ഒന്നേകാൽ കോടി പരീക്ഷാർഥികൾ, 25 ജീവനക്കാർ; ചെറുപ്പക്കാരുടെ ഭാവി പന്താടുന്ന എൻടിഎ

നീറ്റ് യുജി, ജെഇഇ മെയിൻ, യുജിസി നെറ്റ് തുടങ്ങി 34 പ്രവേശന – മത്സരപരീക്ഷകൾ നടത്തുന്ന നാഷനൽ ടെസ്റ്റിങ് ഏജൻസി (എൻടിഎ) കഴിഞ്ഞ ദിവസം ആ ‘മഹാരഹസ്യം’ വെളിപ്പെടുത്തി– കഴിഞ്ഞ വർഷം ഇന്ത്യയിലെ 1.23 കോടി ചെറുപ്പക്കാരുടെ ഭാവി നിശ്ചയിച്ച പരീക്ഷകൾ നടത്തിയ അവർക്ക് ആകെ 25 സ്ഥിരം ജീവനക്കാരേയുള്ളൂ! ഡൽഹിയിൽ എൻടിഎ ആസ്ഥാനത്തുള്ള ബാക്കി മുന്നൂറോളം പേർ ഡെപ്യൂട്ടേഷനിലോ കരാറടിസ്ഥാനത്തിലോ ജോലിചെയ്യുന്നവരാണ്. വിവിധപരീക്ഷകളുടെ നടത്തിപ്പുമായി ബന്ധപ്പെട്ട് പലതലങ്ങളിൽ ജോലി ചെയ്യുന്ന ബാക്കി ആയിരക്കണക്കിനാളുകൾ വിവിധ സ്വകാര്യ ഏജൻസികളുടെ ജീവനക്കാരോ അവർ പുറംകരാർ കൊടുത്ത് ചുമതലപ്പെടുത്തുന്നവരോ ആണ്.

നമ്മുടെ രാജ്യത്തെ നിയമാനുസൃത, ഔദ്യോഗിക സംവിധാനങ്ങളുമായി നേരിട്ടു ബന്ധമില്ലാത്ത, സർക്കാരിനോടും ജനങ്ങളോടും ഉത്തരംപറയാൻ ബാധ്യതയില്ലാത്ത ആയിരക്കണക്കിന് പുറംകരാർ തൊഴിലാളികളെയാണ് 23.3 ലക്ഷം കുട്ടികളുടെ ഭാവി നിശ്ചയിക്കുന്ന നീറ്റ് യുജി പ്രവേശനപരീക്ഷയും നടത്താൻ എൻടിഎ ചുമതലപ്പെടുത്തിയിരുന്നതെന്ന് ഇതോടെ വ്യക്തമാവുന്നു. ഏതു ഘട്ടത്തിലും അഴിമതിയും ക്രമക്കേടും നടത്താവുന്നവിധം ദുർബലവും പഴുതുകൾ നിറഞ്ഞതുമായിരുന്നു ആ സംവിധാനം. അവയുടെ നടത്തിപ്പ് അങ്ങേയറ്റം അതാര്യവും ദുരൂഹവുമായിരുന്നു.

∙ ക്രമക്കേട് പലതരം, വ്യാപകം

ബിഹാർ, ജാർഖണ്ഡ്, ബംഗാൾ, മഹാരാഷ്ട്ര, ഗുജറാത്ത് എന്നീ 5 സംസ്ഥാനങ്ങളിൽ ഇതിനകം പലതരം ക്രമക്കേടുകൾ കണ്ടെത്തിയ നീറ്റ് യുജി പരീക്ഷയ്ക്ക് രാജ്യത്തെ 571 പട്ടണങ്ങളിലായി 4750 സെന്ററുകളാണ് ഇത്തവണയുണ്ടായിരുന്നത്. അതിനുപുറമേ വിവിധ ഗൾഫ് രാജ്യങ്ങളിൽ ഉൾപ്പെടെ 14 വിദേശ സെന്ററുകളുമുണ്ടായിരുന്നു. ഓരോ സെന്ററിലും പരീക്ഷ നടത്താൻ ചുമതലപ്പെട്ടവരുടെ വിവരങ്ങളും അതിനു മേൽനോട്ടം വഹിക്കാൻ നിർദേശിക്കപ്പെട്ടിരുന്നവരുടെ പശ്ചാത്തലവും പരിശോധിക്കുമ്പോൾ, ഇതിനകം പുറത്തുവന്നതിലേറെ ഇനിയും വരാനുണ്ടെന്നു ചിന്തിക്കുന്നതിൽ തെറ്റുപറയാനാവില്ല.

