‘അതെ, ഞങ്ങൾ മൂത്രം കുടിക്കുന്നവരാണ്’: എന്തിനാണ് ഇവർ ഒത്തുകൂടുന്നത്? ഇത് ‘ഒഴിച്ചു’ കളയേണ്ടതോ, മരുന്നോ!

ആശങ്ക. പണ്ടു മുതലേ മലയാളിയുടെ മടിയിലുള്ള ദ്വയാർഥ പ്രയോഗം. മൂത്രശങ്കയ്ക്കും സംശയത്തിനും വാഗ്മികൾ മാറിമാറി ആശങ്ക എടുത്തു പൂശും. നാലു പേർ കൂടുന്നിടത്ത്, മൂത്രമൊഴിക്കണമെന്ന് പറയാൻ നാണമുള്ളവർ ചോദിക്കും - ആശങ്ക മാറ്റാൻ എന്താ വഴി? അതോടെ കേൾക്കുന്നവർക്ക് കാര്യം പിടികിട്ടും. ശങ്കക്കാരന് ആശ്വാസവും. എന്നാൽ എത്ര ‘ഒഴിച്ചിട്ടും’ മാറാത്ത മൂത്രശങ്ക വേറെയാണ്. സ്വന്തം മൂത്രം മനുഷ്യന് കുടിക്കാമോ എന്ന ചോദ്യമാണത്. വർഷങ്ങൾ പഴക്കമുള്ളതും ഉത്തരം കിട്ടാത്തതുമായ ചോദ്യം. മുൻ പ്രധാനമന്ത്രി മൊറാർജി ദേശായി മൂത്രം ഉപയോഗിക്കുന്നുണ്ടെന്ന് പരസ്യമാക്കിയതോടെ ആ ചർച്ച ഒരുകാലത്ത് വീണ്ടും സജീവമായിരുന്നു. സ്വന്തം മൂത്രം കഴിക്കാറുണ്ടെന്നു സാക്ഷ്യപ്പെടുത്തി ഇക്കാലത്ത് പലരും രംഗത്തു വന്നെങ്കിലും മൂത്രം നാണിച്ചു നിന്നു. മൂത്രപ്പുരയെ ഒരു കൈയകലത്ത് നിർമിക്കുന്നതു പോലെ മൂത്രത്തിന്റെ ഔഷധ ഗുണം സംബന്ധിച്ച ചർച്ചയും എന്നും പിന്നാമ്പുറത്തുതന്നെ നിന്നു.

ഈ ശങ്കകൾക്കു പരിഹാരമായി യൂറിൻ തെറപ്പിസ്റ്റുകൾ മേയ് 26ന് തൃശൂരിൽ ഒത്തു ചേരുന്നു. സ്വന്തം മൂത്രം കുടിക്കുന്നതുകൊണ്ട് ശരീരത്തിനുണ്ടാകുന്ന ഗുണങ്ങളെ കുറിച്ച് ആളുകളെ ബോധവൽകരിക്കുക എന്നതാണ് യൂറിൻ തെറപ്പി സംസ്ഥാന സമ്മേളനത്തിന്റെ ലക്ഷ്യം. ‘വാട്ടർ ലൈഫ് കേരള’ എന്ന സംഘടനയാണ് മൂത്ര ചികിത്സകരുടെ യോഗം സംഘടിപ്പിക്കുന്നത്. മൂത്രം വിസർജ്യമല്ലെന്നും ഔഷധ ഗുണം ഉള്ളതാണെന്നും വാട്ടർ ലൈഫ് കേരള സംസ്ഥാന പ്രസിഡന്റ് ടി. നാരായണൻ വട്ടോളി പറയുന്നു. എന്നാൽ മനുഷ്യശരീരം പുറന്തള്ളുന്ന വിസർജ്യ വസ്തുവാണ് മൂത്രമെന്ന് ആരോഗ്യ സർവകലാശാല വൈസ് ചാൻസലർ ഡോ. മോഹനൻ കുന്നുമ്മേൽ മുന്നറിയിപ്പു നൽകുന്നു. 

