ഗുജറാത്തിൽ സമ്പന്നർക്ക് പരവതാനി, കടം വാങ്ങി ഊട്ടുന്ന കേരളം; ഏതാണ് വികസന വഴിയിലെ നല്ല മാതൃക?

∙ ഗുജറാത്ത് മോഡൽ ശരിക്കും ‘ട്രിക്കിൾ ഡൗൺ ഇഫക്ട്’

ഗുജറാത്ത് മോഡൽ ‘ട്രിക്കിൾ ഡൗൺ ഇഫക്ട്’ എന്ന കാര്യത്തിലാണ് നിലകൊള്ളുന്നത്. ഇതിനെ വിമർശിച്ചും അനുകൂലിച്ചതും പല വാദഗതികളുമുണ്ട്. എന്താണ് ട്രിക്കിൾ ഡൗൺ ഇഫക്ട്? അടിസ്ഥാന സൗകര്യങ്ങളും നികുതി ഇളവും മറ്റു പ്രോത്സാഹനങ്ങളും സമൂഹത്തിലെ കോർപറേറ്റുകളുടെയും ബിസിനസ് ചെയ്യുന്നവരുടെയും  കൈവശം എത്തിച്ചാൽ അതിന്റെ ഗുണഫലങ്ങൾ പതുക്കെ താഴേത്തട്ടിലേക്ക് എത്തുമെന്ന ചിന്താഗതിയാണിതിന് അടിസ്ഥാനം. അതായത് മുകൾത്തട്ടിലെ സിഇഒമാരിൽനിന്ന് തുടങ്ങി, കമ്പനി  ജോലിക്കാരിലൂടെ താഴേത്തതട്ടിലെ വീട്ടു ജോലിക്കാർ വരെയുള്ളവരിലേയ്ക്ക് സമ്പത്ത് എത്തുമെന്ന സിദ്ധാന്തം.

‌

ഇത് ഗുജറാത്തിൽ പൂർണമായും നടപ്പിലായില്ല എന്നാണ് ഗുജറാത്ത് മോഡലിനെ വിമർശിക്കുന്ന പലരും അഭിപ്രായപ്പെടുന്നത്. അതായതു പണക്കാരായവർ പണക്കാരായും പാവപ്പെട്ടവർ പാവപ്പെട്ടവരായും തുടരുന്നു. എന്നാൽ കേരള മോഡലിലാണെങ്കിൽ കമ്പനികളും പുതിയ വ്യവസായങ്ങളും ഒന്നും ഉണ്ടായില്ലെങ്കിലും സാമൂഹ്യ സുരക്ഷാ പദ്ധതികൾ സർക്കാർ കടമെടുത്താണെങ്കിലും താഴേത്തട്ടിലേക്കെത്തിയിട്ടുണ്ട്. എന്നാൽ 0.1 ശതമാനത്തിനു പോലും പലിശ നിരക്കിൽ വായ്പകൾ വമ്പൻ കുത്തക കമ്പനികൾക്ക് നൽകി അവരെ ഗുജറാത്തിൽ പിടിച്ചു നിർത്താനായി എന്നുള്ളത് സർക്കാരിന്റെ ഒരു നേട്ടമായാണ് പലരും കാണുന്നത്. 

ഇതു മാത്രമല്ല പല കമ്പനികൾക്കും ബിസിനസ് തുടങ്ങാൻ ഭൂമിക്കായി 75 ശതമാനം സബ്സിഡിയാണ് ഗുജറാത്ത് സർക്കാർ വാഗ്ദാനം ചെയ്തത്. എങ്ങനെയും വമ്പൻ കമ്പനികളെ ഗുജറാത്തിലേയ്ക്ക് ആകർഷിക്കുക, അവർക്ക് കമ്പനി തുടങ്ങാൻ ആവശ്യമായ എല്ലാ സൗകര്യങ്ങളും ചെയ്തുകൊടുക്കുക, നികുതി ഇളവുകൾ കൊടുത്ത് നിലനിർത്തുക തുടങ്ങി ഒട്ടേറെ പദ്ധതികളാണ് ഗുജറാത്തിൽ സർക്കാർ നടപ്പിലാക്കിയത്. നൂറുകണക്കിനു വ്യവസായങ്ങൾ ഗുജറാത്തിൽ തുടങ്ങിയപ്പോൾ ലക്ഷക്കണക്കിന് തൊഴിലവസരങ്ങൾ ഉണ്ടാകുകയും ഗുജറാത്ത് സമ്പദ്‌വ്യവസ്ഥയിൽ തൊഴിലില്ലായ്മ കുത്തനെ കുറയുകയും ചെയ്തു. എന്നാൽ വിദ്യാഭ്യാസ രംഗത്തും ആരോഗ്യ മേഖലയിലും വേതന കാര്യത്തിലും ഗുജറാത്ത് ഇനിയും മുന്നേറാനുണ്ട്. 

