യുദ്ധമുഖത്ത് എതിരാളിക്ക് ആയുധം നൽകരുത്: സന്ദീപിനെതിരെ കൃഷ്ണകുമാർ; ‘ശോഭ’യിലും ‘ഇ.ശ്രീധരനി’ലും നിലപാട്

∙ ക്രോസ് വോട്ടിങ് സാധ്യത കാണുന്നുണ്ടോ വീണ്ടും? താങ്കൾ അവകാശപ്പെടുന്ന ബിജെപിയുടെ ജയം തടയാൻ മുന്നണികൾ ഒരുമിക്കുമോ?

ഇത്തവണ സിപിഎം അതിനു ശ്രമിച്ചാൽ ആ പാർട്ടിയുടെ സാധാരണക്കാരായ പ്രവർത്തകർ പാർട്ടിയെ തള്ളി എൻഡിഎയ്ക്കു വോട്ടു ചെയ്യും. കാരണം കഴിഞ്ഞ തവണ ഷാഫിക്ക് ആ സഹായം ചെയ്തുകൊടുത്ത നേതൃത്വത്തിന്റെ മുഖത്തിനു കിട്ടിയ അടിയാണ് വടകര. ഭസ്മാസുരനു വരം കൊടുത്തതു പോലെ ആയില്ലേ കാര്യങ്ങൾ? സിപിഎം തങ്ങളുടെ കോട്ടയെന്ന് വിശ്വസിച്ചിരുന്ന വടകരയിൽ അവരുടെ അടിവേര് ഇളകുന്നതു പോലെയാണ് വോട്ട് ചോർന്നത്. അതിൽ പ്രവർത്തകർക്ക് വലിയ അമർഷമുണ്ട്.

∙ ത്രികോണ മത്സരത്തിൽ ആരാണ് ശക്തരായ എതിരാളി? യുഡിഎഫോ എൽഡിഎഫോ?

എൽഡിഎഫിനെ ഒരു പ്രധാന പ്രതിയോഗിയായി ബിജെപി ഇവിടെ കാണുന്നില്ല. കാരണം കഴിഞ്ഞ തവണത്തെ അതേ ‘മറിക്കൽ’ പരിപാടിക്ക് ഇത്തവണയും അവർ ശ്രമിക്കും. ആഗ്രഹിച്ച പ്രയോജനം അവർക്ക് സരിനെക്കൊണ്ട് ഉണ്ടായിട്ടില്ല. പുറമേ നിന്നുള്ള ഒരു സ്ഥാനാർഥിയായ രാഹുൽ മാങ്കൂട്ടത്തിലിനെ മനസ്സുകൊണ്ട് അംഗീകരിക്കാൻ പാലക്കാട്ടെ കോൺഗ്രസുകാർക്ക് കഴിഞ്ഞിട്ടില്ല. ഇതു രണ്ടും ഞങ്ങൾക്ക് ഗുണകരമായി ഭവിക്കും. കഴിഞ്ഞ രണ്ടു തവണയും നഷ്ടപ്പെട്ടത് നേടുമെന്നുതന്നെ ഞങ്ങൾ വിശ്വസിക്കുന്നു

∙ കുഴൽപ്പണക്കേസ് വീണ്ടും ചർച്ചയായത് പാലക്കാട് സ്ഥാനാർഥി നിർണയത്തിന്റെയും സംഘടനാ തിരഞ്ഞെടുപ്പിന്റെയും ഭാഗമാണെന്ന ആരോപണത്തെക്കുറിച്ച് എന്താണു പറയാനുള്ളത്?

പാലക്കാട്ടെ വോട്ടർമാരൊന്നും ഇത്തരം വിവാദങ്ങൾക്കു ചെവി കൊടുക്കുന്നില്ല. ഏറ്റവും കൂടുതൽ പേരെ നേരിട്ടു കണ്ടു വോട്ടു ചോദിച്ച സ്ഥാനാർഥി ഞാനായിരിക്കും. വീടുകൾ കയറുന്ന രീതിയാണ് ‍എന്റേത്. ഇത്രയും ദിവസമായിട്ടും കൊടകര കുഴപ്പൽപ്പണക്കേസിനെക്കുറിച്ച് ആരും ചോദിച്ചിട്ടില്ല. അനുഭാവികളോ പ്രവർത്തകരോ ഇക്കാര്യം ആരാഞ്ഞിട്ടില്ല. നെല്ലു സംഭരണവും കുടിവെള്ള പ്രശ്നങ്ങളും റോഡുകളുടെ പോരായ്മയും ചികിത്സാ സൗകര്യങ്ങളുടെ കുറവുമെല്ലാമാണ് അവർ ചർച്ച ചെയ്യുന്നത്.

