‘പാര്‍ട്ടി പ്രസിഡന്റ് നിഷേധിച്ച കാര്യത്തെക്കുറിച്ച് ഞാനെന്തു പറയാൻ’: പവാറിനെ കാണാൻ തോമസ് കെ. തോമസ്

രണ്ടര വർഷത്തിലേറെ നീണ്ട തന്റെ മന്ത്രിസ്ഥാനത്തിന് അവകാശം ഉന്നയിച്ച് എൻസിപിക്കുള്ളിൽനിന്നു കുട്ടനാട് എംഎൽഎ തോമസ് കെ.തോമസ് മുന്നോട്ടുവരുമ്പോൾ വനം മന്ത്രി എ.കെ.ശശീന്ദ്രനു പറയാൻ ഒന്നേയുള്ളൂ – ‘പാർട്ടി പ്രസിഡന്റ് തന്നെ നിഷേധിച്ച ഒരു കാര്യത്തെക്കുറിച്ചു ഞാനെന്തു പറയാൻ. മന്ത്രിസ്ഥാനം കിട്ടാൻ വേണ്ടിയോ അതു നിലനിർത്താൻ വേണ്ടിയോ ഞാൻ ഇന്നേവരെ ആരെയും കണ്ടിട്ടില്ല. ദേശീയ പ്രസിഡന്റിനെ കണ്ടിട്ടുതന്നെ ഒന്നര വർഷത്തിലേറെയായി. സ്ഥാനമാറ്റം എന്നോട് ആരും ചർച്ച ചെയ്തിട്ടുമില്ല’ – ശശീന്ദ്രൻ നയം വ്യക്തമാക്കി.

? രണ്ടര വർഷത്തിനുശേഷം മന്ത്രിമാറ്റം എന്ന ധാരണ ഉണ്ടായിരുന്നു എന്നാണു വാദം.

അങ്ങനെയൊരു ചർച്ചയേ പാർട്ടിക്കുള്ളിൽ ഉണ്ടായിട്ടില്ല. സംസ്ഥാന പ്രസിഡന്റോ ദേശീയ പ്രസിഡന്റോ എന്നോട് അങ്ങനെ ആവശ്യപ്പെട്ടിട്ടുമില്ല.

? ഇപ്പോൾ ചർച്ചയാകാൻ കാരണമെന്താണ്.

ഒരു ചാനലിലാണു മന്ത്രിമാറ്റം സജീവമായി ചർച്ച ചെയ്യുന്നത്. അതിനുപിന്നാലെ മറ്റുമാധ്യമങ്ങളിലും സമാന വാർത്തകൾ പ്രത്യക്ഷപ്പെടുന്നു. ആ ചാനലിന് എന്നോട് എന്തെങ്കിലും വിരോധമുണ്ടായിട്ടാണ് എന്നൊന്നും തോന്നുന്നില്ല.

? പാർട്ടിയുടെ ജില്ലാ പ്രസിഡന്റുമാർ യോഗം ചേർന്നു ശശീന്ദ്രൻ മാറണമെന്ന ആവശ്യം പ്രസിഡന്റിനോട് ഉന്നയിച്ചു എന്നാണു വാർത്തകൾ.

ഇക്കാര്യം പാർട്ടി പ്രസിഡന്റ് തന്നെ നിഷേധിച്ചു. വാർത്തയിൽ പറയുന്നതു പോലെ 9 പ്രസിഡന്റുമാർ അല്ല, കോഴിക്കോട്ടെ ഇടതു മുന്നണി കൺവീനർ മുക്കം മുഹമ്മദ് ഉൾപ്പെടെ 10 പേർ പങ്കെടുത്ത യോഗമാണു നടന്നത്. സംസ്ഥാന സമ്മേളന നടത്തിപ്പു ചർച്ച ചെയ്ത് ഒരുമണിക്കൂറിനുള്ളിൽ പിരിഞ്ഞു.

? ജില്ലാ ഭാരവാഹികൾ പാർട്ടി പ്രസിഡന്റിനൊപ്പം നിന്ന് അങ്ങയെ മാറ്റാൻ ആവശ്യപ്പെട്ടുവെന്നും വാർത്തകളുണ്ട്.

ജില്ലാ ഭാരവാഹികൾ മന്ത്രിക്കൊപ്പമല്ല, പാർട്ടി പ്രസിഡന്റിന്റെ ഒപ്പം തന്നെയല്ലേ നിൽക്കേണ്ടത്. പാർട്ടിയാണ് അവസാനവാക്ക്. പ്രസിഡന്റാകട്ടെ അങ്ങനെ ഒരു ചർച്ചയും ഇതുവരെ നടത്തിയിട്ടില്ല.

? മന്ത്രിസ്ഥാനം നിലനിർത്താൻ താങ്കളുമായി അടുപ്പമുള്ള നേതാക്കൾ ദേശീയ പ്രസിഡന്റിനെ കണ്ടിരുന്നോ.

ഞാൻ പാർട്ടി ദേശീയ പ്രസിഡന്റിനെ കണ്ടിട്ട് ഒന്നര വർഷത്തിലേറെയായി. ഡൽഹിയിൽ പോകുമ്പോഴാണു കാണാറുള്ളത്. അടുത്തകാലത്ത് അത്തരം ചർച്ചകൾ നടത്താൻ പോയിട്ടുമില്ല.