ആരാധനയ്ക്ക് പിണറായി യോഗ്യൻ; എന്റെ ചുണ്ടിൽ പഞ്ചസാര വയ്ക്കേണ്ട; ഇനി മത്സരത്തിനില്ല: എ.കെ.ബാലൻ

∙ പിണറായിയോടു സ്നേഹം കൂടിക്കൂടി വന്നപ്പോൾ ‘മരിച്ചാൽ പോലും കണ്ണടയില്ല’ എന്നു ശപിക്കാൻ വരെ മുതിർന്നല്ലോ?

ചെറുപ്പത്തിൽ അമ്മ പറഞ്ഞു കേട്ടിട്ടുള്ള ഒരു പ്രയോഗമാണ്. എനിക്കെതിരെ ഒരാൾ വല്ലാത്ത ക്രൂരത കാട്ടിയപ്പോഴും അമ്മ അതു പറഞ്ഞിട്ടുണ്ട്. ‘അവൻ മരിച്ചാലും കണ്ണടയില്ല’ ആ വിഷയം എന്താണെന്നു ഞാൻ പറയുന്നില്ല. പിണറായി എന്ന മനുഷ്യന് എപ്പോഴെങ്കിലും നിങ്ങൾ സ്വൈര്യം കൊടുക്കേണ്ടേ? അത്ര ഗ്ലാമർ അദ്ദേഹത്തിനു വേണ്ട, ജീവിക്കാനേ ഞങ്ങൾ അനുവദിക്കില്ല എന്ന് മാധ്യമങ്ങൾക്കു തോന്നുമ്പോൾ ക്യാമറ കണ്ണുകൾ പോലെ അടയാതിരിക്കും എന്നു ഞാൻ പറഞ്ഞെന്നു കരുതിയാൽ മതി. 

∙ രണ്ടുതവണ മന്ത്രിയായിരുന്ന ആളല്ലേ താങ്കൾ, മുഖ്യമന്ത്രി പുറത്തു പോകുമ്പോൾ സ്വകാര്യ യാത്രയാണെങ്കിൽ പോലും ഒരു വാർത്താക്കുറിപ്പ് ഇറക്കേണ്ടതല്ലേ? എന്തിനാണ് ഈ രഹസ്യ സ്വഭാവം?

ഔദ്യോഗികമായി പോകുമ്പോൾ വിശദാംശങ്ങളെ മാധ്യമങ്ങളെ അറിയിക്കും. വ്യക്തിപരമായി പോകുമ്പോൾ കേന്ദ്രസർക്കാരിനെ പക്ഷേ അറിയിക്കേണ്ടതുണ്ട്. പാർട്ടിയുടെ അംഗീകാരം വേണം. അതു രണ്ടും ചെയ്തിട്ടുണ്ട്. അദ്ദേഹത്തിന് വരുമാനമുണ്ട്, ബാങ്ക് നിക്ഷേപമുണ്ട്. പൂർണമായും സ്വന്തം ചെലവിൽതന്നെയാണ് അദ്ദേഹം പോയത്. 

∙ സിപിഎം സംസ്ഥാന സെക്രട്ടറിയായ പിണറായി വിജയൻ പുറത്തു പോകുമ്പോൾ ആവശ്യമുണ്ടെങ്കിൽ അറിയിച്ചാൽ മതി, പക്ഷേ കേരളത്തിന്റെ മുഖ്യമന്ത്രി രണ്ടാഴ്ചത്തേയ്ക്ക് വിദേശത്തു പോകുന്നത് അങ്ങനെയല്ലല്ലോ? 

അതു പറഞ്ഞിട്ടുണ്ടല്ലോ. എവിടേക്കെല്ലാമാണ് പോകുന്നതെന്നും കേന്ദ്രസർക്കാരിന്റെ അംഗീകാരം വാങ്ങിയെന്നും പറഞ്ഞല്ലോ. 

∙ അദ്ദേഹമോ ഓഫിസോ ഔദ്യോഗികമായി അക്കാര്യം അറിയിച്ചിട്ടില്ലല്ലോ? പത്രക്കുറിപ്പും ഉണ്ടായില്ല...

വിദേശത്തേയ്ക്കുളള സ്വകാര്യ സന്ദർശനമെന്നു പറയുമ്പോൾ അതിൽ ഔപചാരികത ഇല്ലല്ലോ. പിന്നെ പാർട്ടിയുടെ അംഗീകാരമുണ്ടെന്ന് സെക്രട്ടറിയും പറഞ്ഞല്ലോ. അതിന്റെ മുകളിൽ പിന്നെ വിവാദം ഉണ്ടാക്കേണ്ട കാര്യമില്ല. 