∙ താങ്കൾക്കൊപ്പം സ്ഥാനാർഥിയായി പരിഗണിക്കപ്പെടുകയും ഒടുവിൽ സീറ്റ് കിട്ടാതെ പോകുകയും ചെയ്ത ബിജെപി നേതാവ് ശോഭ സുരേന്ദ്രനാണ് പലതും തുറന്നു പറയാൻ പ്രേരിപ്പിച്ചതെന്ന് ബിജെപിയുടെ തൃശൂർ ഓഫിസ് സെക്രട്ടറി ആയിരുന്ന തിരൂർ സതീഷ് വെളിപ്പെടുത്തിയിട്ടുണ്ടല്ലോ?

ശോഭാ സുരേന്ദ്രനെ പൊലെ സമുന്നതയായ ബിജെപി നേതാവിനെതിരെ ആരോപണം ഉന്നയിക്കുന്ന തിരൂർ സതീഷിന്റെ വിശ്വാസ്യത എന്താണെന്ന് എല്ലാവർക്കും ബോധ്യമുണ്ട്. ബിജെപിയുടെ തൃശൂർ ഓഫിസ് സെക്രട്ടറി ആയിരിക്കെ ആരോപണങ്ങളുടെ പേരിൽ പുറത്താക്കപ്പെട്ട ഒരാളാണ് അദ്ദേഹം. പാലക്കാടും ചേലക്കരയും ബിജെപിയുടെ ജയസാധ്യത ഇല്ലാതാക്കാൻ മുന്നണികൾ അയാളെ കരുവാക്കുകയാണ് ചെയ്തത്. ശോഭയെ പ്രകോപിപ്പിക്കാനും പ്രവർത്തനരംഗത്തുനിന്നു പിന്മാറ്റാൻ ശ്രമിക്കുന്നതുമെല്ലാം ഗൂഢാലോചനയുടെ ഭാഗമാണ്. ഞങ്ങളുടെ നേതാക്കന്മാരെക്കുറിച്ചു പരിപൂർണവിശ്വാസമുണ്ട്. അവർ പാർട്ടിക്കു വേണ്ടി വിശ്രമമില്ലാതെ പ്രവർത്തിക്കുന്നവരാണ്.

∙ തിരഞ്ഞെടുപ്പു കൺവൻഷന് ശേ‍ാഭ സുരേന്ദ്രൻ എത്തിയെങ്കിലും അവരുമായി അകൽച്ചയുണ്ടെന്ന് ആരേ‍ാപണമുണ്ടല്ലേ‍ാ? ബിജെപിക്കുള്ളിൽ കാര്യങ്ങൾ ഭദ്രമല്ല എന്ന സ്ഥിതിയില്ലേ?

അങ്ങനെ ഒരു ചർച്ചയോ ആശയക്കുഴപ്പമോ ബിജെപിയിൽ ഇല്ല. കുമ്മനം രാജശേഖരൻ, പി.കെ.കൃഷ്ണദാസ്, വി.മുരളീധരൻ, എ.എൻ.രാധാകൃഷ്ണൻ തുടങ്ങിയവരെല്ലാം ഇവിടെ സജീവമാണ്. സംസ്ഥാന പ്രസിഡന്റ് കെ.സുരേന്ദ്രൻ നേരിട്ട് ക്യാംപ് ചെയ്താണ് പ്രവർത്തനം ഏകോപിപ്പിക്കുന്നത്. ജില്ല തൊട്ട് സംസ്ഥാനം വരെയുള്ള ബിജെപിയുടെ എല്ലാ നേതാക്കളും ഇവിടെയുണ്ട്.

∙ ശോഭ സുരേന്ദ്രനോ?

