‘വയനാട്ടിൽ വൃന്ദ കൊടിവീശട്ടെ, സിപിഐ എന്തിന് ഒപ്പം നിൽക്കണം? ആ ‘പോസ്റ്റർ’ സിപിഎം ബിഹാറിൽ ഉപയോഗിക്കുമോ!’

∙ എന്തിനു വേണ്ടി ലീഗ് പതാക മാറ്റിവച്ചു? 

രാഹുൽ ഗാന്ധി നോമിനേഷൻ സമർപ്പിക്കാൻ പ്രകടനമായി പോയപ്പോൾ ജാഥയിൽ ആരും പാർട്ടി പതാകകൾ ഉപയോഗിച്ചില്ലെന്നും അതിനു കാരണമായത് ലീഗിന്റെ പതാക ഒഴിവാക്കാനാണെന്നുമുള്ളതാണല്ലോ പരാതി. ഇതെന്തിനായിരുന്നെന്ന് എല്ലാവർക്കുമറിയാം. കഴിഞ്ഞ തവണ വടക്കേ ഇന്ത്യയിൽ വ്യാപകമായി വർഗീയ പ്രചാരണത്തിനായി ബിജെപി ഇത് ദുരുപയോഗം ചെയ്തുവെന്നാണ് പ്രതിപക്ഷം പറയുന്നത്. കൊടി വേണ്ടെന്നു വച്ച സംഭവത്തിൽ ബിജെപി കോൺഗ്രസിനെതിരെ രാഷ്ട്രീയമായി വിമർശനമുന്നയിക്കുന്നത് മനസ്സിലാക്കാം. ലീഗിന്റെ കൊടി ഉപയോഗിച്ചാലും ഇല്ലെങ്കിലും ബിജെപി അതിനെ വിമർശിക്കും. പക്ഷേ, ബിജെപിയുടെ കെണിയിൽ വീഴാതിരിക്കാനുള്ള കോൺഗ്രസിന്റെ ശ്രമത്തെ ഇടതു പക്ഷം പരിഹസിക്കുന്നത് വാർത്തമാനകാല ഇന്ത്യൻ സാഹചര്യത്തിൽ കടന്ന കൈയായിപ്പോയി. 

മറ്റൊരർഥത്തിൽ ഇതൊരു ഒറ്റുകൊടുക്കലാണ്. തമിഴ്‌നാട്ടിൽ കോൺഗ്രസും ലീഗും ഇടതും ഡിഎംകെ മുന്നണിയിലാണ്. അവിടെയുള്ള സഖ്യ കക്ഷിയായ ലീഗിന്റെ കൊടി ചെങ്കൊടിയുമായി കൂട്ടിക്കെട്ടിയുള്ള പോസ്റ്റർ രാജസ്ഥാനിലും ബിഹാറിലും തങ്ങൾ മത്സരിക്കുന്ന മണ്ഡലങ്ങളിൽ പ്രചാരണത്തിന് ഉപയോഗിക്കാൻ സിപിഎമ്മും സിപിഐയും തയാറാകുമോ? അതുണ്ടാവില്ലെന്ന് എല്ലാവർക്കുമറിയാം. എന്നിട്ടാണ് വൃന്ദ കാരാട്ടിന്റെ ഇടപെടൽ. ഇത്തരം രാഷ്ട്രീയ ഗിമ്മിക്കുകൾക്ക്‌ കൂട്ടുനിൽക്കേണ്ടിവരുന്ന സിപിഐ യുടെ ഗതികേടിൽ സഹതപിക്കുകയേ നിവർത്തിയുള്ളൂ.

