‘കമ്യൂണിസ്റ്റുകാർ എന്നും കീറപ്പായയിൽ കിടക്കണോ?’ വിശ്വസ്തനെ കൈവിട്ട് പിണറായി; സിപിഎമ്മിൽ ഇനി ഗോവിന്ദൻ പക്ഷം!

വർഷങ്ങൾക്കു മുൻപാണ്, തൃശൂരിൽ ഡിവൈഎഫ്ഐ നടത്തിയ പ്രകൃതി സംരക്ഷണ പരിപാടിയിൽ ജനപങ്കാളിത്തം കുറഞ്ഞു. വേദിയിലെ കസേര എടുത്തു മാറ്റുന്നതിനു മുൻപ് യുവജന സംഘടനാ നേതാക്കളെ തേടി ഇ.പി. ജയരാജന്റെ ഫോൺ വിളിയെത്തി. ചോദ്യം ഒന്നു മാത്രം. എന്തുകൊണ്ടാണ് പങ്കാളിത്തം കുറഞ്ഞത്? ടെലിഫോൺ ശാസന കഴിഞ്ഞു, ഇപി ഇത്രയും കൂടി പറഞ്ഞു. ‘ആളെക്കൂട്ടാൻ നിങ്ങൾക്കു പറ്റില്ലെങ്കിൽ പറഞ്ഞാൽ മതി. നിങ്ങളുടെ പരിപാടി ഞാൻ നടത്തിത്തരാം’. യുവജന സംഘടനാ നേതാക്കൾക്കു കാര്യം മനസ്സിലായി. അടുത്ത പരിപാടി വൻ വിജയവും. ഇപി എന്ന് പാർട്ടി വൃത്തങ്ങളിൽ വിളിക്കപ്പെടുന്ന ജയരാജൻ വെറുതേ പറഞ്ഞതല്ല. ഡിവൈഎഫ്ഐയുടെ അഖിലേന്ത്യാ പ്രസിഡന്റായിരുന്നു ഇപി. തൃശൂർ ജില്ലാ സെക്രട്ടറിയായും പ്രവർത്തിച്ചിട്ടുണ്ട്.

വിഭാഗീയതയെത്തുടർന്ന് തൃശൂർ, ആലപ്പുഴ ജില്ലാ കമ്മിറ്റികൾ പിരിച്ചുവിട്ടപ്പോൾ ഇപിക്ക് തൃശൂരിലും എം.എ. ബേബിക്ക് ആലപ്പുഴയിലുമായിരുന്നു ചുമതല. പാർട്ടിയിലും മുന്നണിയിലും എന്നും പ്രശ്ന പരിഹാരകൻ അല്ലെങ്കിൽ ‘ട്രബിൾ ഷൂട്ടർ’ എന്ന നിലയിലും ചർച്ചകൾക്കു നേതൃത്വം നൽകുന്ന ‘മീഡിയേറ്റർ’ എന്ന നിലയിലും കാലങ്ങളോളം ഇപി തിളങ്ങിയിരുന്നു. പല തസ്തികകൾ ഉണ്ടെങ്കിലും സിപിഎമ്മിലും എൽഡിഎഫ് മുന്നണിയിലും ട്രബിൾ ഷൂട്ടർ, മീഡിയേറ്റർ പദവികൾ പരസ്യമായി ഇല്ലതാനും. അതിനാൽ മുന്നണിയെ മുന്നോട്ട് നയിക്കുമ്പോഴും പിന്നണിയിലായിരുന്നു ഇപിയുടെ സ്ഥാനം. കണ്ണൂരിലെ മൂന്നു ജയരാജന്മാരിൽ കേരളത്തിൽ ഇപി മുന്നിലാവുകയും ചെയ്തു.

മന്ത്രി സ്ഥാനം ഏറ്റെടുത്തതിനു ശേഷമുണ്ടായ നാക്കുപിഴകൾ എല്ലാവരെയും പോലെ പാർട്ടിയും തമാശയായി എടുത്തു കാണും. എന്നാൽ പ്രകാശ് ജാവഡേക്കറെ സന്ദർശിച്ചത് അങ്ങനെ കാണാൻ തയാറല്ലെന്നു പാർട്ടി തിരിച്ചറിഞ്ഞുവെന്നു വ്യക്തം. അതു കൊണ്ടാണല്ലോ മുന്നണിക്കു നേതൃത്വം നൽകുന്നതിൽ ഇപിക്ക് പരിമിതികൾ ഉണ്ടെന്ന് സംസ്ഥാന സെക്രട്ടറി എം.വി. ഗോവിന്ദൻ മറയ്ക്കാതെ പറഞ്ഞത്. ഇപിയെ കൺവീനർ സ്ഥാനത്തു നിന്നു നീക്കുന്നതിന് കാരണം എം.വി. ഗോവിന്ദൻ പറയുന്നതു മാത്രമാണോ? എവിടെയാണ് ഇപിക്ക് പിഴച്ചത്? എന്തുകൊണ്ടാണ് എന്നും സംരക്ഷിച്ചു പോന്ന പിണറായി വിജയന് ഇപിയെ കൈവിടേണ്ടി വന്നത്. സിപിഎമ്മിലെ പുതിയ അധികാര ധ്രുവീകരണത്തിന്റെ സൂചനയാണ് ഇപിയുടെ പടിയിറക്കം? ?

