജംക്‌ഷൻ ഭാഗത്തേക്കും!