സാംസങിനൊപ്പം ടിവി നിർമിച്ച കേരളം; ട്രാക്ടർ തടഞ്ഞവർ ആ പേര് മനപൂർവം മറന്നു; വഴികാട്ടിയായ അച്യുതമേനോൻ

ഭവനനിർമാണ മന്ത്രിയായിരുന്ന എം.എൻ. ഗോവിന്ദൻനായരാണ് അതിന് ചുക്കാൻ പിടിച്ചത്. കമ്യൂണിസ്റ്റുകാർക്ക് പ്രിയപ്പെട്ട ‘പാമ്പുകൾക്ക് മാളമുണ്ട്, പറവകൾക്കാകാശമുണ്ട്, മനുഷ്യപുത്രനു തലചായ്ക്കാൻ മണ്ണിലിടമില്ല’ എന്ന കെപിഎസി നാടകഗാനത്തിലെ വരികൾ ഉദ്ധരിച്ചാണ് ഈ ദുരവസ്ഥയ്ക്ക് പരിഹാരമുണ്ടാകണമെന്ന് സിപിഐ സംസ്ഥാന കൗൺസിലിൽ എം.എൻ. ഗോവിന്ദൻ നായർ പറഞ്ഞത്. അങ്ങനെയാണ് ‘ഒരു ലക്ഷം വീട്’ പദ്ധതി നടപ്പാക്കാൻ തീരുമാനിച്ചത്. ഒരു പഞ്ചായത്തിൽ 100 വീട് എന്ന കണക്കിൽ സംസ്ഥാനത്തെ 928 പഞ്ചായത്തുകളിലാണ് വീടുകൾ നിർമിച്ചത്. 

ജില്ലകൾ തോറും വ്യവസായ എസ്റ്റേറ്റുകൾ സ്ഥാപിച്ചതിനു പുറമെ 45 പൊതു മേഖലാ സ്ഥാപനങ്ങൾക്കാണ് അച്യുത മേനോൻ മുഖ്യമന്ത്രിയായിരുന്നപ്പോൾ തറക്കല്ലിട്ടത്. കെഎസ്എഫ്ഇ, സപ്ലൈകോ, സ്‌റ്റേറ്റ് പ്ലാനിങ് ബോർഡ്, ആർസിസി, സ്റ്റീൽ കോംപ്ലക്‌സ് ലിമിറ്റഡ്, ഹൗസിങ് ബോർഡ് തുടങ്ങിവ ഇതിൽ ഉൾപ്പെടുന്നു. 

∙ പരാജയപ്പെടുത്തിയത് ആര്?

1970 ജനുവരി 21ന് ട്രാൻസ്പോർട്ട് സമരത്തിന്റെ ഭാഗമായി മട്ടന്നൂരിൽ കെഎസ്ആർടിസി ബസിന് തീകൊളുത്തിയ സംഭവമുണ്ടായി. 4 യാത്രക്കാരാണ് വെന്തുമരിച്ചത്. കൂട്ടുപുഴയിൽ നിന്ന് കണ്ണൂരിലേക്കു പോകുകയായിരുന്ന ബസ് അമ്പതോളം പേർ തടയുകയും നാലുഭാഗത്തു നിന്നും പെട്രോൾ ഒഴിച്ച് തീകൊടുക്കുകയുമാണുണ്ടായത്. ഭയന്ന് ആളുകൾ ബസിൽ യാത്ര ചെയ്യാതിരുന്നാൽ മാത്രമേ സമരം വിജയിക്കൂ എന്നതായിരുന്നു സമരക്കാരുടെ സിദ്ധാന്തം. ഈ കേസിൽ 3 പേർക്കു വധശിക്ഷയും ഏതാനും പേർക്ക് ജീവപര്യന്തം ശിക്ഷയുമാണ് ലഭിച്ചത്. 

അച്യുതമേനോൻ സർക്കാരിനെ പരാജയപ്പെടുത്താൻ സിപിഎം നിരന്തരം ശ്രമിച്ചുവെന്നാണ് സിപിഐ പലവട്ടം ആരോപിച്ചിട്ടുള്ളത്. അതിന് ഉദാഹരണമായി ഈ സംഭവം ചൂണ്ടിക്കാട്ടുന്നു. കടുത്ത അക്രമസമരങ്ങളാണ് അക്കാലത്തുണ്ടായത്. ബസിൽ യാത്ര ചെയ്യുന്ന നിരപരാധികളായ യാത്രക്കാരെ കൊലപ്പെടുത്തുക, ട്രാൻസ്ഫോമറുകൾ തകർക്കുക എന്നിവയെല്ലാം ഉണ്ടായി. നെൽപാടങ്ങളിൽ ട്രാക്ടർ ഉപയോഗിക്കുന്നതിനുംം കയർ മേഖലയിൽ യന്ത്രവൽക്കരണം കൊണ്ടുവരുന്നതിനും എതിരെ അക്രമാസക്ത സമരങ്ങളാണ് സിപിഎം അഴിച്ചുവിട്ടത്.

