‘കേരളത്തിൽ ഗുണ്ടായിസം വിജയിക്കില്ല; എസ്എഫ്ഐ ആധിപത്യം തകരുന്നു; ഇതാ പിന്തള്ളപ്പെടുന്ന ലക്ഷണങ്ങൾ’

കേരളത്തിലെ പ്രമുഖ വിദ്യാർഥി സംഘടനയായ എസ്എഫ്ഐ പിന്തുടരുന്നത് പ്രാകൃത രീതിയാണെന്നും തിരുത്തിയില്ലെങ്കിൽ ബാധ്യതയാവുമെന്നും അടുത്തിടെ പരസ്യ വിമർശനം നടത്തിയത് സിപിഐ സംസ്ഥാന സെക്രട്ടറി ബിനോയ് വിശ്വം ആയിരുന്നു. എസ്എഫ്ഐക്ക് ക്ലാസ് എടുക്കാൻ വരേണ്ട എന്ന ഭീഷണി പിന്നാലെ സമൂഹമാധ്യമങ്ങളിൽ നിറഞ്ഞു. വിമർശനത്തിന് എതിരെ സിപിഎമ്മിന്റെ മുതിർന്ന നേതാക്കൾ തന്നെ രംഗത്തെത്തി. കഴിഞ്ഞ കുറേക്കാലമായി എസ്എഫ്ഐയുടെ അക്രമ രാഷ്ട്രീയത്തെക്കുറിച്ചുള്ള വിമർശനവും പ്രതിരോധവും കേരളത്തിന് പുതുമയല്ലാതായി കഴിഞ്ഞു.

വിദ്യാർഥികളുടെ ന്യായമായ പല  ആവശ്യങ്ങൾക്ക് വേണ്ടിയും സമരം ചെയ്യുകയും ആവശ്യങ്ങൾ നേടിയെടുക്കുകയും ചെയ്ത സംഘടനയാണ് എസ്‌എഫ്‌ഐ.  പക്ഷേ, ക്യാംപസുകളിൽ നടക്കുന്ന അക്രമങ്ങൾക്ക് നീതീകരണമുണ്ടോ? പൂക്കോട് വെറ്ററിനറി കോളജിലെ വിദ്യാർഥിയായിരുന്ന സിദ്ധാർഥൻ ക്രൂര മർദനത്തിനിരയായി മരിച്ച സംഭവമടക്കം എസ്എഫ്ഐ പ്രതിക്കൂട്ടിൽ വന്നത് ഒട്ടേറെ തവണയാണ്. എന്താണ് എസ്എഫ്ഐ പ്രതിക്കൂട്ടിലാവുന്നതിന് പിന്നിലെ വസ്തുതകൾ? എന്തുകൊണ്ടാണ് നിയന്ത്രണമില്ലാതെ പോകുന്നത്? രാഷ്ട്രീയ നിരീക്ഷകൻ കെ.വേണു ‘മനോരമ ഓൺലൈൻ പ്രീമിയ’ത്തിൽ സംസാരിക്കുന്നു.

∙ മർദനം പ്രിൻസിപ്പലിന് നേരെയും

അടുത്ത കാലത്തായി കേരളത്തിലെ പ്രമുഖ വിദ്യാർഥി സംഘടനകളിലൊന്നായ എസ്എഫ്ഐ കോളജ് ക്യാംപസുകളിൽ പലരീതിയിലുള്ള അക്രമ പ്രവർത്തനങ്ങളിൽ ഏർപ്പെടുന്നു എന്ന റിപ്പോർട്ടുകൾ കാണാം. ഏറ്റവും അവസാനത്തേത് കൊയിലാണ്ടിയിലെ ഒരു കോളജിലെ പ്രിൻസിപ്പൽ ഒരു വിദ്യാർഥിയുടെ ചെകിട്ടത്തടിച്ചു എന്നാരോപിച്ചു കൊണ്ട് എസ്എഫ്ഐ പ്രവർത്തകർ അദ്ദേഹത്തിന്റെ  മുഖത്തടിക്കുകയും രണ്ടു കാലിൽ നടന്ന് കോളജിൽ വരാൻ അനുവദിക്കുകയില്ല എന്ന് ഭീഷണിപ്പെടുത്തുകയും ചെയ്തതാണ്. ആ പ്രിൻസിപ്പൽ ഇപ്പോൾ കോടതി വഴി നേടിയ പൊലീസ് സംരക്ഷണത്തോടെയാണ് കോളജിൽ എത്തുന്നത്. ഇതോടൊപ്പം തന്നെ കാര്യവട്ടം യൂണിവേഴ്സിറ്റി ക്യാംപസിൽ ഒരു കെഎസ്‌യു വിദ്യാർഥിയെ എസ്എഫ്ഐ പ്രവർത്തകർ ഇടിമുറിയിൽ കൊണ്ടുപോയി മർദിച്ചവശനാക്കി എന്ന റിപ്പോർട്ടും നമ്മുടെ മുന്നിലുണ്ട്.