‘പ്രകൃതിയിൽ ഏറ്റവും ബുദ്ധിയുള്ളത് മനുഷ്യ ശരീരത്തിനാണ്. എന്തെങ്കിലും പ്രയോജനം ഉള്ളതാണ് മൂത്രമെങ്കിൽ ശരീരം പുറന്തള്ളുകയില്ല. വേനൽക്കാലത്ത് ശരീരത്തിന് വെള്ളം ആവശ്യമുണ്ട്. അതിനാൽ കുറച്ചു മൂത്രം പുറന്തള്ളും. മഴക്കാലത്ത് വെള്ളം വേണ്ടാത്തതിനാൽ പുറന്തള്ളും. ഈ ബുദ്ധി ശരീരത്തിന്റേതാണ്. മാത്രമല്ല ശരീരത്തിൽ കടന്നു കൂടുന്ന വിഷാംശങ്ങളെ വൃക്ക പുറന്തള്ളുന്നതും മൂത്രത്തിലുണ്ടെന്ന് ഓർക്കുക’. ഡോ. മോഹനൻ പറയുന്നു. ആയുർവേദവും മൂത്രത്തിന് ഔഷധ ഗുണമുണ്ടെന്ന് പ്രചരിപ്പിക്കുന്നില്ലെന്ന് പ്രമുഖ ആയുർവേദ ചികിത്സകൻ ഡോ. കെ.ടി. വിനോദ് കൃഷ്ണനും പറയുന്നു. കടുത്ത നിഷ്കർഷയോടെ മാത്രമാണ് ഗോമൂത്രം പോലും ആയുർവേദം ഉപയോഗിക്കുന്നത്, വിനോദ് വ്യക്തമാക്കുന്നു. 

മൂത്രചികിത്സ സംബന്ധിച്ച അഭിപ്രായ വ്യത്യാസങ്ങൾ തുടരുകയാണ്. ഈ ശങ്കകൾ സംസ്ഥാന സമ്മേളനം തീർക്കുമോ ? ടി. നാരായണൻ വട്ടോളി സംസാരിക്കുന്നു. 

? ശരീരം പുറന്തള്ളുന്ന മൂത്രത്തിന് എന്ത് ഔഷധ ഗുണമാണുള്ളത്

∙ ഏത് ജീവിയുടേതായാലും മൂത്രം ഒരേ രീതിയിലാണ് ഉണ്ടാകുന്നത്. മാലിന്യ ശുദ്ധീകരണം നടത്തുന്നത് മുഖ്യമായും കരളാണ്. ശ്വാസകോശം, പ്ലീഹ, ലിംഫ് നോഡുകൾ തുടങ്ങിയവ വഴിയും ശുദ്ധീകരണം നടക്കുന്നുണ്ട്. വൃക്കകളിൽ മുഖ്യമായും നടക്കുന്നത് പോഷക സമീകരണമാണ്. രക്തത്തിൽ കൂടുതലുള്ള പോഷകങ്ങളാണ് വൃക്കകളിൽ ശേഖരിക്കപ്പെടുന്നത്. ഇതിൽ 99 ശതമാനത്തിലേറെയും രക്തത്തിലേക്ക് തിരിച്ചു പോവുകയും ബാക്കി മൂത്രസഞ്ചിയിലെത്തുകയും ചെയ്യുന്നു. രക്തത്തിലെ 55 ശതമാനം വരുന്ന പ്ലാസ്മയാണ് വൃക്കയ്ക്കുള്ളിലേക്ക് വരുന്നത്. ഏറ്റവും പോഷക ഗുണമുള്ളതാണ് പ്ലാസ്മ. ദിവസവും വീണ്ടും വീണ്ടും ആവർത്തിച്ച് 180 ലീറ്ററിലധികം ഇത്തരത്തിൽ വൃക്കയിൽ  വരുന്നുണ്ട്. ഇതിൽ 1.5 ലീറ്റർ മാത്രമാണ് മൂത്രസഞ്ചിയിൽ വരുന്നത്. ബാക്കിയുള്ളത് വീണ്ടും രക്തത്തിൽ കലരുകയാണ്. ഇതിനാലാണ് മാലിന്യമല്ല വൃക്കയിൽ എത്തുന്നതെന്ന് പറയാനാവുന്നത്. 

