മണിക്കൂറുകൾക്കകം നിക്ഷേപർക്ക് നേട്ടം 14 ലക്ഷം കോടി; അമിത് ഷാ പറഞ്ഞത് വെറുതെയായില്ല? തയാറെടുത്ത് ‘മോദി ഓഹരികൾ’

‘‘എനിക്ക് ഓഹരി വിപണിയിലെ നീക്കങ്ങൾ പ്രവചിക്കാൻ കഴിയില്ല. എന്നാൽ സാധാരണയായി കേന്ദ്രത്തിൽ സ്ഥിരതയുള്ള ഒരു സർക്കാർ വരുമ്പോൾ വിപണി കുതിച്ചുയരും. നാനൂറിലധികം സീറ്റിൽ വിജയം (ബിജെപി/ എൻഡിഎ) നേടിയാൽ മോദി സർക്കാർ വീണ്ടും അധികാരത്തിൽ വരുന്നതും വിപണി കുതിച്ചുയരുന്നതും ഞാൻ കാണുന്നു, ജൂൺ നാലിന് മുൻപ് ഓഹരികൾ വാങ്ങൂ...’’ – അടുത്തിടെ തിരഞ്ഞെടുപ്പ് പ്രചാരണത്തിനിടെ കേന്ദ്ര ആഭ്യന്തര മന്ത്രി അമിത് ഷാ പറഞ്ഞ വാക്കുകൾ. ഏപ്രിൽ, മേയ് മാസങ്ങളിൽ ഓഹരി വിപണിയിൽ സംഭവിച്ച ചാഞ്ചാട്ടങ്ങളെ തിരഞ്ഞെടുപ്പുമായി ബന്ധിപ്പിക്കേണ്ടതില്ല, തിരഞ്ഞെടുപ്പ് ഫലം വരുന്ന ജൂൺ 4ന് മുൻപ് ഓഹരികൾ വാങ്ങാനാണ് അമിത് ഷാ നിക്ഷേപകരോട് നിർദേശിച്ചത്. 2024 ലോക്സഭാ തിരഞ്ഞെടുപ്പിന്റെ ഫലം വരാൻ ഇനി മണിക്കൂറുകൾ മാത്രമാണ് ശേഷിക്കുന്നത്. വിവിധ എക്‌സിറ്റ് പോളുകൾ സൂചിപ്പിക്കുന്നതു പോലെ ബിജെപിയുടെ നേതൃത്വത്തിലുള്ള എൻഡിഎ മൂന്നാമതും ഭരിക്കുമെന്നാണ്. 350ലധികം ഭൂരിപക്ഷത്തോടെ എൻഡിഎ അധികാരം നിലനിർത്തിയാൽ രാജ്യത്തെ സമ്പദ്മേ‌ഖലയിലും വൻ ചലനങ്ങൾ സൃഷ്ടിച്ചേക്കുമെന്നാണ് സാമ്പത്തിക വിദഗ്ധർ വിലയിരുത്തുന്നത്. 

