വിദ്യാഭ്യാസമുണ്ട്, തൊഴിലില്ലായ്മയിൽ മുന്നിൽ കേരളം; ഗൾഫ് വിട്ട് വന്നവർക്കും കഷ്ടം; പാഠം പഠിക്കാറായില്ലേ?

വിദ്യാസമ്പന്നരായ ചെറുപ്പക്കാർ, മികച്ച വിദ്യാഭ്യാസ സ്ഥാപനങ്ങൾ, ഉന്നത വിദ്യാഭ്യാസ മേഖലയിൽ ദേശീയ ശരാശരിയേക്കാളും മികച്ച പ്രകടനം കാഴ്ചവയ്ക്കുന്ന സംസ്ഥാനം, അങ്ങനെ വിദ്യാഭ്യാസത്തിന്റെ കാര്യത്തിൽ കേരളം മറ്റു സംസ്ഥാനങ്ങളെക്കാൾ വളരെ മുൻപന്തിയിലാണ്. എന്നാൽ പഠിച്ചിറങ്ങുന്ന ഈ വിദ്യസമ്പന്നരായ ചെറുപ്പക്കാർക്ക് മികച്ച ജോലി, ശമ്പളം എന്നിവ ലഭിക്കുന്നുണ്ടോ? ഇല്ല എന്നാണ് ഉത്തരം. കേന്ദ്രസർക്കാർ പുറത്തുവിട്ട ‘പീരിയോഡിക് ലേബർ ഫോഴ്സ്’ സർവേയിലാണ് ഞെട്ടിക്കുന്ന ഈ വിവരമുള്ളത്.

15 മുതൽ 29 വരെയുള്ള പ്രായക്കാര്‍ക്കിടയിലെ തൊഴിലില്ലായ്മ നിരക്കിൽ മറ്റു സംസ്ഥാനങ്ങളെ അപേക്ഷിച്ച് കേരളം (29.9%) മുൻനിരയിലാണ്. കേന്ദ്രഭരണ പ്രദേശങ്ങളായ ലക്ഷദ്വീപും (36.2%) ആന്‍ഡമാന്‍ ആന്‍ഡ് നിക്കോബാര്‍ ദ്വീപുകളും (33.6%) ആണ് തൊഴിലില്ലായ്മയില്‍ കേരളത്തിന് മുൻപിലുള്ളത്. മധ്യപ്രദേശിലും ഗുജറാത്തിലുമാണ് തൊഴിലില്ലായ്മ നിരക്ക് കുറവ്. കേരളത്തിലെ സ്ത്രീകളിൽ 47.1 ശതമാനം പേരും പുരുഷന്മാരിൽ 19.3 ശതമാനം പേരും തൊഴിൽരഹിതരാണ്. 2023 ജൂലൈ  മുതൽ 2024 ജൂൺ വരെ നടത്തിയ സർവേയിലെ വിവരങ്ങളാണിത്. ഉയർന്ന വിദ്യാഭ്യാസവും മെച്ചപ്പെട്ട ജീവിത സാഹചര്യങ്ങളും ഉണ്ടായിട്ടും എന്തുകൊണ്ടായിരിക്കും കേരളത്തിൽ തൊഴിലില്ലായ്മ വർധിക്കുന്നത്? അതിന് ഒട്ടേറെ സാമ്പത്തിക–സാമൂഹിക–രാഷ്ട്രീയമാനങ്ങളുണ്ടെന്നാണ് വിദഗ്ധർ‍ പറയുന്നത്.