വർത്തമാനകാല ഇന്ത്യൻ രാഷ്ട്രീയത്തിൽ സിപിഐയുടെ സ്ഥാനം ബിജെപിയെ സഹായിക്കുന്ന കേരള സിപിഎമ്മിനെ പോലുള്ള ഒരു പാർട്ടിയോടൊപ്പമല്ല, മറിച്ച് കോൺഗ്രസ് ഉൾപ്പെടുന്ന വിശാല ജനാധിപത്യ മുന്നണിയോടും അത്തരം പാർട്ടികളോടും ഒപ്പമാണ്. അത്തരമൊരു നിലപാട് അഖിലേന്ത്യാ തലത്തിൽ വേണം. അല്ലാതെ കേരളത്തിൽ വരുമ്പോൾ 1964 മുതൽ സിപിഎം നടപ്പിലാക്കിവരുന്ന അന്ധമായ കോൺഗ്രസ്‌ വിരോധത്തിൽ അധിഷ്ഠിതമായ നയം അതേപടി പകർത്തുകയല്ല സിപിഐ ചെയ്യേണ്ടത്. 

സിപിഎമ്മിന് ഇന്ന് ഒരു അഖിലേന്ത്യാ നയമില്ല. കോൺഗ്രസ്‌ വിരുദ്ധ രാഷ്ട്രീയത്തിന്റെ യുഗം അവസാനിച്ചിരിക്കുന്നു. കോൺഗ്രസിനോട് ‘ഐക്യവും സമരവും’ എന്ന സ്വന്തം നയം സിപിഐ എന്ന് ഉപേക്ഷിച്ചുവോ അന്നു തുടങ്ങി സിപിഐയുടെ തകർച്ച. സിപിഎമ്മിന് രാഷ്ട്രീയ നിലനിൽപ് ഉണ്ടാക്കികൊടുത്തതല്ലാതെ സിപിഐക്കോ ഇന്ത്യയിലെ പുരോഗമന ജനാധിപത്യ രാഷ്ട്രീയത്തിനോ 1978ൽ ഭട്ടിൻഡയിൽ വച്ച് സംഭവിച്ച നയംമാറ്റം ഒരു ഗുണവും ചെയ്തില്ലതാനും.

∙ ആ ചോദ്യം സിപിഐ ചോദിക്കുമോ?

കമ്യൂണിസ്റ്റ്‌ പ്രസ്ഥാനം പിളർന്ന് അറുപതാണ്ടുകൾ പിന്നിട്ടിരിക്കുന്നു. 1964ൽ എന്തിനു വേണ്ടിയാണ്‌ ഇന്ത്യൻ കമ്യൂണിസ്റ്റ്‌ പാർട്ടിയെ പിളർത്തിയതെന്ന ചോദ്യം സിപിഎമ്മിനോട് ചോദിക്കാൻ സിപിഐ തയാറുണ്ടോ? ഉടൻ വിപ്ലവത്തിനുള്ള ചൈനീസ് ആഹ്വാനത്തിന് പുറമേ ഒരു വിഭാഗത്തിന് ഉണ്ടായിരുന്ന അന്ധമായ കോൺഗ്രസ് വിരോധം. ഇതല്ലേ സത്യം? ഉടൻ വിപ്ലവം നടത്താൻ ഇറങ്ങിപ്പുറപ്പെട്ട പാർട്ടിയുടെ കേരളത്തിലെ ഇന്നത്തെ അവസ്ഥ ഒന്ന് നോക്കൂ. 1970 മുതൽ 1977 വരെ കേരളം ഭരിച്ച അച്യുതമേനോൻ സർക്കാരിനെ ആധുനിക കേരളത്തിന്റെ ചരിത്രത്തിലെ ‘ലജ്ജാകരമായ ഏട്’ എന്ന് വിശേഷിപ്പിച്ചത് പിണറായി വിജയനാണ്. 

