'ഭരണമുണ്ടെന്നു കരുതി അവരാണോ മികച്ചവർ?' 'ചിലർക്കു മാറാൻ മടി' – 100ൽ തിളങ്ങി സിപിഐ; തുടരും പോരാട്ടം

മാറ്റം വേണമെന്ന കാര്യത്തിൽ കമ്യൂണിസ്റ്റ് പാർട്ടികളിൽ പക്ഷമില്ലെന്നു തെളിയുന്ന സംവാദം. ഇന്ത്യൻ രാഷ്ട്രീയത്തിന്റെ സഞ്ചാരവഴി പുതിയൊരു ദിശയിലാണെന്ന ബോധ്യത്തിൽനിന്നുള്ള അഭിപ്രായങ്ങൾ. ഇന്ത്യൻ കമ്യൂണിസ്റ്റ് പാർട്ടിയുടെ (സിപിഐ) ശതാബ്ദി വേളയിൽ 4 യുവ നേതാക്കൾ വെല്ലുവിളികളും പ്രതീക്ഷകളും പങ്കുവയ്ക്കുന്നു...

?ഇന്ത്യയിൽ കമ്യൂണിസ്റ്റ് പ്രസ്ഥാനം ഒരു നൂറ്റാണ്ട് പിന്നിടുന്നത് അദ്ഭുതമാണോ

പി.സന്തോഷ് കുമാർ: ആശയപരമായും സംഘടനാപരമായും എതിർക്കുന്നവർ പാർട്ടിയെ തകർക്കാൻ ശ്രമങ്ങൾ നടത്തി. ഇതൊക്കെയാണെങ്കിലും അഭിമാനകരമായ സംഭാവനകളാണ് ഇന്ത്യൻ രാഷ്ട്രീയത്തിനു പാർട്ടി നൽകിയത്. പല കാര്യങ്ങളിലും യോജിക്കാനാകാത്ത കോൺഗ്രസ് പോലുള്ളവരുമായി കൈകോർക്കാൻ സാധിക്കുന്നതാണ് കമ്യൂണിസ്റ്റ് പ്രസ്ഥാനത്തിന്റെ വലിയ ശക്തി. കോൺഗ്രസിൽനിന്നുണ്ടായ ദുരനുഭവങ്ങൾ മനസ്സിലുണ്ടെങ്കിലും വർഗീയതയ്ക്കെതിരെ അവർക്കൊപ്പം നിൽക്കും.

?ലോക്സഭാ തിരഞ്ഞെടുപ്പിൽ ഇടതുപക്ഷത്തിന് 5 ശതമാനത്തിൽ താഴെ മാത്രമാണല്ലോ വോട്ട്

സന്തോഷ്: ആത്മാർഥതയുള്ള പ്രവർത്തകരും സംഘടനാ സംവിധാനവും പാർട്ടിക്കുണ്ടെങ്കിലും തിരഞ്ഞെടുപ്പിൽ ഫലമുണ്ടാകുന്നില്ല. മാറുന്ന രാഷ്ട്രീയ സാഹചര്യത്തിനനുസരിച്ചു ചില കാര്യങ്ങൾ ചെയ്യാൻ പറ്റാത്തതിന്റെ പ്രശ്നമുണ്ട്.

എം.വിജിൻ: 1920 ഒക്ടോബറിൽ താഷ്കന്റിൽ കമ്യൂണിസ്റ്റ് പ്രസ്ഥാനം രൂപം കൊണ്ട ചരിത്രത്തെ ചേർത്തുപിടിച്ചാണു സിപിഎം മുന്നോട്ടുപോകുന്നത്. ഇന്ത്യൻ കമ്യൂണിസ്റ്റ് പാർ‌ട്ടിയുടെ ശതാബ്ദി മുഹൂർത്തത്തെ കുറച്ചു കാണുന്നില്ല. പ്രസ്ഥാനം ഒരു നൂറ്റാണ്ട് പിന്നിടുന്നത് അദ്ഭുതമല്ല; മറിച്ച് അഭിമാനമാണ്. പാർലമെന്റ് തിരഞ്ഞെടുപ്പിന്റെ വോട്ടുശതമാനം കൊണ്ടുമാത്രം ഇടതുപക്ഷത്തെ അളക്കാനാകില്ല.

ശുഭേഷ് സുധാകരൻ: കമ്യൂണിസ്റ്റ് പാർട്ടിയുടെ 100 വർഷം അദ്ഭുതമാണെന്നു പറയുന്നത് കമ്യൂണിസ്റ്റ് വിരുദ്ധ സമീപനമാണ്. രാജ്യത്തു കുറച്ചുകൂടി കരുത്തോടെ ഇടതുപക്ഷം വളരണം.

