‘പൂരം വെടിക്കെട്ട് തരുമോയെന്ന് ശിവകാശി ലോബി; കണ്ണ് 2000 കോടിയിൽ’; സുരേഷ് ഗോപിയും മന്ത്രിയും അറിഞ്ഞില്ലേ?

‘‘തൃശൂർ പൂരത്തിന്റെ വെടിക്കെട്ട്  ഞങ്ങൾക്ക് നൽകാമോ?’’ അയൽ സംസ്ഥാനമായ തമിഴ്‌നാട്ടിലെ ശിവകാശിയിൽനിന്ന് അന്വേഷണങ്ങൾ തൃശൂരിലെ പൂരം നടത്തിപ്പുകാർക്ക് വന്നുതുടങ്ങിയിരിക്കുന്നു. ഇന്നും ഇന്നലെയുമല്ല ‘ശിവകാശി ലോബി’ തൃശൂർ പൂരത്തിൽ കണ്ണുവച്ചു തുടങ്ങിയത്. കേരളത്തിൽ ഉത്സവങ്ങളുടെയും പെരുന്നാളുകളുടെയും ഭാഗമായി ഒരു വർഷം 1500 മുതല്‍ 2000 കോടിയുടെ വെടിക്കെട്ടുകളാണ് നടത്തപ്പെടുന്നത്. ഇതിൽ നല്ലൊരു ഭാഗവും തയാറാക്കുന്നത് വെടിക്കെട്ട് ആശാൻമാർ എന്ന് നമ്മൾ വിളിക്കുന്ന പരമ്പരാഗതമായി വെടിക്കോപ്പുകൾ നിർമിക്കുന്ന കേരളത്തിലെ കലാകാരൻമാരാണ്. ഇവരുടെ അന്നത്തിലാണ് ശിവകാശി ലോബി കണ്ണുവയ്ക്കുന്നത്. 

തൃശൂർ പൂരവുമായി ബന്ധപ്പെട്ട് ആനകളുടെ നിയന്ത്രണവുമായി ബന്ധപ്പെട്ട വിഷയങ്ങളാണ് മിക്ക വർഷങ്ങളിലും വിവാദമായി ഉയരുന്നതെങ്കിൽ ഇക്കുറി വെടിക്കെട്ടാണ് ആ സ്ഥാനത്ത്. അതിനു കാരണമായതാകട്ടെ കേന്ദ്രസർക്കാർ പുറത്തിറക്കിയ വിജ്ഞാപനവും. കൊല്ലം പുറ്റിങ്ങൽ വെടിക്കെട്ട് അപകടത്തിന് ശേഷമാണ് കേന്ദ്രസർക്കാർ നാലംഗ ഉന്നതതല കമ്മിഷനെ സുരക്ഷ സംബന്ധിച്ച അന്വേഷണത്തിനായി നിയോഗിച്ചത്. പെസോ (പെട്രോളിയം ആൻഡ് എസ്ക്പ്ലോസീവ് സേഫ്റ്റി ഓർഗനൈസേഷൻ) ഉപാധ്യക്ഷൻ ഡോ.എ.കെ. യാദവ്, ഡോ.ആർ. വേണുഗോപാൽ, ഡോ. ജി.എം. റെഡ്ഡി, ഡോ. രാധാകൃഷ്ണൻ എന്നിവരടങ്ങുന്നതായിരുന്നു സമിതി. 

കമ്മിഷൻ റിപ്പോർട്ട് നൽകിയത് കേന്ദ്ര മന്ത്രിസഭ അംഗീകരിച്ചതോടെയായിരുന്നു വിവാദങ്ങളുടെ തുടക്കം. കമ്മിഷൻ നിർദേശിക്കാത്ത കാര്യങ്ങൾ വരെ കേന്ദ്രം പുറത്തുവിട്ട റിപ്പോർട്ടിൽ കയറിപ്പറ്റി. ഇതെങ്ങനെ സംഭവിച്ചുവെന്ന ചോദ്യത്തിനും ഉത്തരമില്ല. പെസോയുടെ നിർദേശങ്ങൾക്കു പിന്നിൽ ശിവകാശി ലോബിയുടെ കൈകളാണെന്ന് ഉറച്ചു വിശ്വസിക്കുകയാണ് തിരുവമ്പാടി ദേവസ്വം ജോയിന്റ് സെക്രട്ടറിയും പൂരം വെടിക്കെട്ടിന്റെ കൺവീനറുമായ പി. ശശിധരൻ. മനോരമ ഓൺലൈൻ പ്രീമിയത്തിലെ ‘ഇഷ്യു ഒപീനിയനി’ൽ അദ്ദേഹം മനസ്സുതുറക്കുന്നു. 

∙ ‘പുറ്റിങ്ങൽ, ആ അപകടം ക്ഷണിച്ചുവരുത്തിയത്’

പുറ്റിങ്ങൽ ക്ഷേത്രത്തിലെ ഉൽസവവുമായി ബന്ധപ്പെട്ടുണ്ടായ വെടിക്കെട്ടപകടമാണ് പുതിയ അന്വേഷണ റിപ്പോർട്ടിന് ആധാരം. പുറ്റിങ്ങൽ വെടിക്കെട്ട് ദുരന്തത്തിന് ശേഷം ഹൈക്കോടതി നിയോഗിച്ച വിദഗ്ധ സംഘത്തിൽ ഉൾപ്പെട്ട ഒരാളാണ് ഞാൻ. അന്ന് അവിടെപ്പോയി തെളിവുകൾ അടക്കം കണ്ടിരുന്നു. പുറ്റിങ്ങലിൽ അല്ലാതെ ഇന്നേവരെ കേരളത്തിൽ വെടിക്കെട്ട് നടത്തിയ ഒരിടത്തും മാഗസിൻ (വെടിക്കെട്ടിന് തൊട്ടുമുൻപായി വെടിക്കോപ്പുകൾ സൂക്ഷിക്കുന്ന ഇടം) പൊട്ടിത്തെറിച്ച് അപകടമുണ്ടായിട്ടില്ല. പുറ്റിങ്ങലിൽ തീർത്തും അശാസ്ത്രീയമായിട്ടാണ് വെടിക്കെട്ട് നടത്തിയത്. വിഡിയോ തെളിവുകളിൽ അവിടെ കണ്ട കാര്യങ്ങൾ ഇതായിരുന്നു. 

നിയമം അനുസരിക്കാതെയും അനുവാദമില്ലാതെയും നടത്തിയ വെടിക്കെട്ടായിരുന്നു പുറ്റിങ്ങലിലേത്. രണ്ട് ചേരികളായി തിരിഞ്ഞുള്ള മത്സര വെടിക്കെട്ടായിരുന്നു അവിടെ. നിർത്താതെ അമിട്ട് പൊട്ടിക്കുക എന്നതായിരുന്നു മത്സരത്തിന്റെ രീതി. വിജയിക്കുന്ന വെടിക്കെട്ടാശാന് സ്വർണം സമ്മാനമായി നൽകും. അതിനാൽ നിർത്താതെ അമിട്ട് പൊട്ടിക്കാനാണ് വെടിക്കെട്ട് നടത്തുന്നവർ ശ്രമിച്ചത്. തെളിവായി ശേഖരിച്ച വെടിക്കെട്ടിന്റെ വിഡിയോ പരിശോധിച്ചപ്പോൾ ഓരോ ഉരലിലും (അമിട്ട് പൊട്ടിക്കാനുള്ള കുഴൽ പോലുള്ള ഭാഗം) ഓരോ അമിട്ട് പൊട്ടുന്നതിന് അനുസരിച്ച് അടുത്ത അമിട്ട് ഇട്ട് പൊട്ടിക്കുന്ന അപകടകരമായ രീതിയായിരുന്നു കണ്ടത്.

ഈ സമയം തൊട്ടുമുൻപേ കത്തിച്ച അമിട്ട് മടങ്ങി വന്നപ്പോൾ (പാതി ദൂരം ഉയർന്ന ശേഷം വിപരീത ദിശയിൽ തിരിച്ചെത്തുക) തീപ്പൊരികൾ തെറിക്കുകയായിരുന്നു. അമിട്ട് തിരിഞ്ഞു വരുന്നതുകണ്ട് കയ്യിലെ അമിട്ടുകളുമായി ഒരാൾ തിരികെ മാഗസിനുള്ളിലേക്ക്  ഓടിക്കയറി. എന്നാൽ ഇതിനോടകം തീപ്പൊരികൾ കയ്യിലെ അമിട്ടിൽ പതിക്കുകയും മാഗസിനുള്ളിൽ എത്തിയപ്പോൾ പൊട്ടിത്തെറിക്കുകയുമായിരുന്നു. ഇതാണ് വലിയ ദുരന്തമായത്. ഈ  അപകടത്തിനെ അടിസ്ഥാനമാക്കിയാണ് പെസോ ഇടപെട്ട് മാഗസിനും ഫയർലൈനും തമ്മിലുള്ള ദൂരം 200 മീറ്ററാക്കി ഉയർത്തിയത്. 

∙ ‘പണ്ടേയുണ്ട് തൃശൂർ പൂരവും മാഗസിനും’

തൃശൂർ പൂരം തുടങ്ങിയിട്ട് നൂറ്റാണ്ടുകളായി. പൂരത്തിന് മൂന്ന് വെടിക്കെട്ടാണുള്ളത്. സാംപിൾ വെടിക്കെട്ട്, പൂരത്തിന്റെ അന്ന്, പൂരത്തിന്റെ പിറ്റേന്ന് ഉച്ചയ്ക്കുള്ള വെടിക്കെട്ട്. പുറ്റിങ്ങലിന് ശേഷം പൂരത്തിന് ഉപയോഗിക്കുന്ന അമിട്ടിന്റെ വലുപ്പം കുറച്ചു. 4, 6 ഇഞ്ച് വലുപ്പമുള്ള കുഴിമിന്നലും അമിട്ടുമാണ് ഇപ്പോൾ ഉപയോഗിക്കുന്നത്. അതുപോലെ നൂറ് വർഷമായി തൃശൂരിൽ മാഗസിനുമുണ്ട്. പാറമേക്കാവും തിരുവമ്പാടിയുമാണ് സ്വന്തമായി നൂറ് വര്‍ഷം മുൻപേ മാഗസിൻ  തയാറാക്കിയത്. പുറ്റിങ്ങൽ വെടിക്കെട്ട് അപകടത്തിന് ശേഷമാണ് കേരളത്തിൽ വെടിക്കെട്ട് നടത്തുന്ന മറ്റ് പ്രധാന സ്ഥലങ്ങളിൽ മാഗസിൻ തയാറാക്കാൻ തുടങ്ങിയത്. തൃശൂർ പൂരത്തിനുള്ളത് പെസോ നിലവിൽ നിർദേശിക്കുന്ന എല്ലാ ചട്ടങ്ങളും പാലിച്ച് നടത്തപ്പെടുന്ന വെടിക്കെട്ടാണ്. വെടിക്കെട്ടിനായുള്ള ഡിസ്പ്ലേ ലൈസൻസ് എടുത്ത് നടത്തപ്പെടുന്ന ഇന്ത്യയിലെ ഏക വെടിക്കെട്ടും ഇതാണ്. 

തൃശൂരിൽ മാഗസിനുള്ളിലേക്ക് അതീവ ശ്രദ്ധയോടെയാണ് വെടിക്കോപ്പ് കൊണ്ടുവരുന്നത്. നിലവിൽ 45 മീറ്ററാണ് മാഗസിനും ഫയർലൈനും തമ്മിലുള്ള ദൂരം. വെടിക്കെട്ടിന് മണിക്കൂറുകൾക്ക് മുൻപ് മാത്രമാണ് വെടിക്കോപ്പുകൾ പൂരപ്പറമ്പിലെ മാഗസിനിലേക്ക് എത്തിക്കുന്നത്. സാംപിള്‍ വെടിക്കെട്ടിന് മാത്രമാണ് രണ്ട് ദിവസം മുന്‍പ് കൊണ്ടുവരുന്നത്. ബാക്കി രണ്ട് വെടിക്കെട്ടിനും മണിക്കൂറുകൾ മുൻപാണ് മാഗസിനിലേക്ക് വെടിക്കോപ്പുകൾ എത്തിക്കുന്നത്. അതേസമയം വെടിക്കെട്ട് തുടങ്ങുമ്പോൾ ഈ മാഗസിനുകൾ പൂർണമായും ശൂന്യമായിരിക്കും. പൂരത്തിലെ മൂന്ന് പ്രധാന വെടിക്കെട്ടുകളിലും ഈ രീതിയാണ് പിന്തുടരുന്നത്. 

