പ്രേമചന്ദ്രനെ ഒറ്റപ്പെടുത്തി പാർട്ടി പിളർത്താൻ സിപിഎം...? മാണി കോൺഗ്രസ് പോയാൽ പകരം ആർഎസ്പി

അനുകൂല മദ്യനയം രൂപീകരിക്കുന്നതിനായി ബാർ ഉടമകൾ രണ്ടര ലക്ഷം രൂപ വീതം നൽകണമെന്നാവശ്യപ്പെട്ടുള്ള ബാറുടമാ സംഘടനാ നേതാവിന്റെ ശബ്ദ സന്ദേശം പുറത്തു വന്നപ്പോൾ സിപിഎം സംസ്ഥാന സെക്രട്ടറി എം.വി. ഗോവിന്ദൻ അതിനൊരു പുതിയ വ്യാഖ്യാനം കണ്ടെത്തി. രണ്ടാം പിണറായി സർക്കാരിനെ പിടിച്ചുലച്ച വിവാദത്തെക്കുറിച്ച് ഗോവിന്ദൻ പറഞ്ഞത് ‘‘തിരഞ്ഞെടുപ്പ് കഴിഞ്ഞ് മാധ്യമങ്ങൾ ആകെ ‘ഡ്രൈ’ ആണ്. അതൊഴിവാക്കാനാണ് ഇത്തരം വാർത്തകൾ നൽകുന്നത്’’ എന്നാണ്. ബാർ കോഴ വിവാദം അവിടെ നിൽക്കട്ടെ. മാധ്യമങ്ങൾ ‘ഡ്രൈ’ ആണെന്നു കണ്ടാകണം, കൊല്ലത്ത് സിപിഎം ജില്ലാ സെക്രട്ടറി എസ്. സുദേവന്റെ പ്രസ്താവന ഇക്കഴിഞ്ഞ ദിവസം പൊട്ടി വീണു. 

ഇപ്പോഴെന്താണ് പ്രകോപനം എന്നു മാധ്യമങ്ങൾ തല പുകഞ്ഞാലോചിച്ചിട്ടും പിടി കിട്ടിയില്ല. ആർഎസ്പി നേതാവും നിലവിലെ കൊല്ലം എംപിയുമായ എൻ.കെ.പ്രേമചന്ദ്രനെ ചുറ്റിപ്പറ്റിയായിരുന്നു സുദേവന്റെ പ്രസ്താവന. ലോക്സഭാ തിരഞ്ഞെടുപ്പിന്റെ വോട്ടെടുപ്പ് കഴിഞ്ഞ്, വോട്ടെണ്ണാൻ ഇനി നാളുകൾ മാത്രം ബാക്കി നിൽക്കെ, സിപിഎം സംസ്ഥാന കമ്മിറ്റിയംഗം കൂടിയായ സുദേവൻ ഇത്തരമൊരു പ്രസ്താവന ഇറക്കണമെങ്കിൽ അതിനു പിന്നിൽ ചില്ലറ ബുദ്ധിയല്ല എന്നു ചിന്തിക്കുന്നവർ സിപിഎമ്മിലും ആർഎസ്പിയിലും ഉണ്ട്. 

സിപിഎം പൊളിറ്റ് ബ്യൂറോ അംഗം എം.എ. ബേബിയേയും കേന്ദ്ര കമ്മിറ്റിയംഗം ഇപ്പോഴത്തെ മന്ത്രി കെ.എൻ. ബാലഗോപാലിനെയും വൻഭൂരിപക്ഷത്തിൽ തോൽപിച്ചു കൊല്ലത്ത് ഹാട്രിക് വിജയം കാത്തു നിൽക്കുന്ന പ്രേമചന്ദ്രനെ ഒറ്റപ്പെടുത്തി ആർഎസ്പിയിൽ വീണ്ടും ഒരു പിളർപ്പുണ്ടാക്കാൻ സിപിഎം ഉന്നം വയ്ക്കുന്നുണ്ടോ? അടുത്ത നിയമസഭാ തിരഞ്ഞെടുപ്പിനു മുൻപ് ആർഎസ്പിയിലെ ഒരു വിഭാഗത്തെയെങ്കിലും എൽഡിഎഫിലേക്ക് തിരിച്ചു കൊണ്ടുപോകാനാണോ സിപിഎം നീക്കം? യുഡിഎഫിലേക്കുള്ള കേരള കോൺഗ്രസ്– മാണി ഗ്രൂപ്പിന്റെ പുനഃപ്രവേശനത്തെക്കുറിച്ചു ചർച്ചകൾ സജീവമായപ്പോൾ അതിനെ മറികടക്കാൻ സിപിഎം ബദൽ മാർഗങ്ങൾ ആരായുന്നതിന്റെ ഭാഗമാണോ ഇത്? ഇത്തരം ചർച്ചകൾ രാഷ്ട്രീയ കേരളത്തിൽ സജീവമായിക്കഴിഞ്ഞു. 

