രണ്ടു വർഷം ഒളിപ്പിച്ച ഖാദർ കമ്മിറ്റി റിപ്പോർട്ട്; കണ്ടെത്തി ഒട്ടേറെ കാര്യങ്ങൾ; മാറ്റം വേണ്ടത് എവിടെ?

രണ്ടു വർഷമായി സംസ്ഥാന സർക്കാർ രഹസ്യരേഖയായി സൂക്ഷിക്കുന്ന ഡോ.എം.എ.ഖാദർ കമ്മിറ്റി റിപ്പോർട്ട് ഒടുവിൽ പുറത്തേക്ക്. 2022 സെപ്റ്റംബറിൽ സമർപ്പിച്ച റിപ്പോർട്ടിനു മന്ത്രിസഭാ യോഗം അംഗീകാരം നൽകി. 2019 ജനുവരിയിൽ സമർപ്പിച്ച പ്രാഥമിക റിപ്പോർട്ടിലെ ശുപാർശകൾ നടപ്പാക്കാനുള്ള ശ്രമം ഏറെ പ്രതിഷേധങ്ങൾക്കും വിവാദങ്ങൾക്കും ഇടയാക്കിയിരുന്നു. അന്തിമ റിപ്പോർട്ട് പരസ്യമാക്കാൻ സർക്കാർ മടിച്ചത് അതിനാലാണ്. രാഷ്ട്രീയതലത്തിലുള്ള പരിശോധനകൾക്കു ശേഷമാണ്, റിപ്പോർട്ടിലെ ഓരോ ശുപാർശയും പ്രത്യേകം പരിഗണിക്കുമെന്ന ഉപാധിയോടെ മന്ത്രിസഭ തത്വത്തിൽ അംഗീകാരം നൽകിയത്.

സമുദായ സംഘടനകളടക്കം എതിർക്കുന്ന സ്കൂൾ സമയമാറ്റ നിർദേശം നടപ്പാക്കില്ലെന്നും എയ്ഡഡ് സ്കൂൾ നിയമനം പിഎസ്‌സിക്കു വിടുന്നതു പരിഗണനയിലില്ലെന്നും വിദ്യാഭ്യാസ മന്ത്രി വി.ശിവൻകുട്ടി വ്യക്തമാക്കിക്കഴിഞ്ഞു. പല നിർദേശങ്ങളും പ്രായോഗികമല്ലെന്നും സമൂഹത്തിന്റെയും അധ്യാപക സംഘടനകളുടെയും അഭിപ്രായങ്ങൾ കൂടി പരിഗണിച്ചാകും നടപ്പാക്കുകയെന്നും അദ്ദേഹം പറയുന്നു. എസ്‌സിഇആർടി മുൻ ഡയറക്ടർ ഡോ.എം.എ.ഖാദർ അധ്യക്ഷനും ജി. ജ്യോതിചൂഡൻ, ഡോ. സി.രാമകൃഷ്ണൻ എന്നിവർ അംഗങ്ങളുമായ കമ്മിറ്റി നാലര വർഷത്തിലേറെയെടുത്താണ് രണ്ടു റിപ്പോർട്ടുകൾ തയാറാക്കിയത്.

