‘ജീവനക്കാരോട് കടം പറഞ്ഞ് സർക്കാർ, കുടിശിക 50,000 കോടി, ശമ്പളം തികയാതെ ജീവിതം വഴിമുട്ടിയ ഉദ്യോഗസ്ഥർ പണിമുടക്കിലേക്ക്’

? ക്ഷാമബത്ത (ഡിഎ) എന്നത് ജീവനക്കാരന്റെ അവകാശമല്ല എന്ന വാദത്തെ കുറിച്ച് എന്താണ് പറയാനുള്ളത്

∙ ഡിഎ സർക്കാർ ജീവനക്കാരുടെ അവകാശമാണ്. 1974–75 കാലത്ത് കേന്ദ്ര നിരക്കിലുള്ള ക്ഷാമബത്ത സർക്കാർ ജീവനക്കാർക്കും ലഭിക്കണമെന്ന് കേരള എൻജിഒ അസോസിയേഷൻ  അടക്കമുള്ള ജീവനക്കാരുടെ യൂണിയനുകൾ പണിമുടക്ക് അടക്കമുള്ള പ്രതിഷേധസമരം നടത്തി നേടിയെടുത്ത ആനുകൂല്യമാണ്. അങ്ങനെ ആ ക്ഷാമബത്തയുടെ അടിസ്ഥാനത്തിലാണ് ഓരോ 5 വർഷം കൂടുമ്പോഴും ശമ്പളപരിഷ്കരണ കമ്മിഷനുകൾ നിയമിച്ച് ജീവനക്കാരുടെ വേതന സ്കെയിലുകൾ പരിഷ്കരിച്ച് മുന്നോട്ട് പൊയ്ക്കൊണ്ടിരിക്കുന്നത്. പക്ഷേ ഇങ്ങനെയൊക്കെ പരിഷ്കാരങ്ങൾ നടപ്പാക്കിയിട്ടും കേന്ദ്ര ജീവനക്കാർക്ക് ലഭിക്കുന്ന ശമ്പളത്തിന്റെയോ ആനുകൂല്യങ്ങളുടെയോ അടുത്ത് എത്താൻ പോലും സംസ്ഥാന ജീവനക്കാരുടെ ശമ്പള വ്യവസ്ഥയ്ക്ക് കഴിഞ്ഞിട്ടുമില്ല.

? സർക്കാർ ജീവനക്കാരിൽ ഭൂരിഭാഗവും ഇടത് സംഘടനകളിലാണല്ലോ? ഇപ്പോഴത്തെ അവസ്ഥയിൽ അവരുടെ പ്രതികരണമെന്താണ്

∙ അംഗബലം മാത്രം കൂടിയിട്ട് കാര്യമില്ല. അംഗബലം കൂട്ടുന്നത് സ്ഥലം മാറ്റം ഉൾപ്പെടെയുള്ള കാര്യങ്ങളിൽ ജീവനക്കാരെ ഭീഷണിപ്പെടുത്തിയാണ്. എന്നാൽ ജീവനക്കാർക്ക് ഇപ്പോൾ നടക്കുന്ന എല്ലാ കാര്യങ്ങളിലും നല്ല ബോധ്യമുണ്ട്. ഇടത് യൂണിയനുകളും ഈ വ്യവസ്ഥിതിയെ ഇല്ലാതാക്കാൻ ശ്രമിക്കുകയാണ്. അധികാരത്തിനൊപ്പം നിന്നുകൊണ്ട് കിട്ടുന്ന നേട്ടങ്ങളിലാണ് അവരുടെ ശ്രദ്ധ. സാധാരണക്കാരായ ജീവനക്കാർ ഇവരെ തിരിച്ചറിഞ്ഞിട്ടുണ്ട്.

? സർവീസിലുള്ള ഉദ്യോഗസ്ഥർക്ക് ക്ഷാമബത്തയടക്കം കുടിശികയാക്കുമ്പോൾ, സർവീസിൽ നിന്ന് വിരമിക്കുന്ന ഉദ്യോഗസ്ഥരുടെ അവസ്ഥ എന്താണ്

∙ 2019ൽ പ്രഖ്യാപിച്ച ശമ്പളപരിഷ്കരണത്തിന്റെ കുടിശിക മുടങ്ങിക്കിടക്കുന്നതിനിടയിൽ മരണപ്പെട്ടത് ഒരു ലക്ഷത്തോളം പെൻഷൻകാരാണ്.

