നികുതിയിൽ ഇളവ്, ശമ്പളം കൂടും, എഫ്‌ഡി ഇട്ടവർക്കും സന്തോഷം? എന്തുകൊണ്ട് ഈ ബജറ്റ് ഏവരും ഉറ്റുനോക്കുന്നു?

‘‘ലോക്‌സഭാ തിരഞ്ഞെടുപ്പ് കഴിഞ്ഞ് കേന്ദ്ര സർക്കാർ പൂർണ ബജറ്റ് അവതരിപ്പിക്കും’’. 2024 ഫെബ്രുവരിയിൽ ലോക്സഭയിൽ ഇടക്കാല ബജറ്റ് അവതരിപ്പിച്ചപ്പോൾ ധനമന്ത്രി നിർമല സീതാരാമൻ പറഞ്ഞ വാക്കുകള്‍. തുടർഭരണമെന്ന ആത്മവിശ്വാസം തുളുമ്പുന്നതായിരുന്നു ഈ വാക്കുകൾ. മുന്നിൽ വെല്ലുവിളികൾ ഏറെയാണെങ്കിലും എല്ലാവരെയും തൃപ്തിപ്പെടുത്തണം, അതേസമയം വ്യക്തമായ കാഴ്ച്ചപ്പാടും വേണം. ജൂലൈ 23നാണ് മൂന്നാം മോദി സർക്കാരിന്റെ ആദ്യ ബജറ്റ് ലോക്സഭയിൽ‍ നിർമല സീതാരാമൻ അവതരിപ്പിക്കുന്നത്. 

മാസവരുമാനക്കാർ, കർഷകർ, വ്യവസായികൾ, ഓഹരി വിപണി തുടങ്ങി സമസ്ത മേഖലകളും ഇക്കുറി വലിയ പ്രതീക്ഷയോടെയാണ് ബജറ്റിനെ കാത്തിരിക്കുന്നത്. തൊഴിൽ സാധ്യത വർധിപ്പിക്കുന്നതിലൂടെ യുവാക്കളുടെ വിശ്വാസം വീണ്ടെടുക്കാനും മോദിസർക്കാർ ബജറ്റിലൂടെ ശ്രമിക്കും. രാജ്യത്ത് നടപ്പിലാക്കുന്ന അടിസ്ഥാന സൗകര്യ വികസനം വ്യവസായ വളർച്ചയ്ക്ക് വേഗം കൂട്ടുമെന്നും പ്രതീക്ഷയുണ്ട്. ഇത്തവണ കേന്ദ്ര ബജറ്റിൽ പ്രതീക്ഷിക്കാവുന്നത് എന്തെല്ലാമാണ്? വിദഗ്ദ്ധർ പ്രതികരിക്കുകയാണിവിടെ.

∙ മാസ വരുമാനക്കാരുടെ പ്രതീക്ഷകൾ വാനോളം

സ്ഥിരവരുമാനക്കാരുടേയും സർക്കാർ ജീവനക്കാരുടേയും പ്രതീക്ഷകൾ നികുതി ഇളവിലും ശമ്പള പരിഷ്കരണത്തിലുമാണ്. അതേസമയം മുതിർന്ന പൗരൻമാരടക്കമുള്ള ജനവിഭാഗങ്ങൾക്ക് ആരോഗ്യം, നിക്ഷേപം തുടങ്ങിയ വിഷയങ്ങളിലാണ് താൽപര്യം. ബജറ്റിൽ വിവിധ ജനവിഭാഗങ്ങളുടെ പ്രതീക്ഷകൾ എന്തെല്ലാമാണ്? വിലയിരുത്തുകയാണ് വർമ ആൻഡ് വർമ ചാർട്ടേഡ് അക്കൗണ്ടന്റ്സ് സീനിയർ പാർട്ണർ വിവേക് കൃഷ്ണ ഗോവിന്ദ്. 

