‘എകെജിയെ നിഷേധിക്കുന്നത് പിണറായി, അയോധ്യയിൽ എന്ത് ദേവചൈതന്യം? ഞാൻ സ്റ്റേജിൽ കയറാൻ മടിയുള്ള കുട്ടി’

? രാഷ്ട്രീയക്കാർ പക്ഷേ പൊതുവിൽ അങ്ങനെ അല്ലല്ലോ. ഈ പിൻവാങ്ങി നിൽക്കുന്നത്  ഏതെങ്കിലും തരത്തിൽ പ്രതികൂലമായി ബാധിച്ചിട്ടുണ്ടോ.

∙ ബുദ്ധിമുട്ട് ഉണ്ടാക്കിയിട്ടുണ്ടോ എന്നു ചോദിച്ചാൽ ഈ പറഞ്ഞതെല്ലാം ചിലപ്പോൾ പ്രശ്നമാണല്ലോ. പക്ഷേ 32–ാം വയസ്സിൽ എനിക്ക് എംഎൽഎ ആകാൻ കഴിഞ്ഞു. 40 വയസ്സിൽ തന്നെ അതിന് അവസരം കിട്ടിയവർ ഞങ്ങളുടെ പാ‍ർട്ടിയിൽ കുറവാണ്. ഞാൻ കെഎസ്‌യുവിന്റെ സംസ്ഥാന പ്രസിഡന്റ് ആയിട്ടില്ല, യൂത്ത് കോൺഗ്രസിന്റെ പ്രസിഡന്റും ആയിട്ടില്ല. രണ്ടു ഘട്ടങ്ങളിലും വളരെ സ്വാഭാവികമായി എന്റെ പേരും വരേണ്ടതായിരുന്നെങ്കിലും അന്നത്തെ ഗ്രൂപ്പ് രാഷ്ട്രീയ സാഹചര്യങ്ങൾ പോലും നടന്നില്ല.അവർ ആഗ്രഹിക്കുന്ന തരത്തിൽ ഗ്രൂപ്പിന് വിധേയനായി നിന്നിരുന്നെങ്കിൽ ഈ പദവികൾ എനിക്കു ലഭിക്കുമായിരുന്നു. അതു വേണ്ട എന്ന നിലപാട് ഞാനെടുത്തു. ഇതൊന്നും ആകാത്ത ഒരാൾക്ക് ചെറിയ പ്രായത്തിൽ സീറ്റ് കിട്ടുന്നത് അപൂർവമാണെന്നു പറയാൻ വേണ്ടി കൂടിയാണ് ഇക്കാര്യം പറഞ്ഞത്. രണ്ടു തവണ എംഎൽഎ ആയി. മൂന്നാം തവണ ചെറിയ മാർജിനു തോറ്റു. നാലു മാസം കഴിഞ്ഞപ്പോൾ കെപിസിസിയുടെ വൈസ് പ്രസിഡന്റ് സ്ഥാനത്തേക്ക് കോൺഗ്രസ് എന്നെ നിയോഗിച്ചു.  ഇടിച്ചു നിൽക്കാത്തതു കൊണ്ടോ കയറിക്കളിക്കാത്തതു കൊണ്ടോ വലിയ നഷ്ടമൊന്നും എനിക്ക് ഉണ്ടായിട്ടില്ല.   

? അടിയുറച്ച മതനിരപേക്ഷ  നിലപാടാണല്ലോ താങ്കൾക്കുള്ളത്. നിയമസഭാംഗമായി സത്യപ്രതിജ്ഞ ചെയ്തതെല്ലാം സഗൗരവത്തിലാണ്. അയോധ്യയിലെ രാമക്ഷേത്ര ഉദ്ഘാടന ചടങ്ങിനോടുളള നിലപാട് എന്താണ്.