?തിരഞ്ഞെടുപ്പ് രാഷ്ട്രീയത്തിൽ വോട്ടുകളും അധികാരവും പ്രധാനമല്ലേ

ശുഭേഷ്: തിരഞ്ഞെടുപ്പുകളിലെ തുടർച്ചയായ തിരിച്ചടികളെ ന്യായീകരിക്കില്ല. ബിജെപിയുടെ ആശയം വർഗീയവും ഫാഷിസവുമാണ്. ഭരണമുണ്ടെന്നു കരുതി അവരാണോ മികച്ചവർ?

വി.കെ.സനോജ്: എല്ലാ വിഭാഗം ജനങ്ങളും അസ്വസ്ഥരാണ്. അവർ നേരിടുന്ന പ്രശ്നങ്ങൾക്കു പരിഹാരമാകുന്ന മുദ്രാവാക്യങ്ങളാണ് പ്രസ്ഥാനം ഉയർത്തുന്നത്. 

? ഏതെങ്കിലുമൊരു വിശ്വാസസംഹിത പല തലമുറകൾ നിലനിൽക്കണമെങ്കിൽ അതു മതമായി മാറണമെന്നു നിരീക്ഷിക്കുന്നവരുണ്ട്. കമ്യൂണിസ്റ്റ് പ്രസ്ഥാനത്തിനു മതത്തിന്റെ സ്വഭാവം കൈവന്നിട്ടുണ്ടോ

സന്തോഷ്: ഇല്ല. സിപിഐയുടെ ഭരണഘടനയെക്കാൾ ഭാരതീയമായ ഭരണഘടന മറ്റൊരു പാർട്ടിക്കുമുണ്ടാകില്ല.

വിജിൻ:  ജാതിമതഭേദമില്ലാതെ വർഗപരമായ യോജിപ്പാണു വർഗീയ വിഭജനത്തിനുള്ള മറുമരുന്ന്. അതിൽ ഊന്നിയാണു  പ്രവർത്തനം.

?വോട്ടർമാർക്കു പണമായും കിറ്റായും സൗജന്യങ്ങൾ എത്തുന്ന രീതി കൂടിവരുന്നു. പ്രത്യയശാസ്ത്രംവിട്ടു സൗജന്യങ്ങളെ ചേർത്തുപിടിക്കുകയാണോ

സന്തോഷ്: സ്വന്തം പ്രത്യയശാസ്ത്രത്തിലൂന്നി കരുത്തോടെ മുന്നോട്ടുപോകാൻ സാധിച്ചില്ലെന്നതു യാഥാർഥ്യമാണ്. തിരഞ്ഞെടുപ്പു രാഷ്ട്രീയത്തിൽ പ്രായോഗിക സമീപനം സ്വീകരിക്കേണ്ടി വരും. അതു സൗജന്യങ്ങൾ നൽകിക്കൊണ്ടു മാത്രമാകണമെന്നില്ല.

ശുഭേഷ്: സാഹചര്യങ്ങളെ ഇടതുപ്രത്യയശാസ്ത്രത്തിന്റെ അടിസ്ഥാനത്തിൽ സംരക്ഷിച്ചു നിർത്താൻ സാധിച്ചതു കൊണ്ടാണു പാർട്ടി ജീവിച്ചിരിക്കുന്നത്.

വിജിൻ: ഇടതു പ്രത്യയശാസ്ത്രത്തിന്റെ കൂടി പിൻബലത്തിലാണ് ഇടതുസർക്കാർ  ക്ഷേമ പദ്ധതികൾ നടപ്പാക്കുന്നത്.

?കമ്യൂണിസ്റ്റുകാരുടെ ജീവിതം ഒരുകാലത്തു വളരെ ദുഷ്കരമായിരുന്നു. ഇന്നോ

സന്തോഷ്: മിടുക്കരായ ഒട്ടേറെ ചെറുപ്പക്കാർ പ്രത്യയശാസ്ത്ര അടുപ്പത്തിന്റെ പേരിൽ പാർട്ടിയിൽ നിൽക്കുന്നുണ്ട്. അവരിൽ ഒന്നുമാകാൻ കഴിയാതെ പോകുന്നവർ അനുഭവിക്കുന്ന പ്രശ്നം വലുതാണ്. പലരും വിട്ടുപോകുന്നതും അതുകൊണ്ടാണ്. കനയ്യകുമാറിനെ നോക്കൂ. വിദ്യാഭ്യാസം ഉൾപ്പെടെ പാർട്ടി സഹായിച്ചിരുന്നു.

വിജിൻ: കമ്യൂണിസ്റ്റായി ജീവിക്കുന്നത് അന്നും ഇന്നും എളുപ്പമല്ല. ദേശീയ പ്രസ്ഥാനത്തിന്റെ കാലത്തു കോൺഗ്രസായി ജീവിക്കുന്നതും ബുദ്ധിമുട്ടായിരുന്നു.

