‘ഗോവിന്ദന്‍ പറഞ്ഞ ഈഴവ വോട്ട് ബിജെപിക്ക് ‘കൊടുത്തത്’ വെള്ളാപ്പള്ളി? സിപിഎമ്മിന് പേടി’; ലീഗിന്റെ മാറ്റത്തിനു പിന്നിലെന്ത്?

‘നവോത്ഥാന സമിതി അധ്യക്ഷനായി വെള്ളാപ്പള്ളി നടേശനെ വച്ചുകൊണ്ടിരിക്കുമോ?’ കഴിഞ്ഞ ദിവസം നിയമസഭയിൽ ഏറെ ചർച്ചയ്ക്കും തർക്കത്തിനും വഴിയൊരുക്കിയത് എ.കെ.എം. അഷ്റഫ് എംഎൽഎയുടെ ഈ ചോദ്യമാണ്. ലോക്സഭാ തിരഞ്ഞെടുപ്പിലെ എൽഡിഎഫ് തോൽവി സംബന്ധിച്ച ചർച്ചയ്ക്ക് ഇടയിലാണ് മുസ്‌ലിം ലീഗ് എംഎൽഎ എസ്എൻഡിപി ജനറൽ സെക്രട്ടറി വെള്ളാപ്പളി നടേശനെതിരെയും അതുവഴി സിപിഎമ്മിനെതിരെയും കടുത്ത ആക്രമണം നടത്തിയത്. ചോദ്യം സിപിഎമ്മിനെതിരെ നീണ്ടതോടെ അഷ്റഫിനെതിരെ സിപിഎം എംഎൽഎ ഡി.കെ. മുരളി പ്രത്യാക്രമണം നടത്തി. 

വർഗീയ ധ്രൂവീകരണം നടത്തുന്ന പ്രസംഗമാണ് അഷ്റഫ് നടത്തുന്നതെന്നായിരുന്നു മുരളിയുടെ വിമർശനം. വെള്ളാപ്പള്ളി നടേശനെതിരെയും നവോത്ഥാന സമിതിക്ക് എതിരെയും അതുവഴി സിപിഎമ്മിനെതിരെയും എന്തിനാണ് മുസ്‌ലിം ലീഗ് നീങ്ങുന്നത്?  മു‌സ്‌ലിം, ക്രിസ്ത്യൻ വിഭാഗങ്ങൾക്കു സർക്കാർ അനർഹമായ സഹായങ്ങൾ നൽകുന്നുവെന്ന എ‍സ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശന്റെ നിരന്തര വിമർശനത്തെ ശക്തമായി ചെറുക്കാനാണ് മുസ്‌ലിം ലീഗിന്റെ തീരുമാനം. അതേസമയം, ഈഴവ, ന്യൂനപക്ഷ വോട്ടുകൾ നഷ്ടപ്പെട്ടതായി സിപിഎം സംസ്ഥാന സമിതി വിലയിരുത്തിയത് സംസ്ഥാന സെക്രട്ടറി എം.വി. ഗോവിന്ദൻ തുറന്നു പറയുകയും ചെയ്തു.

ലീഗിന്റെ ഈ രാഷ്ട്രീയ നീക്കത്തിനു പിന്നിൽ പല കാരണങ്ങളുണ്ട്. കേന്ദ്രത്തിൽ നരേന്ദ്ര മോദിയേയും കേരളത്തിൽ പിണറായി വിജയനേയും പരസ്യമായി പിന്തുണയ്ക്കുന്ന വെള്ളാപ്പള്ളിയെ ആ നിലയിൽതന്നെ നേരിടാനാണു ലീഗ് നേതൃത്വത്തിന്റെ ധാരണ. അതിന്റെ ഭാഗമായാണ് നിയമസഭയിൽ ഇതിന്റെ ആദ്യ വെടി പൊട്ടിച്ചത്. ലീഗിന്റെ മഞ്ചേശ്വരം എംഎൽഎയാണ് എ.കെ.എം.അഷ്റഫ്. ലീഗ് നേതൃത്വത്തിന്റെ നിർദേശപ്രകാരമായിരുന്നു അഷ്റഫിന്റെ ആക്രമണവും. 

