ആ ഒന്നര മണിക്കൂർ പൊലീസ് എന്തു ചെയ്തു? അവർ ഭയക്കുന്നത് ഈ തെളിവുകൾ! ഇനി എഡിഎം ഡയറിക്കുറിപ്പ്

∙ പണയം വച്ച് കൈക്കൂലി നൽകിയ വ്യക്തി എങ്ങനെ പമ്പ് തുടങ്ങും 

∙ പെട്രോൾ പമ്പിന് എൻഒസി നൽകാൻ എഡിഎം കൈക്കൂലി വാങ്ങിയെന്ന ധ്വനിയിൽ യാത്രയയപ്പ് യോഗത്തിൽ പ്രസംഗിക്കാൻ ദിവ്യയെ പ്രേരിപ്പിച്ചത് എന്തായിരിക്കും? 

∙ അഴിമതിക്കെതിരെയുള്ള നിലപാടാണ് എന്നു വിശ്വസിക്കാൻ പ്രയാസം. അങ്ങനെയൊരു നിലപാടുണ്ടായിരുന്നെങ്കിൽ സംരംഭം തുടങ്ങാൻ സഹായം തേടി സർക്കാർ ജീവനക്കാരൻ ദിവ്യയ്ക്ക് മുന്നിൽ എത്തുമ്പോൾ തന്നെ, അതിലെ ചട്ടലംഘനം ശ്രദ്ധയിൽപ്പെടുത്തുമായിരുന്നു.

∙ ആരാണ് യഥാർഥത്തിൽ പെട്രോൾ പമ്പിനായി പണം മുടക്കുന്നത്? പരിയാരം ഗവ. മെഡിക്കൽ കോളജ് ആശുപത്രിയിൽ ഇലക്ട്രിക്കൽ ഹെൽപറായ പ്രശാന്തിന്റെയും ഫാമിലി ഹെൽത്ത് സെന്ററിൽ നഴ്സിങ് അസിസ്റ്റന്റായ ഭാര്യയുടെയും ശമ്പളം ചേർത്തുവച്ചാലും, ജീവിതച്ചെലവ് കഴിച്ച് പെട്രോൾ പമ്പിന്റെ ഭൂമിക്ക് നൽകേണ്ട പാട്ടത്തുക പോലും കണ്ടെത്താൻ കഴിയില്ല.

∙ കൈക്കൂലി നൽകാനുള്ള ഒരു ലക്ഷം രൂപ സ്വർണം പണയപ്പെടുത്തിയാണ് സ്വരൂപിച്ചതെന്നാണ് പ്രശാന്ത് പറയുന്നത്. ഇതിൽ നിന്ന് 98,500 രൂപയാണ് കൈക്കൂലി നൽകിയത് എന്നാണ് പ്രശാന്തിന്റെ മൊഴി. ഇത്രയും സാമ്പത്തിക പ്രയാസമുള്ളയാൾ എങ്ങനെ പമ്പ് തുടങ്ങാൻ തുക കണ്ടെത്തും ? 

∙ കൈക്കൂലി പരാതി ദിവ്യയ്ക്കാണോ നൽകേണ്ടത് 

∙ എൻഒസി ലഭിക്കാൻ കൈക്കൂലി നൽകിയെന്ന് ഒക്ടോബർ 9ന് പ്രശാന്ത് തന്നോട് പറഞ്ഞുവെന്നും തുടർന്ന് മുഖ്യമന്ത്രിക്ക് പരാതി നൽകാൻ പറഞ്ഞുവെന്നുമാണ് ദിവ്യയുടെ മൊഴി. കൈക്കൂലിക്കെതിരെ വിജിലൻസിലാണ് പരാതി നൽകേണ്ടത്. എന്നാൽ എന്തുകൊണ്ടായിരിക്കും വളഞ്ഞ വഴി സ്വീകരിക്കാൻ ദിവ്യ നിർദേശിച്ചത്? 

∙ സംരംഭകനായ പ്രശാന്ത് പലതവണ ദിവ്യയെ വന്നു കണ്ടതായി അവർ തന്നെ പ്രസംഗത്തിൽ സൂചിപ്പിക്കുന്നുണ്ട്. എഡിഎമ്മിനെ രണ്ടു തവണ വിളിച്ചതായും നേരിട്ട് കണ്ടപ്പോൾ ‘ഇതെന്തെങ്കിലും നടക്കുമോ?’ എന്നു ചോദിച്ചതായും പറയുന്നു. ഇത്രയേറെ തവണ ദിവ്യയെ ബന്ധപ്പെട്ട സംരംഭകൻ എന്തുകൊണ്ടായിരിക്കും കൈക്കൂലി കൊടുക്കും മുൻപ് അക്കാര്യം ദിവ്യയെ അറിയിക്കാതിരുന്നത്. 

