‘കോൺഗ്രസിലെ നേതാക്കളെ ചുറ്റി പുതിയ ഗ്രൂപ്പുകൾ: ആ ആവശ്യത്തോട് പത്മജ എതിർപ്പ് പറഞ്ഞില്ല; രാധാകൃഷ്ണനെ സിപിഎം ഒതുക്കാൻ കാരണമുണ്ട്’

ഗ്രൂപ്പിന്റെ അതിപ്രസരവും വ്യക്തിപരമായ അകൽച്ചയും സംഘടനാപ്രശ്നങ്ങളും തൃശൂരിലെ സ്ഥിതി മോശമാക്കി. തിരഞ്ഞെടുപ്പിന് മുൻപായി ഇതൊന്നും പരിഹരിക്കാൻ കഴിഞ്ഞില്ല. പക്ഷേ ഞാൻ ഉറപ്പിച്ചു പറയുന്നു, നിങ്ങൾ ഇതു രേഖപ്പെടുത്തി വച്ചോളൂ, അടുത്ത നിയമസഭാ തിരഞ്ഞെടുപ്പിൽ കുറഞ്ഞത് അഞ്ചു സീറ്റെങ്കിലും തൃശൂരിൽ യുഡിഎഫിന് ലഭിക്കും. അതിനു വേണ്ട അടിത്തറ ഇപ്പോഴും യുഡിഎഫിനുണ്ട്. 

∙ താങ്കൾ ചുമതലയേറ്റ ശേഷം ഐക്യാന്തരീക്ഷത്തോടെ ലീഡർ, ഉമ്മൻചാണ്ടി അനുസ്മരണങ്ങൾ നടത്താനായത് ശുഭസൂചനയാണോ?

തോൽവിയെ തുടർന്ന് ഡിസിസി പ്രസിഡന്റ് ജോസ് വള്ളൂരും യുഡിഎഫ് ചെയർമാ‍ൻ എംപി വിൻസന്റും പാർട്ടി നേതൃത്വവുമായി ആലോചിച്ചു രാജിവച്ചതാണ്. അല്ലാതെ ഒരു വ്യക്തിക്കോ ഏതാനും വ്യക്തികൾക്കോ ഒരു പാർലമെന്റ് തിരഞ്ഞെടുപ്പ് അട്ടിമറിക്കാനൊന്നും സാധിക്കില്ല. അസ്വസ്ഥകളുണ്ടായിരുന്നു. മുന്നൊരുക്കങ്ങൾ ഇല്ലായിരുന്നു എന്നതെല്ലാം ശരിയാണ്. ആ അശ്രദ്ധയ്ക്കു കൊടുക്കേണ്ടി വന്ന കനത്ത വിലയാണ് ഈ  മൂന്നാം സ്ഥാനം. ഇക്കാര്യങ്ങളെല്ലാം മുതിർന്ന നേതാക്കളെ വിളിച്ചു ധരിപ്പിച്ചു. നമുക്ക് പറ്റിയ തെറ്റ് നമ്മൾ തന്നെ തിരുത്തണമെന്ന് അവരോടു പറഞ്ഞു. പാർട്ടിയെ കൂടുതൽ മോശമാക്കുന്നത് അവസാനിപ്പിക്കണമെന്നും അല്ലെങ്കിൽ  കർശന നടപടി ഉണ്ടാകുമെന്ന മുന്നറിയിപ്പും നൽകി. അനുനയിപ്പിച്ചും ഒപ്പം കർശന നിലപാട് എടുത്തുമാണ് മുന്നോട്ടു പോകുന്നത്.

∙ ബിജെപിയിൽ ചേർന്ന പത്മജയുടെ കൈവശമാണല്ലോ മുരളീ മന്ദിരം. അവിടെ വച്ചു തന്നെ കരുണാകരൻ അനുസ്മരണം നടത്താൻ സാധിച്ചത് എങ്ങനെയാണ്?

പത്മജയുമായി ജില്ലാ കോൺഗ്രസ് കമ്മിറ്റി ഭാരവാഹികൾ ബന്ധപ്പെട്ടു. എല്ലാ വർഷവും അവിടെ ലീഡറുടെ ജന്മദിനം കോൺഗ്രസുകാർ ആഘോഷിക്കാറുണ്ട്. ഇത്തവണയും അങ്ങനെ നടത്തണമെന്ന് ഞങ്ങൾ പറഞ്ഞപ്പോൾ ഒരു എതിർപ്പും പത്മജ പറഞ്ഞില്ല. ഭംഗിയായി അതു നടന്നു. ഉമ്മൻചാണ്ടി അനുസ്മരണം ടൗൺഹാളിൽ നടത്താമെന്ന് ഞാൻ പറഞ്ഞപ്പോൾ പലരും നെറ്റി ചുളിച്ചു. ആളു വരുമോ എന്നായിരുന്നു സംശയം. പക്ഷേ ടൗൺഹാൾ നിറഞ്ഞു കവിഞ്ഞു. ഒരു അപസ്വരവും ഇല്ലാതെ ക്യാംപ് എക്സിക്യൂട്ടീവ് നടന്നു. ഞങ്ങൾ  ശുഭപ്രതീക്ഷയിലാണ്.  