∙ ചെലവിന്റെ കാര്യം പാർട്ടിയെ അറിയിച്ചോ? 

അതിന്റെ ആവശ്യമില്ലല്ലോ. വ്യക്തിപരമായിട്ടാണ് പോകുന്നതെന്നു പറയുമ്പോൾതന്നെ അക്കാര്യം അന്തർലീനമാണല്ലോ. 

∙ താങ്കൾ ‘മ്യൂസിയം’ ആകുമെന്നു പ്രവചിച്ച നവകേരള ബസ് ഇപ്പോൾ ബെംഗളൂരു റൂട്ടിൽ സർവീസ് നടത്തുകയാണല്ലോ? പ്രവചനം പിഴച്ചോ?

ആ പ്രവചനം ഏറ്റവും ശരിയായില്ലേ? അതിൽ സീറ്റേ കിട്ടുന്നില്ലല്ലോ. ലൈഫ് ടൈം കഴിയുമ്പോൾ ബസ് കാണാനായി ടിക്കറ്റെടുത്ത് ആളു കാണും എന്നാണ് പറഞ്ഞത്. ഇംഎംഎസും സി.അച്യുതമേനോനും ഉമ്മൻചാണ്ടിയുമെല്ലാം ഉപയോഗിച്ചിരുന്ന സാധനങ്ങൾ എത്ര വിലപിടിപ്പുള്ളതായിട്ടാണ് ഇന്ന് എല്ലാവരും കാണുന്നത്. കേരള മന്ത്രിസഭ ഒരു മാസം മുഴുവൻ യാത്ര ചെയ്ത ബസിനും അതേ മൂല്യം ഉണ്ടാകും. ആ അനുഭൂതി ഇപ്പോൾ നിങ്ങൾക്കു മനസ്സിലാകില്ല. 

∙ വ്യക്തിപൂജയ്ക്ക് സിപിഎം എതിരാണല്ലോ, താങ്കളുടെ പല കമന്റുകളും ആ ഗണത്തിൽ വരില്ലേ?

അതിൽ അനൗചിത്യമൊന്നുമില്ല. ചില വ്യക്തികളോട് വല്ലാത്ത ആരാധന ഉണ്ടാകും. അത് ഏതു പാർട്ടി എന്നില്ല. ചില ആളുകളെ അടുത്തു പരിചയപ്പെടുമ്പോഴാണ് അവരുടെ വ്യക്തിത്വത്തിന്റെ മാഹാത്മ്യം മനസ്സിലാകുക. നമ്മുടെ വ്യക്തിത്വത്തെ പരിപാകപ്പെടുത്തുന്നതിലും വരുന്ന തലമുറയെ ഉദ്ദീപിപ്പിക്കുന്നതിലും എല്ലാം അങ്ങനെയുള്ളവരുടെ സമീപനം വലിയ പങ്കുവഹിക്കും. അപ്പോൾ നമ്മുടെ വർത്തമാനത്തിലും പെരുമാറ്റത്തിലും എല്ലാം ഒരു ആരാധനാ മനോഭാവം വരും. അടിയന്തരാവസ്ഥ പ്രഖ്യാപിച്ചതിനോട് എതിർപ്പുണ്ടെങ്കിലും ഇന്ദിരാഗാന്ധി, ഇംഎംഎസ്, സി.എച്ച് കണാരൻ ഒക്കെ ഇതുപോലെ ആകർഷിച്ചവരാണ്. 

∙ താങ്കളിൽ അങ്ങനെ എന്തു സ്വാധീനമാണ് പിണറായി ഉണ്ടാക്കിയത്? 

എനിക്കു മാത്രമല്ല. അദ്ദേഹവുമായി പരിചയപ്പെടുന്ന ആർക്കും അതു തോന്നാം. അദ്ദേഹത്തിന് എല്ലാറ്റിലും മൗലികത ഉണ്ട്. ഒരാളുടെയും സേവ പിടിക്കാൻ പോകില്ല. കാര്യങ്ങൾ മെറിറ്റിന്റെ അടിസ്ഥാനത്തിൽ മാത്രമേ ചെയ്യൂ. ആരെങ്കിലും പോയി എന്തെങ്കിലും പറയുന്നത് വിശ്വസിക്കില്ല.ഒരാൾ പറയുന്നതു മറ്റൊരാളോടു പറയില്ല. രാഷ്ട്രീയത്തിലെ മാന്യതയില്ലാത്ത സമീപനങ്ങൾക്ക് കൂട്ടു നിൽക്കില്ല. 