∙ മർദന പരമ്പരയിലേക്ക്

പാലക്കാട് വിക്ടോറിയ കോളജിലെ പ്രിൻസിപ്പൽ ടി.എൻ.സരസു പെൻഷൻ പറ്റി പിരിഞ്ഞ ദിവസം എസ്എഫ്ഐ അവരോടുള്ള വിരോധം തീർത്തത് കോളജിൽ അവരുടെ പ്രതീകാത്മക ശവസംസ്കാര ചടങ്ങ് നടത്തിക്കൊണ്ടാണ്. പിന്നോട്ടു നോക്കിയാൽ വീണ്ടും ഉദാഹരണങ്ങൾ കാണാം.

∙ എസ്എഫ്ഐ ഗുണ്ടാ സംഘങ്ങളെപ്പോലെ

കേരളത്തിലെ ഭൂരിപക്ഷം വരുന്ന സർക്കാർ, എയ്ഡഡ് കോളജുകളിലും എസ്എഫ്ഐ ആണ് മേധാവിത്തം നിലനിർത്തുന്നത്. എസ്എഫ്ഐ നേതാക്കൾ ഗുണ്ടാ സംഘങ്ങളെപ്പോലെ ഭീഷണിപ്രയോഗത്തിലൂടെയാണ് ഈ ആധിപത്യം നിലനിർത്തുന്നത്. സ്വതന്ത്രമായ അന്തരീക്ഷത്തിൽ ജനാധിപത്യ രീതിയിൽ വിദ്യാർഥികൾക്കിടയിൽ  സംഘടനാ തിരഞ്ഞെടുപ്പ് നടക്കുകയാണെങ്കിൽ എസ്എഫ്ഐ പിന്തള്ളപ്പെടുമെന്ന് ഉറപ്പാണ്. ഇപ്പോൾ തന്നെ അതിന്റെ ലക്ഷണങ്ങൾ കണ്ടു തുടങ്ങിയിട്ടുണ്ട്. കാലിക്കറ്റ് യൂണിവേഴ്സിറ്റിയിൽ എസ്എഫ്ഐ പരാജയത്തിന്റെ രുചി അറിഞ്ഞു കഴിഞ്ഞു. ഈ പ്രവണത വ്യാപകമാവാൻ തുടങ്ങിയിട്ടുമുണ്ട്. പരിയാരം മെഡിക്കൽ കോളജിൽ 30 വർഷമായി എസ്എഫ്ഐ നിലനിർത്തിയിരുന്ന ആധിപത്യവും കെഎസ്‌യു-എംഎസ്എഫ് കൂട്ടുകെട്ട് തിരിച്ചു പിടിച്ചിരിക്കുന്നു.

∙ അക്രമ രാഷ്ട്രീയത്തിന് ന്യായീകരണമില്ല

എസ്‌എഫ്‌ഐ, വിദ്യാർഥികളുടെ പല ന്യായമായ ആവശ്യങ്ങൾക്ക് വേണ്ടി സമരം ചെയ്യുകയും വിജയിക്കുകയും ചെയ്തിട്ടുണ്ട്. എബിവിപിയിലൂടെ വിദ്യാർഥികൾക്കിടക്ക് ഹിന്ദുത്വ രാഷ്ട്രീയം പ്രചരിപ്പിക്കുന്നത് തടയാനായി എസ്എഫ്ഐ ഫലപ്രദമായി ഇടപെട്ടിട്ടുണ്ട്. ഇതെല്ലാം നല്ല കാര്യങ്ങൾ തന്നെ. പക്ഷേ ഇതൊന്നും എസ്എഫ്ഐയുടെ ശക്തിപ്പെട്ടു വരുന്ന അക്രമ രാഷ്ട്രീയത്തിനും ജനാധിപത്യവിരുദ്ധ രീതികൾക്കും ന്യായീകരണമല്ല. ഈ പ്രവണതകൾ പ്രോത്സാഹിപ്പിക്കപ്പെടാനും പാടില്ല.

