‘കാട്ടാനശല്യത്തിനു കാരണം അമമുള ! കടുവകൾക്ക് വേണ്ടത് ‘ട്രാൻസ്ഫർ’ ; അത് കാട്ടിൽ റേഷൻ കട തുടങ്ങുന്നതു പോലെ ’

ലോകത്ത് മൊത്തം 45,000 ഏഷ്യൻ ആനകളാണുള്ളത്. അതിൽ 30,000 എണ്ണം ഇന്ത്യയിലാണ്. ഇതിൽ 15,000 എണ്ണം കേരളം (6000), തമിഴ്നാട് (3000), കർണാടകം (6000) എന്നീ സംസ്ഥാനങ്ങളിലാണ്. എത്ര ആനകളെ ഇന്ത്യ എന്ന രാജ്യത്തിന് കൈകാര്യം ചെയ്യാൻ കഴിയും? ഇത് കിഫ മറുപടി നൽകേണ്ട കാര്യമല്ല. ഇവിടെ വൈൽഡ്‌ലൈഫ് റിസർച്ച് ഇൻസ്റ്റിറ്റ്യൂട്ട് ഉണ്ട്, നാഷനൽ വൈൽഡ് ലൈഫ് ബോർഡ് ഉണ്ട്, കേരള ഫോറസ്റ്റ് റിസേർച്ച് ഇൻസ്റ്റിറ്റ്യൂട്ട് പോലുള്ള സ്ഥാപനങ്ങളുണ്ട്. ബന്ധപ്പെട്ട കാര്യങ്ങളിൽ ഉത്തരവാദപ്പെട്ട ആളുകൾ പഠിച്ച് കൃത്യമായ വൈൽഡ്‌ലൈഫ് മാനേജ്മെന്റിലേക്ക് മാറണം. സ്ഥലംമാറ്റവും പരിഗണിക്കാവുന്നതാണ്. എന്നാൽ, ആനയുടെ കാര്യത്തിൽ അത് കാര്യമായ വിജയം കണ്ടിട്ടില്ല. സ്വന്തം സ്ഥലത്തേക്ക് തിരിച്ചു പോകാനുള്ള ശ്രമം ഉണ്ടാകും. കർണാടകത്തിൽ അത്തരത്തിലൊരു തിരിച്ചുപോക്ക് ഉണ്ടായിട്ടുണ്ട്. എന്നാൽ, അരിക്കൊമ്പന്റെ കാര്യത്തിൽ അത് വിജയിച്ചിട്ടുമുണ്ട്. ഒരിക്കലും എത്തിപ്പെടാൻ കഴിയാത്ത സ്ഥലത്തേക്കാണ് അരിക്കൊമ്പനെ മാറ്റിയത്. 

? ഇനിയൊരു ജീവൻ നഷ്ടപ്പെടാതിരിക്കാൻ എന്തു ചെയ്യാൻ കഴിയും

ഇനിയും ജീവൻ നഷ്ടപ്പെടില്ല എന്നതിന് ഒരു ഗ്യാരണ്ടിയും ഇല്ല. കടുവ എന്നെ ആക്രമിച്ച്, ഞാൻ തിരിച്ച് ആക്രമിച്ച് കടുവ ചത്താൽ ഞാൻ ജാമ്യമില്ലാ കുറ്റത്തിന് അകത്താകും. വനത്തിന് വെളിയിൽ, വന്യജീവികൾ ആക്രമിച്ചാൽ, നമുക്ക് പ്രതിരോധത്തിന്റെ ഭാഗമായി അവയെ കൊല്ലേണ്ടി വന്നാൽ നമുക്കെതിരേ കേസ് എടുക്കാൻ പാടില്ല. അതിൽ കേസ് എടുക്കാതിരിക്കാനുള്ള അധികാരം സർക്കാരിനുണ്ട്. മാങ്കുളത്ത് പുലിയെ കൊല്ലേണ്ടി വന്നപ്പോൾ കേസ് എടുക്കരുതെന്ന് വനം മന്ത്രി എ.കെ.ശശീന്ദ്രൻ ഉത്തരവിട്ടിരുന്നു.

