നാം എന്തേ ഇങ്ങനെ?

‘പ്രസവവേളയിൽ അമ്മ അനുഭവിച്ച അസഹ്യവേദന, കുഞ്ഞ് ഗർഭത്തിലായിരിക്കെ ആഹാരത്തിന് രുചിയില്ലാതെ ക്ഷീണിച്ച ശരീരം, ജനിച്ച് ഒരു വർഷത്തോളം മലമൂത്രാദികളിൽ കിടന്ന കുഞ്ഞിനെ പരിചരിക്കാനുള്ള കഷ്ടപ്പാട് തുടങ്ങി  എണ്ണിയാലൊടുങ്ങാത്ത ത്യാഗം ചെയ്തിട്ടുള്ള അമ്മയോട് എത്ര വലിയ മകനും പകരം നല്‍കാനാവില്ല. അമ്മയെ ഞാൻ നമിക്കുന്നു’.

എഴുത്തച്ഛന്റെ വാക്കുകളിൽ ശ്രീരാമൻ :‘മാതാവു േമാദാലനുവദുച്ചീടുകിലേതുേമ ഖേദമെനിക്കില്ല േകവലം.’   മാതൃവാത്സല്യത്തെപ്പറ്റി വള്ളത്തോൾ : ‘മാതാവിൻ വാത്സല്യ ദുഗ്ധം നുകർന്നാലേ  പൈതങ്ങൾ പൂർണ്ണ വളർച്ച നേടൂ.’ ഈശ്വരാംശമുള്ള മാതാവില്ലാത്തയാൾ ദരിദ്രനെന്നു എബ്രഹാം ലിങ്കൺ.

അമ്മയെന്നാൽ കേവലം ജൈവബന്ധമല്ല, അത് മനോഭാവമാണ്. മറ്റെല്ലാവർക്കും പകരം നിൽക്കാനാവുന്നത് അമ്മയ്ക്കാണ്. പക്ഷേ അമ്മയ്ക്കു പകരമാവാൻ മറ്റാർക്കും കഴിയില്ല. പ്രശസ്തകവി റോബർട് ബ്രൗണിങ് : ‘മാതൃത്വം : എല്ലാ സ്നേഹവും അവിടെ തുടങ്ങുന്നു, അവിടെ അവസാനിക്കുന്നു.’ റഡ്യാർഡ് കിപ്ലിങ് പറഞ്ഞതു വേറൊന്ന്, ‘എല്ലായിടത്തും ഇരിക്കാൻ തനിക്കു കഴിയാത്തതിനാൽ, ഈശ്വരൻ അമ്മമാരെ സൃഷ്ടിച്ചു.’

അച്ഛനെക്കുറിച്ച് ഏതാനും വിവേകശാലികൾ പറഞ്ഞതുകൂടി കേൾക്കുക. വീരനായകന്മാരും സാഹസികരും കഥാക‍ൃത്തുകളും ഗായകരുമെല്ലാമായി സ്നേഹം മാറ്റിയെടുത്ത സാധാരണക്കാരാണ് അച്ഛന്മാർ. ഏതു നേരത്തും വിശ്വസിക്കാവുന്ന സുഹൃത്താണ് അച്ഛൻ. ഏറ്റവും വലിയ സമ്മാനം അച്ഛനെനിക്കു തന്നു; എന്നെ വിശ്വസിച്ചു.  അച്ഛൻ എനിക്കു താരങ്ങളാണ്; എന്റെ  ഹൃദയത്തിൽ ചിമ്മുന്ന താരങ്ങൾ. എങ്ങനെ ജീവിക്കണമെന്ന് അച്ഛനെന്നോടു പറഞ്ഞില്ല; അതെങ്ങനെയെന്ന് അദ്ദേഹം ജീവിച്ചുകാട്ടിത്തന്നു.

‘സ്വന്തം കുഞ്ഞിനെ വിവേകശാലിയായ അച്ഛനറിയാം’ എന്നു ഷേക്സ്പിയർ (മെർച്ചന്റ് ഓഫ് വെനിസ് 2:2)

ഇതെല്ലാമാണെങ്കിലും, വേറൊന്നും പറയണം. ഇതിലൊന്നും പെടാത്ത അച്ഛന്മാരുമുണ്ട്. ആറു വയസ്സുകാരി മകളെ 2023 ജൂണിൽ വെട്ടിക്കൊന്ന അച്ഛനെ കാണാൻ നാം ദൂരദിക്കിലൊന്നും പോകേണ്ട. നമ്മുടെ  സ്വന്തം മാവേലിക്കരയിലായിരുന്നു ഈ സംഭവം. അച്ഛനമ്മമാർ പെരുമാറേണ്ട രീതിയിൽ പെരുമാറുന്നതും പ്രധാനം. അത‌ിരുകടന്ന ഇടപെടൽ കൗമാരത്തിലെത്തിയവർക്കു രുചിക്കില്ല. അവർ വെറും അടയ്ക്കയല്ല, മടിയിൽ വയ്ക്കാനാവാത്ത അടയ്ക്കാമരങ്ങളായിക്കഴിഞ്ഞു എന്നതു മുതിർന്നവർ മനസ്സിൽ വയ്ക്കേണ്ടതുണ്ട്.

‘വണ്ടേ! നീ തുലയുന്നു; വീണയി വിളക്കും നീ കെടുക്കുന്നുതേ’ (പ്രരോദനം–53) എന്നു കുമാരനാശാൻ മറ്റൊരു സാഹചര്യത്തിൽ സൂചിപ്പിച്ചതുപോലെ സ്വയം നശിക്കുകയും കുട്ടികളെ നശിപ്പിക്കുകയും ചെയ്യുന്ന അച്ഛനമ്മമാർ ആ പേരിനർഹരല്ല. കൗമാരക്കാർക്കും മറ്റും പലപ്പോഴും കിട്ടുക തലതിരിഞ്ഞ വിവരങ്ങളാകാം. അവ കേട്ട് അച്ഛനമ്മമാരെ വെറുക്കുകയോ അവരുടെ മനസ്സു വേദനിപ്പിക്കുകയോ ചെയ്യാൻ തുനിയുന്നതു വിവേകശൂന്യതയാണ്. പ്രതിഫലം പ്രതീക്ഷിക്കാതെ എന്തും സന്തോഷപൂർവം തരാൻ അവരല്ലാതെയാരും ഉണ്ടെന്നു വരില്ല.