‘ഉമ്മൻചാണ്ടിയെ വേണ്ടവിധം കെപിസിസി ഓർമിച്ചില്ല: പ്രതിപക്ഷ നേതാവിനെതിരെ സുധാകരൻ യോഗം വിളിക്കരുതായിരുന്നു’

∙ ഉമ്മൻചാണ്ടി സ്മരണയെക്കുറിച്ചു ചർച്ച നടത്തിയേ ഇല്ലേ? 

അങ്ങനെ ഒരു ചർച്ചയേ ഉണ്ടായിട്ടില്ല. ചർച്ചയ്ക്കു മുൻകൈ എടുക്കേണ്ടത് കെപിസിസി പ്രസിഡന്റ് അല്ലേ? ഞങ്ങളെ എല്ലാം വിളിച്ച് ആലോചിക്കണം. ഒടുവിൽ തിരുവനന്തപുരത്ത് അവസാന നിമിഷം പരിപാടിക്കു വേണ്ടിയുള്ള പരിപാടി സംഘടിപ്പിച്ചിട്ട് കെപിസിസി ജനറൽ സെക്രട്ടറി ടി.യു. രാധാകൃഷ്ണൻ എന്നെ വിളിച്ചു. കെപിസിസി പ്രസിഡന്റു തന്നെ ആ പരിപാടിയിൽ പങ്കെടുക്കുന്നില്ല. അതുകൊണ്ടു ‍ഞാനും പോയില്ല. അങ്ങനെ ഒരു പരിപാടി അല്ല ഉമ്മൻ ചാണ്ടിക്കു വേണ്ടി സംഘടിപ്പിക്കേണ്ടത് എന്നതിൽ പ്രതിഷേധിച്ചു തന്നെയാണ് പോകാതിരുന്നത്. ഉമ്മൻചാണ്ടിയുടെ ചരമ വാർഷികം വരുമ്പോൾ എന്താണു ചെയ്യേണ്ടതെന്ന് പാർട്ടിക്കകത്ത് ആലോചിക്കേണ്ടേ?

∙ കോട്ടയത്തെ അനുസ്മരണ പരിപാടി കെപിസിസിയുടേതായിരുന്നില്ലേ?

കോട്ടയം ഡിസിസിയുടേതായിരുന്നു ആ പരിപാടി. കെപിസിസി അതിനോട് പിന്നീട് സഹകരിച്ചു കാണും. പക്ഷേ ഏറ്റവും വലിയ അനുസ്മരണം സംഘടിപ്പിക്കേണ്ടത് കെപിസിസി അല്ലേ? ഉമ്മൻചാണ്ടിയെ സ്നേഹിക്കുന്ന എത്ര ലക്ഷം പേരുണ്ട് ഈ നാട്ടിൽ. കെപിസിസി അദ്ദേഹത്തെ വേണ്ടവിധം അനുസ്മരിക്കാഞ്ഞത് എന്തുകൊണ്ടെന്ന് എത്രയോ പേർ എന്നോടു ചോദിച്ചു. കൂട്ടായ ചർച്ചകളുടെ അഭാവമാണ് ഇതിനെല്ലാം കാരണം. 

∙ കെപിസിസി ആസ്ഥാനത്ത് കാര്യങ്ങൾ ഭദ്രമല്ലെന്ന അഭിപ്രായം പ്രതിപക്ഷ നേതാവ് അടക്കം പലരും പങ്കുവച്ചല്ലോ? ആക്ടിങ് പ്രസിഡന്റായിരുന്നയാൾ എന്ന നിലയിൽ എന്താണ് പ്രതികരണം? 

കെപിസിസി പ്രസിഡന്റ് ലോക്സഭാംഗമാണ്. അദ്ദേഹം ഇല്ലാത്തപ്പോൾ പാർട്ടി ആസ്ഥാനത്തെ പ്രവർത്തനങ്ങൾ നല്ല നിലയിൽ കൊണ്ടുപോകേണ്ടത് ഭാരവാഹികളുടെ ചുമതലയാണ്. ഇത്തരം പരാതികൾ ഉയരാതിരിക്കാൻ അവരാണ് ശ്രദ്ധിക്കേണ്ടത്. 

∙ തിരഞ്ഞെടുപ്പ് സമയത്ത് ആക്ടിങ് പ്രസിഡന്റ് ആയിരുന്ന താങ്കൾ ആ പദവിയിൽ നിന്ന് മാറിക്കൊടുത്തില്ലെന്ന പരാതി കെപിസിസി പ്രസിഡന്റിന് ഉണ്ടായല്ലോ?