∙ ‘പ്രേമചന്ദ്രന്റെ കുതന്ത്രം’

2014ലെ ലോക്സഭാ തിരഞ്ഞെടുപ്പിൽ ആർഎസ്പിക്ക് കൊല്ലം സീറ്റ് നിഷേധിച്ചത് സിപിഎമ്മിന്റെ പിടിവാശി കൊണ്ടല്ലെന്നും അത് പ്രേമചന്ദ്രൻ നടത്തിയ കുതന്ത്രത്തിന്റെ ഭാഗമായിരുന്നുവെന്നുമായിരുന്നു സുദേവന്റെ പ്രസ്താവനയുടെ കാതൽ. ആർഎസ്പിയുടെ ഇടതുമുന്നണിയിലെ ചരിത്രം ഏതാണ്ട് മുഴുവൻ സുദേവന്റെ പ്രസ്താവനയിൽ ഉണ്ടായിരുന്നു. സുദേവൻ പ്രസ്താവനയിൽ തുടർന്നു: ‘1980 മുതൽ എൽഡിഎഫിന്റെ ഭാഗമായിരുന്ന ആർഎസ്പി കൊല്ലം ലോക്സഭാ മണ്ഡലത്തിലും കൊല്ലം, ഇരവിപുരം, ചവറ, കുന്നത്തൂർ, ആര്യനാട്, അമ്പലപ്പുഴ നിയമസഭാ മണ്ഡലങ്ങളിലും എൽഡിഎഫ് ഘടകകക്ഷിയായി മത്സരിച്ച പാർട്ടിയാണ്. ആർഎസ്പി യുടെ തകർച്ചയെ തുടർന്നാണ് കൊല്ലം ലോക്സഭാ സീറ്റ് 1999ൽ ഇടതുമുന്നണി സിപിഎമ്മിനു നൽകിയത്. പകരം ആർഎസ്പിയിലെ പ്രേമചന്ദ്രന് രാജ്യസഭാ സീറ്റ് നൽകി. 

1999 മുതൽ 15 വർഷമായി സിപിഎം മത്സരിച്ചുവന്ന കൊല്ലം ലോക്സഭാ സീറ്റിൽ തെറ്റായ അവകാശവാദം ഉന്നയിക്കുന്ന നിലപാടാണ് 2014ൽ ആർഎസ്പി സ്വീകരിച്ചത്. ഈ സീറ്റ് വിട്ടു കിട്ടണമെന്ന അവകാശവാദം പ്രേമചന്ദ്രൻ ഉന്നയിച്ചത് മുന്നണി വിടാനുള്ള സാഹചര്യം സൃഷ്ടിക്കാനുള്ള കുതന്ത്രമായിരുന്നു. ആർഎസ്പിയിലെ ഒരു വിഭാഗത്തെ സ്വാധീനിച്ച് പ്രേമചന്ദ്രൻ തനിക്ക് കൊല്ലത്ത് മത്സരിക്കാൻ പാർട്ടിയെ യുഡിഎഫിൽ എത്തിച്ചു. 2011ലെ നിയമസഭാ തിരഞ്ഞെടുപ്പിൽ ചവറയിൽ തോറ്റ പ്രേമചന്ദ്രൻ അടുത്ത നിയമസഭാ തിരഞ്ഞെടുപ്പിൽ തനിക്ക് നിയമസഭയിലേക്ക് വരാൻ അവസരമില്ലെന്നു കണ്ടാണ് സ്വാർഥലാഭത്തിനു വേണ്ടി ആർഎസ്പിയെ യുഡിഎഫിൽ എത്തിച്ചത്...’ എന്നിങ്ങനെയായിരുന്നു സുദേവന്റെ പ്രസ്താവന. 