∙ ശമ്പളമില്ല, കടൽ കടക്കാൻ യുവജനങ്ങൾ

സംസ്ഥാനത്ത് ഓരോ വർഷവും പഠനം പൂർത്തിയാക്കി പുറത്തിറങ്ങുന്നത് നിരവധി പേരാണ്. വിദ്യാസമ്പന്നരായ ഈ യുവജനങ്ങളെ ഉള്‍ക്കൊള്ളാൻ നമ്മുടെ തൊഴിൽ മേഖലയ്ക്ക് കഴിയുന്നുണ്ടോ? ഇല്ല എന്നു തന്നെ പറയണം. ഇത് ഉദ്യോഗാർഥികൾക്കിടയിൽ കടുത്ത മത്സരം സൃഷ്ടിക്കുന്നുണ്ട്. വിദ്യാഭ്യാസ യോഗ്യതകള്‍ക്ക് അനുസരിച്ചുള്ള ജോലി പലപ്പോഴും യുവാക്കൾക്ക് ലഭിക്കുന്നില്ല. ലഭ്യമായ തൊഴിലിനേക്കാളും ഉയർന്ന വിദ്യാഭ്യാസ യോഗ്യതകൾ ഉള്ളവരും നമ്മുടെ യുവജനങ്ങൾക്കിടയിലുണ്ട്. ഉദ്യോഗാർഥികളുടെ യോഗ്യതകളും തൊഴിൽ ചെയ്യാൻ ആവശ്യമായ കഴിവും തമ്മില്‍ പൊരുത്തപ്പെട്ട് പോകാത്തതും പ്രതിസന്ധിയുടെ ആക്കം കൂട്ടുന്നു.

വിദ്യാഭ്യാസ യോഗ്യതകൾക്കും വൈദഗ്ധ്യത്തിനും അനുസരിച്ചുള്ള ശമ്പളം പലപ്പോഴും യുവാക്കൾക്ക് ലഭിക്കുന്നില്ലെന്നതും വാസ്തവമാണ്. അതുകൊണ്ടുതന്നെ പ്രതീക്ഷകൾക്കൊത്തുള്ള ശമ്പളമില്ലാത്ത ജോലികൾ വേണ്ടെന്നു വയ്ക്കുന്നതിലേക്കും പലപ്പോഴും കാര്യങ്ങളെത്തുന്നു. വിദേശത്തേക്ക് കുടിയേറി മികച്ച ശമ്പളം വാങ്ങി ജീവിതനിലവാരം ഉയർത്താനാണ് പല യുവാക്കളും ആഗ്രഹിക്കുന്നത്. വിദേശത്തു മെച്ചപ്പെട്ട വേതനവും അവസരങ്ങളും ലഭിക്കുമെന്ന് പ്രതീക്ഷിച്ച് അങ്ങോട്ട് കുടിയേറാൻ യുവാക്കൾ താൽപര്യം പ്രകടിപ്പിക്കുന്നതായി 2023ലെ കേരള മൈഗ്രേഷൻ സർവേ വ്യക്തമാക്കുന്നുണ്ട്.

ഏകദേശം 30% യുവാക്കൾ തങ്ങളുടെ വിദ്യാഭ്യാസ യോഗ്യതകളേക്കാൾ കുറഞ്ഞ ജോലികൾ സ്വീകരിക്കാൻ വിമുഖത കാട്ടുകയും തൊഴിലില്ലാത്തവരായി തുടരുകയും ചെയ്യുന്നതായി സർവേ പറയുന്നു. ഉദ്യോഗാർഥികളുടെ പ്രതീക്ഷകളും നമ്മുടെ തൊഴിൽ സാഹചര്യങ്ങളും തമ്മിലുള്ള പൊരുത്തക്കേടുകൾ വ്യക്തമാക്കുന്നതാണിത്. അതേസമയം 40 ലക്ഷത്തിനടുത്ത് അതിഥി തൊഴിലാളികൾക്ക് കേരളം മികച്ച തൊഴിലിടമാണ്. തൊഴിൽ സംബന്ധിച്ചുള്ള യുവാക്കളുടെ മനോഭാവത്തിന്റെ പ്രതിഫലനം കൂടിയാണ് തൊഴിലില്ലായ്മയ്ക്ക് കാരണമെന്ന് പറയേണ്ടി വരുന്നത് ഈ സാഹചര്യത്തിലാണെന്നും വിദഗ്ധർ ചൂണ്ടിക്കാട്ടുന്നു.