∙ പിന്തുണ നൽകുന്നത് സിപിഎം നേതൃത്വം

സിപിഎം നേതൃത്വം പ്രത്യേകിച്ചും മുഖ്യമന്ത്രി എസ്എഫ്ഐക്ക്, പ്രത്യേകിച്ചും അതിന്റെ അക്രമ പ്രവർത്തന ശൈലിക്ക് തുറന്ന പിന്തുണ നൽകിയിരിക്കുകയാണ്. സിപിഎം കേന്ദ്ര നേതൃത്വത്തിന്റെ താക്കീതിനെ അവഗണിച്ചു കൊണ്ടുള്ളതാണ് ഈ നടപടി എന്നത് ശ്രദ്ധേയം. ലോക്സഭാ തിരഞ്ഞെടുപ്പിൽ സിപിഎം നേരിട്ട കനത്ത പരാജയത്തിനു പിന്നിൽ ഭരണവിരുദ്ധ വികാരം പ്രകടമാണെന്ന് ചൂണ്ടികാണിച്ച കൂട്ടത്തിൽ സിദ്ധാർഥന്റെ ആത്മഹത്യ പോലുള്ള വിഷയങ്ങളും പരിശോധിക്കണമെന്ന് കേന്ദ്ര നേതൃത്വം സൂചിപ്പിച്ചിരുന്നു. എന്നാൽ മുഖ്യമന്ത്രിയും കൂട്ടരും അത്തരം ആത്മ പരിശോധനയ്ക്ക് തയാറല്ല. അതിനു പിന്നിൽ കൃത്യമായ ഒരു രാഷ്ട്രീയ സമീപനമുണ്ട്.

∙ കുറ്റബോധമില്ലാതെ സിപിഎം

ടി.പി.ചന്ദ്രശേഖരനെ അൻപത്തിയൊന്ന് വെട്ടിനു കൊലപ്പെടുത്തിയതിൽ ഒരു കുറ്റബോധവും തോന്നാത്ത, ഒരു തിരുത്തലും ആവശ്യമുണ്ടെന്ന് തോന്നാത്ത ഒരു നേതൃത്വമാണ് കേരളത്തിലെ സിപിഎമ്മിനുള്ളത്. തങ്ങളുടെ പാർട്ടി പരിപാടിയെ, അതിന്റെ ആശയ സംഹിതയെ അവർ മനസ്സിലാക്കിയിട്ടുള്ള രീതിയുമായി ബന്ധപ്പെട്ട നിലപാടാണത്.

ഈ ലക്ഷ്യം നേടണമെങ്കിൽ തങ്ങളുടെ പാർട്ടിക്കു മാത്രം പൂർണമായ ആധിപത്യമുള്ള ഏക പാർട്ടി മേധാവിത്തം സ്ഥാപിക്കുക മാത്രമേ വഴിയുള്ളു എന്ന് സോവിയറ്റ് യൂണിയൻ മുതൽക്കുള്ള മുൻ സോഷ്യലിസ്റ്റു രാജ്യങ്ങളുടെ അനുഭവങ്ങൾ പഠിപ്പിച്ചിട്ടുള്ളതാണ്. ആ അനുഭവപാഠങ്ങളുടെ അടിസ്ഥാനത്തിലാണ് ലോകത്തിലെ ബഹുഭൂരിപക്ഷം കമ്യൂണിസ്റ്റു പാർട്ടികളും ജനാധിപത്യ പാർട്ടികളായി സ്വയം മാറുകയും തൊഴിലാളിവർഗ സർവാധിപത്യം എന്ന ലക്ഷ്യം കയ്യൊഴിയുകയും ചെയ്തത്. ഇന്ത്യയിൽ അൽപം വൈകിയാണെങ്കിലും സിപിഐ ഇങ്ങനെ മാറുകയുണ്ടായി. അവരുടെ ഒരു പാർട്ടി കോൺഗ്രസിൽ വച്ച് പാർട്ടി പരിപാടിയിലെ തൊഴിലാളി വർഗ സർവാധിപത്യം എന്ന ലക്ഷ്യ പ്രഖ്യാപനം എടുത്തുകളയുകയും ജനാധിപത്യ പ്രക്രിയയിലൂടെ സോഷ്യലിസം സ്ഥാപിക്കുക എന്ന പുതിയ ലക്ഷ്യം എഴുതി ചേർക്കുകയും ചെയ്യുകയുണ്ടായി.