∙ ‘തകർക്കാനായിരുന്നു ശ്രമം’

സുദേവന്റെ പ്രസ്താവനയ്ക്ക് അതേ ശക്തിയിൽ മറുപടി ആർഎസ്പി നേതൃത്വത്തിൽ നിന്നുണ്ടായി. സിപിഎം ജില്ലാ സെക്രട്ടറിയുടെ പ്രസ്താവന ദുരൂഹമാണെന്നാണ് ആർഎസ്പിയുടെ ആരോപണം. ആർഎസ്പി ജില്ലാ സെക്രട്ടറി കെ.എസ്. വേണുഗോപാലിന്റെ പ്രസ്താവന തുടരുന്നതിങ്ങനെ: ‘1999ൽ ആർഎസ്പിക്ക് തകർച്ച സംഭവിച്ചുവെന്ന സുദേവന്റെ കണ്ടെത്തൽ അപഹാസ്യമാണ്. 1999ലെ പാർട്ടിയിലെ ഭിന്നിപ്പിന് മുൻപുതന്നെ, ആർഎസ്പി മത്സരിച്ചിരുന്ന പല നിയമസഭാ സീറ്റുകളും സിപിഎം ഏകപക്ഷീയമായി പിടിച്ചെടുത്തിരുന്നു. ഇതിന്റെ തുടർച്ചയായിട്ടാണ് 1999ൽ ഭിന്നിപ്പിന്റെ പേരു പറഞ്ഞ് കൊല്ലം ലോക്സഭാ സീറ്റ് പിടിച്ചെടുത്തത്. 

2001ൽ ഹരിപ്പാട് നിയമസഭാ സീറ്റും 2006ൽ കൊല്ലം നിയമസഭാ സീറ്റും പിടിച്ചെടുത്തു. സീറ്റുകൾ പിടിച്ചെടുത്ത് ആർഎസ്പിയെ ഉന്മൂലനം ചെയ്യുക എന്ന ലക്ഷ്യത്തോടെയാണ് ലോക്സഭാ സീറ്റും നിയമസഭാ സീറ്റുകളും നിഷേധിച്ചത്. 2004ലും 2009ലും കൊല്ലം ലോക്സഭാ സീറ്റ് തിരികെ ലഭിക്കണമെന്നാവശ്യപ്പെട്ട് ആർഎസ്പി മുന്നണിക്കുളളിൽ ശക്തമായ നിലപാട് സ്വീകരിച്ചിരുന്നു. 2009ൽ ലോക്സഭാ സീറ്റ് നിഷേധിച്ചതിനെ തുടർന്ന് ഇടതു മന്ത്രിസഭയിലെ ആർഎസ്പി അംഗത്തെ പിൻവലിക്കാൻ തീരുമാനിച്ചതും രാജിവച്ചതും ചരിത്രമാണ്. 

2014ലെ തിരഞ്ഞെടുപ്പിൽ ആർഎസ്പിയുടെ ആവശ്യം പരിഗണിക്കാമെന്നാണ് സിപിഎം നേതൃത്വം അന്നു ചർച്ചകളിൽ പ്രതികരിച്ചത്. എന്നാൽ ഉഭയകക്ഷി തലത്തിലോ മുന്നണി തലത്തിലോ ചർച്ചയോ തീരുമാനമോ ഇല്ലാതെയാണ് 2014ലും ഏകപക്ഷീയമായി സിപിഎം കൊല്ലത്ത് എം.എ. ബേബിയെ സ്ഥാനാർഥിയായി പ്രഖ്യാപിച്ചത്. സിപിഎമ്മിന്റെ ഈ നിലപാടിൽ പ്രതിഷേധിച്ചാണ് 2014ൽ കൊല്ലത്ത് ഒറ്റയ്ക്ക് മത്സരിക്കാൻ തീരുമാനിച്ചത്...’ ആർഎസ്പിയുടെ പ്രസ്താവന ഇങ്ങനെ തുടർന്നു. 

∙ സിപിഎമ്മിനു പിഴച്ചതെവിടെ?

2014ൽ കൊല്ലം ലോക്സഭാ സീറ്റ് നിഷേധിച്ചതിനെതുടർന്ന് ആർഎസ്പി ഇടതുമുന്നണി വിട്ടപ്പോൾ സിപിഎം പലകുറി ആവർത്തിച്ച വിശദീകരണം ഈ വേളയിൽ വീണ്ടും ഉന്നയിച്ചതാണ് അതിശയം. അതിന് ആർഎസ്പി നേതൃത്വം പലതവണ മറുപടി നൽകിയതുമാണ്. ഇപ്പോൾ, ലോക്സഭാ തിരഞ്ഞെടുപ്പിന്റെ വോട്ടെണ്ണാൻ ദിവസങ്ങൾ മാത്രം ബാക്കി നിൽക്കെ, പ്രേമചന്ദ്രനെ ഉന്നം വച്ച് സിപിഎം നേതൃത്വം രംഗത്തു വരണമെങ്കിൽ അത് ജില്ലാ സെക്രട്ടറി എസ്. സുദേവൻ മാത്രം വിചാരിച്ച് ആകണമെന്നില്ല. പാർട്ടി സംസ്ഥാന നേതൃത്വത്തിന്റെ അറിവോടെയും സമ്മതത്തോടെയും ആകാനാണ് എല്ലാ സാധ്യതയും.