? 2019 ലെ ശമ്പള പരിഷ്കരണം തൃപ്തികരമായിരുന്നോ

∙ 2019 ലെ ശമ്പള പരിഷ്കരണം ഒരു തട്ടിക്കൂട്ട് പരിഷ്കരണമായിരുന്നു. ഓഫിസ് അറ്റൻഡർമാരുടെ കാര്യമെടുത്താൽ അവർക്ക് സർവീസിലെ വെയ്റ്റേജ് നഷ്ടമായി. ആവശ്യാനുസരണ മിനിമം വേതനത്തിന്റെ അടിസ്ഥാനത്തിലായാലും അന്നുണ്ടായ പരിഷ്കരണത്തിൽ നാലായിരം രൂപയോളം അടിസ്ഥാന ശമ്പളത്തിൽ കുറവ് വരുത്തിയാണ് ശമ്പളം പരിഷ്കരിച്ചത്. ഇങ്ങനെ ശമ്പളം പരിഷ്കരിച്ചിട്ട് അതിന്റെ കുടിശിക പോലും ഇനിയും കൊടുത്തിട്ടില്ല.

? 2013ൽ  പങ്കാളിത്ത പെൻഷൻ നടപ്പിലാക്കിയപ്പോൾ അനുകൂലിച്ച കേരള എൻജിഒ ഇപ്പോൾ എന്തു നിലപാടാണ് സ്വീകരിച്ചിരിക്കുന്നത്

∙ പങ്കാളിത്ത പെൻഷൻ ഇന്ത്യയിൽ ഏറ്റവും അവസാനമായി നടപ്പിലാക്കിയ സംസ്ഥാനമാണ് കേരളം. അന്ന് അധികാരത്തിലുണ്ടായിരുന്ന സർക്കാർ,  ജീവനക്കാർക്ക് നൽകിയിരുന്ന ഉറപ്പ് കേന്ദ്രത്തിൽ വരുന്ന മാറ്റങ്ങൾ എല്ലാം ഇവിടെയും നടപ്പാക്കാം എന്നായിരുന്നു. എന്നാൽ അതൊന്നും കേരളത്തിൽ തുടർന്നു വന്ന സർക്കാർ പാലിച്ചില്ല. കേന്ദ്രത്തിൽ ഡെത്ത് കം റിട്ടയർമെന്റ് ഗ്രാറ്റുവിറ്റി വന്നു, ഇവിടെ കൊടുത്തില്ല. കേന്ദ്രം പെൻഷൻ വിഹിതം 14 ശതമാനമാക്കി ഇവിടെ അത് നൽകിയില്ല. ഉമ്മൻ ചാണ്ടി സർക്കാരിന്റെ കാലത്ത് ജീവനക്കാരൻ മരണപ്പെട്ടാൽ ആശ്രിതന് മുഴുവൻകാല പെൻഷൻ നൽകുമെന്ന് ഉറപ്പ് നൽകിയിരുന്നു. അത് പിന്നീട് വന്ന സർക്കാർ നടപ്പാക്കിയില്ല. പങ്കാളിത്ത പെൻഷൻ വികലമാക്കിയാണ് ഇവിടെ നടപ്പിലാക്കിയത്.

പങ്കാളിത്ത പെൻഷൻ പിൻവലിക്കുന്നത് രാജ്യത്തെ വിവിധ സംസ്ഥാനങ്ങളിൽ തിരഞ്ഞെടുപ്പ് പ്രകടന പത്രികയിൽ കോൺഗ്രസ് ഉൾപ്പെടുത്തുകയും അതനുസരിച്ച് പിൻവലിക്കുകയും ചെയ്തിട്ടുണ്ട്. എന്നാൽ കേരളത്തിൽ രണ്ട് വട്ടമാണ് എൽഡിഎഫ് പ്രകടന പത്രികയിൽ ഈ വാഗ്ദാനം നൽകിയത്. രണ്ട് വട്ടം അധികാരത്തിൽ വന്നിട്ടും പിൻവലിക്കാൻ തയാറായില്ല. അതുമായി ബന്ധപ്പെട്ട് നടത്തിയ കമ്മിഷന്റെ പഠന റിപ്പോർട്ട് പോലും പൊതുസമൂഹത്തിന് മുന്നിൽ നൽകിയില്ല. പങ്കാളിത്ത പെൻഷന്റെ പേരിൽ പോയി വായ്പ എടുത്ത സർക്കാരാണ് ഇത്. പങ്കാളിത്ത പെൻഷനിൽ നിന്നും പിന്മാറില്ലെന്ന ഉറപ്പ് നൽകിയാണ് 3700 കോടി വായ്പ എടുത്തത്. അത്രയ്ക്ക് ജീവനക്കാരെ അവഹേളിക്കുകയാണ് സർക്കാർ.

