Exclusive Interview

അന്ന് ഹൃദയത്തിൽ നമോ; പിന്നാലെ കേസ്; ‘മോദിയെ തകർക്കാൻ എനിക്ക് 200 രൂപ മതി’; ശ്യാം രംഗീലയെ ആർക്കാണ് ഭയം?

2016 വരെ ഞാൻ പാർട്ടിയെ പിന്തുണച്ചിരുന്നു. 2017ലാണ് സ്റ്റാർ പ്ലസ് ചാനലിലെ ഗ്രേറ്റ് ഇന്ത്യൻ ലാഫ്റ്റർ ചാലഞ്ച് എന്ന സ്റ്റാൻഡപ് കോമഡി റിയാലിറ്റി ഷോയിൽ പങ്കെടുക്കുന്നത്. അതിൽ മോദിയേയും മറ്റു ഞാൻ അനുകരിച്ചിരുന്നു. എന്നാൽ എന്റെ ഷോയുടെ ടെലികാസ്റ്റ് തടയപ്പെട്ടു. മോദിയെ അനുകരിച്ചെങ്കിലും അതിൽ രാഷ്ട്രീയ ഉള്ളടക്കമുണ്ടായിരുന്നില്ല. എന്നിട്ടും ആ പരിപാടി സംപ്രേഷണം ചെയ്യപ്പെട്ടില്ല. സർക്കാരിന്റെ സമ്മർദ്ദം മൂലമാണ് ചാനൽ അതിനു തയാറാകാതിരുന്നതെന്നാണ് ഞാൻ കരുതുന്നത്. അങ്ങനെ ഞാൻ ആ റിയാലിറ്റി ഷോയിൽ നിന്ന് പുറത്തായി. ഇത് എനിക്ക് വലിയ പ്രയാസമുണ്ടാക്കി. ഇതായിരുന്നു തുടക്കം. പിന്നീട് രാജ്യത്തെ മറ്റ് സാമൂഹിക പ്രശ്നങ്ങൾ കൂടി കണ്ടതോടെ ബിജെപി അനുഭാവം ഉപേക്ഷിച്ചു.

∙ കുടുംബം?

കുടുംബത്തിന്റെ നിലപാടുകളിലും മാറ്റം വന്നു. സ്ഥാനാർഥിയെ നോക്കിയാണിപ്പോൾ അച്ഛൻ വോട്ട് ചെയ്യുന്നത്. അച്ഛൻ പറയുന്നതനുസരിച്ചാണ് അമ്മയുടെ വോട്ട്. ചേട്ടൻ ബിജെപി അനുഭാവിയാണ്. പക്ഷേ, വാരാണസിയിൽ എനിക്കുണ്ടായ അവസ്ഥ ചേട്ടന്റെ സമീപനത്തിൽ മാറ്റമുണ്ടാക്കുമെന്നാണ് എനിക്ക് തോന്നുന്നത്.

∙ നാമനിർദേശപത്രികയുമായി ബന്ധപ്പെട്ട പ്രശ്നമെന്തായിരുന്നു?

ആരുടെയൊക്കെ പത്രിക വാങ്ങണം, ആരുടെയൊക്കെ വാങ്ങരുത്, ആരുടെയൊക്കെ തള്ളണം എന്ന് കൃത്യമായി അവർ തീരുമാനിച്ചുറപ്പിച്ചിരുന്നു. എല്ലാം നേരത്തേ പ്ലാൻ ചെയ്തതുപോലെയായിരുന്നു. 2 ദിവസം ക്യൂവിൽ കാത്തുനിന്ന്, മൂന്നാം ദിവസമാണ് എനിക്ക് അകത്തുകയറി പത്രിക നൽകാനായത്. അതും പത്രിക സമർപ്പിക്കാനുള്ള അവസാന ദിവസം 3 മണിയോടെ. എന്റെ അഭിഭാഷകരെയടക്കം ആരെയും അകത്തേക്കു കടത്തിവിട്ടില്ല. ഞാൻ ഒറ്റയ്ക്കായിരുന്നു. സത്യവാചകം ചൊല്ലിയില്ലെന്ന് പറഞ്ഞാണ് ഇപ്പോൾ പത്രിക തള്ളിയിരിക്കുന്നത്. ഇതിനെക്കുറിച്ച് എനിക്കറിയില്ലായിരുന്നു. ഉദ്യോഗസ്ഥരാരും പറഞ്ഞുതന്നുമില്ല. അഭിഭാഷകരെ പുറത്തുനിർത്തിയിരിക്കുകയായിരുന്നു.

ഞാൻ ആദ്യമായിട്ടല്ലേ തിരഞ്ഞെടുപ്പിൽ പത്രിക നൽകുന്നത്. ഇതൊക്കെ ഞാൻ എങ്ങനെ അറിയാനാണ്? സത്യവാചകത്തിന്റെ കാര്യം നിങ്ങൾ പറഞ്ഞില്ലല്ലോ എന്നു ചോദിച്ചപ്പോൾ അത് ഞങ്ങളുടെ പണിയല്ലെന്നായിരുന്നു ഉദ്യോഗസ്ഥരുടെ മറുപടി. എല്ലാ ദിവസവും ഒട്ടേറെ ആളുകൾ പത്രിക നൽകാൻ എത്തിയിരുന്നു. എന്നാൽ പ്രവേശനം നൽകിയത് ഏതാനും ചിലർക്കു മാത്രം. മനഃപൂർവം കാലതാമസം ഉണ്ടാക്കാനായി ചിലർ ഡമ്മി പത്രികകൾ സമർപ്പിച്ചതാണോയെന്നു പോലും സംശയിക്കുന്നു. പലരും ക്യൂ നിന്ന് മടുത്ത് തിരികെ പോകുന്ന അവസ്ഥ വരെയുണ്ടായി. ഇത് വാരാണസിയിൽ മാത്രമല്ല, യുപിയിൽ പല മണ്ഡലങ്ങളിലും ഇതേ അവസ്ഥയുണ്ടെന്ന് പിന്നീട് പലരും പറഞ്ഞു. 