എനിക്ക് ലഭിച്ചത് താൽക്കാലിക ചുമതലയാണെന്ന പൂ‍ർണബോധ്യം ഉണ്ടായിരുന്നു. എഐസിസി ഏതു സമയത്തു പറഞ്ഞാലും മാറിക്കൊടുക്കുമെന്നും വ്യക്തമാക്കി. ആ നിർദേശം വന്ന ഉടനെ അതു ചെയ്തു. തിരഞ്ഞെടുപ്പു പ്രക്രിയ പൂർത്തിയാകുന്നതു വരെ തുടരാനുള്ള നിർദേശമാണ് എനിക്കു നേരത്തേ ലഭിച്ചത്. തിരഞ്ഞെടുപ്പ് ഫലം പുറത്തു വരുന്നതു വരെ എന്നാണ് അതിൽനിന്ന് ഉദ്ദേശിക്കുന്നതെന്ന് എഐസിസി എന്നോട് വ്യക്തമാക്കുകയും ചെയ്തിരുന്നു. എന്നാൽ വോട്ടെടുപ്പ് കഴിയും വരെയാണ് ചുമതല എന്ന് കെ.സുധാകരൻ ചൂണ്ടിക്കാട്ടി. അദ്ദേഹം ആ നിലപാടെടുത്തതിന്റെ അടിസ്ഥാനത്തിൽ എഐസിസിയുടെ നിർദേശം വന്നപ്പോൾ ഞാൻ മാറി. അല്ലാതെ അവിടെ കടിച്ചു തൂങ്ങിയിരിക്കാൻ പറ്റില്ലല്ലോ.

∙ കെ.സുധാകരൻ തിരിച്ചു വന്നപ്പോൾ കെപിസിസി ആസ്ഥാനത്തെ ചടങ്ങിൽനിന്ന് താങ്കൾ വിട്ടു നിൽക്കുകയാണല്ലോ ചെയ്തത്? 

ചുമതല തിരിച്ചേൽക്കുന്നതിന് പ്രത്യേക ചടങ്ങൊന്നും വേണ്ടെന്ന് എഐസിസി ജനറൽ സെക്രട്ടറി ദീപദാസ് മുൻഷി കെപിസിസിയോട് നിഷ്കർഷിച്ചിരുന്നു. അതുകൊണ്ട് കെ.സുധാകരൻ എന്നെ വിളിച്ച ഉടൻ തന്നെ അവരുമായി ഞാൻ ബന്ധപ്പെട്ടു. ചുമതല കൈമാറാനായി അവിടെ പോകേണ്ട കാര്യമില്ലെന്നും അതൊരു ചടങ്ങാക്കി മാറ്റേണ്ട കാര്യമില്ലെന്നുമാണ് അവർ പറഞ്ഞത്. 

∙ രണ്ടു വട്ടം ആക്ടിങ് പ്രസിഡന്റായിരുന്ന താങ്കൾ സ്ഥിരം പ്രസിഡന്റ് പദവിക്കു ശ്രമിക്കുന്നതായി കോൺഗ്രസിൽ പ്രചാരണം ഉണ്ടല്ലോ?

അതൊന്നും ഞാൻ പ്രചരിപ്പിക്കുന്നതല്ലല്ലോ. 18 മാസം പ്രസിഡന്റിന്റെ ചുമതല നേരത്തേ നിർവഹിച്ചിരുന്നതു കൊണ്ട് മുൻ പ്രസിഡന്റ് എന്ന അംഗീകാരം എനിക്കുണ്ടല്ലോ. ഞാൻ അതിൽ സംതൃപ്തനാണ്. 

∙ കൂടോത്ര വിവാദമെല്ലാം കോൺഗ്രസിന് ഭൂഷണമാണോ?

ആ വിവാദമെല്ലാം കെട്ടടങ്ങി. ഇനി അതിനെക്കുറിച്ച് പറയാൻ ആഗ്രഹിക്കുന്നില്ല. 

∙ പ്രതിപക്ഷനേതാവിനും കെപിസിസി പ്രസിഡന്റിനും ഇടയിൽ പെട്ടു പോകുന്ന സ്ഥിതി യുഡിഎഫ് കൺവീനർക്കുണ്ടോ? 

ഞാൻ അതിനിടയിലൊന്നും പെടുന്നില്ല. എന്നോട് വളരെ അടുത്ത ബന്ധം പുലർത്തിയിരുന്നവരാണ് ഉമ്മൻചാണ്ടിയും രമേശ് ചെന്നിത്തലയും. അവർക്കിടയിൽ ചില അസ്വാരസ്യങ്ങൾ ഉണ്ടാകുമ്പോൾ ഞാൻ ഇടപെടുമായിരുന്നു. ഇപ്പോൾ എനിക്ക് അതിന്റെ ആവശ്യമില്ല. പ്രതിപക്ഷനേതാവ് യുഡിഎഫ് ചെയർമാനും ഞാൻ കൺവീനറുമാണ്. ഞങ്ങൾ തമ്മിൽ ഒരു പ്രശ്നവും ഇല്ല. എല്ലാ ദിവസവും സംസാരിക്കാറുണ്ട്. കെപിസിസി പ്രസിഡന്റ് എന്നെ ബന്ധപ്പെട്ടാൽ അല്ലേ അവർക്കിടയിൽ ഞാൻ പെടൂ. ഞാനുമായി ഇത്തരം കാര്യങ്ങൾ അദ്ദേഹം ചർച്ച ചെയ്യാറില്ല. 