സമയമാറ്റം സ്വാഗതാർഹം; ഗതാഗതത്തിരക്ക് കുറയും : പ്രഫ.എം.എൻ.കാരശ്ശേരി 

സ്കൂളുകളിൽ പരമാവധി പഠനദിവസങ്ങളാണ് ഉറപ്പാക്കേണ്ടത്; അവധി ദിവസങ്ങളല്ല. മഹാന്മാരുടെ ജന്മ–ചരമദിനങ്ങൾ  അവരുടെ ജീവിതം പഠിക്കാനും വിശകലനം ചെയ്യാനുമുള്ള പഠനദിവസമാക്കി മാറ്റണമെന്നതു മികച്ച നിർദേശമാണ്. സ്കൂൾസമയം രാവിലെ 8 മുതൽ ഒന്നു വരെയാക്കണമെന്നതും നടപ്പാക്കേണ്ടതാണ്. കുട്ടികൾക്കു പഠിക്കാനും ചിന്തിക്കാനുമെല്ലാം ഏറ്റവും ഉന്മേഷമുള്ള സമയം പ്രഭാതമാണ്. പാശ്ചാത്യ രാജ്യങ്ങളിലടക്കം സ്കൂൾസമയം ആ രീതിയിലാണ്. ഓഫിസ് സമയവും സ്കൂൾസമയവും ഒരുമിച്ചുവരുന്ന സാഹചര്യം വലിയ ഗതാഗതക്കുരുക്കിന് ഇടയാക്കുന്നുണ്ട്. ഈ സമയത്തു ബസുകളിൽ  കുട്ടികൾക്കു സീറ്റ് അനുവദിക്കാത്ത സമീപനവുമുണ്ട്. സ്കൂൾസമയം നേരത്തേയാക്കുന്നതോടെ ഗതാഗതത്തിരക്കും അപകടങ്ങളും കുറയും.

എണ്ണം നിയന്ത്രിക്കൽ അപ്രായോഗികം : കെ.വി.മനോജ് 

കുട്ടികളുടെ എണ്ണം പരിമിതപ്പെടുത്തണമെന്ന നിർദേശം കേരളംപോലെ ജനസാന്ദ്രതയേറിയ നാട്ടിൽ അപ്രായോഗികം.  രണ്ടായിരവും മൂവായിരവും വിദ്യാർഥികളൊക്കെ പഠിക്കുന്ന ഒട്ടേറെ സ്കൂളുകളുണ്ട്. തിരുവനന്തപുരം ഗവ. കോട്ടൺഹിൽ സ്കൂൾ ഉദാഹരണം. ഈ നിർദേശം നടപ്പാക്കിയാൽ ആ സ്കൂളുകളിലൊക്കെ  കെട്ടിടങ്ങളും ക്ലാസ് മുറികളും പാഴാകില്ലേ. പകരം പുതിയവ നിർമിക്കാൻ എത്ര ചെലവു വരും. എവിടെ പഠിക്കണമെന്നു തീരുമാനിക്കാൻ കുട്ടിക്ക് അവകാശം നൽകുന്ന വിദ്യാഭ്യാസ അവകാശ നിയമത്തിന് അത് എതിരുമാണ്. ഓരോ ഡിവിഷനിലെയും കുട്ടികളുടെ എണ്ണം കുറയ്ക്കണമെന്ന നിർദേശം  നല്ലതാണെങ്കിലും പ്രായോഗികമല്ല.  ഡിവിഷൻ കൂട്ടിച്ചേർക്കാനും കുറയ്ക്കാനും എഇഒ, ഡിഇഒമാർക്കുള്ള അധികാരം എടുത്തു കളയണമെന്ന നിർദേശം ആ കാര്യത്തിൽ നടക്കാൻ സാധ്യതയുള്ള ക്രമക്കേടും അഴിമതിയും തടയാൻ ഉദ്ദേശിച്ചാണെങ്കിൽ സ്വീകരിക്കപ്പെടേണ്ടതാണ്. 

