‘മലയാളിയെന്ന പേരിൽ വോട്ട് തേടിയില്ല; പ്രസി‍ഡന്റ് ആക്കിയത് അന്നത്തെ ഉഷാറില്ലാത്ത സമരം; യുകെയിലേക്ക് വരുമ്പോൾ ഇക്കാര്യങ്ങൾ അറിയണം’

ആളുകൾക്കു ബാലറ്റ് പേപ്പർ കിട്ടിയോ എന്നും അവർ വോട്ടു രേഖപ്പെടുത്തിയ ശേഷം കൃത്യമായ മേൽവിലാസത്തിൽ തപാൽപെട്ടിയിലിട്ടോ എന്നതും ഉറപ്പാക്കേണ്ടിയിരുന്നു. ഇതിനായി ഞങ്ങളുടെ ടീമംഗങ്ങൾ വോട്ടർമാരെ നിരന്തരം ഫോണിലും നേരിട്ടും ബന്ധപ്പെട്ടു. തപാൽവോട്ട് ചെയ്യാനുള്ള ആളുകളുടെ മടിയും മറികടക്കേണ്ടിയിരുന്നു. ഇതിനായി സമൂഹമാധ്യമ ഗ്രൂപ്പുകളിൽ പോസ്റ്ററുകളും വിഡിയോകളും പങ്കുവച്ചു. 

∙ യുകെ മലയാളികൾക്കും അഭിമാനമാണല്ലോ?

നമ്മളൊരിക്കലും മലയാളി സ്ഥാനാർഥിക്കു വോട്ടു ചെയ്യണം എന്ന് ആവശ്യപ്പെട്ടു പ്രചാരണം നടത്തിയിരുന്നില്ല. എങ്കിലും വലിയ പിന്തുണയാണു കിട്ടിയത്. അതിൽ സന്തോഷവും അഭിമാനവുമുണ്ട്. പ്രചാരണ വിഡിയോയിൽ കൂടുതലും മറ്റു കമ്യൂണിറ്റിയിലെ ആളുകളാണ് എനിക്കുവേണ്ടി സംസാരിച്ചത്. ഞാൻ ജയിച്ചതിൽ നഴ്സുമാർ ഉൾപ്പെടെയുള്ള മലയാളി ആരോഗ്യപ്രവർത്തകരും ആഹ്ലാദത്തിലാണ്.

∙ നാട്ടിൽ സംഘടന, രാഷ്ട്രീയ പ്രവർത്തനമുണ്ടായിരുന്നോ?

കോട്ടയം മെഡിക്കൽ കോളജിലെ പഠനകാലത്തു സ്റ്റുഡന്റ്സ് നഴ്സസ് അസോസിയേഷന്റെ സെക്രട്ടറി, വൈസ് പ്രസിഡന്റ്, ട്രഷറർ ചുമതലകൾ വഹിച്ചിട്ടുണ്ട്. അക്കാലത്ത് എസ്എഫ്ഐയിൽ പ്രവർത്തിച്ചിരുന്നു. പുന്നപ്ര പോലെ ചെറിയ സ്ഥലത്തുനിന്നുള്ള എനിക്ക് ലോകത്തെ വലിയ നഴ്സിങ് സംഘടനയിലെ ആദ്യ മത്സരത്തിൽ ജയിക്കാനായി എന്നതു വലിയ കാര്യമാണ്. എനിക്കു വോട്ടു ചെയ്തതവരും അല്ലാത്തവരുമായ എല്ലാ ആർസിഎൻ അംഗങ്ങൾക്കും സാമൂഹികനീതിയും മികച്ച തൊഴിൽ അന്തരീക്ഷവും ഉറപ്പാക്കുക എന്നതിനാണു മുൻഗണന.

∙ നഴ്സിങ് പഠനവും യുകെ യാത്രയും?

കോട്ടയം മെഡിക്കൽ കോളജിലെ നഴ്സിങ് പഠനത്തിനും ഒരു വർഷത്തെ സേവനത്തിനും ശേഷം നേരെ യുകെയിലേക്കു പോവുകയായിരുന്നു. 2011ൽ ഇംപീരിയൽ കോളജ് എൻഎച്ച്എസ് ട്രസ്റ്റിൽ ജോലിയിൽ പ്രവേശിച്ചു. 2021ലാണു യൂണിവേഴ്‌സിറ്റി കോളജ് ലണ്ടൻ ഹോസ്പിറ്റലിലേക്കു മാറിയത്. നെറ്റ്‍വർക്ക്‌ ഓഫ് ഇന്റർനാഷനലി എജ്യുക്കേറ്റഡ് നഴ്സസ് ആൻഡ് മിഡ്‌വൈഫറി അസോസിയേഷൻസിന്റെ ചെയർ, അലയൻസ് ഓഫ് സീനിയർ കേരള നഴ്സസിന്റെ ജനറൽ സെക്രട്ടറി എന്നീ നിലകളിലും പ്രവർത്തിക്കുന്നുണ്ട്. ഇംപീരിയൽ കോളജ് എൻഎച്ച്എസ് ട്രസ്റ്റിന്റെ ഹാമർസ്മിത്ത് ആശുപത്രി നഴ്‌സായ ദിവ്യയാണു ഭാര്യ. ഇമ്മാനുവൽ മകനാണ്. എന്റെ സഹോദരി ബ്ലെസിയും ഭർത്താവ് ജിതിനും ലണ്ടനിൽ നഴ്സുമാരാണ്. 

