‘രാത്രി മെസഞ്ചറിൽ വിളി; ആ കണ്ണുകൾ പെണ്ണുടുപ്പുകളുടെ നീളമളക്കും; സോഷ്യൽ മീഡിയ ആണുങ്ങൾ ആർമാദിക്കുന്നിടം’

പുരുഷൻമാരെപ്പോലെ വലിയൊരു വലയത്തിലേക്ക് അതു വികസിപ്പിക്കാൻ സ്ത്രീകൾക്കു സാധിക്കാത്തത് ഈ സ്റ്റോക്കിങ് കൊണ്ടും വളഞ്ഞിട്ടാക്രമണം കൊണ്ടുമാണ്. ഒരാൾക്ക് 5000 ഫ്രണ്ട്സും 10,000 ഫോളോവേഴ്സുമുണ്ടെങ്കിൽ ആ 15,000 മനുഷ്യരാണ് ഒരാളുടെ ഡെമോഗ്രാഫിക് സർക്കിൾ. അതിലെത്ര പേർ നേരിട്ട് അറിയാവുന്നവരാകും, എത്ര പേർ മ്യൂച്വൽ ഫ്രണ്ട്സ് വഴി വന്നവരാകും, എത്ര പേർ ആദ്യമായി വന്നവരാകും തുടങ്ങിയ പ്രശ്നങ്ങളുണ്ട്. അതിലെത്രപേർ നെഗറ്റീവ് ആയിരിക്കും എത്ര പേർ ജെനുവിൻ ആയിരിക്കും തുടങ്ങിയ കാര്യങ്ങളുമുണ്ട്. ഇവയെല്ലാം നേരിട്ടു തങ്ങളുടെ സോഷ്യൽ പ്രൊഫൈൽ നടത്തിക്കൊണ്ടുപോകുക സ്ത്രീക്ക് ഒട്ടുമേ എളുപ്പമല്ല. 

അതുകൊണ്ടു തന്നെയാണു പലരും തങ്ങളുടെ സമൂഹമാധ്യമങ്ങളിലെ ഇടപെടലുകൾ ലോക്കിട്ട് വയ്ക്കുന്നതും. വിർച്വൽ സ്പേസിൽ നമ്മുടെ സ്ത്രീകൾ എത്രമാത്രം അരക്ഷിതരാണ് ഇന്ന് എത്രപേർക്ക് അറിയുമോ എന്തോ! നമ്മുടെ ഭാഷയിലെ ഭൂരിഭാഗം അസഭ്യപദങ്ങളും സ്ത്രീവിരുദ്ധ പദങ്ങളാണല്ലോ. ഫേക്ക് ഐഡികളിൽ നിന്നു വരുന്ന അസഭ്യവർഷങ്ങളത്രയും ഇതുപോലത്തെ പദപ്രയോഗങ്ങളുപയോഗിച്ചാണ്. അതു സ്ഥിരമായി കേൾക്കേണ്ടിയും കാണേണ്ടിയും വരുന്ന ഒരാളുടെ മനസ്സിനുണ്ടാകുന്ന പോറൽ എത്രമാത്രമായിരിക്കും’. ഐശ്വര്യ ചൂണ്ടിക്കാട്ടി. 

∙ ‘ബ്ലോക്ക്‌ ചെയ്ത അക്കൗണ്ടുകളിൽ‌ 99 ശതമാനവും ആണുങ്ങൾ’

2017ൽ ആദ്യമായി ഫെയ്സ്ബുക്ക്‌ അക്കൗണ്ട് തുടങ്ങിയപ്പോൾ സ്വന്തം മുഖം വ്യക്തമായി കാണും വിധം പ്രൊഫൈൽ പിക് വച്ചപ്പോൾ ‘കുടുംബത്തിൽ പിറന്ന പെണ്ണുങ്ങൾ സ്വന്തം മുഖവും ഫിഗറും സമൂഹമാധ്യമങ്ങളിൽ പ്രദർശിപ്പിക്കാറില്ല, ഇതൊന്നുമത്ര സേഫ് അല്ല’ എന്ന് പറഞ്ഞുപദേശിച്ച ആൺസുഹൃത്തിനെ ഓർക്കുന്നുവെന്നു പറയുന്നു എഴുത്തുകാരി പുണ്യ സി.ആർ. ‘അന്ന് അതുകേട്ട് പതിനേഴുവയസ്സുകാരിയായ ഞാൻ ചെറുതായൊന്നു പരിഭ്രമിച്ചുവെങ്കിലും പ്രൊഫൈൽ ഫോട്ടോ മാറ്റി പകരം റോസാപ്പൂവിന്റെ പടം വയ്ക്കാനൊന്നും നിന്നില്ല. സമൂഹമാധ്യമ അക്കൗണ്ടുകൾ തുടങ്ങിയ കാലം തൊട്ട് ഇന്നുവരേയ്ക്കും ബ്ലോക്ക്‌ ചെയ്ത അക്കൗണ്ടുകളുടെ എണ്ണം ഏറെയാണ്. അതിൽ 99 ശതമാനവും ആണുങ്ങൾ- ആണുങ്ങളുടെ ഫേക്ക് അക്കൗണ്ടുകൾ. ചെറിയ flirting മുതൽ ഭീഷണി മെസേജുകൾ വരെ മെസഞ്ചറുകളിൽ വന്നിട്ടുണ്ട്. 

