‘ധർമടത്ത് നിർത്തിയത് എന്നെ ഒതുക്കാൻ; സുധാകരന്റെ ആ ഫോൺ എടുക്കാഞ്ഞത് മനപൂർവം; പ്രതീക്ഷ ബിജെപിയിൽ മാത്രം’

? ഇതുവരെ നടത്തിയ പ്രസംഗങ്ങളെല്ലാം ഇനി തിരുത്തിപ്പറയേണ്ടി വരില്ലേ 

∙ അക്കാര്യങ്ങളിലൊന്നും വലിയ വ്യത്യാസമൊന്നുമില്ല. മതനിരപേക്ഷത പറയുമ്പോൾ അത് ബിജെപിക്കും ഉണ്ടല്ലോ. കോൺഗ്രസ് പറയുന്നതും ചെയ്യുന്നതും ബന്ധമില്ലാത്ത കാര്യമല്ലേ. ആ പാർട്ടിയിൽ ജനാധിപത്യമുണ്ടോ, ഏകാധിപത്യ പ്രവണതയില്ലേ, ഉണ്ട്. മതനിരപേക്ഷതയുണ്ടോ, ഇല്ല. ജാതീയതയുണ്ടോ, ഉണ്ട്. ഓരോ പോസ്റ്റിലേക്കും പരിഗണിക്കുന്നത് ജാതീയത വച്ചാണ്. കോൺഗ്രസ് സ്വീകരിക്കുന്നതും മൃദു ഹിന്ദുത്വ സമീപനം തന്നെയല്ലേ. 

? ദേശീയ സമിതി അംഗമായിട്ടാണല്ലോ ബിജെപി സ്വീകരിച്ചത്. ബിജെപിയിൽ താങ്കൾ ചേർന്ന ശേഷം ദേശീയ സമിതി യോഗം നടന്നിട്ടുണ്ടോ

∙ ഇല്ല. സംസ്ഥാന കമ്മിറ്റിയിൽ പങ്കെടുത്തു. തൃശൂരിൽ മോദിയുടെ പരിപാടിയിലും പങ്കെടുത്തു. 

? ഇനി കണ്ണൂരിലെ കോൺഗ്രസിൽ നിന്ന് ആരെങ്കിലും ബിജെപിയിലേക്കു പ്രതീക്ഷിക്കുന്നുണ്ടോ 

∙ ജില്ലയിൽ നിന്ന് 100 പേർ സമീപ ദിവസങ്ങളിൽ എന്നോടൊപ്പം ചേരും. എന്റെ നാട്ടിലെല്ലാം ചലനങ്ങളുണ്ട്. ചില പ്രാദേശിക നേതാക്കളെല്ലാം ബന്ധപ്പെടുന്നുണ്ട്. മറ്റു പാർട്ടികളിലെ സംസ്ഥാന നേതാക്കളും വരും. 

?ഇന്നത്തെ കോൺഗ്രസ് നാളത്തെ ബിജെപിയെന്ന ഇടതു പരിഹാസം ശരിയാവുകയാണോ 

∙ വരുന്ന ലോക്സഭാ തിരഞ്ഞെടുപ്പിനു ശേഷം മറ്റു രാഷ്ട്രീയ പാർട്ടികളുടെ പ്രസക്തി നഷ്ടപ്പെടും. ബിജെപിയായിരിക്കും അഭയം. 

?പിണറായിക്കെതിരെ മത്സരിച്ചത് എങ്ങനെയാണ് 

∙ കഴിഞ്ഞ തദ്ദേശ തിരഞ്ഞെടുപ്പിനു മുന്നോടിയായി ഒരു ദിവസം സുധാകരൻ വിളിച്ച് അത്യാവശ്യമായി കാണണമെന്നു പറഞ്ഞു. കോർപറേഷൻ യുഡിഎഫ് ചെയർമാൻ സ്ഥാനം ഏറ്റെടുക്കണമെന്നായിരുന്നു ആവശ്യം. അങ്ങനെ ഏറ്റെടുത്തു. ഭംഗിയായി തിരഞ്ഞെടുപ്പ് നടത്തി യുഡിഎഫിനെ അധികാരത്തിലെത്തിച്ചു. ഞാനും സുധാകരനും സതീശൻ പാച്ചേനിയും മാത്രമാണ് സ്ഥാനാർഥി നിർണയ കമ്മിറ്റിയിൽ ഉണ്ടായിരുന്നത്. അഭിപ്രായ ഭിന്നതയില്ലാതെ സ്ഥാനാർഥി നിർണയം പൂർത്തിയാക്കി. ചില സ്ഥലങ്ങളിൽ റിബലുകളായി വന്നവരെ അനുനയിപ്പിക്കാനും കഴിഞ്ഞു.