∙ ആർസിഎൻ സംഘടനയുടെ പ്രാധാന്യവും മലയാളികളടക്കം അറിഞ്ഞിരിക്കേണ്ട കാര്യങ്ങളും എന്താണ്?

യുകെയിലെ നഴ്സിങ് ജീവനക്കാരുടെ പ്രമുഖ യൂണിയനുകളിൽ ഒന്നാണു റോയൽ കോളജ് ഓഫ് നഴ്സിങ് എന്ന ആർസിഎൻ. നഴ്സുമാർ, ഹെൽത്ത് കെയർ അസിസ്റ്റന്‍റുമാർ ഉൾപ്പെടെയുള്ള സപ്പോർട്ട് വർക്കർമാർ എന്നിവരാണു യൂണിയനിലുള്ളത്. വോട്ടവകാശം മാത്രമല്ല നിരവധി ആനുകൂല്യങ്ങളാണു ആർസിഎൻ അംഗത്വത്തിലൂടെ ലഭിക്കുക. പിആർ, സിറ്റിസൺഷിപ്പ് എന്നിവ എടുക്കാനും ഏതെങ്കിലും വിധത്തിലുള്ള നിയമ, അച്ചടക്ക നടപടികൾ നേരിടുമ്പോഴും ആർസിഎൻ സഹായവും നിർദേശവും പിന്തുണയും അംഗങ്ങൾക്കു ലഭിക്കും. തൊഴിലിടത്തിലെ അച്ചടക്ക–നിയമ–സിക്നസ് നടപടികൾ എന്നിവയ്ക്കു വിധേയരായി തൊഴിൽ നഷ്ടപ്പെടുന്ന ജീവനക്കാരുടെ എണ്ണം വർധിക്കുകയാണ്. എൻഎംസി റഫറലിലേക്കു നീണ്ട് പിൻ നമ്പർ നഷ്ടപ്പെടുന്ന അവസ്ഥയും ഉണ്ടാകാറുണ്ട്.

എന്നാൽ ആർസിഎൻ അംഗത്വം എടുക്കുന്നവർക്ക് യുകെയിലെ ഏറ്റവും വലിയ ട്രേഡ് യൂണിയൻ ഇൻ ഹൗസ് ലീഗൽ ടീമിന്റെ സൗജന്യ നിയമ സഹായം ലഭ്യമാകും. അംഗത്വമില്ലാത്തവർക്ക് ആയിരക്കണക്കിന് പൗണ്ട് വക്കീൽ ഫീസിനത്തിലും മറ്റും കൊടുക്കേണ്ടി വരും. തൊഴിലിടങ്ങളിലെ വർണവിവേചനത്തിനും ചൂഷണങ്ങൾക്കുമെതിരെ ശബ്ദം ഉയർത്താനും യൂണിയൻ അംഗത്വം സഹായകരമാണ്.  അംഗത്വം എടുക്കുന്നവർക്ക് ആർസിഎൻ സംഘടിപ്പിക്കുന്ന പ്രത്യേക തുടർപഠന പരിപാടികൾ, യുകെയിലെ ഏറ്റവും വലിയ നഴ്സിങ് ലൈബ്രറി റിസോഴ്സ് തുടങ്ങിയവ ലഭിക്കും. ടെലഫോൺ കരിയർ കോച്ചിങ് ഉപയോഗിച്ച് കരിയറിലെ അടുത്ത ഘട്ടം എങ്ങനെ വേണമെന്ന് പ്ലാൻ ചെയ്യാൻ സഹായം, സിവി എഴുത്ത്, പുതിയ കരിയർ മാറ്റത്തിനുള്ള ആശയങ്ങൾ എന്നിവയും കിട്ടും. വീട്ടിലും ജോലിസ്ഥലത്തും നഴ്‌സുമാരെയും ഹെൽത്ത്കെയർ അസിസ്റ്റന്‍റുമാരെയും ബാധിക്കുന്ന നിരവധി പ്രശ്‌നങ്ങളിൽ സൗജന്യ സഹായവും ഉപദേശവും നൽകും.