പലതും ആദ്യമൊക്കെ വലിയ അരക്ഷിതാവസ്ഥകൾക്കും മാനസികപിരിമുറുക്കങ്ങൾക്കും ഇടയാക്കുമായിരുന്നു. പിന്നെപ്പിന്നെ നേരിടാനുള്ള വഴികൾ കണ്ടുപിടിച്ചു. ആണുങ്ങൾ ആർമാദിക്കുന്ന ഇടങ്ങളാണ് സമൂഹമാധ്യമങ്ങൾ. അവിടെ, സ്ത്രീകളുടെ പേരിൽ തുടങ്ങുന്ന ആൺ ഫേക്ക് ഐഡികൾ മുതൽ സ്ത്രീകളുടെ മുഖവും ശരീരഭാഗങ്ങളും ലൈംഗികവൽക്കരിച്ച് ആഘോഷമാക്കുന്ന അശ്ലീല അക്കൗണ്ടുകൾ വരെയുണ്ട്. പെണ്ണുടുപ്പുകളുടെ നീളം മുതൽ പെൺനടപ്പുകളുടെ താളം വരെ ആൺകണ്ണുകൾ അളന്നെടുക്കും. ‘ഇല വന്ന് മുള്ളിൽ വീണാലും മുള്ളു വന്ന് ഇലേൽ വീണാലും...’ എന്ന് നിരന്തരം ഓക്കാനിക്കും!’ പുണ്യ ചൂണ്ടിക്കാട്ടുന്നു.

∙ ‘വ്യക്തിഹത്യയ്ക്ക് ചിലപ്പോൾ ആൺ–പെൺ വ്യത്യാസമില്ല’

സമൂഹമാധ്യമങ്ങളില്‍ വളരെ ജെനുവിൻ ആയ ആൺ–പെൺ സൗഹൃദങ്ങളുണ്ടെങ്കിലും പാട്രിയാർക്കൽ സൊസൈറ്റിയുടെ എല്ലാ പ്രതിഫലനങ്ങളും സൈബറിടത്തും ദൃശ്യമാണെന്നു പറയുന്നു എഴുത്തുകാരി നിഷ നാരായണൻ. ‘സ്ത്രീകളുടെ ആത്മപ്രകാശനങ്ങളെ അവഹേളനങ്ങളിലൂടെയും അധിക്ഷേപങ്ങളിലൂടെയും അസൂയയോടെയും അഭിമുഖീകരിക്കുന്ന ആ പ്രത്യേക പുരുഷമനോഭാവത്തിന് സൈബറിടത്തിലും വലിയ മാറ്റമൊന്നുമില്ല. മാത്രമല്ല, അതിന്ന് കൂടുതൽ വിഷലിപ്തമായിരിക്കുന്നു. വ്യക്തിഹത്യയും അപവാദപ്രചരണവും ആണ് അടുത്തഘട്ടം. ഈ പ്രക്രിയകൾക്കൊന്നും ചില സമയത്ത് ലിംഗ വ്യത്യാസമില്ല എന്നതാണ് സത്യം. കടുത്ത രീതിയിൽ പ്രതികരിക്കാം, പൂർണമായും അവഗണിക്കാം. ഈ രണ്ട് മാർഗങ്ങളാണുള്ളത്. സ്വയബോധവും സെൽഫ് റെസ്പെക്ടുമുള്ള ഏതൊരു സ്ത്രീയും ഇവിടെ ആനന്ദത്തോടെ തന്നെ ജീവിക്കും’. നിഷയുടെ വാക്കുകളിൽ തികഞ്ഞ ആത്മവിശ്വാസം. 