∙ പാർട്ടിയിൽ നിന്ന് ബുള്ളറ്റുകൾ പലവട്ടം, തലനാരിഴയ്ക്ക് രക്ഷപ്പെട്ട ‘ട്രബിൾ ഷൂട്ടർ’

ട്രെയിനിൽ യാത്ര ചെയ്യുമ്പോഴാണ് അന്ന് ഇപിക്ക് വെടിയേറ്റത്. തലനാരിഴയ്ക്കു രക്ഷപ്പെട്ടു. തലയിൽ വെടിയുണ്ടയുടെ ചീളുമായാണ് ജീവിതം. അന്നു മുതൽ വേദനയും കൂടെയുണ്ട്. ആ വെടിയുണ്ട തന്നെ ഉന്നം വച്ചതല്ലെന്നും ശക്തനായ മറ്റൊരു നേതാവായിരുന്നു ലക്ഷ്യമെന്നും ഇപി പറയുന്നു. പാർട്ടിയിലും മുന്നണിയിലും എക്കാലവും ഇപിയുടെ ദൗത്യവും ഏതാണ്ട് ഇതുപോലെയായിരുന്നു. മറ്റു പലരുടെയും ‘കയ്യാളായും ട്രബിൾ ഷൂട്ടറായും’ ഇപി പ്രവർത്തിച്ചു. എന്നാൽ ഇക്കുറി ഇപിയുടെ കൺവീനർ സ്ഥാനം ലക്ഷ്യമിട്ടെത്തിയ വെടിയുണ്ട പാഴായില്ലെന്നു വേണം കരുതാൻ. ഇതുപോലെ ഇപിയെ ലക്ഷ്യംവച്ച് വന്ന പല വെടിയുണ്ടകളിൽനിന്നും പണ്ട് ഇപി തലനാരിഴയ്ക്ക് രക്ഷപ്പെട്ടതാണ്. ഉദാഹരണത്തിന് വ്യവസായ മന്ത്രി സ്ഥാനം നഷ്ടപ്പെട്ടെങ്കിലും തിരിച്ചു വരാൻ ഇപിക്കു കഴിഞ്ഞിരുന്നു. 

കഴിഞ്ഞ ദിവസം സംസ്ഥാന സമിതി യോഗത്തിൽ ഇപിക്കെതിരെ ആഞ്ഞടിച്ചത് സമകാലികനായ മന്ത്രിയാണ്. ഇപിക്കെതിരെ അദ്ദേഹം ആഞ്ഞടിക്കുമ്പോൾ പ്രതിരോധിക്കാൻ ആരും തയാറില്ലെന്നാണ് അറിവ്. സിപിഎമ്മിന്റെ കണ്ണൂർ കളരിയിൽ പയറ്റിയാണ് ഇപിയുടെ വളർച്ച. എം.വി. രാഘവൻ, ഇ.കെ.നായനാർ, പിണറായി വിജയൻ, കോടിയേരി ബാലകൃഷ്ണൻ എന്നിവരുടെ പിൻനിരയിൽ ഇ.പി. ജയരാജനും പി. ജയരാജനും എം.വി. ജയരാജനും പാർട്ടിയെ നയിക്കുന്ന കാലം. സിഐടിയു വിഭാഗത്തിനെതിരെ വിഎസ് പക്ഷം രൂപപ്പെട്ടപ്പോൾ പിണറായിയും ഇപിയും വിഎസിനൊപ്പം നിന്നു. പിന്നീട് വിഎസും പിണറായിയും പിരിഞ്ഞപ്പോൾ പിണറായിക്കൊപ്പവും. അന്നും ഇന്നും പിണറായിയുടെ വിശ്വസ്തനായിരുന്നു ഇപി. നാക്കുപിഴയും നടപടി വിവാദങ്ങളും ഇപിയെ കുരുക്കിയപ്പോഴും പിണറായി കയ്യയച്ചു സഹായിക്കുകയും ചെയ്തു. 