ഇതുകഴിഞ്ഞതോടെ സുധാകരനുമായി വളരെ അടുത്ത ബന്ധമുണ്ടായി. കഴിഞ്ഞ ലോക്സഭാ തിരഞ്ഞെടുപ്പിൽ സുധാകരന്റെ തിരഞ്ഞെടുപ്പു പ്രചാരണ കമ്മിറ്റി ചെയർമാൻ ഞാനായിരുന്നു. ആ സമയത്ത് ധർമടം നിയമസഭാ മണ്ഡലത്തിൽ എൽഡിഎഫും യുഡിഎഫും തമ്മിലെ വോട്ടു വ്യത്യാസം 4090ൽ എത്തിക്കാനായി. അന്ന് അവിടെ 8 പഞ്ചായത്തും ഭരിക്കുന്നത് സിപിഎമ്മാണ്. 6 പഞ്ചായത്തുകളിൽ സുധാകരൻ ലീഡ് നേടി. ഇതോടെ ഒരാഴ്ച കണ്ടില്ലെങ്കിൽ നീ എവിടെയാണ് എന്ന സുധാകരന്റെ വിളി എത്തുമായിരുന്നു. ആ സമയത്ത് നീയൊന്ന് ധർമടം ശ്രദ്ധിക്കണമെന്ന് അദ്ദേഹം പറഞ്ഞു. അപ്പോഴും അത് എന്റെ തലയിൽ വരുമെന്നു കരുതിയിരുന്നില്ല.

2001ലെ തിരഞ്ഞെടുപ്പിൽ മമ്പറം ദിവാകരനൊപ്പം എന്റെ പേരും ഉണ്ടായിരുന്നു. അന്ന് മത്സരിക്കാൻ അവസരം കിട്ടിയിരുന്നെങ്കിൽ മത്സരം കനക്കുമായിരുന്നില്ല. പിണറായി അന്ന് മുഖ്യമന്ത്രിയല്ലല്ലോ. കഴിഞ്ഞ തവണ നിൽക്കണമെന്നു പറഞ്ഞപ്പോൾ വലിയ മോഹമൊന്നുമില്ലാതെ അതിനു വഴങ്ങേണ്ടി വരികയായിരുന്നു. പിണറായിക്ക് എതിരെ മത്സരിച്ചയാളെന്ന കീർത്തി കിട്ടിയെങ്കിലും രാഷ്ട്രീയമായി എനിക്കത് വലിയ പരാജയമായിരുന്നു. എന്നെ ഒതുക്കാൻ തീരുമാനിച്ചതായിരുന്നുവെന്ന് പിന്നീടു മനസ്സിലായി. 

? അതെങ്ങനെ ബോധ്യമായി 

∙ യുഡിഎഫിന്റെ കുറ്റവിചാരണ സദസ്സിന്റെ സംസ്ഥാനതല ഉദ്ഘാടനം ധർമടത്തായിരുന്നു. അതിന് എന്നെ ക്ഷണിക്കുക പോലുമുണ്ടായില്ല. ഏറ്റവും ഒടുവിൽ നേരിട്ട അപമാനമായിരുന്നു അത്. നിങ്ങൾ അവിടെ ഉണ്ടാകണമെന്ന് ഏതെങ്കിലുമൊരു നേതാവിനു പറയാമായിരുന്നു. അകൽച്ചയുണ്ടായിരുന്നെങ്കിലും അതുവരെ കോൺഗ്രസ് വിടണമെന്നുണ്ടായിരുന്നില്ല. 

? അടുത്ത ലോക്സഭാ തിരഞ്ഞെടുപ്പിൽ സ്ഥാനാർഥിയാകുമോ

∙ പറയാൻ കഴിയില്ല, രാഷ്ട്രീയമല്ലേ. പക്ഷേ എന്റെ മോഹങ്ങളിൽ ഇപ്പോൾ അതില്ല. കോൺഗ്രസ് വിട്ടുവന്ന എനിക്ക് ഇപ്പോൾ കിട്ടിയതു തന്നെ ഏറ്റവും വലിയ പരിഗണനയാണ്. പാർട്ടി ഏൽപിക്കുന്ന ഏത് ഉത്തരവാദിത്തവും ഏറ്റെടുക്കും.