വ്യക്തിജീവിതത്തിലായാലും ഔദ്യോഗിക ജീവിതത്തിലായാലും എല്ലാറ്റിലും വല്ലാത്ത ചിട്ട ഉണ്ട്. കണ്ടു പഠിക്കേണ്ടതാണ്. ചിലയാളുകൾക്കു ചില പ്രത്യേക കഴിവുകളുണ്ട്, ആ വ്യക്തിത്വങ്ങൾ മറ്റുളളവരിൽ ചെലുത്തുന്ന സ്വാധീനം വിലകുറച്ചു കണ്ടിട്ടു കാര്യമില്ല. സംഘാടകനായും ഭരണാധികാരിയായും നിർഭയനായ നേതാവ് എന്ന നിലയിലും പിണറായി ആളുകളെ ആകർഷിക്കുന്ന ഒരു നേതാവ് തന്നെയാണ്. ഞാനും കോടിയേരിയും ഇ.പി. ജയരാജനുമെല്ലാം പിണറായിയുടെ ശിക്ഷണത്തിൽ മുന്നോട്ടു വന്നവരാണ്. 

∙ സിപിഎം ചിഹ്നമായ അരിവാൾ ചുറ്റികയെ നീരാളി, ഈനാം പേച്ചി എന്നിവയുമെല്ലാമായി താരതമ്യം ചെയ്തത് കടന്നു പോയില്ലേ? 

രാജ്യത്തിന്റെ ഭരണഘടന, എൽഡിഎഫ് സർക്കാർ, പാർട്ടി– ഇതു മൂന്നും സംരക്ഷിക്കുക എന്നതായിരുന്നു ഈ തിരഞ്ഞെടുപ്പിലെ ഞങ്ങളുടെ ലക്ഷ്യങ്ങൾ. താങ്കൾ ഉദ്ദേശിക്കുന്ന കോഴിക്കോട്ടെ എന്റെ പ്രസംഗത്തിൽ 52 മിനിറ്റും ആദ്യത്തെ രണ്ടു കാര്യത്തെക്കുറിച്ചാണ് പറഞ്ഞത്. പാർട്ടി ചിഹ്നത്തെക്കുറിച്ചു പറഞ്ഞത് ഒന്നരമിനിറ്റാണ്. അതു മാത്രം വാർത്തയാക്കി ചിഹ്നം സംരക്ഷിക്കാനാണ് മത്സരിക്കുന്നതെന്ന വ്യാഖ്യാനം മാധ്യമങ്ങൾ കൊടുത്തു. 

∙ താങ്കളുടെ ആ പ്രസ്താവനയെക്കുറിച്ചു താങ്കളോടു തന്നെ ചോദിക്കണമെന്നാണല്ലോ ഗോവിന്ദൻ പറഞ്ഞത്? പാർട്ടിക്ക് അതൃപ്തി ഉണ്ടായോ? 

അതൃപ്തി ഉണ്ടായിട്ടില്ലെന്നു മാത്രമല്ല, എന്റെ പ്രസംഗം വൈകാരികമായി സഖാക്കളെ വല്ലാതെ സ്വാധീനിച്ചു. ഏതു സാഹചര്യത്തിലാണ് അതു പറ‍ഞ്ഞതെന്ന് എന്നോടു ചോദിക്കാനാണ് സെക്രട്ടറി പറഞ്ഞത്. തിരഞ്ഞെടുപ്പിൽ ചിഹ്നം നഷ്ടപ്പെടാൻ പോകുന്നെന്ന അപകട സന്ദേശം പോയാൽ പാർട്ടിയെ സംരക്ഷിക്കാനായി സഖാക്കൾ കൂട്ടത്തോടെ ഇറങ്ങും. അതാണ് സംഭവിച്ചത്.

∙ തിരഞ്ഞെടുപ്പു ഫലം വരുമ്പോൾ എന്തു സംഭവിക്കും? ചിഹ്നം നഷ്ടപ്പെടുന്ന സ്ഥിതിയാകുമോ?

ഒരിക്കലും സംഭവിക്കില്ല. എല്ലാ സീറ്റുകളും ജയിക്കുമെന്ന് യുഡിഎഫ് പറയുന്നതു പോലെ ഞങ്ങൾ അവകാശപ്പെട്ടാൽ അതു ശരിയാകില്ല. പക്ഷേ ചരിത്ര നേട്ടം എൽഡിഎഫിന് ഉണ്ടാകും. 

∙ ലോക്സഭയിലേക്കുള്ള മത്സര രംഗത്തു താങ്കളുടെയും ഭാര്യയുടെയും പേരുണ്ടായിരുന്നല്ലോ? 