? സിപിഐ ആഭിമുഖ്യമുള്ള സർവീസ് സംഘടന അടുത്തിടെ സംസ്ഥാന വ്യാപകമായി പ്രതിഷേധ സമരം നടത്തിയിരുന്നല്ലോ? അവരുമായി ഒന്നിച്ച് ആവശ്യങ്ങൾ ഉന്നയിച്ചു കൂടെ

∙ പങ്കാളിത്ത പെൻഷന്റെ കാര്യത്തിൽ മാത്രമാണ് അവർക്ക് ലക്ഷ്യം. കഴുകൻ കണ്ണുകളോടെയുള്ള ഒരു ആത്മാർഥതയാണ് അവരുടേത്. അതിന്റെ ഉദ്ദേശ്യം വേറെയാണ്. പങ്കാളിത്ത പെൻഷൻ നടപ്പിലാക്കിയതിന് ശേഷം സർവീസിലെത്തിയ ജീവനക്കാരെ കൂടെക്കൂട്ടുക എന്നതാണത്. രണ്ടും മൂന്നും മന്ത്രിമാർ സ്വന്തമായുള്ള യൂണിയന് സർക്കാരിൽ സമ്മര്‍ദം ചെലുത്തി നടപ്പാക്കാവുന്ന കാര്യം മാത്രമാണിത്. ജാഥയൊക്കെ നടത്തിയതിന്റെ പൊള്ളത്തരങ്ങൾ ജീവനക്കാർക്ക് മനസ്സിലായിട്ടുണ്ട്.

? സർക്കാർ ജീവനക്കാർക്കായി ആരംഭിച്ച മെഡിസെപ് പദ്ധതിയെ കുറിച്ചും ആക്ഷേപം ഉയരുന്നുണ്ടല്ലോ

∙ സർക്കാർ ജീവനക്കാരന്റെ ആരോഗ്യ പരിപാലനവും സർക്കാരിന്റെ ഉത്തരവാദിത്തമാണ്. തൊഴിലാളികളുടെ ആരോഗ്യം സംരക്ഷിക്കേണ്ട ഉത്തരവാദിത്തം തൊഴിലുടമയ്ക്കുണ്ട്. എന്നാൽ ഈ ചുമതലയിൽ നിന്ന് പിൻവാങ്ങിയ സർക്കാർ മെഡിസെപ് എന്ന പേരിൽ ഒരു ഇൻഷുറൻസ് പദ്ധതി കൊണ്ടുവന്നു. ജീവനക്കാരിൽ നിന്ന് മാസം 500 രൂപ വച്ച് വർഷം 6000 രൂപ പിരിച്ചെടുക്കുന്നു. എന്നാൽ പദ്ധതിയിൽ അംഗമായ ആശുപത്രികളിൽ മിക്കവയും ജീവനക്കാർക്ക് സേവനം നൽകാൻ വിസമ്മതിക്കുകയാണ് ഇപ്പോൾ. 6000 രൂപ പിരിച്ചെടുത്ത് ഇൻഷുറൻസ് കമ്പനിയെ ഏൽപ്പിക്കുന്ന മധ്യസ്ഥന്റെ റോളിലേക്ക് സർക്കാർ ചുരുങ്ങിയ അതേസമയം ഇൻഷുറൻസ് കമ്പനിയുമായി സർക്കാർ ഒപ്പുവച്ചു എന്ന് പറയുന്ന കരാറിന്റെ വിവരങ്ങൾ പുറത്ത് വിടാൻ പോലും മടികാട്ടുകയാണ്. സർവീസ് സംഘടനകളുടെ പ്രതിനിധികൾക്ക് പോലും ഇതിന്റെ പ്രയോജനം ലഭിക്കുന്നില്ല. ഇതിൽ നിന്ന് കമ്മിഷൻ അടിച്ചിരിക്കുകയാണ് സർക്കാർ.