പഠനഭാരം കുറയും; ക്ലാസിലെ വ്യായാമം നല്ലത് : അച്യുത്ശങ്കർ എസ്.നായർ

കമ്മിറ്റി നിർദേശിക്കുന്ന പരിഷ്കാരങ്ങൾ പൊതുവേ അംഗീകരിക്കപ്പെടേണ്ടതാണ്. സ്കൂൾ വിദ്യാഭ്യാസം മാതൃഭാഷയിൽ മതിയെന്നതു തത്വത്തിൽ അംഗീകരിക്കുന്നു. എന്നാൽ, ഇംഗ്ലിഷിൽ മിടുക്കു നേടേണ്ടത് ഇംഗ്ലിഷ് മീഡിയത്തിൽ പഠിക്കുന്നവർ മാത്രമാകരുത്. 5–ാം ക്ലാസ് വരെ എല്ലാ വിഷയങ്ങളും മാതൃഭാഷയിൽ പഠിക്കാനും പിന്നീടു സയൻസ് വിഷയങ്ങൾ മീഡിയം വ്യത്യാസമില്ലാതെ എല്ലാ വിദ്യാർഥികളും ഇംഗ്ലിഷിൽ പഠിക്കാനുമുള്ള സാഹചര്യം ഒരുക്കുകയാണ് വേണ്ടത്.  ഹയർ സെക്കൻഡറി തലത്തിൽ 3 കോർ വിഷയങ്ങൾ ആക്കുന്നതു പഠനഭാരം ലഘൂകരിക്കും. ക്ലാസ് മുറിയിൽ പഠനത്തിന്റെ ഭാഗമായി വ്യായാമം കൂടി വേണമെന്നതും ഉന്നത വിദ്യാഭ്യാസ മേഖലയിലടക്കം നടപ്പാക്കേണ്ട നല്ല നിർദേശമാണ്. നീന്തൽ പോലുള്ള സ്വയം സുരക്ഷാ പരിശീലനം അപകടങ്ങൾ കുറയ്ക്കുമെന്നതു മാത്രമല്ല, വ്യക്തിത്വ വികസനത്തിനും സഹായിക്കും. കലാ–സർഗവാസനകൾ പ്രോത്സാഹിപ്പിക്കുന്ന പദ്ധതികളും ഇതിന് അനിവാര്യമാണ്. ലൈംഗിക വിദ്യാഭ്യാസം പാഠ്യപദ്ധതിയുടെ ഭാഗമാക്കുന്നത് ഏതു തലം മുതലാണെന്നതും എങ്ങനെ അവതരിപ്പിക്കുന്നു എന്നതും പ്രധാനമാണ്. 

ഒരേ ദിവസം രണ്ടു പരീക്ഷ സമ്മർദമുണ്ടാക്കും :  ഡോ. അമൃത് ജി.കുമാർ 

എഴുത്തു പരീക്ഷാരീതി പരിഷ്കരിക്കേണ്ടതു തന്നെയാണ്. ചോദ്യരീതിയിൽ മാറ്റം വേണം. കാണാതെ പഠിച്ച് എഴുതാൻ കഴിയുന്ന വിധമാകരുത് ചോദ്യം. കുട്ടികളുടെ യുക്തിബോധവും വിമർശനാത്മക ചിന്തയും പരീക്ഷിക്കുന്നതാകണം. പൊതുപരീക്ഷകൾ ഒരുമിച്ചു നടത്തുന്നതു ഭരണപരമായ സൗകര്യത്തിനു നല്ലതാണെങ്കിലും കുട്ടികൾക്കു മെച്ചമൊന്നുമില്ല. ഒരേ ദിവസം രണ്ടു പരീക്ഷ കുട്ടികൾക്കു സമ്മർദമേറ്റുന്നതാണ്. മാത്രമല്ല, ഉത്തരക്കടലാസ് തരംതിരിച്ച് അയയ്ക്കുന്നതിലുൾപ്പെടെ കാര്യമായ ശ്രദ്ധ ഇല്ലെങ്കിൽ പരാതികൾക്ക് ഇടനൽകുകയും ചെയ്യും. പരീക്ഷാകേന്ദ്രത്തിൽ തിരക്കുമേറും.

ഗ്രേസ് മാർക്കുകൊണ്ട് നേടാവുന്ന പരമാവധി മാർക്ക് 79% ആയി പരിമിതപ്പെടുത്തണമെന്നതു സ്വാഗതാർഹം. യഥാർഥത്തിൽ ഇത് 60% ആക്കണം. അധ്യാപകർ അവർ പഠിപ്പിക്കുന്ന കുട്ടികളുടെ ഉത്തരക്കടലാസല്ല മൂല്യനിർണയം നടത്തുന്നതെങ്കിൽ അത് അവരുടെ തൊഴിലിന്റെ ഭാഗമാക്കുന്നതു ശരിയല്ല. പരീക്ഷാ മൂല്യനിർണയത്തിനുള്ള അധിക അലവൻസ് ഒഴിവാക്കുക മാത്രമാകരുത് ആ പരിഷ്കരണത്തിന്റെ ലക്ഷ്യം. 