ഈ രണ്ടുമേഖലകളും കേരളത്തിൽ അന്ത്യശ്വാസം വലിക്കുന്ന അവസ്ഥയിലെത്തിയതിന് സിപിഎമ്മിനെയാണ് സിപിഐ കുറ്റപ്പെടുത്തുന്നത്. വ്യവസായ മേഖലയിലെ ട്രേഡുയൂണിയൻ സമരങ്ങൾ നൽകിയ കുപ്രസിദ്ധിയിൽ നിന്ന് കേരളത്തിന് ഇനിയും കരകയറാനായിട്ടില്ല. കേരളത്തിലെ ഏറ്റവും അക്രമ സമരങ്ങൾ നടന്നത് അച്യുതമേനോൻ ഭരണം നടത്തുന്ന കാലത്താണെന്ന് സിപിഐ വിലയിരുത്തുന്നു. 

∙ എന്തുകൊണ്ട്? 

‘കേരളത്തിലെ ഏറ്റവും മികച്ച കോൺഗ്രസ് സർക്കാരിന് നേതൃത്വം നൽകിയ വ്യക്തിയാണ് സി. അച്യുതമേനോൻ’ – സിപിഎം സൈദ്ധാന്തികനായ പി.ഗോവിന്ദപ്പിള്ളയാണ് ഇങ്ങനെ നിന്ദാസ്തുതി നടത്തിയത്. അച്യുതമേനോന്റെ നിര്യാണത്തിനു പിന്നാലെയാണ് പിജി ഇങ്ങനെ പറഞ്ഞത്. സിപിഎം– കോൺഗ്രസ് ബാന്ധവം സജീവമാകുന്നതിനു മുൻപുള്ളതായിരുന്നു ആ കാലം. 

കോൺഗ്രസിനൊപ്പം ചേർന്ന് അടിയന്തരാവസ്ഥക്കാലത്ത് ഭരണം നടത്തിയെന്നതാണ് അച്യുതമേനോനെതിരെ സിപിഎം ഉന്നയിക്കുന്ന പ്രധാന ആരോപണം. അതേസമയം അടിയന്തരാവസ്ഥയ്ക്കു ശേഷം സിപിഐയുടെ ഭട്ടിൻഡ കോൺഗ്രസ് അടിയന്തരാവസ്ഥയെ തള്ളിപ്പറയുകയും സിപിഎമ്മിനൊപ്പം ചേർന്ന് ഇടതുമുന്നണി രൂപീകരിക്കാൻ തീരുമാനിക്കുകയും ചെയ്തു. അതനുസരിച്ചാണ് പി.കെ. വാസുദേവൻനായർ മുഖ്യമന്ത്രിസ്ഥാനം രാജിവച്ചത്. തുടർന്ന് 4 പതിറ്റാണ്ടു പിന്നിട്ടെങ്കിലും സിപിഎം വിമർശനം തുടരുന്നു. ബംഗാൾ അടക്കമുള്ള സ്ഥലങ്ങളിൽ കോൺഗ്രസുമായി സഖ്യത്തിൽ മത്സരിക്കുമ്പോഴും ഈ വിമർശനം ഒഴിവാക്കിയിട്ടില്ല. അതേസമയം കോൺഗ്രസുമായി സഖ്യം വേണമെന്ന് വാദിക്കുന്ന ‘ഡാങ്കേയിസ്റ്റുകളു’ടെ എണ്ണം സിപിഐയിൽ വർധിക്കുകയും ചെയ്യുന്നു. 

∙ എന്നും വിമർശകൻ

ഉന്നതരായ രണ്ടു കമ്യൂണിസ്റ്റ് നേതാക്കളാണ് ഇഎംഎസും അച്യുതമേനോനും. ഇരുവർക്കും തമ്മിൽ സാമ്യം എന്നപോലെ വൈരുധ്യങ്ങളും ഉണ്ട്. പാർട്ടി നയങ്ങളെ സാധൂകരിക്കാനാണ് എഴുത്തും പ്രസംഗവും വഴി ഇഎംഎസ് എപ്പോഴും ശ്രമിച്ചതെങ്കിൽ എക്കാലവും പാർട്ടിയെ തുറന്നെതിർക്കാൻ സി. അച്യുതമേനോൻ സന്നദ്ധനായി. 1948ൽ ബി.ടി. രണദിവെ സായുധ സമരം എന്ന കൽക്കട്ട തിസീസ് അവതരിപ്പിച്ചപ്പോൾ ‘സായുധ സമരം പാർട്ടിയെ 25 കൊല്ലം പിന്നോട്ടടിക്കും’ എന്നായിരുന്നു അദ്ദേഹത്തിന്റെ നിലപാട്. 1956ൽ പാർട്ടി കോൺഗ്രസിൽ ജനാധിപത്യ നിലപാട് കൈക്കൊള്ളണമെന്ന് വാദിച്ച ന്യൂനപക്ഷമായ പ്രതിനിധികളിൽ പ്രമുഖൻ അച്യുതമേനോൻ ആയിരുന്നു.