ഒരു പിളർപ്പും ഇല്ലാതിരുന്നിട്ടും കോൺഗ്രസ് തകർന്നു; ‘മിണ്ടാതിരിക്കുമോ’ ഷിൻഡെയും പവാറും? പിണങ്ങിയാൽ ബിജെപിക്ക് ‘പ്ലാൻ ബി’

∙ പടക്കുതിരയായി ബിജെപി

ഘടകകക്ഷികളുടെ വിലപേശൽ രാഷ്ട്രീയത്തിനു നിന്നുകൊടുത്ത്, മുഖ്യമന്ത്രി സ്ഥാനം വരെ വിട്ടുകൊടുത്തിടത്തുനിന്നാണു ബിജെപി കേവല ഭൂരിപക്ഷത്തിനു തൊട്ടരികെ ഫിനിഷ് ചെയ്തത്. 2014ൽ മഹാരാഷ്ട്രയിൽ ആദ്യമായി ഒരു ബിജെപി മുഖ്യമന്ത്രി അധികാരത്തിലേറിയപ്പോൾ അവർക്കു ലഭിച്ച സീറ്റ് 122 ആയിരുന്നു. 63 സീറ്റുണ്ടായിരുന്ന അവിഭക്ത ശിവസേനയ്ക്കൊപ്പം ദേവേന്ദ്ര ഫഡ്നാവിസ് മഹാരാഷ്ട്ര അഞ്ചുവർഷം തികച്ചു ഭരിച്ചു. 2019ൽ 105 സീറ്റുമായി വീണ്ടും ഏറ്റവും വലിയ ഒറ്റക്കക്ഷിയായെങ്കിലും മുഖ്യമന്ത്രി സ്ഥാനത്തിനു വേണ്ടി വിലപേശിയ ശിവസേനയെ പുറത്തുനിർത്തി, അജിത് പവാറിനെ ഒപ്പം കൂട്ടിയുണ്ടാക്കിയ സർക്കാർ അഞ്ചുദിവസം തികച്ചില്ല. കോൺഗ്രസിനും എൻസിപിക്കുമൊപ്പം ചേർന്നു ശിവസേന ഭരണം പിടിച്ചപ്പോൾ ബിജെപി പ്രതിരോധത്തിലായി. 

എന്നാൽ, ശിവസേനയെ പിളർത്തി വീണ്ടും ഭരണം പിടിച്ച ബിജെപിക്കൊപ്പം എൻസിപി അജിത് പവാർ പക്ഷവും ചേർന്നു. മുഖ്യമന്ത്രിസ്ഥാനത്തുനിന്ന് ഉപമുഖ്യമന്ത്രി സ്ഥാനത്തേക്കു മാറിയ ദേവേന്ദ്ര ഫഡ്നാവിസും ഏറ്റവും വലിയ ഒറ്റക്കക്ഷിയായിട്ടും ഭരണത്തിന്റെ കടിഞ്ഞാൺ നഷ്ടപ്പെട്ട ബിജെപിയും അവസരം കാത്തിരിക്കുകയായിരുന്നു. 133 സീറ്റുകളിലൂടെ വീണ്ടും ഏറ്റവും വലിയ ഒറ്റക്കക്ഷിയായി മാറിയതോടെ എല്ലാ വിലപേശലുകളെയും മറികടക്കാനുള്ള ആ അവസരമാണു കൈവന്നത്. 148 സീറ്റിൽ മത്സരിച്ചാണ് ഈ മികച്ച സ്ട്രൈക്ക് റേറ്റ് ബിജെപി സ്വന്തമാക്കിയത്. യാഥാർഥ്യം മനസ്സിലാക്കി ഏക്നാഥ് ഷിൻഡെയും അജിത് പവാറും വലിയ വിലപേശലുകൾക്കു മുതിരാതിരുന്നാൽ വീണ്ടും ബിജെപി മുഖ്യമന്ത്രി മഹാരാഷ്ട്ര ഭരിക്കും. 

∙ പാളം തെറ്റി കോൺഗ്രസ്

മഹാ വികാസ് അഘാഡിയിൽ കോൺഗ്രസും ഉദ്ധവ് താക്കറേ ശിവസേനയും ശരദ് പവാർ എൻസിപിയും ഏതാണ്ട് ഒരേ എണ്ണം സീറ്റുകളിലാണു മത്സരിച്ചത്. മൂന്നുപേരുടേതും വളരെ മോശം സ്ട്രൈക്ക് റേറ്റുമാണ്. കോൺഗ്രസ് 103ൽ മത്സരിച്ച് 15ലും ശിവസേന 89ൽ മത്സരിച്ച് 20ലും എൻസിപി 87ൽ മത്സരിച്ച് 10ലും ഒതുങ്ങി. ശിവസേനയിലെയും എൻസിപിയിലെയും പിളർപ്പുകൾക്കുശേഷം ഈ തിരഞ്ഞെടുപ്പിനെ അഭിമുഖീകരിക്കുമ്പോൾ മഹാരാഷ്ട്ര നിയമസഭയിൽ കോൺഗ്രസിനു 37, ഉദ്ധവ് സേനയ്ക്ക് 15, ശരദ് പവാർ എൻസിപിക്ക് 11 എന്നിങ്ങനെയായിരുന്നു എംഎൽഎമാർ. പാർട്ടിയിൽ ഒരു പിളർപ്പും ഇല്ലാതിരുന്നിട്ടും ഏതാണ്ടു പകുതിയിലും താഴെ സീറ്റിലേക്കു ചുരുങ്ങിയ കോൺഗ്രസാണ് ഏറ്റവും വലിയ തിരിച്ചടി നേരിട്ടത്. 

മുന്നണിയിൽ കോൺഗ്രസിന്റെ നേതൃശേഷി തന്നെ ചോദ്യം ചെയ്യുന്നതാണു തിരഞ്ഞെടുപ്പു ഫലം. വിവിധ മേഖലകളായി കിടക്കുന്ന മഹാരാഷ്ട്രയിൽ ഓരോ മേഖലയിലും ഓരോ പ്രധാന നേതാവുണ്ട്. അവരുടെ കരുത്തു തെളിയിക്കാനുള്ള മത്സരത്തിൽ പാർട്ടിയുടെ ഐക്യവും തിരഞ്ഞെടുപ്പു പ്രവർത്തനത്തിലെ കെട്ടുറപ്പും നഷ്ടമായെന്നു ന്യായമായും സംശയിക്കാം. ആഴത്തിലുള്ള വിഷയങ്ങൾ ഏറ്റെടുക്കുന്നതിൽ പാർട്ടി നേതൃത്വത്തിന്റെ പരാജയവും ചർച്ചയാകും. മുംബൈ സിറ്റിയിൽ അദാനിയുടെ ധാരാവി പദ്ധതി വിവാദമല്ലാതെ ജനകീയ പ്രശ്നങ്ങളൊന്നും കോൺഗ്രസ് ചർച്ചയ്ക്കു വച്ചിരുന്നില്ല. അദാനി–മോദി ബന്ധമെന്ന പഴകിയ ആയുധം വീണ്ടും പുറത്തെടുക്കുക മാത്രമാണുണ്ടായത്.