വോട്ടുപിടിക്കാൻ അമിത് ഷായുടെ ‘ഗുജറാത്ത് മോഡൽ’? സഹകരണത്തിൽ ബിജെപിക്ക് രാഷ്ട്രീയ മോഹം; ‘നയം’ ഭയന്ന് ഇടതും?

∙ ആർക്കാകും മേൽക്കൈ?

കേന്ദ്ര, സംസ്ഥാന സർക്കാരുകളിൽ ആർക്കാകും സഹകരണ സംഘങ്ങളുടെ നിയന്ത്രണത്തിൽ മേൽക്കൈ, കരുവന്നൂർ പോലുള്ള ക്രമക്കേടുകൾ കണ്ടെത്തിയാൽ നടപടിയെടുക്കാൻ ആർക്കാണ് അധികാരം, അഡ്മിനിസ്ട്രേറ്ററെ നിയമിച്ച് സഹകരണ സംഘങ്ങൾ പിടിച്ചെടുക്കുന്ന കേരള മോഡൽതന്നെയാകുമോ കേന്ദ്രത്തിന്റെയും മനസ്സിൽ തുടങ്ങിയ കാര്യങ്ങളാണ് ഇനി അറിയേണ്ടത്. 

സഹകരണ മേഖലയിൽ പുതിയ ദേശീയ സഹകരണ നയം സംബന്ധിച്ച കേന്ദ്ര സർക്കാർ പ്രഖ്യാപനം വിരൽചൂണ്ടുന്നത് ഗുജറാത്ത് മോഡലിലേക്കു തന്നെയെന്നാണു സൂചന. കേന്ദ്ര സഹകരണമന്ത്രി കൂടിയായ അമിത് ഷാ പ്രത്യേക താൽപര്യമെടുത്ത് ഗുജറാത്തിലെ ബനാസ്കന്ത, പഞ്ച്മഹൽ എന്നീ ജില്ലകളിൽ സഹകരണ നയത്തിന്റെ പൈലറ്റ് പ്രോജക്ടും നടപ്പാക്കിക്കഴിഞ്ഞു.

∙ ഗുണമുണ്ട്, ദോഷവും

എല്ലാ സഹകരണ ബാങ്കുകളെയും കോർ ബാങ്കിങ്ങിലൂടെ ബന്ധിപ്പിച്ചാണ് പദ്ധതി നടപ്പാക്കിയത്. ഫണ്ട് പൂർണമായും സഹകരണ ബാങ്കുകളുടെ കേന്ദ്ര പൂളിലേക്കാണ് പോകുക. ഇതനുസരിച്ച് അധിക ഫണ്ടുള്ള ബാങ്കുകളിലെ പണം ഫണ്ട് കുറവുള്ള സഹകരണ ബാങ്കുകൾക്കും ലഭ്യമാകും. ഇത് ഫണ്ട് കുറവുള്ള സഹകരണ ബാങ്കുകൾക്കും നേട്ടമാകുമെന്നതാണ് പ്രത്യേകത. 

ഉദാഹരണത്തിന്, ഒരിടത്തെ സഹകരണ ബാങ്കിൽ ധാരാളം പണമുണ്ടെന്നു വയ്ക്കുക. മറ്റൊരിടത്തെ ബാങ്കിൽ പണമില്ല. അങ്ങിനെയെങ്കിൽ മിച്ചം വരുന്ന ‘സർപ്ലസ്’ ഫണ്ട് കേന്ദ്ര പൂളിലേക്കു മാറ്റാം. അവിടെനിന്ന് അത് നിക്ഷേപം കുറഞ്ഞ ബാങ്കുകളിലേക്കും മാറ്റാം. സഹകരണം സംഘം ശക്തമായാൽ ആ നാട്ടിൽ ആവശ്യമുള്ളത്ര വായ്പ നൽകാം. അതുവഴി പ്രദേശത്തെ ജനങ്ങളുടെ ജീവിതം മെച്ചപ്പെടുത്താം, ഗ്രാമീണ വികസനത്തിനും പണം ഉപയോഗപ്പെടുത്താം. ഇതാണ് പദ്ധതിയുടെ ഗുണകരമായ വശം.

അതേസമയം നെഗറ്റിവ് വശങ്ങളുമുണ്ട്. രാഷ്ട്രീയ ഇടപെടലാണ് അതിൽ പ്രധാനം. ഒരു പ്രദേശത്തെ പ്രസ്തുത പാർട്ടി അംഗങ്ങൾക്കു മാത്രം വായ്പ നൽകുന്ന അവസ്ഥ വരികയാണെങ്കിൽ എന്തു ചെയ്യും? അങ്ങനെ വായ്പ നൽകി തിരഞ്ഞെടുപ്പിൽ വോട്ടു ചോദിച്ചാലോ? ഇപ്പോൾത്തന്നെ ഗുജറാത്തിലെ പലയിടത്തും ഇങ്ങനെ നടക്കുന്നതായി പ്രതിപക്ഷത്തിന്റെ ശക്തമായ ആരോപണമുണ്ട്. പുതിയ സഹകരണ നയം വന്നാൽ അത് സഹകരണ സംഘങ്ങളിൽ കേന്ദ്രത്തിന് കൂടുതൽ പിടിമുറുക്കാനുള്ള അവസരമാണ് തുറക്കുന്നതെന്ന ആരോപണത്തിനു പിന്നിലും ഇക്കാരണമാണ്. 

∙ ബിജെപി പിടിച്ചെടുക്കുമോ?

എന്നാൽ അത്തരമൊരു കേന്ദ്ര നയം വന്നാൽ സംസ്ഥാന സർക്കാരുകളുടെ അധികാരം കുറയുമോ എന്ന പേടി കേരളത്തിൽ ഉൾപ്പെടെ ശക്തമായുണ്ട്. ഓരോ മേഖലയും കേന്ദ്രീകരിച്ച് സഹകരണ സംഘങ്ങളിലൂടെ ലഭിക്കുന്ന രാഷ്ട്രീയ നേട്ടം ഇല്ലാതാകും എന്നതാണ് അതിലെ പ്രധാന കാരണങ്ങളിലൊന്ന്. കൂടുതൽ മേഖലകളിൽ സ്വാധീനശക്തിയാകാൻ ബിജെപിക്കു സാധിക്കുമെന്ന ആശങ്കയും കേരളത്തിൽ ഇടതു–വലതു പക്ഷങ്ങൾക്കുണ്ട്.