ജീവിതത്തിന് ‘ലാസ്റ്റ് സല്യൂട്ട്’ നൽകുന്ന പൊലീസുകാർ കൂടുന്നു; ഈ ദുരന്തത്തിന് ഉത്തരവാദികളാര്?

∙ മേശ പൊട്ടിയത് രക്ഷ; ജീവിതം നീട്ടി സിപിഒ

‘‘എന്റെ മൃതദേഹമായിരിക്കും ഇനി നാട്ടിലേക്കു കൊണ്ടുപോകുക. ഞാൻ മരിച്ചാൽ കടമെങ്കിലും വീടുമല്ലോ’’– ആത്മഹത്യാശ്രമത്തിനു തൊട്ടുമുൻപ് ആ പൊലീസുകാരൻ സഹപ്രവർത്തകന് അയച്ച സന്ദേശമായിരുന്നു ഇത്. കേസെഴുത്തിൽ വിദഗ്ധനായ ഇദ്ദേഹത്തെ ഒരു കേസിലെ പ്രതികൾ നൽകിയ വ്യാജപരാതിയെത്തുടർന്നാണ് ഇടുക്കിയിൽനിന്നു കണ്ണൂരിലേക്കു മാറ്റിയത്. ഭാര്യ നാട്ടിൽ ഒറ്റയ്ക്ക്, സാമ്പത്തികബാധ്യത, ഭക്ഷണത്തിനും മരുന്നിനും മറ്റുമായി മാസം 10,000 രൂപ ചെലവ്...

വാടകച്ചെലവ് ഒഴിവാക്കാൻ സ്റ്റേഷനു മുകളിലെ ഷീറ്റിട്ട ഭാഗത്തു താമസമാക്കി. ആരോപണം സത്യമല്ലെന്ന് അന്വേഷണത്തിൽ കണ്ടെത്തി ശിക്ഷ ഒഴിവാക്കിയപ്പോൾ നാട്ടിലേക്കു തിരിച്ചുപോകാമെന്ന് ആശ്വാസം. പിന്നീട്, മടക്കം എളുപ്പമല്ലെന്നു തിരിച്ചറിഞ്ഞ് ഒരാഴ്ച മുൻപ് രാത്രി ഒന്നിനു സ്റ്റേഷന്റെ ഒന്നാംനിലയിൽ തൂങ്ങിമരിക്കാൻ ശ്രമിച്ചു. മേശപൊട്ടി, താഴെ വീഴുന്ന ശബ്ദംകേട്ടു സഹപ്രവർത്തകർ എത്തിയതുകൊണ്ടുമാത്രം രക്ഷപ്പെട്ടു. ഇപ്പോൾ ആത്മഹത്യാശ്രമത്തിനു കേസും നേരിടേണ്ട അവസ്ഥയാണ്.

ഇതിനെല്ലാം പുറമേയാണ് ഐപിഎസുകാരും മന്ത്രിമാരും കയ്യടി നേടാൻ പ്രഖ്യാപിക്കുന്ന പല പദ്ധതികളുടെ നിർവഹണം. പദ്ധതികൾ മാത്രമേ പുതിയതായി പ്രഖ്യാപിക്കുന്നുള്ളൂ. അതു നടപ്പാക്കാൻ പഴയ അംഗബലമേയുള്ളൂ.

∙ വകുപ്പുണ്ട്; പീഡനത്തിന്!

മേലുദ്യോഗസ്ഥൻ ദ്രോഹിക്കാൻ തീരുമാനിച്ചാൽ പിന്നെ രക്ഷയില്ല. കേരള പൊലീസ് ഡിപ്പാർട്മെന്റൽ എൻക്വയറി പണിഷ്മെന്റ് ആൻഡ് അപ്പീൽ റൂളിൽ അതിനും വകുപ്പുണ്ട്!. ആദ്യം സസ്പെൻഷൻ. പിന്നെ, അന്വേഷണത്തിന് ഒരുദ്യോഗസ്ഥൻ വരും. ഇദ്ദേഹം നൽകുന്ന റിപ്പോർട്ട് അനുകൂലമായാലും പ്രതികൂലമായാലും നടപടിക്കുള്ള വിവേചനാധികാരം എസ്പിക്കുണ്ട്. അതായത് സസ്പെൻഡ് ചെയ്യപ്പെട്ടാൽ ജില്ലാ പൊലീസ് മേധാവിയുടെ കയ്യിലാണു ഭാവി. 3 ഇൻക്രിമെന്റ് വരെ കട്ടാകും. 