∙ കോൺഗ്രസിൽ  ഗ്രൂപ്പുകൾ ഇല്ലാതായതോടെ എല്ലാ പ്രശ്നവും അവസാനിച്ചോ? നേതാക്കൾ തമ്മിലെ അനൈക്യം, ചെറിയ പ്രശ്നങ്ങൾ പർവതീകരിക്കുന്ന സ്ഥിതി ഇതൊക്കെ പാർട്ടിയെ ബാധിക്കുന്നില്ലേ?

എ–ഐ എന്നീ ശക്തമായ ചേരികൾ ഏറക്കുറെ ഇല്ലാതായി. പക്ഷേ, പകരം ചെറിയ ചേരികൾ പ്രത്യക്ഷപ്പെട്ടു. നേതാക്കന്മാർക്കും ചുറ്റും ചിലർ ഒത്തു കൂടുകയാണ്. സോവിയറ്റ് യൂണിയന്റെ തകർച്ചയ്ക്കു ശേഷം ചെറിയ ചെറിയ രാജ്യങ്ങൾ ഉണ്ടായതു പോലെ കേരളത്തിലെ കോൺഗ്രസിൽ ചെറിയ ഗ്രൂപ്പുകൾ ഉദയം ചെയ്യുന്നു. അതു പ്രവർത്തകരുടെ ആത്മവിശ്വാസത്തെ ബാധിച്ചിട്ടുണ്ട്. 

സ്വന്തം നിലനിൽപ്പിനായി നേതാക്കന്മാ‍ർ ഇങ്ങനെ ആളെ കൂട്ടുന്ന പ്രവണത പാർട്ടിക്കു ഗുണം ചെയ്യില്ല. മുൻപ് രണ്ടു പേർ ഇരുന്ന് ചർച്ച ചെയ്ത് പ്രശ്നം തീർക്കേണ്ട സ്ഥാനത്ത് ഇന്ന് ആറുപേർ ഇരുന്നാലും തീരില്ലെന്നായി. ഇതേ നേതാക്കൾ ആത്മവിമർശനം നടത്തി ഐക്യത്തോടെ നീങ്ങിയാൽ സംഘടനയെ ശക്തമാക്കാൻ സാധിക്കും. സംഘടനാ സംവിധാനം ദുർബലമാണ്. ഇന്ത്യയെ നയിക്കാൻ പ്രാപ്തരായ ആളുകളാണ് കേരളത്തിലെ നേതാക്കൾ. അവർ വിശാലമനസ്കതയോടെ ഒത്തുപിടിച്ചാൽ മാത്രം മതി. 

∙ ചെറുപ്പക്കാരുടെ നിരയിലാണല്ലോ താങ്കളുടെ സ്ഥാനം. പക്ഷേ അവരുടെ പൊതു കൂട്ടായ്മകളിൽ അങ്ങനെ സജീവവുമല്ല. ഒറ്റയാൻ രീതിയുണ്ടോ? 

താങ്കളുടെ നിരീക്ഷണം ശരിയാണ്. ഓരോ ഘട്ടത്തിലും സുഹൃത്തുക്കളായ സഹപ്രവർത്തകർ ഒരു ടീമായി നിൽക്കണമെന്ന് എന്നോടു പറഞ്ഞിട്ടുണ്ട്. ഞാൻ അതു മുഖവിലയ്ക്കെടുക്കാറില്ല. സംസ്ഥാനം മുഴുവൻ പാറിപ്പാറി വലിയ ലക്ഷ്യങ്ങളുമായി നടക്കുന്ന ഒരാളല്ല ഞാൻ. ഏൽപ്പിച്ച പ്രദേശത്ത് പാർട്ടിയെ മെച്ചപ്പെടുത്താൻ എന്തു ചെയ്യണമെന്ന ആലോചനയും നടപടികളുമാണ് ഓരോരുത്തരും ചെയ്യേണ്ടതെന്നാണ് എന്റെ നിലപാട്. ഞാൻ എന്നെ വളർത്താനല്ല, പാർട്ടിയെ വളർത്താനാണ് കൂടുതൽ ശ്രമിച്ചിട്ടുള്ളത്. 

∙ ഈ പ്രസ്താവന സമൂഹമാധ്യമങ്ങളിൽ വല്ലാതെ അഭിരമിക്കുന്നവരെ ഉദ്ദേശിച്ചാണോ?

പാർട്ടിക്കകത്ത് ചർച്ച ചെയ്യാനുളളത് ഉടൻ വാട്സാപ് ഗ്രൂപ്പിലിടുന്നതാണ് പുതിയ തലമുറയുടെ ഒരു പ്രശ്നം. പ്രതികരിക്കുന്നതെല്ലാം സോഷ്യൽ മീഡിയയിലാണ്. ഇതെല്ലാം എതിരാളികൾക്കു കൊടുക്കുന്ന ചെറു വടികളാണ്. സോഷ്യൽ മീഡിയയിൽ വരുന്നതോടെ  വലിയ സംഭവമായി എന്നാണ് ഇവരുടെ വിശ്വാസം. കഴിഞ്ഞ നിയമസഭാ തിരഞ്ഞെടുപ്പിൽ പാലക്കാട് 9 ചെറുപ്പക്കാർക്കാണ് അവസരം ലഭിച്ചത്. മുൻകൂട്ടി അതതു മണ്ഡലങ്ങളിൽ പോയി പ്രവർത്തിക്കാൻ അവർക്കു സാവകാശം കിട്ടിയില്ല. 