ആധുനിക കേരളത്തിന്റെ മുഖഛായതന്നെ മാറ്റിയ, എല്ലാ അർഥത്തിലും ഒരു മാതൃകയായിരുന്ന അച്യുതമേനോൻ സർക്കാരിനെയാണ് ഈ രീതിയിൽ ഇകഴ്ത്തിയത്. അച്യുതമേനോൻ സർക്കാരിനോട് സിപിഎം എടുത്തിരുന്ന സമീപനം എന്തായിരുന്നു എന്ന് ആധുനിക കേരളം മറക്കില്ല. സർക്കാർ ബസുകൾ, ഇലക്ട്രിസിറ്റി ട്രാൻസ്‌ഫോർമറുകൾ, ട്രാക്ടറുകൾ അങ്ങനെ സിപിഎം അക്കാലത്ത് അഗ്നിക്കിരയാക്കാത്ത വല്ലതുമുണ്ടോ? ചുരുക്കത്തിൽ ഒരു പരിഷ്കൃത സമൂഹത്തിന് ചേരാത്ത സമരാഭാസങ്ങൾ മുഴുവൻ സിപിഎം നേതൃത്വത്തിൽ അന്ന് അരങ്ങേറി. എന്നാൽ ഇന്ന് നിലനിൽപ്പിനായി, ദേശീയ അംഗീകാരം നിലനിർത്തുന്നതിനായി സിപിഎം കോൺഗ്രസിന്റെ പിന്തുണയോടെ കേരളത്തിനു പുറത്ത് സാധ്യമായ സ്ഥലങ്ങളിലെല്ലാം പാർലമെന്റ് തിരഞ്ഞെടുപ്പിൽ മത്സരിക്കുന്നു. 

ബംഗാൾ, രാജസ്ഥാൻ, ബിഹാർ, തമിഴ്നാട്, ഇവിടെയെല്ലാം കോൺഗ്രസ്‌ ഇന്ന് സിപിഎമ്മിന്റെ സഖ്യകക്ഷിയാണ്. ഈ അടുത്ത ദിവസമാണല്ലോ പിണറായി വിജയൻ രാഹുൽ ഗാന്ധിയെ പേരെടുത്തു വിളിച്ച് ശകാരിച്ചത്. മേൽ സംസ്ഥാനങ്ങളിൽ എവിടെയെങ്കിലും പോയി പിണറായി രാഹുലിനെതിരെ ഇത്തരത്തിൽ സംസാരിക്കുമോ? ബിജെപി വർഷങ്ങളായി രാഹുൽ ഗാന്ധിക്കെതിരെ പ്രചരിപ്പിക്കുന്ന ഒരു പ്രയോഗം പിണറായി വിജയൻ ആയുധമാക്കിയതിന് പിന്നിലെ ചേതോവികാരം എന്താണ്‌?

അറുപത്തിനാലിൽ കമ്യൂണിസ്റ്റ്‌ പ്രസ്ഥാനത്തെ പിളർക്കാൻ പറഞ്ഞതൊക്കെ സിപിഎം ഇന്ന് വിഴുങ്ങിയിരിക്കുന്നു. കേരളത്തിൽ മാത്രം കോൺഗ്രസ്‌ വിരോധം! അതേസമയം, സിപിഐ ചെന്നുപെട്ട പടുകുഴി ഒന്ന് ആലോചിച്ച് നോക്കൂ! ഇതൊക്കെ നേർക്കുനേർ നിന്ന് സിപിഎമ്മിനോട് ചോദിക്കാൻ ഒരു സി. കെ. ചന്ദ്രപ്പൻ ഇല്ലാതെപോയത് സിപിഎമ്മിന്റെ നല്ലകാലം. കാലിനു കീഴെ ബാക്കിയുള്ള മണ്ണു കൂടി ഒലിച്ചു പോകുന്നതിന് മുൻപ്, ഇനിയെങ്കിലും ഒരു തിരിച്ചറിവ് സിപിഐക്ക്‌ ഉണ്ടാകുമോ? സിപിഎമ്മിനൊപ്പം മുങ്ങാനുള്ള പ്രസ്ഥാനം അല്ല സിപിഐ.

(ചരിത്രാധ്യാപകനും ഇടതുനിരീക്ഷകനുമാണ് ലേഖകൻ. അഭിപ്രായങ്ങൾ വ്യക്തിപരം)