ബിജെപി വൻഭൂരിപക്ഷത്തോടെ അധികാരത്തിലെത്തിയാൽ ഓഹരി വിപണിയിൽ സ്ഫോടനാത്മകമായ മാറ്റങ്ങൾ പ്രതീക്ഷിക്കാമെന്നാണ് വിപണി നിരീക്ഷകർ പറയുന്നത്. പ്രത്യേകിച്ചും 'മോദി ഓഹരികൾ' റെക്കോർഡ് നേട്ടം കൈവരിച്ചേക്കും. എന്താണീ ‘മോദി ഓഹരികൾ’? പ്രതിരോധം, റെയിൽവേ തുടങ്ങിയ പൊതുമേഖലാ സ്ഥാപനങ്ങൾ എന്നിവയുടെ ഓഹരികളും മറ്റു ചില കോർപറേറ്റ് കമ്പനികളുടെ ഓഹരികളും കുതിച്ചുയരുമെന്ന പ്രതീക്ഷയിലാണ് അവയെ ‘മോദി ഓഹരികൾ’ എന്നു വിശേഷിപ്പിക്കുന്നത്. ഈ ഓഹരികളിൽ ഉൾപ്പെടെ വൻ കുതിപ്പാണ് ഫലം വരുന്നതിന്റെ തലേന്ന്, ജൂൺ 3ന്, വിപണിയിൽ പ്രകടമായത്. എക്സിറ്റ് പോൾ ഫലങ്ങളുടെ അലയൊലികൾ ഓഹരിവിപണിയുടെ കുതിപ്പിലും സഹായിച്ചെന്നു വ്യക്തം. മൂന്നാം മോദി സർക്കാരിന്റെ വരവിലൂടെ പൊതുമേഖലാ കമ്പനികളുടെയും ചില കോർപറേറ്റ് ഗ്രൂപ്പുകളുടെയും ഓഹരികൾ ഉൾപ്പെടെയുള്ള 54 ഓഹരികൾക്കു നേരിട്ട് പ്രയോജനം ലഭിക്കുമെന്ന് രാജ്യാന്തര ബ്രോക്കറേജ് സ്ഥാപനമായ സിഎൽഎസ്എ ഇതിനോടകം പ്രവചിക്കുകയും ചെയ്തുകഴിഞ്ഞു.

∙ എക്സിറ്റ് പോളിനു പിന്നാലെ റെക്കോർഡ് നേട്ടം

വൻ ഭൂരിപക്ഷത്തോടെ എൻഡിഎ സർക്കാർ വീണ്ടും അധികാരത്തിൽവരുമെന്ന എക്‌സിറ്റ് പോൾ ഫലങ്ങളെ തുടർന്ന് ഓഹരി വിപണിയിൽ വൻ മുന്നേറ്റമാണുണ്ടായത്. പൊതുമേഖലാ ഓഹരികൾക്കാണ് വൻ മുന്നേറ്റം. നിഫ്റ്റിയും സെൻസെക്സും മൂന്ന് വർഷത്തിനിടയിലെ ഏറ്റവും മികച്ച നിലയിലാണ് ജൂൺ 3ന് വ്യാപാരം അവസാനിപ്പിച്ചത്. ഒരു ദിവസത്തെ വ്യാപാരത്തിൽ നിക്ഷേപകർ 14 ലക്ഷം കോടി രൂപയുടെ നേട്ടം കൈവരിച്ചു. ജൂൺ മൂന്നിനു രാവിലെ 73,961.31ൽ വ്യാപാരം തുടങ്ങിയ സെൻ‍സെക്സ് 3.39 ശതമാനം നേട്ടത്തോടെ 76,468.78 എന്ന നിലയിലാണ് ക്ലോസ് ചെയ്തത്. നിഫ്റ്റി 3.25 ശതമാനം മുന്നേറി 23,263.90 എന്ന നിലയിലും വ്യാപാരം അവസാനിപ്പിച്ചു. ഒരുസമയത്ത് സെൻസെക്സ് 76,739.89 വരെയും നിഫ്റ്റി 23,338.70 വരെയും എത്തിയിരുന്നു.