എന്നെയും എന്റെ പാർട്ടിയേയും അറിയാവുന്ന ഒരാളും ഞാൻ സ്ഥാനാർഥിയാകുമെന്നു പറയില്ല. കാരണം എന്റെ ശക്തമായ നിലപാട് പാർട്ടിയെ അറിയിച്ചതാണ്. അതു തീരുമാനം തന്നെയാണ്. എന്നെ സംബന്ധിച്ചു പരമാവധി പരിഗണന പാർട്ടി നൽകിയിട്ടുണ്ട്. താങ്ങാൻ പറ്റാത്ത സ്ഥാനങ്ങളിലേയ്ക്കും പരിഗണിക്കുമെന്ന തോന്നൽ വന്നപ്പോൾ അതു വേണ്ടെന്ന് അങ്ങോട്ടു പറഞ്ഞിട്ടുള്ളയാളാണ് ഞാൻ. കൊക്കിലൊതുങ്ങുന്നതേ ഞാൻ കൊത്തൂ. ‘ബാലനെ തഴഞ്ഞു, ബാലനെ തഴഞ്ഞു’ എന്നു തെറ്റായി പ്രചരിപ്പിക്കുകയായിരുന്നു. അങ്ങനെ പ്രചരിപ്പിച്ചിട്ട് എന്തെങ്കിലും എന്റെ വായിൽ നിന്നു കിട്ടാൻ നോക്കിയിരിക്കുന്നവർ നിരാശരാകുകയേയുള്ളൂ. 

ഞാൻ അസംതൃപ്തൻ അല്ലെന്നു മാത്രമല്ല, അങ്ങേയറ്റം ഭാഗ്യവാനാണെന്നു കൂടിയാണ് കരുതുന്നത്. എന്നെ അറിയാവുന്ന ആരും വേണ്ടാത്ത ഒരു കാര്യത്തിലേയ്ക്ക് എന്റെ പേര് വലിച്ചിഴയ്ക്കില്ല. ഭാര്യ ഡോ. പി.കെ. ജമീലയുടെ കാര്യവും അങ്ങനെത്തന്നെ. അവർ സിപിഎമ്മിന്റെ സമുന്നത നേതാവും കേന്ദ്രകമ്മിറ്റി അംഗവുമായിരുന്ന പി.കെ.കുഞ്ഞച്ചന്റെ മകളാണ്. കഴിഞ്ഞ നിയമസഭാ തിരഞ്ഞെടുപ്പിൽ മറ്റു മേഖലകളിലെ പ്രമുഖരെ പരിഗണിച്ചപ്പോൾ അവരുടെ പേരും ചർച്ച ചെയ്തു. അക്കാര്യം അന്നു സെക്രട്ടറിയായിരുന്ന കോടിയേരി ബാലകൃഷ്ണൻതന്നെ ഒരു അഭിമുഖത്തിൽ പറഞ്ഞിരുന്നു. അതിന്റെ പേരിൽ വിവാദങ്ങൾ വന്നതോടെ മത്സരിക്കാനില്ലെന്ന നിലപാട് അവരെടുത്തു. അതു ഞാൻ മുഖേന പാർട്ടിയെയും അറിയിച്ചു. അതും കോടിയേരി പുറത്തു പറഞ്ഞിട്ടുണ്ട്. 

∙ അപ്പോൾ ഇനി തിരഞ്ഞെടുപ്പ് മത്സരങ്ങൾക്കില്ല എന്നാണോ? 

ഞാൻ അവസാനിപ്പിച്ചതാണ്. ഇനി ലോക്സഭയിലേക്കോ നിയമസഭയിലേക്കോ ഒന്നുമില്ല. ശരീരവും മനസ്സും താങ്ങേണ്ടേ? ആ അധ്യായം അവസാനിച്ചു. 

∙ കൊക്കിലൊതുങ്ങുന്നതേ കൊത്തൂ എന്നു താങ്കൾ പറഞ്ഞത് ദലിത് വിഭാഗത്തിൽനിന്ന് ആദ്യ പൊളിറ്റ് ബ്യൂറോ അംഗം ആകാൻ ഉണ്ടായിരുന്ന സാധ്യതയെക്കുറിച്ചാണോ? 

ഒരു പദവിയെക്കുറിച്ചും ഞാൻ പറഞ്ഞിട്ടില്ല. ആളുകൾ അങ്ങനെ ചിന്തിക്കുന്നതിലും പറയുന്നതിലും തകരാറില്ല. പക്ഷേ ആരെങ്കിലും ചുണ്ടിൽ പഞ്ചസാര വച്ചാൽ അതു നുണച്ചിറക്കുന്ന രീതി എ.കെ.ബാലനില്ല.