‘വീട്ടിൽനിന്ന് കല്യാണത്തിന് പോലും ആളുകള്‍ക്ക് ഭയം; ഞങ്ങളിങ്ങനെ മരിച്ചു പോകട്ടെ എന്നാണോ? സർക്കാരും തിരിഞ്ഞു നോക്കുന്നില്ല’

ഈ കൊടുംചൂടിൽ പൊള്ളലേൽക്കാതിരിക്കാൻ ഓരോ ദിവസവും നടത്തേണ്ടി വരുന്ന പരിശ്രമങ്ങൾ അക്ഷരാർത്ഥത്തിൽ‌ ഞങ്ങളെ തളർത്തുന്നതാണ്. ജീവിച്ചിരിക്കുക എന്നതു പോലും വലിയ വെല്ലുവിളിയാണ്. ക്ഷീണം, തലകറക്കം, നെഞ്ചുവേദന തുടങ്ങിയ ശാരീരിക പ്രശ്നങ്ങൾ മൂലം സാധാരണ മനുഷ്യരെപ്പോലെ പകൽ പുറത്തിറങ്ങി ജോലിയോ മറ്റു കാര്യങ്ങളോ ചെയ്യാൻ കഴിയാറില്ല. സൂര്യാഘാതം ഏൽക്കാനുള്ള സാധ്യത മറ്റുള്ളവരേക്കാൾ കൂടുതലുള്ളവരാണ് ഞങ്ങൾ. അതിനാൽ, രാത്രിയിലാണ് യാത്രകളും വായനയും എഴുത്തുമെല്ലാം. പകൽജീവിതമെന്നു പറയുന്നത് ഇപ്പോഴത്തെ അവസ്ഥയിൽ തീർത്തും അപ്രാപ്യമാണ്. 

∙ ഞങ്ങളിങ്ങനെ മരിച്ചു പോകട്ടെ എന്നാണോ?

മുഖ്യമന്ത്രി പിണറായി വിജയൻ നടത്തിയ കേരളയാത്രയിൽ അദ്ദേഹത്തെ നേരിൽ കണ്ടു സംസാരിക്കാൻ അവസരം ലഭിച്ചിരുന്നു. അന്ന് കൊണ്ട വെയിൽ മൂലം നേരിടേണ്ടി വന്ന ആരോഗ്യപ്രശ്നങ്ങൾ എന്നെ ഇപ്പോഴും അലട്ടുന്നുണ്ട്. ആൽബിനോകൾക്കു വേണ്ടിയുള്ള പദ്ധതിയുടെ രൂപരേഖയും സമർപ്പിച്ചിരുന്നു. പക്ഷേ, ഇതുവരെ അതിനുള്ള നടപടി സർക്കാർ തലത്തിൽ നിന്നുണ്ടായിട്ടില്ല. ചൂടു കൂടുകയാണെന്നു ബോധ്യം വന്നപ്പോൾ നേരത്തേ തന്നെ തിരുവനന്തപുരത്തു പോയി മുഖ്യമന്ത്രിയെ നേരിട്ടു കണ്ടും വിഷയത്തിന്റെ ഗൗരവം ധരിപ്പിക്കാൻ ശ്രമിച്ചിരുന്നു. വളരെയേറെ പരിശ്രമങ്ങളുടെ ഭാഗമായാണ് ഈയടുത്ത് മുഖ്യമന്ത്രിയുടെ പേജിൽ അദ്ദേഹം ഔദ്യോഗികമായി പങ്കുവച്ച കുറിപ്പിൽ ആൽബനിസം എന്ന വാക്കു പോലും ഇടം നേടിയത്.

ഉഷ്ണതരംഗത്തിനെതിരെ ജാഗ്രത പുലർത്തണമെന്ന കുറിപ്പിലാണ് മുഖ്യമന്ത്രി ആൽബനിസം ഉള്ളവരെ പ്രത്യേകമായി പരാമർശിച്ചത്. പക്ഷേ, അതുകൊണ്ടായില്ല. സർക്കാർ പുറത്തിറക്കുന്ന പോസ്റ്ററുകളിലോ മറ്റു മുന്നറിയിപ്പുകളിലോ ഞങ്ങൾ ഇല്ല. ഫെബ്രുവരി 24ന് മുഖ്യമന്ത്രി, സാമൂഹിക നീതി വകുപ്പ് മന്ത്രി, ആരോഗ്യ മന്ത്രി എന്നിവർക്ക് സമർപ്പിച്ച ആൽബനിസം കെയർ മാസ്റ്റർ പ്ലാനിൽ അഭ്യർഥിച്ച യാതൊരു ആവശ്യങ്ങളും നടപ്പായിട്ടില്ല. തിരഞ്ഞെടുപ്പു പെരുമാറ്റചട്ടം നിലനിൽക്കുന്നതുകൊണ്ടാണ് നടപടി വൈകുന്നതെന്ന ന്യായം അംഗീകരിക്കാൻ ബുദ്ധിമുട്ടുണ്ട്. കാരണം, ഈ ചൂടുകൊണ്ട് ഏറ്റവും ദുരിതം അനുഭവിക്കുന്ന ഞങ്ങൾ ഇപ്പോഴും സർക്കാർ പരിഗണനയ്ക്ക് പുറത്താണ്. എണ്ണത്തിൽ കുറവായതുകൊണ്ടാണ് ഇതു സംഭവിക്കുന്നതെന്നാണ് മറ്റൊരു ഔദ്യോഗിക വിശദീകരണം. എണ്ണത്തിൽ കുറവായതുകൊണ്ട് ഞങ്ങൾ ഇങ്ങനെ മരിച്ചു പോകട്ടെ എന്നാണോ?