നിലനിൽക്കാനുള്ള അവകാശം മനുഷ്യനുണ്ട്. അത് മൃഗങ്ങൾക്കുമുണ്ട്. എന്നാൽ, മനുഷ്യനു താഴയെ മൃഗങ്ങൾ വരൂ. മനുഷ്യൻ സംരക്ഷിക്കാൻ തീരുമാനിച്ചിട്ടുള്ള മൃഗങ്ങൾ മാത്രമേ സംരക്ഷിക്കപ്പെട്ടിട്ടുള്ളൂ. കടുവയുടെ കാര്യംതന്നെയെടുക്കൂ. ഇന്ത്യയിൽ വംശനാശത്തിലേക്ക് അടുത്ത കടുവകളുടെ എണ്ണം ഇപ്പോൾ 3000 എത്തിയതുതന്നെ ഈ സംരക്ഷണത്തിന്റെ ഭാഗമായാണ്. മനുഷ്യൻ മൃഗങ്ങളെ സംരക്ഷിക്കുന്നത് മനുഷ്യനുവേണ്ടിയാണ്, പ്രകൃതിക്കുവേണ്ടിയാണ്. മനുഷ്യനുവേണ്ടി, മനുഷ്യൻ ഉണ്ടാക്കിയ നിയമങ്ങളാൽ സംരക്ഷിക്കപ്പെടുന്ന മൃഗങ്ങളാൽ മനുഷ്യർ കൊല്ലപ്പെടാൻ പാടുണ്ടോ? ദൗർഭാഗ്യവശാൽ ഫോറസ്റ്റ് വകുപ്പിനും മൃഗപ്രേമികൾക്കും ഇതു മനസിലാകുന്നില്ല. മനുഷ്യൻ കൊല്ലപ്പെടട്ടെ, നിങ്ങൾ കയ്യേറിയിട്ടല്ലേ എന്നാണ് അവർ പറയുന്നത്.

? എന്തുകൊണ്ടായിരിക്കാം ഒരു വിഭാഗം ആളുകൾ മനുഷ്യ ജീവനു പകരം മൃഗങ്ങൾക്കു പ്രാധാന്യം കൊടുക്കുന്നത്

അതൊരു തെറ്റിദ്ധാരണയുടെ ഭാഗമായിരിക്കാം എന്നാണ് എനിക്ക് തോന്നുന്നത്. കൊച്ചിയിലോ കോഴിക്കോട്ടോ തിരുവനന്തപുരത്തോ ടൗണിലുള്ള ആളുകളുടെ വിചാരം മലയോരത്തു താമസിക്കുന്നവർ മുഴുവൻ കയ്യേറ്റക്കാരാണ്, ‌അവർ പരിസ്ഥിതി നശിപ്പിക്കുന്നവരാണ്, അവർ കൊള്ളക്കാരാണ് എന്നിങ്ങനെയാണ്. ഇവിടുത്തെ സാംസ്കാരിക നായകന്മാരും സാഹിത്യകാരന്മാരുമൊക്കെ ഇതിന് വളമിട്ടു കൊടുത്തിട്ടുമുണ്ട്. അവർ പറയുന്നത് പശ്ചിമഘട്ടം മുഴുവൻ തകർന്നുവെന്നാണ്. പശ്ചിമഘട്ടത്തിലെ പാറ മുഴുവൻ പശ്ചിമഘട്ടത്തിലെ ആളുകളാണോ ഉപയോഗിക്കുന്നത്? ഇത് പ്രധാനമായും പോകുന്നത് നാഷനൽ ഹൈവേ പണിയാനും കൊച്ചിയിൽ ഫ്ലാറ്റ് പണിയാനുമല്ലേ?

നഗരവാസികളുടെ സുഖസൗകര്യങ്ങൾക്കുവേണ്ടിയാണ് ഇവിടെ പരിസ്ഥിതി കൂടുതൽ നശിപ്പിക്കപ്പെട്ടിരിക്കുന്നത്. കൊച്ചി നഗരം തന്നെ ചതുപ്പല്ലേ. പരിസ്ഥിതി എന്നു പറയുന്നത് മലയുടെ മുകളിൽ മാത്രമുള്ളതല്ലല്ലോ. ചതുപ്പ് നികത്തി ഫ്ലാറ്റ് പണിത് ജീവിക്കുന്നവരാണ് പശ്ചിമഘട്ടത്തിലേക്കു നോക്കി നിങ്ങൾ പരിസ്ഥിതി നശിപ്പിക്കുന്നവരാണ്, മൃഗങ്ങളെ നശിപ്പിക്കുന്നവരാണ് എന്നു പറയുന്നത്. കിഫ വന്നതിനു ശേഷം ഞങ്ങൾ വളരെ ശക്തമായി ചെയ്തുകൊണ്ടിരുന്നത് കർഷകർക്കെതിരേയുള്ള ഇത്തരം പ്രചാരണത്തെ എതിർക്കുക എന്നതാണ്. മുൻപ് ഒരു കർഷകസംഘടനയും ഇത് ചെയ്യുന്നുണ്ടായിരുന്നില്ല.

? എന്തുകൊണ്ടാണ് കേരളത്തിലെ മലയോര കർഷകർ കയ്യേറ്റക്കാർ എന്ന ആരോപണം കേൾക്കുന്നത്. വനസംരക്ഷണത്തിൽ മലയോര കർഷകരുടെ പങ്ക് എത്രത്തോളം നിർണായകമാണ്

അതിലേക്കാണ് ഞാൻ പറഞ്ഞുവന്നത്. കേരളത്തിൽ 29.6 ശതമാനമാണ് റിസർവ് ഫോറസ്റ്റ്. ഇത് വനം വകുപ്പിന്റെ നിയന്ത്രണത്തിലുള്ള സ്ഥലം. എന്നാൽ, വനാവരണം എന്നൊന്നുണ്ട്, അതായത് ട്രീ കവർ, അത് 54 ശതമാനമാണ്. 24 ശതമാനം അധികമായുള്ളത് എവിടെനിന്ന് വന്നു? അത് ഞാനടക്കമുള്ള കർഷകർ സൃഷ്ടിച്ചതാണ്. കോഴിക്കോട് കൂരാച്ചുണ്ട് പഞ്ചായത്തിൽ വെറുമൊരു മൊട്ടക്കുന്നു വാങ്ങിയാണ് എന്റെ വല്യപ്പൻ കൃഷി തുടങ്ങിയത്. അതൊക്കെയാണ് ഫോറസ്റ്റ് കവറായി വന്നിട്ടുള്ളത്.

വയനാടും ഇടുക്കിയുമാണ് കയ്യേറ്റ ആക്ഷേപം കേൾക്കുന്നത്. കേരളത്തിൽ ഏറ്റവും കൂടുതൽ വനാവരണം ഉള്ളത് ഈ ജില്ലകളിലാണ്, 75 ശതമാനം. അടിസ്ഥാന കാര്യങ്ങൾ മനസിലാക്കാതെ വെറുതെ കുറ്റം പറയുകയാണ് ഇപ്പോൾ പലരും ചെയ്യുന്നത്. ഇവിടുത്തെ സ്കൂൾ പാഠപുസ്തകങ്ങൾ വരെ ഇതിന് ഉത്തരാവാദിയാണ്. യാഥാർഥ്യവുമായി യാതൊരു ബന്ധവുമില്ലാത്ത കാര്യങ്ങൾ, പരിസ്ഥിതി കാൽപനികതയുടെ പേരിൽ അടിച്ചേൽപ്പിക്കുകയാണ്. അത് ഞങ്ങളെക്കൊണ്ടു പറ്റുന്ന രീതിയിൽ എതിർക്കുന്നുണ്ട്, പ്രതിരോധിക്കുന്നുണ്ട്. എങ്കിലും ആളുകൾ സ്വയം ചിന്തിക്കേണ്ട കാര്യമാണത്.

? ഇടുക്കിയിൽ നടന്ന കർഷകശ്രീ കർഷകസഭയിൽ അലക്സ് ഉന്നയിച്ച കാര്യമാണ് വിസ്റ്റ ക്ലിയറിങ്. അത് ഇപ്പോൾ നിയമസഭയിൽ വരെ ചർച്ചയായിട്ടുണ്ട്. എന്താണ് വിസ്റ്റ ക്ലിയറിങ്?

വികസിത രാജ്യങ്ങളിലൊക്കെയുള്ള ഒരു ആശയമാണത്. റവന്യു ലാൻഡും വനവും പ്രത്യേകം വേർതിരിക്കുക. കാഴ്ചയ്ക്കു മറയില്ലാതെ ഒരു ഇടനാഴി സൃഷ്ടിക്കുക എന്നതാണ് ഇതിലൂടെ ഉദ്ദേശിക്കുന്നത്. വിസ്റ്റ എന്നാൽ വഴി എന്നാണ്. കുറ്റിക്കാടുകളും മരങ്ങളുമെല്ലാം നീക്കം ചെയ്ത് വഴിപോലെ ക്ലിയർ ആയ ഇടനാഴി. ഞാൻ മുന്നോട്ടു വച്ച ആശയം 100 മീറ്റർ വീതിയിൽ വനത്തിലേക്ക് ക്ലിയർ ചെയ്യുക എന്നതാണ്. ഇവിടെ കുറ്റിക്കാടുകളും മരങ്ങളും ഒന്നും ഉണ്ടാകാൻ പാടില്ല. ഇതിന്റെ നടുവിലൂടെ ഇലക്ട്രിക് ഫെൻസിങ് ഇടുക. നമ്മുടെ നാട്ടിൽ 2 രീതിയിലാണ് ഫെൻസിങ് തകരുന്നത്.