∙ ആർട്സ് ആൻസ് സയൻസിൽ കുട്ടികളില്ല

സംസ്ഥാനത്തെ ഏറ്റവും ഉയർന്ന തൊഴിലില്ലായ്മ നിരക്കാണിതെന്നും മുപ്പത് ശതമാനത്തോളം ചെറുപ്പക്കാർക്കും വരുമാനമില്ലെന്നു വ്യക്തമാക്കുന്നതാണ് സർവേ റിപ്പോർട്ടെന്നുമാണു ധനകാര്യ കമ്മിഷൻ മുൻ ചെയർമാൻ ഡോ.ബി.എ.പ്രകാശ് പറയുന്നത്. ‘‘സംസ്ഥാനത്തെ ഏറ്റവും ഉയർന്ന തൊഴിലില്ലായ്മ നിരക്കാണിത്. മുപ്പത് ശതമാനത്തോളം ചെറുപ്പക്കാർക്കും വരുമാനമില്ലെന്ന് വ്യക്തമാക്കുന്നതാണ് സർവേ. കോവിഡിന് പിന്നാലെ ഗൾഫ് രാജ്യങ്ങളിൽ നിന്ന് പ്രവാസികള്‍ തൊഴിൽ ഇല്ലാതെ തിരികെ എത്തുകയും നാട്ടിൽ തന്നെ തൊഴിലിന് വേണ്ടി ശ്രമിക്കുകയും ചെയ്യുന്ന അവസ്ഥയുണ്ടായി.

സ്ഥിരവും മെച്ചപ്പെട്ടതുമായ ജോലി ഇവിടെ ലഭിക്കുന്നില്ല. പൊതുമേഖലയിൽ ജോലി വേണമെന്നാണ് നമ്മുടെ നാട്ടിലെ ചെറുപ്പക്കാരുടെ കാഴ്ചപ്പാട്. സ്ഥിരമായ സർക്കാർ ജോലി, പെൻഷൻ കിട്ടുന്ന ജോലി. എന്നാൽ അതിൽ ചെറിയ മാറ്റം വരുന്നുണ്ട്. ഇവിടെ ജോലി കിട്ടിയില്ലെങ്കിൽ വിദേശത്ത് പോവുക എന്ന കാഴ്ചപ്പാടിലേക്ക് യുവാക്കൾ എത്തുന്നു. കേരളം വിട്ട് മറ്റ് രാജ്യങ്ങളിലേക്ക് പോകാനാണ് ചെറുപ്പക്കാർ ശ്രമിക്കുന്നത്. കാർഷിക മേഖലയിലും നിർമാണ മേഖലയിലും തൊഴിൽ അവസരങ്ങളുണ്ട്. എന്നാൽ അതിനോട് വിദ്യാസമ്പന്നരായ ചെറുപ്പക്കാർക്ക് താൽപര്യമില്ല.

അവരുടെ തൊഴിൽ താൽപര്യങ്ങള്‍ വളരെ വ്യത്യസ്തമാണ്. പഠിച്ചവർക്ക് അവരുടെ യോഗ്യതയ്ക്ക് അനുസരിച്ചുള്ള തൊഴിൽ ലഭിക്കുന്നില്ല. എൻജിനീയറിങ് പഠിച്ച ആളുകളടക്കം ഡെലിവറി ബോയ്സിന്റെ ജോലി ചെയ്യുന്നുണ്ട്. തൊഴിലധിഷ്ഠിതമായ വിദ്യാഭ്യാസ സമ്പ്രദായം പണ്ടുമുതലേ നമുക്കില്ലെന്നതാണ് വാസ്തവം. മുൻപ് മെഡിക്കൽ കോളജുകളും എൻജിനീയറിങ് കോളജുകളും നാട്ടിൽ കുറവായിരുന്നു. ആർട്സ് ആൻഡ് സയൻസ് കോളജുകളിലേക്കാണ് കുട്ടികൾ എത്തിയിരുന്നത്. എന്നാലിന്ന് ആർട്സ് ആൻഡ് സയൻസ് മേഖലയിൽ പല കോളജുകളിലും കുട്ടികളെ കിട്ടാനില്ല. അങ്ങനൊരു മാറ്റം വരുന്നുണ്ട്. വലിയ താമസമില്ലാതെ ആർട്സ് ആൻഡ് സയൻസ് കോഴ്സുകൾ നിന്ന് പോവുന്ന അവസ്ഥ വരും. നഴ്സിങ്, മെഡിസിൻ പഠിച്ച് രക്ഷപ്പെടാൻ ഇന്നിപ്പോൾ ആളുകൾ ശ്രമിക്കുന്നു’’– ബി.എ. പ്രകാശ് നിരീക്ഷിക്കുന്നു.