ഇന്ത്യൻ ഓഹരി വിപണിയിലെ ചലനങ്ങളും രാജ്യത്തെ രാഷ്ട്രീയ സംഭവവികാസങ്ങളും പരസ്പരം ബന്ധപ്പെട്ടു കിടക്കുന്നതാണ്. ഈ പ്രതിഭാസത്തിന്റെ ഏറ്റവും ശ്രദ്ധേയമായ ഉദാഹരണങ്ങളിലൊന്നാണ് 'മോദി ഓഹരികൾ' എന്ന ആശയം. പ്രധാനമന്ത്രി നരേന്ദ്ര മോദിയുടെയും ബിജെപി സർക്കാരിന്റെയും നയങ്ങളും ജനപ്രീതിയും കാരണം മികച്ച പ്രകടനം കാഴ്ചവയ്ക്കുമെന്ന് പ്രതീക്ഷിക്കുന്ന ഓഹരികളെയാണ് ഇത്തരത്തില്‍ വിശേഷിപ്പിക്കുന്നത്. ബിജെപി വീണ്ടും അധികാരത്തിലെത്തുമെന്ന് ഉറപ്പായതോടെ ഈ ഓഹരികളെ ചുറ്റിപ്പറ്റിയുള്ള പ്രതീക്ഷകളും ഊഹാപോഹങ്ങളും ഉയർന്നിരിക്കുകയാണ്. അടിസ്ഥാന സൗകര്യം, ബാങ്കിങ്, പ്രതിരോധം, ഊർജം തുടങ്ങിയ മേഖലകളിലെ കമ്പനികളാണ് 'മോദി സ്റ്റോക്കുകളിൽ' പൊതുവെ ഉൾപ്പെട്ടിരിക്കുന്നത്. ഇവയ്ക്ക് മോദിയുടെ സാമ്പത്തിക, നയ അജൻഡയിൽ നിന്ന് പ്രയോജനം ലഭിക്കുകയും ചെയ്യുന്നുണ്ട്. 

മേൽപ്പറഞ്ഞ മേഖലകളില്‍ വളർച്ചയും കാര്യക്ഷമതയും വർധിപ്പിക്കാൻ ലക്ഷ്യമിട്ടുള്ള കാര്യമായ പരിഷ്‌കാരങ്ങളും സംരംഭങ്ങളും സൃഷ്ടിക്കാനും ആദ്യ രണ്ട് മോദി സർക്കാരുകൾക്ക് സാധിച്ചിട്ടുണ്ട്. ഈ പ്രതീക്ഷകൾ തന്നെയാണ് ഇപ്പോഴത്തെ കുതിപ്പു പ്രതീക്ഷകൾക്ക് പിന്നിലെ രഹസ്യവും. ബിജെപി സർക്കാർ 350ലധികം സീറ്റ് നേടി ഭരണത്തിലെത്തിയാല്‍ അടുത്ത ആറു മാസത്തിനുള്ളിൽ മോദി ഓഹരികൾ 50 ശതമാനം നേട്ടം കൈവരിക്കുമെന്നാണ് വിദഗ്ധരുടെ പ്രവചനം. എൻഡിഎ വൻ നേട്ടം കൈവരിച്ചാൽ ഓഹരി വിപണിയിൽ നിക്ഷേപകരുടെ വൻ ആഘോഷംതന്നെ നടന്നേക്കുമെന്നാണ് രാജ്യാന്തര ബ്രോക്കറേജ് സ്ഥാപനമായ സിഎൽഎസ്എ അനലിസ്റ്റുകൾ പറയുന്നത്. അതായത് പൊതുമേഖല ഓഹരികൾ വാങ്ങിയിട്ടുള്ളവർക്കെല്ലാം അടുത്ത വർഷങ്ങളിൽ ഇരട്ടി ലാഭം ലഭിച്ചേക്കും. രാജ്യത്തെ മിക്ക നിക്ഷേപകരുടെയും ആസ്തികൾ ലക്ഷങ്ങളും കോടികളും കടക്കുമെന്ന് ഇതിൽനിന്ന് അനുമാനിക്കാം.