∙ അന്ധവിശ്വാസങ്ങളും തെറ്റായ ചിന്തകളും

ആൽബിനോ എന്ന അവസ്ഥ മനുഷ്യരിൽ മാത്രമല്ല എല്ലാ ജീവജാലങ്ങളിലും കാണപ്പെടുന്നതാണ്. വെളുത്ത പൂച്ചയും നായയും കടുവയുമൊക്കെയുണ്ട്. നമുക്ക് അതിനോടൊക്കെ ഒരു തരം കൗതുകമാണ്. പക്ഷേ, അങ്ങനെയുള്ള മനുഷ്യരോടുള്ള പെരുമാറ്റം വ്യത്യസ്തമാണ്. ചിലർക്ക് ഇത് പകരുമോ എന്ന ഭയം! ചിലർക്കു പരിഹാസം! പൊതുയാത്രകളിൽ ഞങ്ങളെ കൂട്ടണമെന്നില്ല. ഹോസ്റ്റൽ മുറികൾ ഷെയർ ചെയ്യണമെന്നില്ല. ഒരു ഓഫിസ് സംവിധാനത്തിൽ എന്നെപ്പോലുള്ള ആളുകളെ ഉൾച്ചേർക്കുന്നത് അത്ര സാധാരണമല്ല. ആൽബിനോ ആയ കുഞ്ഞു ജനിച്ചാൽ, ആ കുഞ്ഞിന്റെ പിതൃത്വം വരെ ചോദ്യം ചെയ്യപ്പെടുന്ന സംഭവങ്ങൾ ഉണ്ടായിട്ടുണ്ട്. അങ്ങനെയുള്ള കുട്ടികളെ ഉപേക്ഷിച്ചു പോയവരൊക്കെയുള്ള നാടാണ് ഇത്. 

വിവാഹം നടക്കാൻ ബുദ്ധിമുട്ടാണ്. ഞങ്ങളുടെ വീട്ടില്‍ നിന്നുപോലും കല്യാണം കഴിക്കാനോ കഴിച്ചുവരാനോ ആളുകള്‍ ഭയക്കുന്നു വേറെ ചിലർക്ക് ഇത് അന്ധവിശ്വാസമാണ്. വിദ്യാഭ്യാസം ഉള്ളവരിലും ഇല്ലാത്തവരിലും ഇതുണ്ട്. ഞങ്ങൾ ചെകുത്താന്റെ പ്രതിരൂപമാണെന്നും ശാപം കിട്ടി ജനിച്ചവരാണെന്നും വിശ്വസിക്കുന്നവരുണ്ട്. വേറെ ചിലരുടെ വിശ്വാസം, ഞങ്ങൾ ദൈവത്തിന്റെ പ്രത്യേക സൃഷ്ടിയാണെന്നും ഞങ്ങളെപ്പോലുള്ളവരുമായി ലൈംഗികബന്ധത്തിലേർപ്പെട്ടാൽ എയ്ഡ്സ് മാറുമെന്നുമൊക്കെയാണ്. ഇതെല്ലാം, കുറച്ചുകാലം മുൻപു വരെ ആഫ്രിക്കയിൽ പ്രചരിച്ചിരുന്ന അന്ധവിശ്വാസങ്ങളാണ്. ഇന്റർനെറ്റ് സാർവത്രികമായതോടെ ആ വിശ്വാസങ്ങളും വ്യാപകമായി പ്രചരിച്ചു.  

∙ നരകിച്ചു മരിക്കേണ്ട അവസ്ഥ

ഉഷ്ണതരംഗ ഭീതിക്കു മുൻപും വെയിൽ ഞങ്ങൾക്കു ബുദ്ധിമുട്ടായിരുന്നു. പരിധിക്കപ്പുറത്തെ വെയിൽ ഞങ്ങളെ ബാധിക്കാറുണ്ട്. ഇപ്പോൾ 40 ഡിഗ്രിക്കു മുകളിലാണ് പുറത്തെ ചൂട്. മറ്റുള്ളവരേക്കാൾ സൂര്യാതപം ഏൽക്കാനുള്ള സാധ്യത ഞങ്ങൾക്കു കൂടുതലാണ്. കൂടുതൽ തവണ ഇങ്ങനെ സംഭവിക്കുന്നത് ആരോഗ്യത്തെ പ്രതികൂലമായി ബാധിക്കും. അതിൽ നിന്നു സാധാരണ ജീവിതത്തിലേക്കു തിരിച്ചു വരാൻ, ഒട്ടും വെയിൽ ഇല്ലാത്ത സ്ഥലത്ത് അടച്ചു പൂട്ടി ഇരിക്കേണ്ടി വരും. സൂര്യപ്രകാശത്തിലെ യുവി രശ്മികൾ നേരിട്ട് ഏൽക്കുന്നതു വഴി മെലനോമ എന്ന ത്വക്ക് കാൻസർ വരാനുള്ള സാധ്യതയും കൂടുതലാണ്.