∙ പണം എന്തിന് ഒറ്റത്തവണയായി കൊടുത്തു 

∙ ഒറ്റത്തവണയായി മുഴുവൻ ‘കൈക്കൂലി തുകയും’ നൽകുന്നതിനു പകരം കുറച്ച് തുക നൽകി, ബാക്കി തൊട്ടടുത്ത ദിവസം തരാമെന്നു പറഞ്ഞാൽ പോലും വിജിലൻസിനെ അറിയിച്ച് എഡിഎമ്മിനെ കുരുക്കാൻ വഴിയുണ്ടായിട്ടും എന്തുകൊണ്ട് അങ്ങനെ ചെയ്തില്ല? 

∙ ഒക്ടോബർ 6ന് ക്വാർട്ടേഴ്സിലേക്ക് വിളിച്ചുവരുത്തി ഒരു ലക്ഷം രൂപ കൈക്കൂലി ചോദിച്ചു എന്നാണ് പ്രശാന്ത് പറയുന്നത്. അത്രയും തുക കയ്യിലില്ലെന്നു പറഞ്ഞപ്പോൾ, രണ്ടു ദിവസം കഴിയുമ്പോൾ പണം റെഡിയാക്കിയിട്ട് വന്നാൽ മതി എന്ന് എഡിഎം പറഞ്ഞുവെന്നും പ്രശാന്ത് പറയുന്നുണ്ട്. എന്നിട്ടും ഉടൻ തുക സംഘടിപ്പിച്ചു കൊടുത്തു എന്നും പ്രശാന്ത് പറയുന്നു. ഇത് വിശ്വസനീയമല്ല.

∙ ആ 50000 കൈയിൽ കരുതിയത് എന്തിനാണ് 

∙ എഡിഎം ആദ്യമായി പ്രശാന്തിനെ വിളിക്കുന്നത് 6ന് രാവിലെ 11.10നാണ്. 23 സെക്കൻഡ് മാത്രം ദൈർഘ്യമുള്ള കോൾ. പള്ളിക്കുന്നിലേക്ക് വരാമോ എന്നു ചോദിച്ചു എന്നാണ് പ്രശാന്ത് പറയുന്നത്. താമസ സ്ഥലത്തേക്ക് വിളിച്ചതിനാൽ കൈക്കൂലി ചോദിക്കാനായിരിക്കും എന്ന ഊഹത്തിൽ 50,000 രൂപ കയ്യിൽ കരുതി എന്നാണ് പ്രശാന്ത് ചാനലുകൾക്ക് നൽകിയ ഇന്റർവ്യൂവിൽ ആദ്യം പറഞ്ഞത്. എഡിഎം മുൻപ് ഒരിക്കലും കൈക്കൂലി ആവശ്യപ്പെട്ടതായി പ്രശാന്ത് പറയുന്നില്ല. കൈക്കൂലി നൽകാനുള്ള പണം കണ്ടെത്താൻ 5ന് കൊയ്യം ബാങ്കിൽ സ്വർണം പണയപ്പെടുത്തി പ്രശാന്ത് ഒരു ലക്ഷം രൂപ സംഘടിപ്പിച്ചുവെന്ന് ദിവ്യയുടെ അഭിഭാഷകൻ കോടതിയിൽ പറയുന്നത്?

∙ എന്തിന് പ്രശാന്തിൽ നിന്നു മാത്രം കൈക്കൂലി ചോദിച്ചു 

∙ ഇതേ സമയത്ത് ജില്ലയിൽ എൻഒസി ലഭിച്ച മറ്റ് പെട്രോൾ പമ്പ് ഉടമകളിൽ നിന്നൊന്നും എഡിഎം കൈക്കൂലി വാങ്ങിയിട്ടില്ല. ഇത്രയേറെ ഉന്നത സ്വാധീനമുള്ള പ്രശാന്തിൽ നിന്നു മാത്രം കൈക്കൂലി ചോദിച്ചു വാങ്ങിയെന്ന വാദം വിശ്വസിക്കാൻ കഴിയുമോ? 