വള്ളിപ്പടർപ്പുകൾ വളരുന്നു എന്നതാണ് ഒരു കാരണം. അടുത്തുള്ള മരങ്ങൾ ആനകൾ തള്ളിയിട്ട് നശിപ്പിക്കുന്നതാണ് മറ്റൊരു കാരണം. 100 മീറ്റർ വീതിയിൽ മരങ്ങൾ ഇല്ലെങ്കിൽ ആനയ്ക്ക് ഒരിക്കലും ഈ വൈദ്യുത വേലി തകർക്കാൻ കഴിയില്ല. കോതമംഗലത്ത് എൽദോസ് ആനയുടെ ആക്രമണത്തിൽ കൊല്ലപ്പെടാൻ കാരണം വഴിയരികിൽ നിന്ന ആനയെ കാണാൻ കഴിയാത്തതുകൊണ്ടാണ്. വനത്തിലൂടെയുള്ള വഴികളുടെ വശങ്ങളിൽ 10 മീറ്റർ അകലത്തിൽ ക്ലിയർ ചെയ്യണം. വനാതിർത്തികളിൽ 100 മീറ്ററും വേണം. 100 മീറ്റർ മണ്ണിൽക്കൂടി നടന്ന് കുരങ്ങ് കൃഷിയിടത്തിലേക്ക് കടക്കാൻ സാധ്യത കുറവാണ്. കാട്ടുപന്നിയേക്കാളും ആനയേക്കാളും വലിയ ശല്യമാണ് കുരങ്ങ്. ഞാൻ ഒന്നര വർഷമായി തേങ്ങയിട്ടിട്ട്. 50 തെങ്ങുണ്ട്. എന്നാൽ മുഴുവനും കുരങ്ങ് നശിപ്പിക്കുകയാണ്.

? കാട്ടിനുള്ളിൽ ഭക്ഷണം ലഭ്യമാക്കാനും ആശയം ഉയരുന്നു. ഈ പദ്ധതി വിജയിക്കുമോ

കാട് എന്നത് സ്വയം പര്യാപ്തമായ ഒരു സംവിധാനമാണ്. അവിടെക്കൊണ്ടുപോയി റേഷൻകട വയ്ക്കാൻ പറ്റില്ല. അരിയും പഴങ്ങളും കാട്ടിൽക്കൊണ്ടുപോയി കൊടുക്കേണ്ട കാര്യമില്ല. വെള്ളം കൊടുക്കാൻ പറ്റുമായിരിക്കും. കാട് സ്വയം പര്യാപ്തമായി നിൽക്കണം. അത് വനംവകുപ്പിന്റെ ഉത്തരവാദിത്തമാണ്. കാട്ടിൽ മൃഗങ്ങളുടെ പെരുപ്പമുണ്ടായാൽ ഭക്ഷണം കിട്ടാതാകും. അവിടെ അരി കൊണ്ടുപോയി കൊടുത്തിട്ട് കാര്യമില്ല. മൃഗങ്ങൾക്ക് ആവശ്യം പച്ചപ്പാണ്. എണ്ണം നിയന്ത്രിച്ചാൽ പച്ചപ്പ് തനിയെ ഉണ്ടായിക്കൊള്ളും. വനത്തിൽ മൃഗങ്ങൾക്ക് ഭക്ഷണമൊരുക്കാൻ 50 ലക്ഷം രൂപ കൊടുക്കുമെന്ന് പറയുന്നു. അത് പോയി എന്നു കൂട്ടിയാൽ മതി. കേരളത്തിന്റെ മൊത്തം വനത്തിന്റെ 13 ശതമാനം പ്ലാന്റേഷനുകളാണ്.

മൊത്തം 75,000 ഹെക്ടറാണ് പ്ലാന്റഷൻ. അതിൽ 25,000 ഹെക്ടർ വയനാട്ടിൽ മാത്രമാണ്. തേക്കാണ് പ്രധാന വിള. തേക്കുള്ള പ്രദേശത്ത് മറ്റൊന്നും വളരില്ല. ഇതൊക്കെ മാറ്റി സ്വാഭാവിക വനമാക്കണം. വനം എന്നാൽ ഇടതൂർന്ന മരങ്ങൾ മാത്രമല്ല, പുൽമേടുകളും വനത്തിന്റെ ഭാഗമാണ്. സസ്യഭുക്കുകൾക്ക് ആവശ്യം പുല്ലും വെള്ളവുമാണ്. അവ ലഭ്യമായാൽ മാംസഭുക്കുകളും വനത്തിനുള്ളിൽത്തന്നെ നിന്നുകൊള്ളും. വൃക്ഷവിളകൾ നട്ടുവളർത്തി വനത്തിന്റെ ഇക്കോളജി നശിപ്പിച്ചത് വനം വകുപ്പാണ്. വയനാട്ടിൽ ഇപ്പോൾ ഭീഷണിയായി മാറിയ മഞ്ഞക്കൊന്ന സോഷ്യൽ ഫോറസ്ട്രിയുടെ ഭാഗമായി വനംവകുപ്പ് നട്ടുപിടിപ്പിച്ചതാണ്. വനത്തിനുള്ളിൽ അവ വ്യപകമായി ഇപ്പോൾ വനത്തിന്റെ ഇക്കോളജി മുഴുവൻ തകർന്നിരിക്കുന്നു.