26ൽ സച്ചിന് കപ്പ് സമ്മാനിച്ച ' ക്യാപ്റ്റൻസി: ഇന്ന് മൂല്യം 178.6 കോടി! സലാം രോഹിത് ഭായ്... ആ റെക്കോർഡുകൾക്ക് 37ന്റെ ചെറുപ്പം

ഐപിഎൽ റെക്കോർഡുകളുടെ ‘കളി’ത്തോഴൻ

∙ ഏറ്റവും കൂടുതൽ കിരീടങ്ങൾ സ്വന്തമാക്കിയിട്ടുള്ള ക്യാപ്റ്റൻ. 5 കിരീടം സ്വന്തമാക്കി എം.എസ്. ധോണിയും ഈ നേട്ടം പങ്കിടുന്നുണ്ട്

∙ ഏറ്റവും കൂടുതൽ കിരീടങ്ങൾ സ്വന്തമാക്കിയിട്ടുള്ള താരം. ആകെ നേടിയ 6 കിരീടങ്ങളിൽ 5 എണ്ണവും മുംബൈ ഇന്ത്യൻസ് നായകനായി. ശേഷിക്കുന്ന ഒരെണ്ണം ഡക്കാൻ ചാർജേഴ്സിലെ താരമായി. 6 കിരീട നേട്ടവുമായി അമ്പാട്ടി റായിഡുവും ഈ നേട്ടം പങ്കിടുന്നുണ്ട്.

∙ ഏറ്റവും കുറഞ്ഞ പ്രായത്തിൽ ഐപിഎൽ കിരീടം സ്വന്തമാക്കിയ നായകൻ. 2013ൽ മുംബൈ ഇന്ത്യൻസിനായി ആദ്യ കിരീടം ഏറ്റുവാങ്ങുമ്പോൾ 26 വയസ്സും 13 ദിവസവുമായിരുന്നു രോഹിത്തിന്റെ പ്രായം.

∙ ഒന്ന്, രണ്ട്, മൂന്ന്, നാല്, അഞ്ച് കിരീടങ്ങൾ സ്വന്തമാക്കാൻ ഏറ്റവും കുറച്ച് മത്സരങ്ങൾ മാത്രം വേണ്ടിവന്ന നായകൻ

∙ സെഞ്ചറിയും ഹാട്രിക് വിക്കറ്റും 100 ക്യാച്ചും തികച്ചിട്ടുള്ള ഏക താരം.

∙ സെഞ്ചറിയും ഹാട്രിക് വിക്കറ്റും നേടിയിട്ടുള്ള മൂന്ന് താരങ്ങളിൽ ഒന്നാമൻ. ഷെയ്ൻ വാട്സൻ, സുനിൽ നരെയ്ൻ എന്നിവരാണ് രോഹിത്തിന് പുറമേ സെഞ്ചറിയും ഹാട്രിക് വിക്കറ്റും നേടിയിട്ടുള്ള താരങ്ങൾ.

∙ ഏറ്റവും കൂടുതൽ പ്ലയർ ഓഫ് ദ് മാച്ച് പുരസ്കാരങ്ങൾ സ്വന്തമാക്കിയിട്ടുള്ള ഇന്ത്യൻ താരം. 19 മത്സരങ്ങളിൽ. വിദേശ താരങ്ങളെക്കൂടി ഉൾപ്പെടുത്തി നോക്കിയാൽ എ.ബി.ഡിവില്ലിയേഴ്സ് (25), ക്രിസ് ഗെയ്ൽ (22) എന്നിവർക്ക് പിന്നിൽ മൂന്നാം സ്ഥാനത്താണ് രോഹിത്തിന്റെ സ്ഥാനം.

∙ ക്യാപ്റ്റന്റെ തൊപ്പിയുമായി ഏറ്റവും കൂടുതൽ മത്സരങ്ങളിൽ കളത്തിലിറങ്ങിയ രണ്ടാമത്തെ താരം. രോഹിത് 158 മത്സരങ്ങളിