കായിക താരങ്ങൾ ഓടിയാൽ കുഴിയിൽ വീഴും; കാട് മൂടിപ്പോയത് കോടികൾ; 32 കോടിയുടെ ഉപകരണങ്ങളും എവിടെപ്പോയി?

കർണാടകയിൽ 1997ൽ നടന്ന ദേശീയ ഗെയിംസ് വഴി ബെംഗളൂരു നഗരത്തിനു ലഭിച്ചതു രണ്ടു മനോഹര സ്റ്റേഡിയങ്ങളാണ്– ശ്രീകണ്ഠീരവ സ്റ്റേഡിയവും ശ്രീകണ്ഠീരവ ഇൻഡോർ സ്റ്റേഡിയവും. ഇന്നും കർണാടകയുടെ സ്പോർട്സ് മികവിന്റെ കേന്ദ്രങ്ങളാണിത്. കർണാടകയിൽ മാത്രമല്ല,  ഡൽഹിയിലും മണിപ്പുരിലുമെല്ലാം ദേശീയ ഗെയിംസുകൾക്കു പിന്നാലെ ഒട്ടേറെ അടിസ്ഥാന സൗകര്യങ്ങളുണ്ടായി. കേരളത്തിന്റെ കാര്യമോ? 2015ൽ കേരളത്തിൽ നടന്ന ദേശീയ ഗെയിംസിനായി നിർമിച്ച സ്റ്റേഡിയങ്ങൾ, ഗെയിംസ് വില്ലേജ്, കോടികൾ മുടക്കി വാങ്ങിയ കായിക ഉപകരണങ്ങൾ എന്നിവയുടെ അവസ്ഥ എന്താണ്? ‘മനോരമ’ നടത്തിയ അന്വേഷണത്തിന്റെ വിശദാംശങ്ങൾ ആരെയും ഞെട്ടിക്കും.

∙ ട്രാക്കുമില്ല ടർഫുമില്ല

ഒളിംപ്യന്മാരടക്കം പരിശീലിച്ചു വളർന്ന തൃശൂർ കോർപറേഷൻ സ്റ്റേഡിയത്തിലെ അത്‍ലറ്റിക് ട്രാക്ക് ഇല്ലാതാക്കിയാണു ദേശീയ ഗെയിംസിനായി സിന്തറ്റിക് ഫുട്ബോൾ ടർഫ് ഒരുക്കിയത്. 7 കോടി രൂപയായിരുന്നു ചെലവ്. പവിലിയനും നിർമിച്ചു. ദേശീയ ഗെയിംസ് കഴിഞ്ഞ് സ്റ്റേഡിയത്തിന്റെ നിയന്ത്രണം കോർപറേഷൻ ഏറ്റെടുത്തതോടെ തുടങ്ങി ദുർഗതി. അറ്റകുറ്റപ്പണിയില്ലാതെ ടർഫ് നാശമായി. കൃത്രിമപ്പുല്ല് അടർന്നുമാറി പലയിടത്തും കുഴികളായി. ഇവിടെ ചില ഭാഗങ്ങളിൽ കോൺക്രീറ്റ് പുറത്തുകാണാം. അത്‍ലറ്റിക് ട്രാക്ക് ഉണ്ടായിരുന്ന ഭാഗത്താകെ വൻ കുഴികളും വെള്ളക്കെട്ടുമാണ്.

∙ ഷൂട്ടിങ് റേഞ്ച് കണ്ടവരുണ്ടോ?