കാലങ്ങളായുള്ള ആവശ്യം : മനോജ് വി.കൊടുങ്ങല്ലൂർ

സ്‌കൂൾ ഉച്ചഭക്ഷണവുമായി ബന്ധപ്പെട്ടു കാലങ്ങളായുള്ള ആവശ്യങ്ങൾ റിപ്പോർട്ടിൽ ഇടം പിടിച്ചതിൽ സന്തോഷം. ഇതെല്ലാം വേഗത്തിൽ നടപ്പാക്കാം. ഉച്ചഭക്ഷണം 12–ാം ക്ലാസ് വരെ ഘട്ടംഘട്ടമായി നടപ്പാക്കേണ്ടതാണ്. തദ്ദേശ സ്ഥാപന പങ്കാളിത്തത്തോടെ സമൂഹ അടുക്കള എന്ന ആശയം  പദ്ധതി നടത്തിപ്പിന്റെ നൂലാമാലകളിൽപ്പെട്ടു വലയുന്ന അധ്യാപകർക്കു വലിയ ആശ്വാസമാകും. വിഭവങ്ങൾ പ്രാദേശിക സാധ്യതകൾ അനുസരിച്ചു തീരുമാനിക്കാൻ കഴിയണം. ഇത്രയേറെ കുട്ടികൾക്കുവേണ്ട പാൽ, മുട്ട, പച്ചക്കറികൾ എന്നിവയുടെ ഉൽപാദന സാധ്യതകൾ പ്രാദേശികമായി കൂടുതൽ തൊഴിൽദിനങ്ങൾ സൃഷ്ടിക്കും. ബഹുജന പങ്കാളിത്തം ഉറപ്പാക്കുന്നതും ഗുണകരമാകും. 

രാഷ്ട്രീയ ഇടപെടലിന് വഴിയൊരുക്കരുത് : കെ.അബ്ദുൽ മജീദ് 

അധ്യാപക നിയമനത്തിനു പുതിയ ബോർഡ് രൂപീകരിക്കുമ്പോൾ അതു രാഷ്ട്രീയ ഇടപെടലിനു വഴിയൊരുക്കുന്നതായേക്കുമെന്ന ആശങ്കയുണ്ട്.  എയ്ഡഡ് സ്കൂൾ നിയമനം പിഎസ്‌സിക്കു വിട്ടാൽ മാനേജ്മെന്റുകളുമായുള്ള പോരാട്ടത്തിനാകും അതു വഴിതുറക്കുക. അധ്യാപക യോഗ്യത പുനർനിശ്ചയിക്കുന്നതിന് എതിരല്ല. പക്ഷേ, നിലവിലെ അധ്യാപകരുടെ ജോലിയെയോ സ്ഥാനക്കയറ്റ സാധ്യതയെയോ ബാധിക്കരുത്. അധ്യാപക സ്ഥാനക്കയറ്റംസീനിയോറിറ്റിയുടെ അടിസ്ഥാനത്തിൽ മതി. മറ്റു തരത്തിലുള്ള വിലയിരുത്തലിന്റെ അടിസ്ഥാനത്താലാകുമ്പോൾ ബാഹ്യ ഇടപെടലുകൾക്കു സാധ്യതയേറെ. അധ്യാപക വിലയിരുത്തലും നല്ലതു തന്നെ. പക്ഷേ, അതു വകുപ്പുതലത്തിൽ തന്നെയാകണം. 