∙ സയൻസ് പഠിച്ചാലേ ജോലിയുള്ളൂ

വിദ്യാർഥികൾക്ക് തൊഴിൽ പരിശീലനം നൽകുന്ന രീതിയിലുള്ള വിദ്യാഭ്യാസരീതി അത്യാവശ്യമാണെന്ന് യൂണിവേഴ്സിറ്റി കോളജിലെ ഇക്കണോമിക്സ് വിഭാഗത്തിലെ അസിസ്റ്റന്റ് പ്രഫസർ ഡോ.രശ്‍മി സി.പണിക്കർ പറയുന്നു. ‘‘ഒരുപാട് കുട്ടികൾ ഓരോ വർഷവും പഠിച്ചിറങ്ങുന്നുണ്ട്. എന്നാൽ അവർക്ക് തൊഴിൽ മേഖലയിൽ വേണ്ടത്ര കാര്യക്ഷമത ഇല്ലാതെ പോകുന്നുണ്ട്. സിലബസ് പരിഷ്കരിച്ചതുകൊണ്ട് മാത്രം കാര്യമില്ല. സിലബസ് മാറ്റിയാലും സിസ്റ്റം മാറുന്നില്ല. ഉന്നതവിദ്യാഭ്യാസ മേഖലയിൽ തൊഴിലധിഷ്ഠിത കോഴ്സുകൾ അനുവദിക്കണം. സ്വകാര്യ മേഖലയിൽ പ്രഫഷനൽ കോഴ്സുകൾ പഠിപ്പിക്കുന്ന നിരവധി കോളജുകളുണ്ട്. എത്ര പൈസ കൊടുത്തുവേണമെങ്കിലും സീറ്റ് വാങ്ങിക്കാൻ സാധിക്കുന്നവരുണ്ട്. എന്നാൽ മേന്മയുള്ള വിദ്യാഭ്യാസം നൽകാൻ സ്ഥാപനങ്ങൾക്കു കഴിയുന്നുണ്ടോയെന്ന് സംശയമാണ്.

ടൂറിസം മേഖലയുമായി ബന്ധപ്പെട്ട് പ്രവർത്തിക്കുന്ന വർക്കലയിലെ ഒരു സ്ഥാപനം നന്നായി ഇംഗ്ലിഷ് സംസാരിക്കാൻ കഴിയുന്ന ഒരു വിദ്യാർഥിയെ അവിടുത്തെ ഒരു ചടങ്ങിൽ പങ്കെടുപ്പിക്കുന്നതിനായി അയയ്ക്കാമോയെന്ന് ചോദിച്ചിരുന്നു. എന്നാൽ നന്നായി ഭാഷ കൈകാര്യം ചെയ്യാനുള്ള ആത്മവിശ്വാസം കുട്ടികൾക്ക് കുറവാണ്. പിജി പഠിച്ചിറങ്ങുന്ന വിദ്യാർഥികൾക്ക് പോലും നന്നായി ഇംഗ്ലിഷ് സംസാരിക്കാനുള്ള ആത്മവിശ്വാസം ഇല്ല. വിദ്യാർഥികൾക്ക് മലയാളവും ഇംഗ്ലിഷും നന്നായി എഴുതാൻ‍ അറിയില്ലെന്ന് വൈവകൾക്ക് പോകുമ്പോൾ തോന്നാറുണ്ട്.