‘‘മാസ വരുമാനക്കാർ വളരെ പ്രതീക്ഷയോടെയാണ് ബജറ്റിനെ കാത്തിരിക്കുന്നത്. നികുതി ഇളവിന്റെ പരിധി 5 ലക്ഷമാക്കി ഉയർത്തുമെന്നാണ് പൊതുവേ കരുതപ്പെടുന്നത്. എട്ടാമത് ശമ്പള പരിഷ്കരണ കമ്മിഷനെ നിയമിക്കുമെന്ന വിശ്വാസവും ജീവനക്കാർ പുലർത്തുന്നു. 2014ൽ ആണ് ഇതിന് മുൻപ് കമ്മിഷൻ രൂപീകരിച്ചത്. കമ്മിഷൻ മുന്നോട്ട് വച്ച ശുപാർശകൾ നടപ്പാക്കിയത് 2016ലും. നിലവിൽ 80സി വിവിധ വകുപ്പുകൾ ഉൾക്കൊള്ളിച്ചതാണ്. ഇതിൽ ഭവന വായ്പയുടെ പ്രിൻസിപ്പൽതുക, നികുതി ഇളവ് നൽകുന്ന നിക്ഷേപം, പ്രോവിഡന്റ് ഫണ്ട്, കുട്ടികളുടെ സ്കൂൾ ഫീ, ലൈഫ് ഇൻഷുറൻസ് പോളിസികളുടെ പ്രീമിയം തുക, തുടങ്ങിയവ ഉൾപ്പെടുന്നു. 

ഓരോ വിഭാഗത്തിനും പ്രത്യേകം നികുതി ഇളവ് നൽകണമെന്നതാണ് മറ്റൊരു ആവശ്യം. ഇത് നടപ്പായാൽ നികുതി ബാധ്യതകൾ കണക്കിലെടുത്ത് നിക്ഷേപം നടത്തുമ്പോൾ ഫലപ്രദമായ രീതിയിൽ അവ വിന്യസിക്കാൻ സാധിക്കും. 80സിയിലെ നികുതി ഇളവ് 2 ലക്ഷമാക്കി ഉയർത്തണമെന്ന ആവശ്യവും നിക്ഷേപകർക്കിടയിലുണ്ട്. ചികിത്സാ ചെലവ് ഗണ്യമായി ഉയർന്നു വരുന്നതിനാൽ മെഡിക്കൽ പ്രീമിയത്തിന്മേലുള്ള നികുതി ഇളവ് ഉയർത്തേണ്ടതിന്റെ ആവശ്യവും വർധിച്ചിട്ടുണ്ട്. നിലവിൽ വ്യക്തികൾക്ക് 25,000 രൂപയും മുതിർന്ന പൗരന്മാർക്ക് 50,000 രൂപയുമാണ്. ഇത് യഥാക്രമം 50,000 രൂപയും 75,000 രൂപയുമാക്കി ഉയർത്തണമെന്നാണ് ആവശ്യം.

‌ബാങ്കുകളിലെ സ്ഥിര നിക്ഷേപത്തിൽ നികുതി പിടിക്കുന്ന രീതി മാറ്റണമെന്ന് ഇന്ത്യൻ ബാങ്ക്സ് അസോസിയേഷൻ ആവശ്യപ്പെടുന്നു. 5 ലക്ഷം രൂപ വരെയുള്ള സ്ഥിര നിക്ഷേപത്തിന് പൂർണമായും നികുതി ഒഴിവ് നൽകണം. വാർഷിക പലിശ 40,000 രൂപ കടന്നാൽ നിലവിൽ സ്രോതസ്സിൽ നികുതി പിടിക്കും. മുതിർന്ന പൗരന്മാർക്ക് ഇത് 50,000 രൂപയാണ്. മൂലധന നികുതി ഘടന ലളിതമാക്കണമെന്ന ആവശ്യവും ഉയരുന്നുണ്ട്. ലിസ്റ്റ് ചെയ്തതും ചെയ്യാത്തതുമായ സെക്യൂരിറ്റികളിലുള്ള നികുതി നിർണയ മാനദണ്ഡങ്ങൾ ഏകീകരിക്കുക, കടപ്പത്രം, ഓഹരി എന്നിവയുടെ തരംതിരിക്കൽ കാര്യക്ഷമമാക്കുക തുടങ്ങിയവയും ബജറ്റിൽ പ്രതീക്ഷിക്കുന്നു.