∙ കെപിസിസി പ്രസിഡന്റും യുഡിഎഫ് കൺവീനറും തമ്മിൽ ബന്ധമില്ലെന്നാണോ ഞങ്ങൾ കരുതേണ്ടത്? 

ബന്ധത്തിനൊന്നും ഒരു തകരാറുമില്ല. പക്ഷേ ആശയവിനിമയം കുറവാണ്. അത് അദ്ദേഹത്തിന്റെ ശൈലിയായിരിക്കാം. 

∙ യുഎസിലെ ചികിത്സ കഴിഞ്ഞെത്തിയ കെ.സുധാകരൻ തന്റെ ആരോഗ്യ പ്രശ്നങ്ങളെല്ലാം പരിഹരിച്ചെന്നാണ് ഇതേ പംക്തിയിൽ പറഞ്ഞത്. അനാരോഗ്യം കെപിസിസി പ്രസിഡന്റിനെ അലട്ടുന്നുണ്ടോ? 

ആരോഗ്യ പ്രശ്നങ്ങളെ എല്ലാം അതിജീവിച്ചെന്നാണ് അദ്ദേഹം ഞങ്ങളോടു പറഞ്ഞത്. ഞങ്ങളാരും ഡോക്ടർമാരല്ലല്ലോ. 

∙ തദ്ദേശ തിരഞ്ഞെടുപ്പിനു മുൻപായി കെപിസിസിയിൽ അഴിച്ചുപണി സാധ്യത ഉണ്ടോ? 

ഞാൻ അതു കാണുന്നില്ല. എഐസിസി തീരുമാനിക്കേണ്ട ഒരു കാര്യത്തിൽ ഞാൻ എന്ത് അഭിപ്രായം പറയാനാണ്! 

∙ കേരള പ്രവാസി അസോസിയേഷൻ എന്ന ആരും കേട്ടിട്ടില്ലാത്ത സംഘടനയെ യുഡിഎഫിൽ പ്രത്യേക ക്ഷണിതാവാക്കിയത് ഏതു സാഹചര്യത്തിലാണ്?

പേര് അസോസിയേഷൻ എന്നാണെങ്കിലും പ്രവാസികളുടെ പേരിൽ രജിസ്റ്റർ ചെയ്തിട്ടുള്ള പാർട്ടിയാണ് അതെന്നാണ് ഞാൻ മനസ്സിലാക്കുന്നത്. പ്രവാസി ക്ഷേമത്തിൽ യുഡിഎഫ് വലിയ താൽപര്യം കാണിക്കാറുണ്ട്. ലോക്സഭാ തിരഞ്ഞെടുപ്പിൽ അവർ മുസ്‌ലിം ലീഗിനു വേണ്ടി പ്രവർത്തിച്ചിരുന്നു. അതിനു ശേഷം അവരെ ഘടകകക്ഷിയാക്കണമെന്ന് ലീഗ് ആവശ്യപ്പെട്ടു. തദ്ദേശ തിരഞ്ഞെടുപ്പുമായി ബന്ധപ്പെട്ട് യുഡിഎഫിനു മുൻപാകെ അവർ നടത്തിയ ഡിജിറ്റൽ അവതരണം മികച്ചതായിരുന്നു. പ്രവാസികളുടെ പ്രശ്നത്തിനു വേണ്ടി പ്രവർത്തിക്കുന്ന പാർട്ടി എന്നതു കണക്കിലെടുത്തും തിരഞ്ഞെടുപ്പിൽ അവരുടെ മികവ് പ്രയോജനപ്പെടുത്താൻ കഴിയുമെന്നു കണ്ടും കൂട്ടായ തീരുമാനത്തിന്റെ അടിസ്ഥാനത്തിലാണ് അവരെ ക്ഷണിതാവാക്കിയത്.

∙ സിപിഐ യുഡിഎഫിലേക്കു വരണമെന്ന് താങ്കൾ അഭിപ്രായപ്പെട്ടത് ഗൗരവത്തിലാണോ അതോ ആ സാഹചര്യത്തിൽ നടത്തിയ പ്രതികരണമാണോ? 

സിപിഐ മത്സരിക്കുന്ന രണ്ടു സീറ്റുകളിലെ സിപിഎം– ബിജെപി അന്തർധാര വ്യക്തമായിരുന്നല്ലോ. രണ്ടിടത്തും അവർ തോറ്റു. കോൺഗ്രസ് നേതൃത്വം നൽകുന്ന ഇന്ത്യാ മുന്നണിയുടെ ഭാഗമായ അവർ പുതിയ രാഷ്ട്രീയ സാഹചര്യത്തിൽ ഇടതുപക്ഷത്തു തുടരുന്നതിൽ അർഥമില്ല. സിപിഐയുടെ അണികളിൽ തന്നെ ആ വികാരം ശക്തമാണ്. അത്തരമൊരു രാഷ്ട്രീയ ധ്രുവീകരണത്തിനു സമയമായി. സിപിഐയുടെ അടുത്ത പാർട്ടി കോൺഗ്രസിൽ ഇക്കാര്യത്തിൽ ചർച്ച വരുമെന്നാണ് ഞാൻ കരുതുന്നത്.