∙ ഇത്തരം കാര്യങ്ങളിൽ എന്റെ വ്യക്തിപരമായ നിലപാട് എന്താണെന്ന് താങ്കൾക്കും അറിയാം. ബിജെപിയെയും സംഘപരിവാറിനെയും പൊതുവിൽ വിമർശിക്കുന്നതിന് അപ്പുറമായി അവരുടെ ഹിന്ദുത്വ പ്രത്യയശാസ്ത്രത്തെ നിരന്തരമായി വിമർശിക്കുന്ന ഒരാളാണ് ഞാൻ. ഹിന്ദുത്വത്തിനെതിരെ പറയുമ്പോൾ അതു ഹിന്ദുക്കൾക്കെതിരെയാണ് എന്ന വ്യാഖ്യാനം വരാം എന്നതു കൊണ്ടുതന്നെ അങ്ങനെ ശക്തമായ നിലപാട് എടുക്കുന്നവർ രാഷ്ട്രീയത്തിൽ കുറവാണ്. അതിന്റെ ഗുണവും ദോഷവും  എനിക്ക് ഉണ്ടാകുന്നുണ്ട്. പാർലമെന്റ് തിരഞ്ഞെടുപ്പിൽ നരേന്ദ്ര മോദിയെ താഴെയിറക്കുക എന്നതാണ്, മതനിരപേക്ഷകതയുടെ കണികയെങ്കിലും മനസ്സിൽ ഉള്ള എല്ലാവരുടെയും ലക്ഷ്യം. കഴിഞ്ഞ പത്തുവർഷത്തെ നരേന്ദ്രമോദിയുടെ ദുർഭരണത്തെക്കുറിച്ചുള്ള സംവാദം  നടന്നാൽ മാത്രമേ അതിനു സാധിക്കൂ. വിലക്കയറ്റം, തൊഴിലില്ലായ്മ, കർഷകരുടെ പ്രശ്നങ്ങൾ, വിദേശനയത്തിലെ പാളിച്ച, പാർലമെന്റ് അടക്കം ആക്രമിക്കപ്പെട്ടത്... ഇങ്ങനെ എന്തെല്ലാം വിഷയങ്ങൾ രാജ്യത്തിനു മുന്നിലുണ്ട്.

ഇതിൽ നിന്നെല്ലാം ജനശ്രദ്ധ മാറ്റി അമ്പലം, പള്ളി എന്നീ വൈകാരിക വിഷയങ്ങളിലേക്ക് ചർച്ചകൾ ചുരുങ്ങണമെന്നത് ബിജെപിയുടെ ആഗ്രഹവും ആർഎസ്എസിന്റെ അജൻഡയുമാണ്. അതിനെ കൃത്യമായി തിരിച്ചറിയുക എന്ന വിവേകമാണ് ഇപ്പോൾ വേണ്ടത്. ആ ക്ഷേത്രത്തിൽ നടക്കാൻ പോകുന്ന ചടങ്ങോ അതിൽ വിശ്വാസികളായ ഏതെങ്കിലും വ്യക്തികൾ പങ്കെടുക്കുന്നുണ്ടെങ്കിൽ അക്കാര്യമോ ഒരു വാർത്തയാകാം. അതിൽ കൂടുതലായി  അതു മാത്രമാകണം ചർച്ച ചെയ്യേണ്ടത് എന്ന അഭിപ്രായം എനിക്കില്ല. 

? താങ്കൾ നിരാകരിക്കുന്നുവെന്നു പറയുന്ന ഹിന്ദുത്വ പ്രത്യയശാസ്ത്രത്തിന്റെ ഏറ്റവും വലിയ പ്രതീകമായി അയോധ്യ മാറിയില്ലേ. അവിടെ നടക്കുന്ന ചടങ്ങിൽ പങ്കെടുക്കണോ വേണ്ടയോ എന്നതു സംബന്ധിച്ച് കൃത്യമായ നിലപാട് കോൺഗ്രസ് എടുക്കേണ്ടതല്ലേ? അതിലേക്കു  വ്യക്തികളെയാണ് ക്ഷണിച്ചിരിക്കുന്നത് എന്ന മട്ടിൽ നിഷ്കളങ്കമായി കാണാൻ കഴിയുമോ? രണ്ടിലൊന്നു തീരുമാനം വേണ്ടതല്ലേ.

∙ രണ്ടിലൊന്നിലേക്കു കൊണ്ടുവരിക എന്നാൽ ആ രണ്ടിലൊന്നിന്റെ പേരിൽ പ്രചാരണം നടത്താൻ ആഗ്രഹിക്കുന്നവരുടെ പക്കലേക്കു കാര്യങ്ങൾ എത്തിക്കുക എന്നല്ലേ? അത് അവർക്കല്ലേ ഗുണം ചെയ്യുക. നമ്മുടെ മുന്നിലുള്ള യഥാർഥ വിഷയം അതല്ല എന്നതാണ് എന്റെ പക്ഷം. വ്യക്തിപരമായി പറഞ്ഞാൽ, നിലവിൽ ഉണ്ടായിരുന്ന ഒരു ആരാധനാലയം പൊളിച്ച് അതേ സ്ഥലത്ത് മറ്റൊരു ആരാധനാലയം ഉയർന്നു വരുമ്പോൾ അവിടെ  ദൈവ ചൈതന്യം ഉണ്ടാകുമെന്നു ഞാൻ വിശ്വസിക്കുന്നില്ല. അല്ലെങ്കിൽതന്നെ ഞാൻ ദൈവവിശ്വാസി അല്ല. ഇനി ആണെങ്കിലും അവിടെ നടക്കുന്നത് എന്നെ സ്പർശിക്കുന്ന  കാര്യമായി പോലും  കരുതുന്നില്ല. 