യുകെയിൽ സ്ഥിരതാമസമായ നഴ്‌സുമാർ ഉൾപ്പടെയുള്ള ജീവനക്കാർക്ക് വിൽപത്ര എഴുത്തു സംബന്ധിച്ച ഉപദേശങ്ങളും സാമ്പത്തിക ഉപദേശങ്ങളും ലഭ്യമാകും. യുകെയിലെ വീസ മാറ്റം, സെറ്റിൽമെന്‍റ് അപേക്ഷ തുടങ്ങിയ കാര്യങ്ങളിലും ആർസിഎൻ ഇമിഗ്രേഷൻ ഉപദേശക സംഘത്തിന് ഇടപെടാനാകും. ആർസിഎൻ അംഗത്വത്തിന് നഴ്സുമാർ പ്രതിമാസം 16.82 പൗണ്ടാണു നൽകേണ്ടത്. എന്നാൽ എൻഎംസിയിൽ റജിസ്റ്റർ ചെയ്ത പുതിയ നഴ്സുമാർക്ക് ആദ്യ വർഷത്തിൽ പ്രതിമാസം 8.41 പൗണ്ട് മതി. നഴ്‌സുമാരുടെ നേരിട്ടുള്ള മേൽനോട്ടത്തിൽ എൻഎച്ച്എസ് ആശുപത്രികൾ, നഴ്സിങ് ഹോമുകൾ എന്നിവിടങ്ങളിൽ ജോലി ചെയ്യുന്ന ഹെൽത്ത് കെയർ അസിസ്റ്റന്‍റുമാർ ഉൾപ്പടെയുള്ള സപ്പോർട്ട് വർക്കർമാർക്കും ആർസിഎൻ അംഗത്വം ലഭിക്കും. ഇവർക്ക് അംഗത്വ ഫീസ് പ്രതിമാസം 8.41 പൗണ്ടാണ്. ആദ്യവർഷം 4.21 പൗണ്ട് അടച്ചാൽ മതി.

3,000 ചില്ലറ വ്യാപാരികളിൽനിന്നും പ്രത്യേക ഡിസ്കൗണ്ടുകളും ആർസിഎൻ അംഗങ്ങൾക്കു ലഭ്യമാണ്. സ്റ്റുഡന്‍റ് നഴ്സസ്, മറ്റേർണിറ്റി ലീവ് അല്ലെങ്കിൽ കരിയർ ബ്രേക്ക് ലീവിലുള്ള ജീവനക്കാർക്കു മാസ വരിസംഖ്യയ്ക്കു പകരം വാർഷിക വരിസംഖ്യ ആയി 10 പൗണ്ട് മാത്രം അടച്ചാൽ മതി. ഇത്തരം സേവനങ്ങൾ കിട്ടാനായി എല്ലാ നഴ്സിങ് ജീവനക്കാരും അംഗത്വം എടുക്കണമെന്ന് ഞങ്ങൾ ആവശ്യപ്പെട്ടു. ഇതോടെ മലയാളികൾ ഉൾപ്പെടെയുള്ള ആയിരക്കണക്കിനുപേർ പുതുതായി അംഗത്വമെടുത്തതാണു പ്രസിഡന്റായതിനേക്കാൾ സന്തോഷമുള്ള കാര്യം. 

∙ യുകെ ഇപ്പോഴും നഴ്സുമാരുടെ സ്വപ്നരാജ്യമാണോ? മലയാളികൾ നേരിടുന്ന പ്രശ്നങ്ങൾ എന്തൊക്കെയാണ്?

5 വർഷത്തിനിടെ 60,000 പേരെ റിക്രൂട്ട് ചെയ്തതിനാൽ എൻട്രി ഗ്രേഡിൽ താൽക്കാലികമായി ജോലിസാധ്യത കുറഞ്ഞിട്ടുണ്ട്. നിലവിൽ ഒഴിവുകൾ കുറവാണ്. 2011ലും കോവിഡിനു മുൻപും ഇതുപോലെയുണ്ടായിരുന്നു. ഇതു സ്വാഭാവികമാണ്, ഈ സാഹചര്യം മാറും. പുറത്തുനിന്നു വരുന്നവർ നേരിടുന്നതും യുകെയിൽ പൊതുവായുള്ളതുമായ അനേകം പ്രശ്നങ്ങളുണ്ട്. കേരളത്തിലെ തൊഴിൽ സാഹചര്യവും രീതികളും യുകെയിൽനിന്നു വ്യത്യസ്തമാണ്. ഉത്തരവാദിത്തം കൂടുതലാണ്.