∙ ഇഷ്ടം ഗുജറാത്തിനോടോ കേരളത്തോടോ? 

പ്രശസ്ത സാമ്പത്തിക ശാസ്ത്രഞ്ജന്മാരായ അമർത്യ സെന്നും പ്രഫ. ജഗദിഷ് ഭഗവതിയും ഗുജറാത്ത്, കേരള മോഡലുകളെ സംബന്ധിച്ച അക്കാദമിക് നിരീക്ഷണങ്ങളും വാദപ്രതിവാദങ്ങളും നടത്തിയിട്ടുണ്ട്. ഗുജറാത്ത് മോഡലിൽ വളർച്ചയ്ക്കും അടിസ്ഥാന സൗകര്യ വികസനത്തിനുമാണ് മുൻഗണന നൽകുന്നത്. വളർച്ചയും വ്യാവസായിക വികസനവും ദാരിദ്ര്യം കുറയ്ക്കുന്നതിൽ വലിയ പങ്ക് വഹിക്കുമെന്നതാണ് ഈ മോഡലിന്റെ പ്രത്യേകത. ഗുജറാത്ത് മോഡലിന്റെ ശക്തമായ വക്താവാണ് പ്രഫസർ ഭഗവതി. ഗുജറാത്ത് മോഡൽ വികസനമാണ് കേരള മോഡലിനേക്കാളും നല്ലതെന്ന  അഭിപ്രായമാണ് അദ്ദേഹത്തിനുള്ളത്. 

അതേസമയം കേരള മോഡലിനെയാണ് ഒരു നല്ല വികസന മാതൃകയായി, നൊബേൽ ജേതാവ് കൂടിയായ അമർത്യ സെൻ കണ്ടിരുന്നത്. ഗുജറാത്ത് വികസന മാതൃക സാമൂഹിക മേഖലകളിലെ വികസനത്തിന് ഊന്നൽ കൊടുക്കുന്നില്ല എന്നാണ് അദ്ദേഹത്തിന്റെ അഭിപ്രായം. എന്നാൽ സാമ്പത്തിക വളർച്ചയില്ലാത്ത കേരള മോഡലിനെ ഒരു മോഡൽ ആയി കണക്കാക്കാനാകില്ല എന്ന് പ്രഫസർ  ഭഗവതി വാദിക്കുന്നു. ‘‘വിദ്യാഭ്യാസത്തിനും ആരോഗ്യപരിപാലനത്തിനും ഉയർന്ന തുക ചെലവഴിക്കണമെന്ന് ഞാൻ വാദിക്കുന്നുണ്ടെങ്കിലും, അതിനർഥം ഞാൻ വളർച്ചയ്ക്ക് എതിരായിരുന്നുവെന്നല്ല’’ എന്നായിരുന്നു സെന്നിന്റെ ഇതിനോടുള്ള മറുപടി. 

അമർത്യ സെൻ കേരള വികസന മോഡൽ നല്ലതാണ് എന്ന് വാദിക്കുന്നുണ്ടെങ്കിലും കുറഞ്ഞ തൊഴിൽ വളർച്ച, വിദ്യാസമ്പന്നരായ യുവാക്കളുടെ വിദേശ കുടിയേറ്റം കൂടുന്നത്, സ്വകാര്യമേഖലയ്‌ക്ക് പ്രതികൂലമായ അന്തരീക്ഷം എന്നിവ കേരളത്തിന്റെ വളർച്ചയ്ക്ക് തടസ്സം ഉണ്ടാക്കുന്നുവെന്ന കാര്യം ശരിയല്ലേ? ഇതുകൊണ്ടൊക്കെത്തന്നെ കേരളത്തിന്റെ വികസന മാതൃക ഒരു നല്ല മാതൃകയല്ലെന്ന് വാദിക്കുന്നവരും ഉണ്ട്. ഉയർന്ന വിദ്യാഭ്യാസവും മികച്ച ആയുർദൈർഘ്യവും ഉണ്ടെങ്കിലും തൊഴിലില്ലായ്മ കൂടുതലുള്ള ഒരു വ്യവസ്ഥ എങ്ങനെ ഒരു മാതൃകയാകും എന്ന് ചോദിക്കുന്നവരുമുണ്ട്. ഇനി ഈ രണ്ടു മാതൃകകളെ കൂട്ടി യോജിപ്പിച്ച് ഒരു പുതിയ മോഡൽ ഉരുത്തിരിഞ്ഞു വരുമോ? അതായത്, നല്ല സാമ്പത്തിക വളർച്ചയും ഒപ്പം സാമൂഹ്യ സൂചകങ്ങളിൽ ഉയർച്ചയും രേഖപ്പെടുത്തുന്ന ഒരു മാതൃക, അതായിരിക്കില്ലേ കൂടുതൽ നല്ലത്?