മോദി ഇനി ‘ദൈവമല്ല, സേവകൻ’; മോദി 3.Oയും ഇല്ല; വീണ്ടും എൻഡിഎക്കാലം, കൈപിടിക്കണം നേതാക്കൾ

ഇന്ത്യൻ രാഷ്ട്രീയത്തിൽ വലിയ മാറ്റത്തോടെയാണ് 2014ൽ മോദി ആദ്യമായി പ്രധാനമന്ത്രിയായത്. ബിജെപിക്ക് 282 സീറ്റ്, എൻഡിഎയ്ക്ക് 336. 2019ലെ തിരഞ്ഞെടുപ്പിൽ സീറ്റെണ്ണം വർധിച്ചു– ബിജെപിക്ക് 303, എൻഡിഎയ്ക്ക് 352. സർക്കാരിന്റെ നിലനിൽപ്പിനായി ഒരു സഖ്യകക്ഷിയെയും ആശ്രയിക്കാതിരിക്കാനുള്ള ഭൂരിപക്ഷം ഒറ്റയ്ക്കു ബിജെപിക്കുണ്ടായിരുന്നു. 

പതിറ്റാണ്ടുകളായി സഖ്യരാഷ്ട്രീയവും അതിന്റെ ഭാഗമായ ഭരണപരമായ അസ്ഥിരതകളും കണ്ടിട്ടുള്ള രാജ്യത്തിനു മോദിയുടെ ഭരണം വ്യത്യസ്തമായി അനുഭവപ്പെട്ടു. സഖ്യകക്ഷികൾ പ്രധാനമന്ത്രിയേയും സർക്കാരിനെയും സമ്മർദപ്പെടുത്തുന്ന കാഴ്ച ഇല്ലാതായി. കോൺഗ്രസിന്റെ നേതൃത്വത്തിലുള്ള രണ്ടാം യുപിഎ സർക്കാരിലെ അഴിമതിക്ക് ഏറെ പഴികേട്ടത് കൂട്ടുകക്ഷി രാഷ്ട്രീയമായിരുന്നു. ഇത്തരം പരിമിതികളില്ലാതിരുന്ന മോദിക്ക് സ്വന്തം ഇഷ്ടപ്രകാരം സമ്പദ്‌വ്യവസ്ഥയും ഭരണവും രൂപപ്പെടുത്താനായി. വിമർശിക്കപ്പെട്ടെങ്കിലും വലിയ പരിഷ്കാരങ്ങൾ അദ്ദേഹം നടപ്പിലാക്കി. 

∙ അന്ന് കൈവിട്ടു, ഇനി ചേർത്തുപിടിക്കും

പല സഖ്യകക്ഷികളുമായും ബിജെപി തെറ്റിപ്പിരിയുന്നതും മോദിയുടെ ഭരണകാലത്താണ്. കാലങ്ങളായി കൂടെയുള്ള മുഖ്യകക്ഷികളായ ശിവസേനയുമായും അകാലികളുമായും തെറ്റി. ഈ ലോക്‌സഭാ തിരഞ്ഞെടുപ്പിനു മുൻപ് തമിഴ്നാട്ടിലെ അണ്ണാഡിഎംകെയുമായുള്ള ബന്ധവും അവസാനിപ്പിച്ചു. രണ്ടു ടേമിലെയും ഗംഭീര വിജയമാണ് ആരെയും കൂസാത്ത നിലപാടെടുക്കാൻ ബിജെപിയെ പ്രേരിപ്പിച്ചത്. ആരു പോയാലും വന്നാലും ഒന്നുമില്ല. മുന്നണിയായാണു തിരഞ്ഞെടുപ്പിനെ നേരിട്ടതെന്നുപോലും മറന്നപോലെയായിരുന്നു ബിജെപി.

വിവാദമായ തിരഞ്ഞെടുപ്പ് വാഗ്ദാനങ്ങൾ ഒന്നൊന്നായി നടപ്പാക്കിയതോടെ ഇന്ത്യ ഏകകക്ഷി ഭരണത്തിലേക്കു നീങ്ങുകയാണെന്ന് പലരും ചിന്തിക്കാനും തുടങ്ങി. ആത്മവിശ്വാസത്തിൽ മുന്നേറിയ ബിജെപി സ്വന്തം മുന്നണിയായ എൻഡിഎയെ കാര്യമായിട്ടോർത്തത് 2023ലാണ്. തിരഞ്ഞെടുപ്പിൽ ബിജെപിയെ നേരിടാൻ കോൺഗ്രസിന്റെ നേതൃത്വത്തിലുള്ള ഇന്ത്യാസഖ്യം രൂപീകരിച്ചതായിരുന്നു പ്രചോദനം. അപകടം മണത്തിട്ടാകണം പെട്ടെന്നുതന്നെ എൻഡിഎ യോഗം ചേർന്നു.