രാവിലെയുള്ള മൂത്രം മണിക്കൂറുകളോളം നാം ഉറങ്ങിയ ശേഷമുള്ളതാണ്. തലച്ചോറിലെ പീനിയൽ ഗ്രന്ഥി പ്രവർത്തിക്കുന്നത് ഗാഢമായ ഉറക്കത്തിൽ മാത്രമാണ്. അത് ഇരുട്ടത്ത് മാത്രമാണ് പ്രവര്‍ത്തിക്കുന്നത്. മെലടോണിൻ, സെറോടോണിൻ എന്നീ ഹോർമോണുകളെ പീനിയൽ ഗ്രന്ഥി ഈ  സമയത്ത് മാത്രമാണ് ഉൽപാദിപ്പിക്കുന്നത്. ഈ രണ്ട് ഹോർമോണുകള്‍ രാവിലത്തെ മൂത്രത്തിൽ മാത്രമേ ഉണ്ടാവുകയുള്ളു. അതിനാലാണ് രാവിലെയുള്ള മൂത്രം കൂടുതല്‍ ഗുണകരമാവുന്നത്. മൂത്രത്തിലാകെ 3079 ഘടകങ്ങൾ തിരിച്ചറിഞ്ഞിട്ടുണ്ട്. ഇതിൽ ഈ രണ്ട് ഘടകങ്ങള്‍ ഒഴിച്ച് ബാക്കിയെല്ലാം ഏതു സമയത്തും ഉണ്ടാവും. അതിനാൽ ഏത് സമയത്തെ മൂത്രവും കഴിക്കാനാവും

? എന്തിനാണ് സംസ്ഥാന സമ്മേളനം നടത്തുന്നത്. ആരെങ്കിലും തങ്ങൾ മൂത്രം കഴിക്കുന്നുവെന്ന് പരസ്യമായി പറയുമോ

യൂറിൻ തെറപ്പി പ്രോത്സാഹിപ്പിക്കുന്നവരുടെ ആദ്യത്തെ സംസ്ഥാന സമ്മേളനമല്ല തൃശൂരിൽ നടക്കുന്നത്. രണ്ട് വർഷം മുൻപ് തിരുവനന്തപുരം ജില്ലയിലെ വിതുരയിൽ യൂറിൻ തെറപ്പിയുടെ ദേശീയ സമ്മേളനം നടത്തിയിട്ടുണ്ട്. മുൻപ് കോഴിക്കോട് വച്ചും സംസ്ഥാന സമ്മേളനം നടത്തി. വാട്ടർ ഓഫ് ലൈഫ് ഫൗണ്ടേഷൻ കേരള എന്ന സംഘടനയാണ് ഈ പരിപാടികൾ സംഘടിപ്പിക്കുന്നത്. ഈ പേരിൽ മറ്റ് സംസ്ഥാനങ്ങളിലും വിദേശ രാജ്യങ്ങളിലും ഉൾപ്പെടെ യൂറിൻ തെറപ്പിയെ കുറിച്ചുള്ള സംഘടനകളുണ്ട്. എന്നാൽ ഞങ്ങൾ അവയുടെ ഭാഗമായിട്ടല്ല കേരളത്തിൽ പ്രവർത്തിക്കുന്നത്.

വാട്ടർ ഓഫ് ലൈഫ്  എന്നത് യൂറിൻ തെറപ്പിയെ കുറിച്ച് പാശ്ചാത്യ രാജ്യങ്ങളിൽ പുറത്തിറങ്ങിയ ഒരു പുസ്തകത്തിന്റെ പേരാണ്. ജെ. ഡബ്ല്യു. ആംസ്ട്രോങ് 1944ൽ രചിച്ചതാണ് ഈ പുസ്തകം. ഇതിന് ശേഷമാണ് യൂറിൻ തെറപ്പിയെ കുറിച്ച് വ്യാപകമായി ലോകത്ത് പ്രചരിക്കുന്നത്. സമ്മേളനത്തിൽ യൂറിൻ തെറപ്പി ബോധവൽകരണം ഉദ്ദേശിച്ചുള്ള ഗീതം അവതരിപ്പിക്കും. യൂറിൻ തെറപ്പിയുടെ 12ാം പതിപ്പ് പ്രകാശനം ചെയ്യും. തെറപ്പിയുടെ ഗുണങ്ങളെ കുറിച്ച് ബോധവാൻമാരായവരാണ് പരിപാടിയിൽ പങ്കെടുക്കുന്നവരിൽ ഭൂരിഭാഗവും. പലരും അവരുടെ അനുഭവങ്ങള്‍ തുറന്ന് പറയും. മലയാള സിനിമയിലെ ഒരു പ്രമുഖ നടനും സംവിധായകനും എത്താമെന്ന് സമ്മതിച്ചിട്ടുണ്ട്. തൃശൂരിൽ നടത്താനുള്ള പ്രധാന കാരണം എല്ലാവർക്കും എത്തിച്ചേരാനാകും എന്നതാണ്. തൃശൂർ വിവേകോദയം ഹയർ സെക്കൻഡറി സ്കൂൾ ഹാളിൽ മേയ് 26ന് രാവിലെ 9.30 മുതൽ 5.30 വരെയാണ് സമ്മേളനം.