പൊലീസ്, റവന്യു, ഫയർ ഫോഴ്സ് തുടങ്ങിയ അധികാരികൾ നൽകുന്ന നിർദേശങ്ങൾ ഞങ്ങൾ പാലിക്കുന്നുണ്ട്. വെടിക്കോപ്പുകളിൽ ഉപയോഗിക്കുന്ന രാസവസ്തുക്കൾ ഓരോ വിഭാഗത്തിൽനിന്നും പ്രത്യേകം സാംപിളുകൾ എടുത്ത് കാക്കനാടുള്ള ലാബിൽ പരിശോധിച്ച ശേഷമാണ് പൂരത്തിന് വെടിക്കെട്ട് നടത്തുന്നത്. നിരോധിത രാസവസ്തുക്കൾ ഒന്നും ഉപയോഗിക്കുന്നില്ലെന്ന് ഉറപ്പുവരുത്തുന്നതിന് വേണ്ടിയാണ് ഈ പരിശോധന. ഇതിന് ശേഷം പെസോ റിപോർട്ട് നൽകിയ ശേഷമാണ് കലക്ടർ വെടിക്കെട്ടിന് അനുമതി നൽകുന്നത്. നമ്മളെ സംബന്ധിച്ചിടത്തോളം വെടിക്കെട്ട് നടക്കുമ്പോൾ മാഗസിനിൽ ഒന്നുമില്ല. പെസോയുടെ മുന്‍കാല നിയമപ്രകാരം, 3500 കിലോഗ്രാം വരെ വെടിമരുന്ന് ഉപയോഗിക്കുന്ന വെടിക്കെട്ടുകൾക്ക് 45 മീറ്ററായിരുന്നു മാഗസിൻ–ഫയർ ലൈൻ ദൂരം. ഇതാണ് ഇപ്പോൾ 200 മീറ്റർ ആക്കി ഉയർത്തിയത്. 

∙ ‘പിന്നിൽ ശിവകാശി ലോബി’

വെടിക്കെട്ട് പാരമ്പര്യ കലാരൂപമല്ലെന്ന പെസോ വാദം നമ്മുടെ പൂരങ്ങളെ ഉദ്ദേശിച്ച് മാത്രമാണ്. ഇതിന് പിന്നിൽ ശിവകാശി ലോബിയാണെന്നത് തീർച്ച. നമ്മൾ വഴിമരുന്നിട്ട് അതില്‍ പൊരുത്ത് കൊണ്ട്  (തുണിയും ചാക്കുനൂലും ചകിരിയും ചേർത്തുകെട്ടിയ നീണ്ട തിരി) തീ കൊളുത്തി അതിൽ നിന്നാണ് വെടിക്കെട്ടിന് തുടക്കമിടുന്നത്. എന്നാല്‍ ഇത് പാടില്ല, ഇലക്ട്രിക് ഫ്യൂസ് വച്ച് ഓട്ടമാറ്റിക്കായി കത്തിക്കണമെന്നാണ് പെസോ പറയുന്നത്. ഇതു വെടിക്കെട്ട് മേഖലയിൽനിന്ന് പരമ്പരാഗത കലാകാരന്മാരെ ഒഴിവാക്കാനുള്ള നീക്കമാണെന്നത് പകൽപോലെ വ്യക്തം. 