2023 ജൂലൈയിൽ ഡൽഹിയിൽ മോദിയുടെ അധ്യക്ഷതയിൽ ചേർന്ന ദേശീയ ജനാധിപത്യ സഖ്യത്തിന്റെ യോഗത്തിൽ 39 കക്ഷികൾ  പങ്കെടുത്തു. എൻഡിഎ 25 വർഷം പൂർത്തിയാകുന്ന വേളയിലായിരുന്നു യോഗം. ശിവസേന അധ്യക്ഷനും മഹാരാഷ്ട്ര മുഖ്യമന്ത്രിയുമായ ഏക്നാഥ് ഷിൻഡെ പ്രമേയം അവതരിപ്പിച്ചു. അണ്ണാഡിഎംകെയും അസം ഗണപരിഷത്തും പ്രമേയത്തെ പിന്തുണച്ചു. മോദിയുടെ നേതൃത്വത്തിൽ ലോക്‌സഭാ തിരഞ്ഞെടുപ്പിൽ എൻഡിഎ ഒറ്റക്കെട്ടായി മത്സരിക്കുമെന്നും തുടർച്ചയായി മൂന്നാം തവണയും മോദി പ്രധാനമന്ത്രി ആകുമെന്നുമായിരുന്നു പ്രധാന തീരുമാനം.

എൻഡിഎയുടെ മുൻഗണനകളായ രാജ്യസുരക്ഷ, നല്ല ഭരണം, അടിസ്ഥാനസൗകര്യ വികസനം, ദരിദ്രരുടെയും പാർശ്വവൽക്കരിക്കപ്പെട്ടവരുടെയും ജീവിതനിലവാരം മെച്ചപ്പെടുത്തൽ, ആഗോള തലത്തിൽ ഇന്ത്യയുടെ യശസ്സ് ഉയർത്തൽ എന്നിവയിൽ മോദി സർക്കാരിന്റെ പ്രവർത്തനങ്ങൾ മികച്ചതെന്നും യോഗം വിലയിരുത്തി. അതോടൊപ്പംതന്നെ, തനിച്ച് മൂന്നിൽ രണ്ടു ഭൂരിപക്ഷം, എൻഡിഎക്ക് നാനൂറിലേറെ സീറ്റ് – പരമാവധി സഖ്യങ്ങളിലൂടെയും കൂറുമാറ്റങ്ങളിലൂടെയും ഈ ലക്ഷ്യം ഉറപ്പാക്കാനും ബിജെപി കരുക്കൾ നീക്കി. 

ബിജെപിക്കു വളക്കൂറുള്ള ഉത്തർപ്രദേശ് പോലുള്ള സംസ്ഥാനങ്ങളിൽ പരമാവധി സീറ്റ് നേടിയ പശ്ചാത്തലത്തിലായിരുന്നു ഈ നീക്കം. പ്രതിപക്ഷ നിരയുടെ ഏറ്റവും മികച്ച കൂട്ടുകെട്ടുണ്ടായിരുന്ന സംസ്ഥാനമായിരുന്നു ബിഹാർ. ഇന്ത്യാ സഖ്യത്തിലെ മുഖ്യയാളായ നിതീഷ് കുമാർ നേരം ഇരുട്ടി വെളുത്തപ്പോൾ എൻഡിഎയുടെ ആളായതു പ്രതിപക്ഷത്തിനു പക്ഷേ ഞെട്ടലായി. കേന്ദ്രത്തിൽ ബിജെപിയെ അധികാരത്തിൽനിന്നു പുറത്താക്കാവുന്ന മുന്നേറ്റം ഇന്ത്യാ മുന്നണി പ്രതീക്ഷിച്ച സംസ്ഥാനങ്ങളിലൊന്നായിരുന്നു ബിഹാർ. നിതീഷിനെ അടർത്തിയതോടെ ഇന്ത്യാസഖ്യത്തെ ചിതറിക്കാമെന്നായിരുന്നു ബിജെപിയുടെ കണക്കുകൂട്ടൽ. 

∙ വാജ്‌പേയി മുതൽ മോദി വരെ

ബിജെപിയുടെ നേതൃത്വത്തിലുള്ള കോൺഗ്രസ് വിരുദ്ധ സഖ്യമായി 1998ലാണ് എൻഡിഎ നിലവിൽ വന്നത്. അടൽ ബിഹാരി വാജ്പേയി ആയിരുന്നു ആദ്യ ചെയർമാൻ. 1998 മുതൽ 2004 വരെ സഖ്യം രാജ്യം ഭരിച്ചു. പിന്നീട് 2014 മുതൽ 2024 വരെയും ഭരണത്തിലിരുന്നു. 2019ലെ പൊതു തിരഞ്ഞെടുപ്പിൽ 45.43% വോട്ടുവിഹിതവും 353 സീറ്റുകളും നേടിയാണ് അധികാരത്തിലെത്തിയത്.