∙ കാസർകോട് ജില്ലയിൽ നവീൻ ബാബു എഡിഎം ആയിരുന്ന കാലഘട്ടത്തിലും പമ്പുകൾക്ക് അനുമതി നൽകിയിട്ടുണ്ട്. അവിടെയും കൈക്കൂലി ആരോപണം ഉയർന്നിട്ടില്ല.

∙ ആ കാരണങ്ങൾ ഇതുവരെ പുറത്തു വരാത്തത് എന്തു കൊണ്ട് 

∙ രണ്ടു ദിവസത്തിനകം കാരണങ്ങൾ നിങ്ങൾക്ക് അറിയാമെന്നു പറഞ്ഞാണ് ദിവ്യ പ്രസംഗം അവസാനിപ്പിച്ചത്. എന്തുകൊണ്ടാണ് ഒന്നര മാസമായിട്ടും ആ കാരണങ്ങൾ പുറത്തു വരാത്തത്? 

∙ 14ന് രാവിലെ ഡിപിസി ഹാളിൽ നടന്ന പരിപാടിയിൽ കലക്ടറെ കണ്ടപ്പോൾ എഡിഎം പെട്രോൾ പമ്പ് എൻഒസി ഫയൽ താമസിപ്പിക്കുന്നു എന്നാണ് ദിവ്യ പറഞ്ഞത്. കൈക്കൂലി നൽകിയെന്ന വിവരം 9നു തന്നെ അറിയുകയും മുഖ്യമന്ത്രിക്ക് പരാതി നൽകാൻ പറയുകയും ചെയ്തിട്ടും എന്തുകൊണ്ടായിരിക്കും 14ന് രാവിലെ കലക്ടറോട് ദിവ്യ അക്കാര്യം പറയാതിരുന്നത്?

∙ ദിവ്യയെ കലക്ടർ ക്ഷണിച്ചിരുന്നോ 

∙ കലക്ടർ ക്ഷണിച്ചിട്ടാണ് ചടങ്ങിൽ പങ്കെടുത്തതെന്നാണ് ദിവ്യയുടെ മൊഴി. സ്റ്റാഫ് കൗൺസിൽ സംഘടിപ്പിച്ച പരിപാടി ആയതിനാൽ ക്ഷണിക്കേണ്ടത് താനല്ല എന്നാണ് കലക്ടറുടെ നിലപാട്. യഥാർഥത്തിൽ ദിവ്യയെ കലക്ടർ പരിപാടിയിലേക്ക് ക്ഷണിച്ചിട്ടുണ്ടോ? 

∙ കലക്ടർ അരുൺ കെ.വിജയൻ, എഡിഎമ്മിന്റെ ഭാര്യയ്ക്ക് നൽകിയതായി പറയുന്ന കത്തിൽ ഒപ്പു രേഖപ്പെടുത്തുകയോ തന്റെ യഥാർഥ പേരിനു പകരം അരുൺ വിജയൻ എന്നു മാത്രം എഴുതുകയും ചെയ്തത് എന്തിനായിരിക്കും?

∙ അക്കാര്യം കലക്ടർ അറിഞ്ഞിരുന്നോ 

∙ പെട്രോൾ പമ്പ് ഫയൽ എഡിഎം വൈകിപ്പിക്കുന്നു എന്ന് ദിവ്യ പറഞ്ഞപ്പോൾ, രേഖാമൂലം പരാതിയുണ്ടോ എന്ന് ചോദിച്ചുവെന്നും തെളിവില്ലാതെ ആരോപണം ഉന്നയിക്കരുതെന്ന് ദിവ്യയോട് പറഞ്ഞതായും കലക്ടറുടെ മൊഴിയുണ്ട്. അതായത് യാത്രയയപ്പ് യോഗത്തിൽ ദിവ്യ ഇക്കാര്യം പറയുമെന്ന കാര്യം കലക്ടർക്ക് നേരത്തേ അറിയാമായിരുന്നു !  

∙ ദിവ്യ യാത്രയയപ്പ് യോഗത്തിൽ പ്രസംഗിക്കുമ്പോൾ മുഖം മറച്ചും മൂക്ക് ചൊറിഞ്ഞും ഇരിക്കുന്ന കലക്ടർ, സഹപ്രവർത്തകനെ സംശയ നിഴലിലാക്കും വിധം സംസാരം നീണ്ടിട്ടും ഒരിക്കൽപ്പോലും ഇടപെടാതിരുന്നത് എന്തുകൊണ്ടാവും? 