എന്നാൽ ജാവഡേക്കറുമായുള്ള ചർച്ച പിറ്റേന്നു തന്നെ പിണറായി തള്ളിപ്പറഞ്ഞു. ചർച്ച എന്തിനായിരുന്നെന്നും ആർക്കു വേണ്ടി ആയിരുന്നെന്നുമുള്ള തർക്കം ഇപ്പോഴും തീർന്നിട്ടില്ല. പലരുടെ പ്രശ്നങ്ങളും പരിഹരിച്ചിരുന്നത് ഇപിയാണ്. ഇപിയെ പ്രയോജനപ്പെടുത്തിയവരും ഒട്ടേറെയുണ്ട്. താൻ സഹായിച്ചവർ തന്നെ സഹായിക്കുമെന്ന് ഇപി പ്രതീക്ഷിച്ചിരുന്നോ? ഇല്ലെന്നു വേണം കരുതാൻ. സംസ്ഥാന സമിതിയിൽ കൺവീനർ സ്ഥാനത്തു നിന്നു ഇപിയെ മാറ്റാൻ തീരുമാനം ഉണ്ടാകുമെന്ന് അവസാന നിമിഷംവരെയും ഇപിക്കു സൂചന ലഭിച്ചില്ല. മുൻപ് സഹായിച്ചവർ കൈവിടുകയും ചെയ്തു.

∙ കടുത്ത നടപടിക്ക് യച്ചൂരി, ഒടുവിൽ കൈവിട്ട് പിണറായി

ഇപിക്കെതിരായ നടപടിക്ക് പ്രധാനമായും രണ്ടു കാരണങ്ങൾ ഉണ്ടെന്നാണ് പാർട്ടി വൃത്തങ്ങൾ നൽകുന്ന സൂചന. ജാവഡേക്കർ കൂടിക്കാഴ്ച സംബന്ധിച്ച് ലോക്സഭാ തിരഞ്ഞെടുപ്പിലെ പരാജയത്തിനു ശേഷം പാർട്ടിയിൽ കടുത്ത വിമർശനം ഉയർന്നു. പിണറായി പരസ്യമായി തള്ളിപ്പറഞ്ഞതിനാൽ ശക്തമായി വിമർശനം ഉന്നയിക്കാൻ താഴെത്തട്ടിലെ നേതാക്കൾക്ക് ഭയവും ‘പരിമിതിയും’ ഉണ്ടായതുമില്ല. പാർട്ടി സമ്മേളനത്തിലേക്ക് നീങ്ങുന്ന സാഹചര്യത്തിൽ നടപടി എടുക്കാതെ മുന്നോട്ട് പോകാൻ നേതൃത്വത്തിന് കഴിയുമായിരുന്നില്ല. ഇപിയുമായി അടുത്ത സൗഹൃദം പുലർത്തുന്ന ആലപ്പുഴയിലെ ഒരു എംഎൽഎ പറഞ്ഞത് ഇങ്ങനെയാണ്. ‘ഈ ആരോപണങ്ങൾ നിൽക്കുമ്പോൾ എങ്ങനെ പാർട്ടി സമ്മേളനം നടത്തും.’

ബ്രാഞ്ച് മുതൽ ദേശീയ നേതൃത്വം വരെ പ്രചരിച്ച വാദം ഇതായിരുന്നു. എന്നാൽ അതു മാത്രമല്ല കാരണമെന്നാണ് സൂചന. മുതിർന്ന നേതാവായ ഇപി കോടിയേരിക്കു ശേഷം സംസ്ഥാന സെക്രട്ടറി സ്ഥാനത്ത് എത്തുമെന്ന് പലരും കരുതിയിരുന്നു. കേന്ദ്ര കമ്മിറ്റിയിലെ മുതിർന്ന അംഗമായ ഇപി പൊളിറ്റ് ബ്യൂറോയിലേക്കും എത്തുമെന്നും കരുതിയിരുന്നു. എന്നാൽ ഈ രണ്ടു സ്ഥാനങ്ങളും കയ്യെത്തും ദൂരത്ത് ഇപിക്ക് നഷ്ടമായി. എക്കാലവും പിണറായിയുടെ വിശ്വസ്തനായിരുന്നു ഇപി. എന്നാൽ കോടിയേരിയുമായി അകൽച്ച പലപ്പോഴും ഉണ്ടായി. തന്റെ പിൻഗാമിയായി കോടിയേരിയും എം.വി. ഗോവിന്ദനെ പിന്തുണച്ചിരുന്നുവെന്നും സൂചനകളുണ്ട്. ചികിത്സയ്ക്കായി പോകുന്നതിനു മുൻപ് ഇക്കാര്യം കോടിയേരി പിണറായിയോടു സൂചിപ്പിക്കുകയും ചെയ്തുവെന്നും പറയുന്നു.