∙  ‘പിന്നിൽ വലിയൊരു ഗൂഢസംഘം’

സമൂഹമാധ്യമങ്ങളിൽ പരിധിവിട്ടു പെരുമാറുന്നവരെ ഫിൽട്ടർ ഔട്ട് ചെയ്യാനുള്ള ആവശ്യത്തിനുള്ള സൗകര്യങ്ങൾ സമൂഹമാധ്യമങ്ങൾ തന്നെ ഒരുക്കിയിട്ടുണ്ടെന്നാണ് എഴുത്തുകാരി കൃപ അമ്പാടിയുടെ അഭിപ്രായം. ‘പതിനഞ്ചു വർഷത്തോളമായി ദിവസവും രണ്ടു മൂന്നു മണിക്കൂറെങ്കിലും സമൂഹമാധ്യമങ്ങളിൽ ചെലവഴിക്കാറുള്ള വ്യക്തിയാണു ഞാൻ. എന്റെ സെൽഫ് മാർക്കറ്റിങ്ങിന്റെയും സെൽഫ് പ്രമോഷന്റെയും കൂടി ഇടമായിട്ടാണു സമൂഹമാധ്യമങ്ങളെ ഞാൻ കാണുന്നത്. ഇതിലുള്ള വിവിധ തരക്കാരെ ഞാൻ ഡീൽ ചെയ്യാറാണു പതിവ്. ഇതൊരു വിർച്വൽ വേൾഡ് ആയിട്ടാണു ഞാൻ വച്ചിട്ടുള്ളത് എന്നതിനാൽ ഇത്തരക്കാരുടെ ഇടപെടലുകൾ എനിക്കൊരു ശല്യമായി തോന്നിയിട്ടില്ല. ഇതൊരു മാർക്കറ്റിങ് സ്പേസ് ആയി ഞാൻ വിലയിരുത്തുന്നതിനാലാണ് ആ മനോഭാവം. സമൂഹമാധ്യമങ്ങളിലെ ആൾമാറാട്ടക്കാരെ കണ്ടുപിടിക്കാൻ കഴിയാത്തത് പലപ്പോഴും ആശയക്കുഴപ്പമുണ്ടാക്കിയിട്ടുണ്ട്. സ്ത്രീ നാമമുപയോഗിച്ചു പുരുഷൻമാർ നടത്തുന്ന സമൂഹമാധ്യമ ഇടപെടലുകളിൽ വലിയൊരു ചതിയുണ്ടെന്നു ഞാൻ കരുതുന്നു. ഒരുപക്ഷേ, അത്തരം ഇടപെടലുകൾക്കു പിന്നിൽ വലിയൊരു ഗൂഢസംഘം തന്നെ പ്രവർത്തിക്കുന്നുണ്ടാകാം’. കൃപ പറയുന്നു. 

ഒരു പരിഷ്കൃത സമൂഹമാകാൻ നമ്മളിനിയും ഏറെദൂരം സഞ്ചരിക്കാനുണ്ടെന്ന് തെളിയിക്കുന്നു സൈബറിടത്തിലെ ഇത്തരം ഓരോ ആൺ (ഒളിഞ്ഞു) നോട്ടങ്ങളും. പെണ്ണ് കെട്ടിച്ചുവിടേണ്ടവളായ ഒരു സമൂഹം, ലോക്സഭാ തിരഞ്ഞെടുപ്പിൽ അൻപതുശതമാനത്തിലേറെ വോട്ടർമാർ സ്ത്രീകളായിരിക്കുമ്പോഴും പത്തു ശതമാനത്തോളം മാത്രം സ്ഥാനാർഥികൾ വനിതകളായിരിക്കുന്ന ഒരു സമൂഹം, ആൺകുട്ടികൾക്കു വീട്ടിലും നാട്ടിലും സവിശേഷാവകാശങ്ങൾ ഉണ്ടെന്ന് ഇപ്പോഴും വിശ്വസിക്കുന്ന ഒരു സമൂഹം ഇവിടെ സജീവമായി നിലനിൽക്കുന്ന കാലത്തോളം സ്ത്രീകളെ സമൂഹത്തിലും സമൂഹമാധ്യമത്തിലും ഏറ്റവും മോശമായ രീതിയിൽ സമീപിക്കാം എന്നു വിശ്വസിക്കുന്ന ആണുങ്ങൾക്കു തന്നെയാകും ഭൂരിപക്ഷം.