ഓരോ വർഷവും സ്കൂളിലെത്തുന്ന കുട്ടികളുടെ എണ്ണം അനുസരിച്ച് അധ്യാപക–അനധ്യാപകരെ നിയമിക്കുന്നതിനാണ് തസ്തികനിർണയം നടത്തുന്നത്. അതു മൂന്നു വർഷത്തിലൊരിക്കൽ മതിയെന്ന നിർദേശം അംഗീകരിക്കാവുന്നതല്ല. ഓരോ വർഷവും തസ്തികനിർണയം ജൂലൈ 15നു മുൻപു പൂർത്തിയാക്കി അധ്യാപക–അനധ്യാപക വിന്യാസം നടപ്പാക്കണം. 

മറ്റു കാര്യങ്ങൾ വേണ്ട : എ.പ്രദീപ് കുമാർ

വിദ്യാഭ്യാസ ഇതര കാര്യങ്ങൾക്കു സ്കൂളുകൾ ഉപയോഗിക്കുന്നതും നഷ്ടത്തിലാണെന്ന പേരിൽ അടച്ചുപൂട്ടി റിയൽ എസ്റ്റേറ്റ് താൽപര്യത്തോടെ ഉപയോഗിക്കപ്പെടുന്നതുമെല്ലാം കർശനമായി തടയണം. സ്കൂൾ വളപ്പിൽ വിദ്യാഭ്യാസ വകുപ്പിന്റെ ഓഫിസ് പ്രവർത്തിക്കുന്നതു പോലും ശരിയല്ല. ഇന്നത്തെക്കാലത്ത് ഏതു സാഹചര്യത്തിലുള്ള രക്ഷിതാവും കുട്ടികളുടെ വിദ്യാഭ്യാസം എറ്റവും മികച്ച രീതിയിൽ വേണമെന്ന് ആഗ്രഹിക്കുന്നവരാണ്. അവരിൽ ആ ആത്മവിശ്വാസം സൃഷ്ടിക്കാനായാൽ ഒരു സ്കൂളിലും കുട്ടികൾ കുറയില്ല. അതിനു കഴിഞ്ഞില്ലെങ്കിൽ അതു സ്ഥാപനത്തിന്റെ വീഴ്ചയാണ്. 

കോഴിക്കോട് അടച്ചുപൂട്ടലിന്റെ വക്കിലായിരുന്ന മലാപ്പറമ്പ് എയുപിഎസും കാരപ്പറമ്പ് ഹയർ സെക്കൻഡറി സ്കൂളുമെല്ലാം ഇന്ന് ഏറെ വിദ്യാർഥികൾ പഠിക്കുന്നയിടങ്ങളായി മാറിയത് സർക്കാരിന്റെ പൊതു വിദ്യാഭ്യാസ സംരക്ഷണ യജ്ഞത്തിന്റെ ഭാഗമായാണ്. മനസ്സുവച്ചാൽ അത് എല്ലായിടത്തും സാധിക്കും. ഏറെപ്പേർ ആശ്രയിക്കുന്ന പൊതുവിദ്യാഭ്യാസ വകുപ്പ് ഓഫിസുകൾ ജനകീയവും കാര്യക്ഷമവുമായി മാറ്റാനുള്ള നിർദേശങ്ങളും വൈകാതെ നടപ്പാക്കേണ്ടതാണ്. 

ഹിതപരിശോധന നല്ലത് :  ഒ.കെ.ജയകൃഷ്ണൻ

വിദ്യാഭ്യാസ മേഖലയെ ഒന്നായിക്കണ്ട് അധ്യാപക സംഘടനകൾക്കായി ഹിതപരിശോധന നടത്തുന്നതു സ്വാഗതാർഹം. സംഘടനകളുടെ നേതൃത്വത്തിൽ  സമ്മേളനങ്ങളും സെമിനാറുകളും അനുമതിയോടെ നടത്തുന്നതു നിയന്ത്രിക്കാനുള്ള നിർദേശത്തോടു യോജിക്കാനാകില്ല. ഏതു നിർദേശവും  ചർച്ചയ്ക്കു ശേഷമേ നടപ്പാക്കൂവെന്നു  മന്ത്രി പ്രഖ്യാപിച്ചിട്ടുള്ളതിനാൽ ആശങ്കയില്ല.

തയാറാക്കിയത്: അനീഷ് നായർ