വെള്ളാപ്പള്ളിയെ ‘കുത്തു’ന്നതിനേക്കാൾ അദ്ദേഹത്തെ പിന്തുണയ്ക്കുന്ന സിപിഎമ്മിനോടായിരുന്നു അഷ്റഫിന്റെ ചോദ്യങ്ങൾ. പച്ചയ്ക്കു വർഗീയത പറയുന്ന വെള്ളാപ്പള്ളിയെ കേരള നവോത്ഥാന സമിതിയിൽനിന്നു പുറത്താക്കണമെന്നായിരുന്നു അഷ്റഫ് ആവശ്യപ്പെട്ടത്. എന്തുകൊണ്ടാണ് ലീഗ് കടുത്ത ആക്രമണത്തിന്റെ വഴിയിലേക്ക് നീങ്ങുന്നത്? നേരത്തേ വെള്ളാപ്പള്ളിയോട് ലീഗ് മൃദു സമീപനം പുലർത്തിയിരുന്നു. അതു മാറാൻ കാരണം എന്താകും? വെള്ളാപ്പള്ളി നടേശനെ വിമർശിക്കുന്നതിന്റെ ലക്ഷ്യങ്ങൾ എന്തായിരിക്കും? 

∙ അന്ന് വെള്ളാപ്പള്ളി സമുദായ നേതാവ്, ഇപ്പോൾ വർഗീയ വാദിയും 

വെള്ളാപ്പള്ളിയുടെ നിലപാടുകൾക്കെതിരെ 2015 മുതൽ ലീഗിൽ ശക്തമായ വിമർശനം ഉണ്ട്. കോഴിക്കോട് മാൻഹോളിൽ വീണവരെ രക്ഷിക്കാൻ ശ്രമിക്കുന്നതിനിടെ മരിച്ച നൗഷാദിന് ഉമ്മൻ ചാണ്ടി സർക്കാർ ജോലി നൽകിയിരുന്നു. ഈ സംഭവത്തോടെയാണു വെള്ളാപ്പള്ളി, മുസ്‌ലിംകൾക്ക് അനർഹമായ ആനുകൂല്യങ്ങൾ നൽകുന്നുവെന്ന പ്രചാരണം ആരംഭിച്ചത്. 2015 നവംബർ 30ന് ആലുവയിൽ നടത്തിയ വാർത്താസമ്മേളനത്തിൽ വെള്ളാപ്പള്ളിയുടെ ആരോപണം ഇങ്ങനെ: 

‘സ്കൂൾ ഗെയിംസിന് പോയ ഹാൻഡ് ബോൾ ടീം മരിച്ചപ്പോൾ സർക്കാർ അവഗണിച്ചു. മാൻഹോൾ വൃത്തിയാക്കുന്നതിനിടയിൽ മരിച്ച നൗഷാദിനു 10 ലക്ഷവും വീട്ടുകാർക്കു ജോലിയും കൊടുത്തു. ഇവിടെ ജാതിയും മതവുമില്ലെന്നു തെളിഞ്ഞില്ലേ? മരിക്കുന്നെങ്കിൽ മുസ്‌ലിമായി മരിക്കണം. മുസ്‌ലിമോ ക്രിസ്ത്യാനിയോ മരിക്കുമെങ്കിൽ തിരുവനന്തപുരത്തുനിന്നു മന്ത്രിപ്പടതന്നെ എത്തും. എന്നാൽ ഹിന്ദു ആണെങ്കിൽ ആരും തിരിഞ്ഞു നോക്കില്ല.’ വെള്ളാപ്പള്ളിക്കെതിരെ അന്ന് ഡിവൈഎഫ്ഐക്കാർ പ്രകടനം നടത്തിയിരുന്നു. സിപിഎം നേതാക്കളും വെള്ളാപ്പള്ളിയെ വിമർശിച്ചു. 

ഇതിനെതിരെ ശക്തമായ പ്രതികരണം അന്നു ലീഗിൽ നിന്ന് ഉണ്ടായില്ല. സമുദായ നേതാവെന്ന നിലയിൽ കണ്ടാൽ മതിയെന്നായിരുന്നു നേതൃത്വത്തിന്റെ നിർദേശം. ആ നിലപാടാണ് ലീഗ് മാറ്റിയത്. ജൂൺ 19ന് നിയമസഭയിൽ അഷ്റഫ് നടത്തിയ പ്രസംഗത്തിൽ നിലപാടുമാറ്റം വ്യക്തമാണ്. പച്ചയ്ക്കു വർഗീയത പറയുന്ന വെള്ളാപ്പള്ളിയെ ചെയർമാൻ സ്ഥാനത്തുവച്ച് കേരളത്തിൽ എങ്ങനെ നവോത്ഥാന സമിതി മുന്നോട്ടു പോകുമെന്നാണ് അഷ്റഫിന്റെ ചോദ്യം. ‘‘മന്ത്രിമാരുടെ സ്റ്റാഫിൽ സാമുദായിക പ്രാതിനിധ്യം ആനുപാതികമായി പാലിക്കാൻ കഴിയാത്ത സർക്കാർ എന്ത് മുസ്‌ലിം പ്രീണനം നടത്തുന്നു എന്നാണു വെള്ളാപ്പള്ളിയും ബിജെപിയും പറയുന്നത്? തൊഴിൽ മേഖലയിലുള്ള സാമുദായിക പ്രാതിനിധ്യം ജാതി തിരിച്ചു ധവളപത്രം സർക്കാർ പുറത്തിറക്കണം. 