? കോൺഗ്രസ് അക്കാര്യത്തിൽ ഖണ്ഡിതമായ തീരുമാനം എടുക്കേണ്ട കാര്യമില്ലെന്നാണോ.

∙ ഈ സാഹചര്യം വിലയിരുത്തി  തീരുമാനം എടുക്കുക എന്നതിന് അപ്പുറത്ത് അതേക്കുറിച്ചു മാത്രം ചർച്ച ചെയ്തുകൊണ്ടിരിക്കുന്നത് ദുഷ്ടലാക്കോടെയാണ്.  

? കോൺഗ്രസിൽ  ഇപ്പോൾ ഗ്രൂപ്പുകളുടെ അവസ്ഥ എന്താണ്? ഇല്ലാതായോ?

∙ മാറ്റം പൂർണമായിട്ടില്ല. പഴയ ഗ്രൂപ്പുകളും അതിന്റെ അവശിഷ്ടങ്ങളും  ഉണ്ട്. പുതിയ വിഭാഗങ്ങൾ ഉണ്ടാകുന്നുണ്ട്. അതെല്ലാം കൺമുന്നിൽ കാണുന്ന യാഥാർഥ്യമാണ്. ഉപസമിതികളും മറ്റും രൂപീകരിക്കുമ്പോൾ  ഗ്രൂപ്പുകളെ പിണക്കേണ്ട, അവിടെ നിന്നും രണ്ടാൾ വരട്ടെ എന്ന നിലയിൽ തീരുമാനങ്ങൾ  ഉണ്ടാകുന്നുണ്ട്. 

? യുവ നേതാക്കളുമായി താരതമ്യം ചെയ്യുമ്പോൾ മുതിർന്ന നേതാക്കളാണ് പലപ്പോഴും പാർട്ടി അച്ചടക്കം പാലിക്കാത്തതെന്ന വിമർശനം ഉയരുന്നുണ്ടല്ലോ...

∙ ഞങ്ങളേക്കാൾ കൂടുതൽ വാർത്താപ്രാധാന്യം ലഭിക്കുന്നത് മുതിർന്ന നേതാക്കൾക്കാണല്ലോ. അതുകൊണ്ട് അവർ പാർട്ടി അച്ചടക്കം വിട്ടു സംസാരിക്കുമ്പോൾ മാധ്യമങ്ങൾ ആഘോഷിക്കും. അവരാണ് ഇക്കാര്യത്തിൽ ഞങ്ങളേക്കാൾ ജാഗ്രത, വാക്കുകളിൽ സൂക്ഷ്മത പുലർത്തേണ്ടത്. ചില ഘട്ടങ്ങളിൽ അത് ഉണ്ടാകുന്നില്ല എന്നുള്ളത് ശരിയാണ്. പക്ഷേ പഴയതു പോലെ മൊത്തത്തിൽ കുളമാക്കാൻ എന്ന നിലയ്ക്ക്, ആരിൽനിന്നും പ്രതികരണങ്ങൾ  ഉണ്ടാകാറില്ല. 

? താങ്കളടക്കമുള്ള ചെറുപ്പക്കാരുടെ നിര പരസ്പരം ശക്തിപ്പെടുത്താനാണോ ശ്രമിക്കുന്നത്? നിങ്ങൾക്കിടയിലെ ബന്ധം എന്താണ്.

∙ പൊതുവായ ലക്ഷ്യബോധം എല്ലാവർക്കും ഉണ്ട്. നിരന്തരം ആശയവിനിമയം നടത്താറുണ്ട്. ഓരോ വിഷയങ്ങൾ ഉയർന്നു വരുമ്പോഴും പാർട്ടി സ്വീകരിക്കേണ്ട നിലപാട് സംബന്ധിച്ച് ചർച്ച നടക്കാറുണ്ട്. വ്യക്തിപരമായി  നല്ല സൗഹൃദം, ഒരു പരിപാടിയിൽ പങ്കെടുക്കാൻ കഴിയാതെ വന്നാൽ തന്നെ മറ്റൊരാളെ ഏൽപ്പിക്കാവുന്ന അടുപ്പം ഉണ്ട്.ഈഗോ  വളരെ കുറവാണ്.