∙ യോഗത്തിൽ നിന്ന് ദിവ്യ എഴുന്നേറ്റു പോയിട്ടും എഡിഎമ്മിനെ ആശ്വസിപ്പിക്കാൻ കലക്ടർ ശ്രമിക്കാതിരുന്നത് എന്തുകൊണ്ടായിരിക്കും?

∙ അപേക്ഷ തയാറാക്കിയത് പ്രശാന്തല്ലേ 

∙ പ്രശാന്ത് മുഖ്യമന്ത്രിക്ക് അയച്ചതായി പറയുന്ന പരാതിയിൽ പേരും ഒപ്പും ഇനീഷ്യലുമെല്ലാം പ്രശാന്തിന്റെ ഔദ്യോഗിക രേഖകളിൽ നിന്ന് തികച്ചും വ്യത്യസ്തമായിരിക്കുന്നത് എന്തുകൊണ്ടാണ്? 

∙ എഡിഎമ്മിന്റെ മരണവിവരം അറിഞ്ഞ ശേഷം മറ്റാരെങ്കിലും പ്രശാന്തിന്റെ പേരിൽ അപേക്ഷ തയാറാക്കി കൈമാറിയതാണോ? 

∙ ഇല്ലാത്ത പരാതിയുടെ പേരിലാണോ വിജിലൻസ് നടപടി 

∙ എഡിഎമ്മിന്റെ മരണം നടന്ന അന്നു രാവിലെ പ്രശാന്ത് വിവിധ ചാനലുകൾക്ക് ഇന്റർവ്യു നൽകിയിരുന്നെങ്കിലും ഒരിടത്തു പോലും മുഖ്യമന്ത്രിക്ക് പരാതി നൽകിയ കാര്യമോ വിജിലൻസിനു മൊഴി നൽകിയ കാര്യമോ പറഞ്ഞിരുന്നില്ല. എന്നാൽ പത്തേകാലോടെ പരാതിയുടെ പകർപ്പ് എന്ന തരത്തിൽ ഒരു പേജ് വാട്സാപ് വഴി പുറത്തുവിട്ടു. മുഖ്യമന്ത്രിയുടെ പരാതി പരിഹാര സംവിധാനത്തിലോ മുഖ്യമന്ത്രിയുടെ ഓഫിസിലെ ഇ–മെയിലിലോ ഇങ്ങനെ ഒരു പരാതി ലഭിച്ചിട്ടില്ലെന്ന് മുഖ്യമന്ത്രിയുടെ ഓഫിസ് സ്ഥിരീകരിച്ചു. 

∙ മുഖ്യമന്ത്രിക്ക് 10ന് അയച്ച പരാതിയിൽ വിജിലൻസ് 14ന് പ്രശാന്തിന്റെ മൊഴിയെടുത്തതായി ദിവ്യയുടെ അഭിഭാഷകൻ. വിജിലൻസ് ഓഫിസിലേക്ക് പ്രശാന്ത് പോകുന്നതിന്റെ ദൃശ്യം കെടിഡിസി ഹോട്ടലിന്റെ ക്യാമറയിൽ പതിഞ്ഞിട്ടുണ്ടെന്നും വാദം. മുഖ്യമന്ത്രിയുടെ ഓഫിസിൽ ലഭിക്കാത്ത ഒരു പരാതിയുടെ പേരിൽ മൊഴിയെടുക്കാൻ ആരാവും വിജിലൻസിനെ പ്രേരിപ്പിച്ചിട്ടുണ്ടാവുക ?

∙ കൈക്കൂലി നൽകുന്നത് കുറ്റമല്ലേ 

∙ 10ന് മുഖ്യമന്ത്രിക്ക് പരാതി അയച്ചാൽ തന്നെ എങ്ങനെ ഇത്ര വേഗം പ്രശാന്തിന്റെ മൊഴി രേഖപ്പെടുത്താൻ വിജിലൻസ് തയാറായി? 11 മുതൽ 13വരെയുള്ള ദിവസങ്ങൾ  പൊതുഅവധിയാണ്. തൊട്ടടുത്ത പ്രവൃത്തി ദിവസമായ 14ന് തന്നെ പ്രശാന്തിന്റെ മൊഴി രേഖപ്പെടുത്തണമെങ്കിൽ മുഖ്യമന്ത്രിയുടെ ഓഫിസിലും വിജിലൻസിലും അതിവേഗം കാര്യങ്ങൾ നീങ്ങണം. അതിനായി ഇടപെട്ടത് ആരായിരിക്കും?  