ട്രാപ് ആൻഡ് സ്കീറ്റ് ഷൂട്ടിങ്ങിനായി തൃശൂരിലെ പൊലീസ് അക്കാദമിക്കുള്ളിൽ 6 കോടി മുടക്കി നിർമിച്ച ഷൂട്ടിങ് റേ‍ഞ്ചിനോളം ദുർഗതി കേരളത്തിലെ മറ്റൊരു വേദിക്കുമില്ല. ദേശീയ ഗെയിംസിനു ശേഷം ഈ ഷൂട്ടിങ് റേഞ്ച് പുറത്തുനിന്നാരും കണ്ടിട്ടില്ല. സുരക്ഷാപ്രശ്നങ്ങൾ ചൂണ്ടിക്കാട്ടി കായികതാരങ്ങളെയോ പരിശീലകരെയോ റേഞ്ചിൽ പ്രവേശിപ്പിക്കാറില്ല. റേഞ്ച് കായികതാരങ്ങൾക്കു തുറന്നുകൊടുക്കണമെന്ന ആവശ്യം ഉയർന്നപ്പോൾ അധികൃതർ റേഞ്ചിന്റെ ഒരു ഭാഗം പൊളിച്ചുകളഞ്ഞു. ശേഷിക്കുന്ന ഭാഗത്തെ ബങ്കറുകളും അതിനുള്ളിലെ കോടികൾ വിലവരുന്ന ഉപകരണങ്ങളും മഴവെള്ളത്തിൽ മുങ്ങി നശിച്ചിട്ടു വർഷങ്ങളായി. ഇവിടെ  ഷൂട്ടിങ് ക്ലബ് സ്ഥാപിക്കാൻ കോടതി ഉത്തരവിട്ടിരുന്നെങ്കിലും അതും നടപ്പാക്കിയില്ല.

∙ മറ്റു വേദികൾ അതിദയനീയം!

തിരുവനന്തപുരം വട്ടിയൂർക്കാവിലെ ഷൂട്ടിങ് റേഞ്ച് നവീകരണമോ വേണ്ടത്ര പരിപാലനമോ ഇല്ലാത്ത അവസ്ഥയിലാണ്. ആറ്റിങ്ങൽ ശ്രീപാദം സ്റ്റേഡിയത്തിന്റെയും സ്പോർട്സ് ഹോസ്റ്റലിന്റെയും പരിസരം മുഴുവൻ കാടുമൂടിക്കഴിഞ്ഞു. ഇവിടം ഇഴജന്തുക്കളുടെ വിഹാരകേന്ദ്രമാണ്. പവിലിയനിലേക്കുള്ള പടികളിൽവരെ കാടുവളർന്നിരിക്കുന്നു. കോഴിക്കോട്, കണ്ണൂർ മുണ്ടയാട് ഇൻഡോർ സ്റ്റേഡിയങ്ങളുടെ നിലം പൊളിഞ്ഞു കിടക്കുകയാണ്.

∙ കാടുമൂടി 60 കോടിയുടെ ഗെയിംസ് വില്ലേജ്

കായിക വകുപ്പിന്റെ കെടുകാര്യസ്ഥതയുടെ ഏറ്റവും മികച്ച ഉദാഹരണമാണ് 2015ൽ തിരുവനന്തപുരം വേദിയായ ദേശീയ ഗെയിംസിന്റെ വില്ലേജായിരുന്ന മേനംകുളത്തെ ഭൂമി. ഇവിടം കാടുപിടിച്ചു കിടക്കുകയാണ്. ഗെയിംസിനു ശേഷം ഇവിടെ സ്ഥാപിക്കുമെന്നു പ്രഖ്യാപിച്ച ജി.വി.രാജ സ്പോർട്സ് എക്സലൻസ് സെന്ററിനായി കഴിഞ്ഞ നിയമസഭാ തിരഞ്ഞെടുപ്പിനു തൊട്ടുമുൻപ് അന്നത്തെ കായികമന്ത്രി ഇ.പി.ജയരാജൻ ഇട്ട തറക്കല്ലും കാടുമൂടി. വ്യവസായ വകുപ്പിൽനിന്ന് പാട്ടത്തിനെടുത്ത 30 ഏക്കറിലായിരുന്നു 60 കോടിയിലേറെ മുടക്കി  വില്ലേജ് സ്ഥാപിച്ചത്. 680 ചതുരശ്ര അടി വീതമുള്ള 365 പ്രീ ഫാബ്രിക്കേറ്റഡ് വില്ലകളും 40 വിഐപി ക്വാർട്ടേഴ്സുകളുമാണ് ഇവിടെയുണ്ടായിരുന്നത്. ഓരോ വില്ലയ്ക്കും ചെലവ് 12 ലക്ഷം രൂപ. ഗെയിംസ് കഴിഞ്ഞ് ഇവ പൊളിച്ച് സർക്കാർ ഓഫിസുകൾക്കും ആശുപത്രികൾക്കും നൽകാനായിരുന്നു പദ്ധതി.