ചെയർമാന്റെ നേതൃത്വത്തിലുള്ള 10 അംഗ ഗവേണിങ് ബോഡിയാണ് എൻടിഎയുടെ പ്രവർത്തനം നിയന്ത്രിക്കുന്നത്. അവരുടെ മേൽനോട്ടത്തിൽ ഓരോ പരീക്ഷകൾക്കും ഓരോ സംസ്ഥാനത്തും സ്റ്റേറ്റ് കോഓർഡിനേറ്റർമാരുണ്ട്. സ്റ്റേറ്റ് കോഓർഡിനേറ്റർമാർക്കു കീഴിൽ രണ്ടോ മൂന്നോ ജില്ലകൾക്കായി റീജനൽ കോഓർഡിനേറ്ററും അതിനു താഴെ ജില്ലകൾ തോറും സിറ്റി കോഓർഡിനേറ്ററും പ്രവർത്തിക്കുന്നു. ഓരോ ജില്ലയിലെയും വിവിധ സെന്ററുകൾക്ക് വെവ്വേറെ സെന്റർ ഹെഡ് ഉണ്ട്. ഹാളിൽ പരീക്ഷ നടത്തുന്ന ഇൻവിജിലേറ്റർമാർ അവരുടെ നിർദേശപ്രകാരം പ്രവർത്തിക്കുന്നു. ഇവർക്കു പുറമേ ഒബ്സർവർ എന്ന പേരിൽ എല്ലാം നിരീക്ഷിക്കാൻ ചുമതലപ്പെട്ട ഒരാൾകൂടി സെന്ററുകളിലുണ്ടാവും.

∙ സർവാധികാരികൾ സിബിഎസ്‌ഇ പ്രിൻസിപ്പൽമാർ

മേൽസൂചിപ്പിച്ച സ്റ്റേറ്റ്– റീജനൽ– സിറ്റി കോഓർഡിനേറ്റർമാരും സെന്റർ ഹെഡുമാരും സിബിഎസ്ഇ സ്കൂൾ പ്രിൻസിപ്പൽമാരാണ്. സെന്ററുകളിലായി തിരഞ്ഞെടുക്കപ്പെടുന്ന സിബിഎസ്ഇ സ്കൂളുകളിലെ അധ്യാപകരായിരിക്കും ഇൻവിജിലേറ്റർമാർ. അനുബന്ധ ജോലികൾ ചെയ്യുന്നത് ഇതേ സ്കൂളുകളിലെ മറ്റു ജീവനക്കാർ തന്നെ. ഒബ്സർവർമാരായി നിയമിക്കുന്നത് മിക്കവാറും സർക്കാർ അല്ലെങ്കിൽ എയ്ഡഡ് കോളജ് അധ്യാപകരെയാണ്. എല്ലാം മാറിനിന്നു നിരീക്ഷിച്ച് ക്രമപ്രകാരമല്ലെങ്കിൽ റിപ്പോർട്ട് ചെയ്യാമെന്നല്ലാതെ പരീക്ഷാനടത്തിപ്പിൽ ഇടപെടാൻ ഒബ്സർവർക്ക് അധികാരമില്ല. ഇങ്ങനെ നൽകുന്ന റിപ്പോർട്ടുകൾ എൻടിഎ ആസ്ഥാനത്ത് ആരെങ്കിലും തുറന്നു പരിശോധിച്ചതായോ എന്തെങ്കിലും തുടർനടപടി സ്വീകരിച്ചതായോ ഇതുവരെ ചരിത്രമില്ലെന്ന് വർഷങ്ങളായി ഈ ചുമതല വഹിച്ചുവരുന്ന അധ്യാപകൻ സാക്ഷ്യപ്പെടുത്തുന്നു.