കേരള വികസനത്തില്‍ രാഷ്ട്രീയം നോക്കില്ല; ഇപ്പോൾ ഞാൻ ചിരിക്കുന്നു, അതിന് കാരണമുണ്ട്: സുരേഷ് ഗോപി

കേരളത്തിൽ പദ്ധതികൾ നടപ്പാകാത്തതിൽ വിമർശനങ്ങളുയർത്താനല്ല താൻ ഉദ്ദേശിക്കുന്നതെന്നും സംസ്ഥാന സർക്കാരിൽ സമ്മർദം ചെലുത്തി അവ പ്രാവർത്തികമാക്കാനാകും ശ്രമമെന്നും കേന്ദ്രസഹമന്ത്രി സുരേഷ് ഗോപി. രണ്ടോ മൂന്നോ മന്ത്രാലയങ്ങളുടെ ഭാഗമായിരിക്കുന്നതിനെക്കാൾ കൂടുതൽകാര്യങ്ങൾ എംപിയെന്ന നിലയിൽ ചെയ്യാനാകുമായിരുന്നു. എന്നാൽ, കേരളത്തിലെ ജനങ്ങളുടെ നിശ്ചയത്തെ ആദരിക്കേണ്ടതു പ്രധാനമന്ത്രിയുടെയും പാർട്ടി നേതൃത്വത്തിന്റെയും ആവശ്യമായിരുന്നു. അതുകൊണ്ടാണു താൻ കേന്ദ്രമന്ത്രിപദവിയിൽ എത്തിയതെന്നു സുരേഷ് ഗോപി പറഞ്ഞു. വിനോദസഞ്ചാരം, പെട്രോളിയം–പ്രകൃതിവാതകം മന്ത്രാലയങ്ങളിൽ സഹമന്ത്രിസ്ഥാനം ഏറ്റെടുത്തശേഷം മലയാള മനോരമയ്ക്കു നൽകിയ അഭിമുഖത്തിൽനിന്ന്...

∙ പെട്രോളിയം മന്ത്രാലയം ഉൾപ്പെടെയുള്ള വകുപ്പുകളുടെ ചുമതലയിലെത്തിയിരിക്കുന്നു. കൊല്ലത്തെ ഇന്ധനനിക്ഷേപത്തിന്റെ കാര്യത്തിൽ ചർച്ചകളുണ്ടാകുമോ? 

ഒരു ദേശീയ പദവിയിലാണ് ഇപ്പോൾ. ആ പദവിയിലിരുന്നു കേരളത്തിനായി എന്തുചെയ്യാൻ സാധിക്കുമോ അതെല്ലാം ചെയ്യും. ഒരു ദേശീയചിന്തയും കാഴ്ചപ്പാടുമുണ്ടാകും. അതു പെട്രോളിയം രംഗത്തായാലും വിനോദസഞ്ചാര മേഖലയിലായാലും. കേരളത്തിന് എന്താണ് ഇതുവരെ ലഭിക്കാത്തത്, കൂടുതൽ എന്താണു ലഭിക്കുക എന്നതെല്ലാം പരിഗണിക്കും. പെട്രോളിയം മന്ത്രാലയവുമായി ബന്ധപ്പെട്ട് ആദ്യം പോകുക കൊല്ലത്തായിരിക്കും. വിനോദസഞ്ചാര മേഖലയിൽ തൃശൂരുമായി ബന്ധപ്പെട്ട പദ്ധതികൾ ആലോചനയിലുണ്ട്. 10 വകുപ്പുകളുടെയെങ്കിലും സജീവ പരിഗണന ഇപ്പോൾ കേരളത്തിനാവശ്യമാണ്. 

∙ ഏതൊക്കെ മേഖലയിലാണ് പരിഗണന വേണ്ടത്? 

നഗരവികസനമാണ് ഒന്ന്. മെട്രോ ഉൾപ്പെടെ ഇതിനു കീഴിലാണ്. കേരളത്തിന്റെ റെയിൽവേ വികസനം മുരടിച്ചു നിൽക്കുന്നു. ഇരിങ്ങാലക്കുട കഴിഞ്ഞു തൃശൂർ ടൗണിലേക്കു പോകാതെ ഗുരുവായൂർ–തിരൂർ വഴി കോഴിക്കോട് ചെന്നെത്തുന്ന പാത വേണം. വന്ദേഭാരത് വലിയ യാത്രാദുരിതങ്ങൾക്കുള്ള മരുന്നായി മാറി. ലൈറ്റ് മെട്രോ സർവീസുകൾ നഗരങ്ങളിൽ വരേണ്ടതുണ്ട്. ഇങ്ങനെ പലതുമുണ്ട്. 

∙ വിനോദസഞ്ചാര മേഖലയിലും കേരളത്തിനു പദ്ധതികൾ പരിഗണനയിലുണ്ടോ? 

തൃശൂരിലെ ഗുരുവായൂർ, ചാവക്കാട്, ഏങ്ങണ്ടിയൂർ എന്നീ സ്ഥലങ്ങളുമായി ബന്ധപ്പെട്ട പദ്ധതി മനസ്സിലുണ്ട്. ഈ പ്രദേശത്തെ ആയുർവേദ മേഖലയെ ആയുഷ് മന്ത്രാലയത്തിന്റെ പിന്തുണയോടെ ഉയർത്താനാണു ശ്രമം. വിവിധ മന്ത്രാലയങ്ങളുടെ പ്രതിനിധികളുമായി ഇവിടം സന്ദർശിക്കും. 2019ലെ തിരഞ്ഞെടുപ്പു പ്രചാരണഘട്ടത്തിലാണ് ഈ സാധ്യത ആദ്യം മനസ്സിലെത്തിയത്. കണ്ടൽക്കാടുകൾ വളർത്തുന്നതും വായുനിലവാരം മെച്ചപ്പെടുത്തുന്നതുമെല്ലാം ഇതിന്റെ ഭാഗമായുണ്ട്.