തിരിച്ചു സർവീസിലെത്തണമെങ്കിൽ പിന്നെയുമുണ്ട് കടമ്പകൾ. ഒരു മാസത്തെ പരേഡ്, അധിക പാറാവ് ഡ്യൂട്ടി, അധിക ജിഡി (ജനറൽ ഡയറി) ഡ്യൂട്ടി തുടങ്ങിയവ ചെയ്യണം. കൂടാതെ എആർ, കെഎപി ക്യാംപ് എന്നിവിടങ്ങളിൽ കോഴ്സ്. തിരികെയെത്തിയാൽ ശിക്ഷയുടെ അടുത്തഘട്ടം. പണിഷ്മെന്റ് റജിസ്റ്റർ (പിആർ) ഓപ്പൺ ചെയ്താൽ 3 വർഷത്തേക്കു സ്ഥാനക്കയറ്റത്തിനു പരിഗണിക്കില്ല. ഫലത്തിൽ വർഷങ്ങൾ പോയിക്കിട്ടും.

∙ പീഡനമുറ അഥവാ 174

ഉപദ്രവിക്കാൻ ഏറ്റവും വ്യാപകമായി ഉപയോഗിക്കുന്ന മാർഗങ്ങളിലൊന്നാണ് അസ്വഭാവിക മരണങ്ങളുടെ സെക്‌ഷൻ ‘174’. രാത്രി ട്രെയിൻതട്ടിയോ, പൊതുസ്ഥലങ്ങളിൽ പൊള്ളലേറ്റോ തൂങ്ങിയോ ആരെങ്കിലും മരിച്ചാൽ പൊലീസുകാരൻ കാവൽ നിൽക്കണം. വിജനമായ സ്ഥലത്ത് പലപ്പോഴും ഒറ്റയ്ക്ക്. പിറ്റേന്ന് ഇൻക്വസ്റ്റ് കഴിഞ്ഞാൽ മൃതദേഹം മോർച്ചറിയിലെത്തിക്കേണ്ടതും ഇതേ സിപിഒയുടെ ചുമതലയാണ്.

പോസ്റ്റ്മോർട്ടം നടക്കുമ്പോൾ ചിലപ്പോൾ ആളൊഴിഞ്ഞ സ്ഥലങ്ങളിൽ കണ്ടെത്തുന്ന അജ്ഞാത മൃതശരീരങ്ങൾ അഴുകിയ നിലയിലാണെങ്കിലും പൊതിഞ്ഞെടുത്ത് ആംബുലൻസിൽ കയറ്റി മോർച്ചറിയിലെത്തിക്കേണ്ടതും ‘174’ ഡ്യൂട്ടി ലഭിക്കുന്നയാൾത്തന്നെ. ചില ഉദ്യോഗസ്ഥർ ‘174 കേസു’വരാൻ കാത്തിരിക്കും; ചിലർക്കു ഡ്യൂട്ടി നൽകി സ്നേഹിക്കാൻ. 

∙ ഭാരം പഠിച്ചിട്ട് വർഷം 33

സ്റ്റേഷനുകളിലെ അംഗബലം അവസാനമായി പഠിച്ചത് 1991ൽ ആണ്. മുൻ ഡിജിപി എം.കെ.ജോസഫായിരുന്നു കമ്മിഷൻ. സ്റ്റേഷനുകളെ ജോലിഭാരത്തിന്റെയും അംഗബലത്തിന്റെയും അടിസ്ഥാനത്തിൽ എ, ബി, സി എന്നു തിരിച്ചു. അന്നു ജോലിഭാരം കുറഞ്ഞ പല സ്റ്റേഷനുകളിലും ഇന്നു കേസുകൾ കുമിഞ്ഞുകൂടി. ഉദാഹരണത്തിനു കഴക്കൂട്ടം പൊലീസ് സ്റ്റേഷൻ അന്നു ജോലിഭാരം കുറഞ്ഞ സ്റ്റേഷന്റെ പട്ടികയിലായിരുന്നു. അതിനുശേഷമാണ് ടെക്നോ പാർക്ക് വന്നത്. വലിയ റസിഡൻഷ്യൽ മേഖലയായി മാറിയ ഇവിടെ കേസുകളുടെ എണ്ണം പെരുകി. ഇങ്ങനെ എത്രയോ സ്റ്റേഷനുകൾ.