∙ നാല് വർഷത്തിനുള്ളിൽ 2150% കുതിപ്പ്

എൻഡിഎ 350ലധികം സീറ്റുകൾ നേടി അധികാരത്തിലെത്തിയാൽ അടുത്ത നാല് വർഷത്തിനുള്ളിൽ മോദി ഓഹരികൾക്ക് 2150 ശതമാനം മുന്നേറ്റം പ്രതീക്ഷിക്കാമെന്നാണ് വിദഗ്ധർ പറയുന്നത്. കഴിഞ്ഞ നാല് വർഷത്തിനിടെ മിക്ക പൊതുമേഖലാ ഓഹരികളുടെയും വിപണി മൂലധനം (എം-ക്യാപ്) ഏകദേശം അഞ്ചു മടങ്ങ് വർധിച്ചിട്ടുണ്ട്. റെയിൽ വികാസ് നിഗം ലിമിറ്റഡ്, ഹിന്ദുസ്ഥാൻ എയറോനോട്ടിക്‌സ് ലിമിറ്റഡ്, കൊച്ചിൻ ഷിപ്പ്‌യാർഡ് ലിമിറ്റഡ്, ഹിന്ദുസ്ഥാൻ കോപ്പർ ലിമിറ്റഡ്, ഇന്ത്യൻ ബാങ്ക്, ഭാരത് ഡൈനാമിക്‌സ് ലിമിറ്റഡ്, ഭാരത് ഇലക്‌ട്രോണിക്‌സ് ലിമിറ്റഡ്, ഹൗസിങ് ആൻഡ് അർബൻ ഡവലപ്‌മെന്റ് കോർപറേഷൻ ലിമിറ്റഡ് എന്നിങ്ങനെ കുറഞ്ഞത് എട്ട് പൊതുമേഖലാ ഓഹരികൾ 1000 മുതൽ 2150 ശതമാനം നേട്ടമാണ് കൈവരിച്ചത്. ഇക്കാലയളവിൽ ഏറ്റവും മോശം പ്രകടനം നടത്തിയ ഓഹരികൾ പോലും 82 ശതമാനം കുതിപ്പ് നടത്തി.

∙ എല്ലാ ശ്രദ്ധയും പൊതുമേഖലാ ഓഹരികളിൽ

എൻഡിഎ സർക്കാരിന്റെ നയങ്ങളുടെ നേരിട്ടുള്ള ഗുണഭോക്താക്കളായി കണക്കാക്കപ്പെടുന്ന 54 കമ്പനികളുടെ ഓഹരികളെ ശ്രദ്ധിക്കണമെന്നാണ് സിഎൽഎസ്എ റിപ്പോർട്ടിൽ പറയുന്നത്. ഇതിൽ പകുതിയും പൊതുമേഖലാ സ്ഥാപനങ്ങളാണ്. എച്ച്എഎൽ, ഹിന്ദുസ്ഥാൻ കോപ്പർ, നാൽകോ, ഭാരത് ഇലക്‌ട്രോണിക്‌സ്, കൊച്ചിൻ ഷിപ്പ്‌യാർഡ്, കമ്മിൻസ് ഇന്ത്യ, സീമെൻസ്, എബിബി ഇന്ത്യ, ഇൻഡസ് ടവേഴ്‌സ്, സെയിൽ, ഭെൽ, ഡിക്‌സൺ, അദാനി പോർട്ട്‌സ്, ആർഇസി, പിഎൻബി, ടാറ്റ പവർ, എച്ച്‌പിസിഎൽ, ഗെയിൽ, ലാർസൻ ആൻഡ് ടൂബ്രോ, എൻടിപിസി, എൻഎച്ച്‌പിസി, പവർ ഫിനാൻസ് കോർപറേഷൻ, ഓയിൽ ആൻഡ് നാച്ചുറൽ ഗ്യാസ് കോർപറേഷൻ, സ്റ്റേറ്റ് ബാങ്ക് ഓഫ് ഇന്ത്യ, റിലയൻസ് ഇൻഡസ്ട്രീസ്, ഭാരതി എയർടെൽ, മഹാനഗർ ഗ്യാസ്, അൾട്രാടെക് സിമന്റ്, അശോക് ലെയ്‌ലാൻഡ് എന്നിവയാണ് 54 ‘മോദി ഓഹരി’കളുടെ പട്ടികയിലുള്ള പ്രധാന ഓഹരികൾ. തിരഞ്ഞെടുപ്പിൽ ബിജെപി വിജയം പ്രതീക്ഷിച്ച് കഴിഞ്ഞ ആറ് മാസത്തിനിടെ ഈ 54 ഓഹരികളിലെ 90 ശതമാനവും നിഫ്റ്റി50 സൂചികയിൽ മികച്ച പ്രകടനം കാഴ്ചവച്ചതായും കണക്കുകൾ പറയുന്നു.