കേരളത്തിൽ അമ്പലങ്ങളിലും പള്ളികളിലുമായി വർഷാവർഷം ഉദ്ദേശം 1500–2000 കോടി രൂപയുടെ വെടിക്കെട്ട് നടക്കുന്നുണ്ട്.  ഈ പണത്തിൽ കണ്ണുവച്ചുള്ള ശിവകാശി ലോബിയുടെ ഗൂഢനീക്കമാണ് പെസോയുടെ റിപ്പോർട്ട്. അവർ തയാറാക്കി വിൽക്കുന്ന ബോക്സുകൾ വച്ച് വെടിക്കെട്ട് നടത്താനാണു നീക്കം. അവിടെ മാനദണ്ഡങ്ങളൊന്നും ഇല്ല. എവിടെ വച്ചും പൊട്ടിക്കാം. റിപ്പോർട്ടിലെ മറ്റു ചില നിർദേശങ്ങളും ശിവകാശി ലോബിയെ വളർത്താനും നമ്മുടെ പരമ്പരാഗത വെടിക്കെട്ട് കലാകാരൻമാരെ തളര്‍ത്താനുമുള്ളതാണ്. 

വെടിക്കോപ്പുകൾ നിർമിക്കുന്ന ഷെഡുകളും പുതിയ നിര്‍ദേശത്തിൽ കൊണ്ടുവരാൻ വലിയ ചെലവ് വേണ്ടി വരും. മറ്റൊന്നു വെടിക്കോപ്പുകൾ കൈകാര്യം ചെയ്യുന്നവർ പെസോയുടെ കോഴ്സ് പാസാവണം എന്നതാണ്. പരമ്പരാഗത കലാകാരൻമാരെ ഒഴിവാക്കാൻ ഉന്നം വച്ചാണ് ഇതും. നിലവിൽ ഇത്തരമൊരു കോഴ്സില്ല. ഇനി നടത്തിയാലും പരമ്പരാഗത കലാകാരന്‍മാരെ പരാജയപ്പെടുത്തി ഒഴിവാക്കാമല്ലോ.

നിലവിൽ 10 മുതൽ 100 കിലോ വരെ വെടിമരുന്ന് ഉപയോഗിക്കുന്ന വെടിക്കെട്ടുകള്‍ക്ക് കലക്ടർക്ക് അനുമതി നൽകാൻ കഴിയുമായിരുന്നു. ഇനി ഇതിനും പെസോയ്ക്ക് മുന്നിൽ പോകേണ്ടിവരും. കേരളത്തിലെ ചെറിയ ആരാധനാലയങ്ങളിൽ വരെ ഇത് ബുദ്ധിമുട്ടുണ്ടാക്കും. ചെറിയ തോതിൽ വെടിക്കെട്ട് നടത്തുന്ന പാറമേക്കാവ്, തിരുവമ്പാടി വേലയ്ക്ക് പോലും പുതിയ നിര്‍ദേശം ബുദ്ധിമുട്ടുണ്ടാക്കി. പുതിയ പെസോ നിയന്ത്രണം പാലിക്കണമെന്നാണ് അനുമതിക്കായി ജില്ലാ ഭരണകൂടത്തെ സമീപിച്ചപ്പോൾ ലഭിച്ച മറുപടി. അതേസമയം ശിവകാശി വെടിക്കോപ്പുകൾ വാങ്ങി പൊട്ടിച്ചാൽ ഒരു കുഴപ്പവുമില്ല. ഈ പടക്കങ്ങൾക്ക് ഒരു നിയന്ത്രണവുമില്ല. 

നിലവിലെ സാഹചര്യത്തിൽ ഇന്ന് അയച്ചാൽ നാളെ റിസൽട്ട് കിട്ടും. ആവശ്യക്കാർ കൂടുമ്പോൾ അനുമതി ലഭിക്കാനും പരിശോധനാ ഫലത്തിനും താമസമുണ്ടാകും. അതേസമയം ശിവകാശിയിൽനിന്ന് വരുന്ന റെഡിമെയ്ഡ് പായ്ക്കുകളിലെ വെടിക്കോപ്പുകൾക്ക് പരിശോധനയും വേണ്ട. അപ്പോൾ കൂടുതലാളുകളും അത് വാങ്ങി ഉപയോഗിക്കാനല്ലേ ശ്രമിക്കൂ. ഇതൊക്കെക്കൊണ്ടാണ് പെസോ നിർദേശങ്ങൾക്ക് പിന്നിൽ വലിയ ലോബിയുടെ കളിയാണെന്ന് സംശയം ഉയരാൻ കാരണം.