?എസ്എഫ്ഐക്കും ഡിവൈഎഫ്ഐക്കും വലിയ അംഗസംഖ്യ ഉണ്ടാകുന്നു. ഇവരെപ്രസ്ഥാനത്തിലേക്ക് എത്തിക്കാനാകുന്നുവോ

വിജിൻ: യുവജന സംഘടനകളിലെ അംഗത്വവിതരണ രീതിയല്ല പാർട്ടിയുടേത്. പാർട്ടിയിലെ അംഗത്വം അരിച്ചെടുക്കലാണ്. ബഹുഭൂരിപക്ഷവും പാർട്ടിയെ മനസ്സിലാക്കി ആ ആശയാടിത്തറയിൽ നിലകൊള്ളുന്നുണ്ട്.

സന്തോഷ്: ഇതു സ്വാതന്ത്ര്യകാലം മുതൽ ഉള്ളതാണ്. കലാലയങ്ങളിൽ എത്തിപ്പെടാത്ത ലക്ഷക്കണക്കിനാളുകൾ ബാക്കിയുണ്ട്. അവരിലേക്ക് എത്തിപ്പെടാനാണു ശ്രദ്ധിക്കേണ്ടത്.

? ഇന്ത്യ ഭരിക്കാനുള്ള അവസരം ഒരിക്കൽ കിട്ടിയെങ്കിലും അതു വേണ്ടെന്നു വച്ചു. ചരിത്രപരമായ മണ്ടത്തരമെന്ന് ഇതു വിശേഷിപ്പിക്കപ്പെട്ടു. ജ്യോതി ബസുവിന്റെ ആ നഷ്ടത്തെ എങ്ങനെ കാണുന്നു

സന്തോഷ്: അതു സ്വീകരിക്കേണ്ടതായിരുന്നു എന്നാണ് അഭിപ്രായം. സ്വീകരിച്ചിരുന്നെങ്കിൽ ഇടതുപക്ഷത്തിനു കൂടുതൽ സ്വീകാര്യത കിട്ടുമായിരുന്നു. സാന്നിധ്യമറിയിക്കുകയും ജനമറിയുകയും ചെയ്യുക എന്നതു പ്രധാനമാണ്.

വിജിൻ: അന്നത്തെ പാർട്ടി തീരുമാനത്തോട് ഇപ്പോഴും യോജിക്കുന്നു.

?ദലിത് വിഭാഗങ്ങളെ ഒരുമിച്ചു നിർത്താൻ വേണ്ടത്ര ശ്രമം ഉണ്ടാകുന്നില്ലെന്ന വിമർശനം ഉയരുന്നുണ്ട്. ന്യൂനപക്ഷങ്ങളോടുള്ള സമീപനത്തിലും ആശയക്കുഴപ്പമില്ലേ

വിജിൻ: എല്ലാവരെയും ചേർത്തുപിടിക്കുന്ന സമീപനമാണു കമ്യൂണിസ്റ്റ് സർക്കാരിന്റേത്. ന്യൂനപക്ഷങ്ങളെ വേട്ടയാടുന്ന നില വന്നാൽ പാർട്ടി അതിനെ പ്രതിരോധിക്കും. പ്രീണനമെന്നും മറ്റുമുള്ള വ്യാഖ്യാനങ്ങളെ തള്ളിക്കളയും.

ശുഭേഷ്: കമ്യൂണിസ്റ്റ് പാർട്ടി എല്ലാ വിഭാഗങ്ങളുടെയും പാർട്ടിയാണെന്നും അതുകൊണ്ട് ഏതെങ്കിലും വിഭാഗത്തെ പ്രത്യേകമായി പരിഗണിക്കേണ്ടതുണ്ടോ എന്നതു പോലുള്ള ചോദ്യങ്ങൾ ഉയർന്നുവരാം. ഇക്കാര്യങ്ങളിൽ ഒരു ആലോചന ആവശ്യമാണ്.

സന്തോഷ്: സ്വത്വരാഷ്ട്രീയത്തെ കൈകാര്യം ചെയ്യാൻ കഴിയുന്നില്ല എന്നതാണു കമ്യൂണിസ്റ്റ് പാർട്ടികൾ അഭിമുഖീകരിക്കുന്ന പ്രശ്നം. ഓരോ വിഭാഗവും ഓരോ വോട്ടുബാങ്കാണ്. ദലിതരുടെയും മതന്യൂനപക്ഷങ്ങളുടെയും വിശ്വാസം വേണ്ടത്ര ആർജിക്കാൻ കഴിഞ്ഞിട്ടില്ല.

?സിപിഎമ്മിലും സിപിഐയിലും 75 വയസ്സ് പ്രായപരിധി വച്ചതു  പ്രായോഗികമാണോ

സന്തോഷ്: പുതിയ തലമുറ വളർന്നു വരണമെങ്കിൽ ബോധപൂർവമായ ശ്രമങ്ങൾ വേണം. പദവികളിൽ ഇരിക്കുന്ന ചിലർക്കു മാറാൻ മടിയുണ്ടെന്നതു യാഥാർഥ്യമാണ്.