∙ നിയമനടപടി സ്വീകരിക്കുമോ?

തീർച്ചയായും. ഇത് ഞങ്ങളുടെ ആത്മാഭിമാനത്തിന്റെ കൂടി പ്രശ്നമാണ്. അഭിഭാഷകരുമായി സംസാരിക്കുന്നുണ്ട്.

∙ മോദിയെ അപേക്ഷിച്ച് താങ്കൾ എത്രയോ ചെറിയ ഒരു വ്യക്തിയാണ്. എന്നിട്ടും താങ്കളുടെ സ്ഥാനാർഥിത്വം ചിലരെ അസ്വസ്ഥപ്പെടുത്തുന്നത് എന്തുകൊണ്ടാകാം?

അതിന് ഒറ്റ കാരണമേയുള്ളൂ, മോദി 100 കോടി രൂപ മുടക്കി സമൂഹമാധ്യമങ്ങളിലുണ്ടാക്കുന്ന ഇമേജ് 200 രൂപ ചെലവിൽ ഞാനെടുക്കുന്ന ഒരു വിഡിയോ കൊണ്ട് തകരുമെന്നതാണ് പേടി. വീട്ടിൽ നിന്ന് പോയിവരാനുള്ള എന്റെ ചെലവ് മാത്രമാണ് 200 രൂപ. പെട്രോൾ വില വർധനയുമായി ബന്ധപ്പെട്ട് ഞാൻ ചെയ്ത വിഡിയോയുടെ ആകെയുള്ള ചെലവാണ് ഈ 200 രൂപ. ഞാനിവിടെ മത്സരിച്ചാൽ, അടുത്ത 20 ദിവസം ഞാനെന്തങ്കിലുമൊക്കെ ചെയ്യുമെന്ന് ഇവർക്ക് നന്നായി അറിയാം. ഇത് മോദിജിയുടെ ഇമേജിന് ക്ഷതമുണ്ടാക്കാം. ഇത്രയും ഏകാധിപത്യ പ്രവണത ഒരിക്കലുമുണ്ടായിട്ടില്ല.

∙ നിങ്ങളെ ബിജെപി അനുഭാവികൾ വല്ലാതെ ട്രോൾ ചെയ്യുന്നുണ്ടല്ലോ. തിരഞ്ഞെടുപ്പിന്റെ പേരും പറഞ്ഞ് പലരുടെയും കയ്യിൽ നിന്ന് പണം വാങ്ങിയെന്നു വരെ ആരോപണമുയർത്തിയിട്ടുണ്ട്.

അവർ ചെയ്യുന്നതെന്താണെന്ന് അവർക്ക് തന്നെ അറിയില്ല. അവർ ചെയ്യുന്നത് തെറ്റാണ്. തമാശ പറയുകയാണ് എന്റെ ജോലി, അവരുടേത് ട്രോൾ മാത്രം. ഞാൻ അവർക്ക് മറുപടി നൽകുമ്പോൾ അവർക്ക് തിരിച്ചൊന്നും പറയാനില്ല. എല്ലാവർക്കും വൈകാതെ കാര്യങ്ങൾ മനസ്സിലാകും.

∙ പെട്രോൾ വിലവർധനവിനെക്കുറിച്ച് താങ്കൾ ചെയ്ത വിഡിയോയ്ക്കു പിന്നാലെ ഒരു കേസ് വന്നിരുന്നു. അതിൽ പിന്നെ എന്തു സംഭവിച്ചു?

ആ കേസ് അവസാനിച്ചു. ഞാനൊരു പെട്രോൾ പമ്പിലാണ് അത് ഷൂട്ട് ചെയ്തത്. ആ പമ്പിന്റെ കമ്പനിയുടെ സമ്മർദത്തെത്തുടർന്ന് ഡീലർഷിപ്പ് എടുത്ത വ്യക്തി എനിക്കെതിരെ കേസ് കൊടുത്തു. ഡീലർക്ക് എന്നോട് ഒരു പ്രശ്നവുമില്ലായിരുന്നു. അയാൾക്ക് കേസ് കൊടുക്കാനും താൽപര്യമുണ്ടായിരുന്നില്ല. പക്ഷേ സ്റ്റോക്ക് മുടങ്ങുമെന്നായതോടെയാണ് നിർബന്ധിതനായത്. ഡീലർഷിപ്പ് അവസാനിപ്പിക്കുമെന്നും കമ്പനിയുടെ ഭീഷണിയുണ്ടായിരുന്നു. ഡീലർക്ക് വേണ്ടി ഞാൻ കമ്പനിയോട് ക്ഷമ പറഞ്ഞു. അതോടെ പ്രശ്നം തീർന്നു. വിഡിയോ നീക്കണമെന്ന് ആവശ്യപ്പെട്ടെങ്കിലും ഞാൻ അംഗീകരിച്ചില്ല. ഈ വിഡിയോ ഇപ്പോഴും എന്റെ ചാനലിൽ കാണാം.