ശോഭ രണ്ടു പൊതുയോഗങ്ങളിൽ കഴിഞ്ഞ ദിവസം സംസാരിച്ചു. അമ്മയ്ക്ക് ചില ആരോഗ്യപ്രശ്നങ്ങൾ വന്നതിനാൽ മറ്റൊരു യോഗത്തിൽ അവർക്ക് പങ്കെടുക്കാനായില്ല. പാലക്കാട്ടെ പ്രചാരണ യോഗങ്ങളിൽ പങ്കെടുത്തതു സംബന്ധിച്ച വിവരങ്ങൾ അവരുടെ ഫെയ്സ്ബുക് പേജിൽത്തന്നെ ശോഭ പങ്കുവച്ചിട്ടുണ്ടല്ലോ. ബാക്കിയെല്ലാം അവാസ്തവമാണ്. വ്യക്തിപരമായി ചില പ്രയാസങ്ങൾ വന്നാൽ ചില പരിപാടികളിൽ പങ്കെടുക്കാൻ കഴിയാതെ വരും. അതിനെ വിഭാഗീയതയായി ചിത്രീകരിക്കുന്നത് തെറ്റാണ്. പാലക്കാട് സ്ഥാനാർഥിയാൻ യോഗ്യനെന്ന് ഡിസിസി വിലയിരുത്തിയ കെ.മുരളീധരനെ ഇവിടെ ഒരു മാസമായിട്ട് കാണുന്നില്ലല്ലോ. മാധ്യമങ്ങൾ അതൊന്നും ശ്രദ്ധിക്കില്ല.

∙ തിരൂർ സതീഷ് ഗുരുതരമായ ആരോപണങ്ങളും വെളിപ്പെടുത്തലുകളാണ് നടത്തിയത്. സിപിഎം ഉൾപ്പെട്ട ഗൂഢാലോചന എന്നതിനപ്പുറം സതീഷിന്റെ ആരോപണങ്ങളെ ഖണ്ഡിക്കുന്ന ശക്തമായ വാദങ്ങൾ ബിജെപിയുടെ ഭാഗത്തുനിന്നു വന്നിട്ടില്ലല്ലോ?

സതീഷിനെ പോലെ ഒരു വിശ്വാസ്യതയും ഇല്ലാത്ത ഒരാൾക്ക് ഒരു ദേശീയ പാർട്ടി എല്ലാ ദിവസവും മറുപടി കൊടുക്കണമെന്ന് വാദിക്കുന്നത് അർഥശൂന്യതയാണ്. തൃശൂർ ജില്ലാ ഓഫിസ് സെക്രട്ടറി ആയിരുന്ന ആളുടെ ആരോപണങ്ങൾക്ക് തൃശൂർ ജില്ലാ അധ്യക്ഷൻ കൃത്യമായി മറുപടി പറഞ്ഞിട്ടുണ്ട്. അതു ധാരാളം.

∙ കുഴൽപ്പണക്കേസ് ബിജെപിയിലെ ഉൾപ്പാർട്ടി പോരിലേക്കു കൂടിയാണു വിരൽചൂണ്ടുന്നത്. ഉപതിരഞ്ഞെടുപ്പുകൾ നടക്കാനിരിക്കെ, പാർട്ടിയിൽ പോര് മുറുകുകയാണോ?

ആ പ്രചാരണം എതിരാളികൾ നടത്തുമല്ലോ. സ്വഭാവികം. കാരണം ഇവിടെ ആരോടു ചോദിച്ചാലും ജയസാധ്യത ബിജെപിക്കാണെന്നെ പറയൂ എന്നതു തന്നെ. അതു തകർക്കാനാണ് ഈ ദുഷ്പ്രചാരണം. വളരെ ചിട്ടയോടെയുള്ള പ്രവർത്തനമാണ് ഞങ്ങൾ നടത്തുന്നത്. സംഘപരിവാറിന്റെ എല്ലാ പ്രസ്ഥാനങ്ങളും ഇവിടെയുണ്ട്. ബിഡിജെഎസിന്റെ സംസ്ഥാന പ്രസിഡന്റ് തുഷാർ വെളളാപ്പള്ളി ഉൾപ്പെടെയുള്ള ഘടകകക്ഷി നേതാക്കൾ ഉണ്ട്. മുൻപില്ലാത്ത ശ്രദ്ധയോടെ സംഘടനാപ്രവർത്തനം മുന്നേറുന്നു. ഇതെല്ലാം കാണുന്നതിന്റെ പരിഭ്രാന്തിയിൽ സൃഷ്ടിക്കുന്ന ഇല്ലാക്കഥകളാണ് ബാക്കിയെല്ലാം.