ഇൻഷുറൻസ് കമ്പനി തോന്നും പടി പുതിയ നിബന്ധനകൾ കൊണ്ടുവരികയാണ്. മദ്യം, പുകവലി തുടങ്ങിയ ശീലമുള്ളവർക്ക് ചികിത്സ സഹായം അനുവദിക്കില്ലെന്ന് അടുത്തിടെ പറഞ്ഞു. ചില ആശുപത്രികളിൽ മെഡിസെപ് ഇവിടെ സ്വീകരിക്കില്ലെന്ന ബോർഡുകൾ സ്ഥാപിച്ചു. സർക്കാർ ജീവനക്കാരെ പൊതുമധ്യത്തിൽ അവഹേളിക്കുന്നതിന് തുല്യമല്ലേ ഇത്. അവരെ ആട്ടിപ്പായിക്കുകയാണ്. ഒരു ലക്ഷം ചികിത്സ സഹായം ആവശ്യപ്പെടുമ്പോൾ കേവലം 10,000 നൽകി അപമാനിക്കുന്നു. സ്വന്തം ശമ്പളത്തിൽ നിന്നും വർഷം 6000 രൂപ നൽകേണ്ടി വരുന്ന ജീവനക്കാരനാണ് ഈ അവസ്ഥയുണ്ടാവുന്നത്. ഈ 6000 രൂപ‌യിൽ നിന്നും ജിഎസ്ടി പിരിച്ച് വരുമാനം കൂട്ടാനാണ് സർക്കാർ ശ്രമിച്ചത്. ജീവനക്കാർക്ക് ആരോഗ്യ പരിരക്ഷ ഉറപ്പാക്കേണ്ട സർക്കാർ മെഡിസെപ്പിലൂടെ തലയൂരാനാണ് തത്വത്തിൽ ശ്രമിച്ചതെന്ന് കാണാനാവും.

? യുവതലമുറയുടെ സ്വപ്നമാണ് സർക്കാർ ജോലി, ഇപ്പോഴത്തെ വിവാദങ്ങൾ സർക്കാർ മേഖല അനാകർഷകമാകുന്നുണ്ടോ

∙ ഇക്കുറി ലോവർ ഡിവിഷൻ ക്ലർക്ക് പരീക്ഷയിൽ പിഎസ്‍സി അപേക്ഷ ക്ഷണിച്ചിട്ടും ലക്ഷക്കണക്കിന് വിദ്യാർഥികളാണ് അപേക്ഷിക്കാതെ മാറി നിൽക്കുന്നത്. സർക്കാർ ജോലി ലഭിച്ചിട്ടും കാര്യമില്ലെന്ന തോന്നൽ അവർക്കുണ്ടായിരിക്കുന്നു. പുതുതലമുറ ജനിച്ച നാട് ഉപേക്ഷിച്ച് പുതിയ സ്ഥലങ്ങൾ തേടിപ്പോവുകയാണ്. അവർ തിരിച്ച് വരാത്ത രീതിയിൽ രാജ്യം വിട്ട് ഓടിപ്പോവുകയാണ്. കുടിയേറ്റക്കാരായി പുതുതലമുറ പോകുമ്പോൾ കേരളം വൃദ്ധസദനമായി മാറിക്കൊണ്ടിരിക്കുന്നു. കഴിഞ്ഞ ബജറ്റ് അവതരിപ്പിച്ചപ്പോൾ ധനമന്ത്രി കേരളത്തിൽ 12000 വീട് പൂട്ടിക്കിടക്കുന്നു എന്നാണ് പറഞ്ഞത്. ഇപ്പോൾ അതിലും വർധിച്ചിട്ടുണ്ടാവും.

ഇവിടെ തസ്തികകൾ വെട്ടിക്കുറയ്ക്കുന്നു, പുതിയ തൊഴിലവസരങ്ങൾ സൃഷ്ടിക്കുന്നില്ല, ജീവനക്കാർക്ക് ശമ്പളം കൃത്യമായി നൽകുന്നില്ല, കെഎസ്ആർടിസി അടക്കമുള്ള പൊതുമേഖലാ സ്ഥാപനങ്ങൾ ഒന്നൊന്നായി തകരുന്നു. സർക്കാരിന്റെ ആസൂത്രണം ഇല്ലായ്മ മൂലം കാലത്തിന് അനുസരിച്ച് പരിഷ്കരണങ്ങൾ നടത്താതെ സർവീസ് മേഖല പകച്ച് നിൽക്കുകയാണ്. ടൂറിസം, വ്യാവസായിക മേഖലകളിൽ അനന്ത സാധ്യതകളുണ്ടെങ്കിലും മദ്യവും ലോട്ടറിയും മുഖ്യവരുമാനമാക്കി മുന്നോട്ട് കൊണ്ടുപോകുവാനാണ് സർക്കാർ ശ്രമിക്കുന്നത്. ഇതിന്റെയൊക്കെ ദുരന്ത ഫലങ്ങൾ അനുഭവിക്കേണ്ടി വരുന്നതും ഈ സമൂഹമാണ്.