വാതിൽ അടച്ച ത്യാഗം; മതിൽ കെട്ടിയ ജയം; ലോക്സഭയിലെ തോൽവിക്ക് സിപിഎമ്മിന് നഷ്ടം രാജ്യസഭാ സീറ്റ്

∙ മുന്നണിമാറ്റം ഇനി മുന്നിലില്ല

നിയമസഭാ ധനാഭ്യർഥന ചർച്ചയിൽ പങ്കെടുത്തു ചൊവ്വാഴ്ച പി.കെ.കുഞ്ഞാലിക്കുട്ടി നടത്തിയ പ്രസംഗം രാഷ്ട്രീയസന്ദേശമായി. ലീഗിനെ ഇനി ഇടതുമുന്നണി കാത്തിരിക്കേണ്ട എന്നാണു കുഞ്ഞാലിക്കുട്ടി പറഞ്ഞത്. ‘ഇടതുണ്ടെങ്കിലേ ഇന്ത്യ ഉള്ളൂ’ എന്ന മുദ്രാവാക്യത്തെ അദ്ദേഹം കണക്കറ്റു പരിഹസിച്ചു. രാജ്യത്തെ കോൺഗ്രസ് രക്ഷിച്ചിരിക്കുന്നു എന്നുവരെ പറഞ്ഞു. ഭരണത്തിലേറിയ  ബിജെപിയെക്കാൾ ജയിച്ചതു കോൺഗ്രസാണെന്നു പുകഴ്ത്തി. ‘കോൺഗ്രസ് തിരിച്ചുവരും; പക്ഷേ, ഇടതുപക്ഷം തിരിച്ചുവരാൻ പോകുന്നില്ല’ എന്നു പ്രവചിച്ചായിരുന്നു ഉപസംഹാരം. 

മുഖ്യമന്ത്രിയോടും സിപിഎമ്മിനോടും അടുപ്പം പുലർത്തിയിരുന്ന കുഞ്ഞാലിക്കുട്ടിതന്നെ നയം വ്യക്തമാക്കിയതോടെ മുന്നണിമാറ്റ അഭ്യൂഹങ്ങൾക്കു പ്രസക്തിയേയില്ലെന്നു ലീഗ് കേന്ദ്രങ്ങൾ വിലയിരുത്തുന്നു.18 സീറ്റ് നേട്ടം യഥാർഥത്തിൽ യുഡിഎഫിനെ രക്ഷപ്പെടുത്തുകയാണു ചെയ്തത്. 15ൽ താഴെ സീറ്റ് ആയിരുന്നെങ്കിൽ നിയമസഭയിൽ കുഞ്ഞാലിക്കുട്ടിയുടേത് ഈ സ്വരമാകാൻ സാധ്യത കുറവായിരുന്നു. പാലക്കാടു തൊട്ട് വടക്കോട്ടുള്ള 9 സീറ്റുകളിൽ മാത്രം എൽഡിഎഫിനെക്കാൾ യുഡിഎഫ് നേടിയത് 13 ലക്ഷത്തോളം വോട്ടാണ്. മുന്നണിയുടെ മുന്നേറ്റത്തിനു ലീഗിന്റെ സംഭാവന വ്യക്തം. 

തൃശൂർ ലോക്സഭാ മണ്ഡലത്തിൽ മൂന്നാം സ്ഥാനത്തേക്കു പോയ കെ.മുരളീധരനു ലീഗ് മത്സരിക്കുന്ന ഗുരുവായൂർ നിയമസഭാ മണ്ഡ‍ലത്തിൽ ഒന്നാമതെത്താനായി. ലീഗും അവർ പ്രതിനിധാനം ചെയ്യുന്ന ജനവിഭാഗവും പൂർണമായും കോൺഗ്രസിനു പിന്നിൽ അടിയുറച്ചു നിൽക്കുകയാണു ചെയ്തത്. അവർ ആശിച്ചതുപോലെ കേരളത്തിൽ യുഡിഎഫിനു വൻ വിജയവും ദേശീയതലത്തിൽ കോൺഗ്രസിന്റെ വലിയ മുന്നേറ്റവും ഉണ്ടായിരിക്കുന്നു. നിയമസഭയിൽ മുഖ്യമന്ത്രി തന്നെ ലീഗിനെതിരെ തിരിഞ്ഞതും സിപിഎമ്മിന്റെ സമീപകാല ലീഗ് പ്രീണന രാഷ്ട്രീയത്തിന്റെ വിരാമമാകാം.