∙ സിപിഎമ്മിന്റെ ഈഴവ വോട്ടുകൾ ബിജെപിയിൽ എത്തിയതെങ്ങിനെ? 

സിപിഎമ്മിനു പരമ്പരാഗതമായി ലഭിച്ചുകൊണ്ടിരിക്കുന്ന ഈഴവ വോട്ടുകൾ ലോക്സഭാ തിരഞ്ഞെടുപ്പിൽ നഷ്ടപ്പെട്ടു. ഇക്കാര്യം സിപിഎം സംസ്ഥാന സമിതി തുറന്നു സമ്മതിക്കുകയും ചെയ്തു. ഈ വോട്ടുകൾ കൂട്ടത്തോടെ ബിജെപിയിലേക്കു പോയതിന്റെ ഉത്തരവാദി വെള്ളാപ്പള്ളിയെന്നാണു ലീഗ് വാദിക്കുന്നത്. ബിജെപിക്കു വേണ്ടി വർഗീയ ധ്രുവീകരണം നടത്തുന്ന വെള്ളാപ്പള്ളിയെയാണോ സിപിഎം സംരക്ഷിക്കുന്നതെന്ന ചോദ്യത്തിൽ ഊന്നിയാണു ലീഗിന്റെ പ്രചാരണം. വെള്ളാപ്പള്ളിയുടെ മകൻ തുഷാർ വെള്ളാപ്പള്ളി നയിക്കുന്ന ബിഡിജെഎസ് പാർട്ടി ബിജെപി മുന്നണിയിലാണുള്ളത്. തുഷാർ കോട്ടയത്ത് എൻഡിഎയുടെ സ്ഥാനാർഥിയായിരുന്നു. 

വെള്ളാപ്പള്ളിയുടെ ഭാര്യ പ്രീതി നടേശൻ ഇത്തവണ ആലപ്പുഴയിലെ ബിജെപി സ്ഥാനാർഥി ശോഭ സുരേന്ദ്രനു വേണ്ടി പരസ്യമായി രംഗത്തു വന്നു. ന്യൂനപക്ഷങ്ങൾക്കെതിരായി വെള്ളാപ്പള്ളി ഉയർത്തിയ ചോദ്യങ്ങളെ പ്രതിരോധിക്കാൻ സിപിഎമ്മിനു സാധിച്ചില്ല.പരസ്യമായി വർഗീയത പറയുന്ന വെള്ളാപ്പള്ളി നടേശനെ സർക്കാർ നിയന്ത്രണത്തിലുള്ള കേരള നവോത്ഥാന സമിതി ചെയർമാൻ സ്ഥാനത്തുനിന്നു പുറത്താക്കണമെന്നും എ.കെ.എം.അഷ്റഫ് ആവശ്യപ്പെട്ടു. 

ഈഴവ ഭൂരിപക്ഷ മണ്ഡലമായ ആലപ്പുഴയിൽ ഒരു മുസ്‍ലിം സ്ഥാനാർഥിയെ നിർത്താൻ പാടില്ലായിരുന്നുവെന്ന് നേരത്തേ വെള്ളാപ്പള്ളി പറഞ്ഞിരുന്നു. അതിനോട് ഇടതുപക്ഷ നേതാക്കൾ ആരും പ്രതികരിക്കാതിരുന്നത് എന്താണെന്നു വ്യക്തമാക്കണം. മഹത്തായ എസ്എൻഡിപി പ്രസ്ഥാനത്തെ ബിഡിജെഎസ് എന്ന പാർട്ടി വഴി ബിജെപിയിൽ എത്തിക്കാനുള്ള കുതന്ത്രമാണു വെള്ളാപ്പള്ളിയും കുടുംബവും നടത്തുന്നതെന്നും ബജറ്റിന്മേലുള്ള ധനാഭ്യർഥന ചർച്ചയിൽ അഷ്റഫ് പറഞ്ഞു.