∙ 3 സംസ്ഥാനങ്ങളിലെ ബിജെപി മുന്നേറ്റം

ആറു മാസം മുൻപു നടന്ന തിരഞ്ഞെടുപ്പുകളിൽ മൂന്ന് സംസ്ഥാനങ്ങളിലെ ബിജെപി വിജയവും വിപണികൾക്ക് പ്രതീക്ഷ പകർന്നിരുന്നു. അന്ന് നിഫ്റ്റി50 ഓഹരികൾ 13 ശതമാനം നേട്ടമാണ് കൈവരിച്ചത്. അതേസമയം, ബിജെപിയുടെ വിജയത്തിൽനിന്ന് നേരിട്ട് നേട്ടമുണ്ടാക്കുമെന്ന് കരുതുന്ന ഓഹരികളുടെ കഴിഞ്ഞ ആറു മാസത്തെ ശരാശരി കുതിപ്പ് 50 ശതമാനമാണ്. ബിജെപിക്ക് അനുകൂലമായ ഒരു ഫലം ഇന്ത്യയുടെ സാമ്പത്തിക വളർച്ചയിൽ നിക്ഷേപകർക്ക് ആത്മവിശ്വാസം നൽകുമെന്നുതന്നെയാണ് മുൻ‍കാല കണക്കുകൾ പറയുന്നത്.

∙ ചരിത്രപരമായ പ്രകടനം

പൊതുമേഖലാ ഓഹരികളിൽ മോദിയുടെ ഭരണകാലം ചെലുത്തിയ സ്വാധീനം ചെറുതല്ല. 2014, 2019 ലോക്‌സഭാ തിരഞ്ഞെടുപ്പുകൾക്കു ശേഷമെല്ലാം പൊതുമേഖലാ ഓഹരികളുടെ നല്ല കാലമായിരുന്നു. 2014 പൊതുതിരഞ്ഞെടുപ്പിൽ ചരിത്ര വിജയം നേടിയ ബിജെപി സമ്പദ്‌മേഖലയിൽ നിരവധി പരിഷ്കാരങ്ങൾ നടപ്പിലാക്കിയതും സഹായകമായി. ഇക്കാലയളവിൽ സാമ്പത്തിക വളർച്ച, ബിസിനസ് സൗഹൃദ അന്തരീക്ഷം എന്നിവ ഉറപ്പാക്കാൻ സാധിച്ചതോടെ വിപണി കുതിച്ചു. 2004ൽ എൻഡിഎ അധികാരത്തില്‍ വരുമെന്ന് മിക്ക എക്സിറ്റ് പോളുകളും പ്രവചിച്ചെങ്കിലും അന്ന് യുപിഎ തന്നെയാണ് അധികാരത്തിലെത്തിയത്. ഇതോടെ തിരഞ്ഞെടുപ്പ് ഫല ദിനത്തിൽ നിഫ്റ്റി 12.24 ശതമാനം ഇടിഞ്ഞെങ്കിലും അടുത്ത ദിവസം 8.3 ശതമാനം തിരിച്ചുവരവ് നടത്തി. തിരഞ്ഞെടുപ്പു ഫലത്തിനു ശേഷം അടുത്ത അഞ്ച് ദിവസങ്ങളിൽ സൂചിക ഏകദേശം 16 ശതമാനം കുതിപ്പ് നടത്തുകയും ചെയ്തത് ചരിത്രം.