∙ കൈക്കൂലി നൽകുന്നതും കുറ്റമാണെന്നിരിക്കെ പ്രശാന്തിന് എതിരെ ഇതുവരെ നിയമനടപടികൾ തുടങ്ങാത്തത് എന്തുകൊണ്ടാണ്? 

∙ ഗൂഢാലോചന അന്വേഷിക്കണ്ടതല്ലേ 

∙ പ്രശാന്തും ദിവ്യയും നടത്തിയ ഗൂഢാലോചനയാണ് നവീൻ ബാബുവിന്റെ മരണത്തിനു പിന്നിലെന്ന് എഡിഎമ്മിന്റെ കുടുംബം രേഖാമൂലം പരാതിപ്പെട്ടിട്ടും അന്വേഷിക്കാത്തത് എന്തുകൊണ്ടായിരിക്കും? പ്രശാന്തിനെ പ്രതിചേർത്തിട്ടുമില്ല. ദിവ്യയുടെ പ്രസംഗത്തെക്കുറിച്ച് നേരത്തേ അറിയാമായിരുന്ന കലക്ടറെയും പ്രതിചേർക്കാത്തത് എന്തുകൊണ്ടാണ്?  

∙ ദിവ്യയുടെ ഭർത്താവ് അജിത്തും പ്രശാന്തും ഒരേ സ്ഥാപനത്തിൽ ജോലി ചെയ്യുന്നവരാണ് എന്ന കാര്യം അന്വേഷണ സംഘം പരിഗണിക്കാത്തത് എന്താണ്?

∙ കലക്ടർ എന്തിനാണ് മൊഴിയിൽ നിലപാട് മാറ്റിയത് 

∙ ‘ഇന്നലെ വരെ എന്റെ തോളോടു തോൾ നിന്നു പ്രവർത്തിച്ചയാളാണ് നവീൻ. കാര്യക്ഷമതയോടും സഹാനുഭൂതിയോടും തന്റെ ഉത്തരവാദിത്തം നിർവഹിച്ച വ്യക്തിയായിരുന്നു എട്ടു മാസത്തോളമായി എനിക്കറിയാവുന്ന നവീൻ. എനിക്ക് ഏതു കാര്യവും വിശ്വസിച്ച് ഏൽപ്പിക്കാവുന്ന സഹപ്രവർത്തകൻ..’ ഇങ്ങനെയായിരുന്നു 18ന് എഴുതിയ കത്തിൽ കലക്ടർ എഡിഎമ്മിനെ വിശേഷിപ്പിച്ചത്.  എന്നാൽ 21ന് പൊലീസിന് മൊഴി നൽകുമ്പോഴേക്കും കലക്ടർ നിലപാട് മാറ്റിയത് എന്തിനാണ്?

∙ 15ന് പുലർച്ചെ എഡിഎമ്മിന്റെ മരണം സംഭവിച്ചെങ്കിലും യാത്രയയപ്പ് യോഗത്തിലെ പ്രധാന സാക്ഷികളിൽ ഒരാളായ കലക്ടറുടെ മൊഴിയെടുക്കാൻ 21 വരെ പൊലീസ് നീട്ടിക്കൊണ്ടുപോയത് എന്തിനാണ്?

∙ കലക്ടറും ഗൂഢാലോചനയുടെ ഭാഗമാണെന്ന് കുടുംബം ആരോപിക്കുമ്പോഴും കലക്ടറുടെയും പ്രശാന്തിന്റെയും ദിവ്യയുടെയും മൊബൈൽ ഫോണുകൾ ശാസ്ത്രീയ പരിശോധനയ്ക്കായി കസ്റ്റഡിയിലെടുക്കാൻ പൊലീസ് തയാറാകാത്തത് എന്തുകൊണ്ടാണ് ?

∙ ലാൻഡ് റവന്യു ജോയിന്റ് കമ്മിഷണർ എ.ഗീത നടത്തിയ വകുപ്പുതല അന്വേഷണത്തിൽ ഉദ്യോഗസ്ഥരെല്ലാം നേരിട്ട് മൊഴി നൽകിയപ്പോൾ കലക്ടർ മാത്രം മുദ്രവച്ച കവറിൽ സ്റ്റേറ്റ്മെന്റ് നൽകിയത് എന്തുകൊണ്ടായിരിക്കും? കലക്ടർ ആരെയോ ഭയക്കുന്നുവെന്നാണ് വാദിഭാഗം പറയുന്നത്. യഥാർഥത്തിൽ ആരെയാണ് കലക്ടർ ഭയക്കുന്നത്?