എന്നാൽ സോഷ്യൽ മീഡിയയിൽ സജീവമായാൽ ജനത്തിന് അറിയാമെന്നായിരുന്നു അവരുടെ വിചാരം. എല്ലാവരു  തോറ്റത് കാൽലക്ഷത്തോളം  വോട്ടിനാണ്. സോഷ്യൽ മീഡിയ വേണം, പക്ഷേ ജനങ്ങളുടെ ഇടയിൽ ഇറങ്ങി പ്രവർത്തിക്കുകയും ചെയ്യണം. ഞാൻ സോഷ്യൽ മീഡിയയിൽ ഉണ്ട്. പക്ഷേ അതിലൂടെ പിആർ വർക്ക് നടത്താറില്ല. അതിനായി സ്റ്റാഫിനെ വച്ചിട്ടില്ല. അറിയേണ്ട ചില കാര്യങ്ങൾ ഞാൻ തന്നെ അതിൽ ഷെയർ ചെയ്യും. ഒരു വിവാദ പരാമർശം പോലും എന്റെ സോഷ്യൽ മീഡിയയിൽ ഉണ്ടാകില്ല, പ്രസംഗത്തിലും ഉണ്ടാകില്ല. 

∙ ചില പ്രസ്താവനകൾ നടത്തിയാൽ ശ്രദ്ധ പിടിച്ചു പറ്റും എന്ന പ്രലോഭനം ഉണ്ടാകാറില്ലേ? 

മുതിർന്ന നേതാക്കളുടെ ചില വിവാദ പ്രസ്താവനകൾ കാണുമ്പോൾ അവരെ വിളിച്ചോ, നേരിൽ കാണുമ്പോഴോ അഭിപ്രായ വ്യത്യാസം പറയാറുണ്ട്. അവരെ ഉപദേശിക്കാൻ ആളല്ല. പക്ഷേ അഭിപ്രായം അങ്ങനെ നേരിട്ടു രേഖപ്പെടുത്തുന്നതാണ് എന്റെ രീതി. ഞാൻ മാധ്യമ പ്രവർത്തകനായിരുന്നു. ഒരുപാട് സുഹൃത്തുക്കൾ ആ മേഖലയിലുണ്ട്. ഒരു പ്രസ്താവന കൊടുക്കാൻ വേണ്ടി ഞാൻ അവരെ ബന്ധപ്പെടാറില്ല. 

ന്യായമായി വരേണ്ടതു വരും. അവിഹിതമായി അവരെ സ്വാധീനിച്ച് ശ്രദ്ധ പിടിച്ചു പറ്റുന്നത് എന്റെ രീതിയല്ല. നേതാക്കന്മാരുടെ പ്രസ്താവനകൾക്കു മറുപടി പറയുന്നതും എന്റെ പണിയല്ല. പാർട്ടിയെ പൊതുജനമധ്യത്തിൽ അവഹേളിക്കുന്നതിനോട് ഒരു ശതമാനം യോജിക്കാൻ കഴിയില്ല. കുറച്ചു കാലം മുൻപ് പരസ്യപ്രതികരണം നടത്തിയതിന്റെ തിക്താനുഭവം എനിക്കുണ്ടായിട്ടുണ്ട്. ആ പാഠം ഉൾക്കൊണ്ടു കൊണ്ടാണ് ഇക്കാലമത്രയും പ്രവർത്തിക്കുന്നത്.

∙ പാലക്കാട് ജില്ലയിൽ കുട്ടികളെ സ്ഥിരമായി ഡൽഹി കാണിക്കാൻ കൊണ്ടുപോകാറുണ്ടല്ലോ? എന്താണ് ലക്ഷ്യമിടുന്നത്? 

സമർഥരായ ഏതാനും വിദ്യാർഥികളെ പ്രചോദിപ്പിക്കാനായി ചെയ്തു തുടങ്ങിയതാണ്. പിന്നീട് അതു തുടരേണ്ട സാഹചര്യമായി. എനിക്ക് അതു വലിയ ചാരിതാർഥ്യം നൽകുന്നു. ഇതുവരെ 24 സ്കൂളുകളിൽ നിന്നുള്ളവരെ ഡൽഹി കാണിച്ചു. തീവണ്ടി ടിക്കറ്റ്, ഡൽഹിയിലെ താമസം, പ്രധാന സ്ഥലങ്ങൾ കാണാനുള്ള സൗകര്യം ഇത്രയും ചെയ്തുകൊടുക്കും. ഇതിനെല്ലാം വേണ്ടിവരുന്ന തുക എന്റെ ശമ്പളത്തിൽനിന്നു തന്നെയാണ് കണ്ടെത്തുന്നത്.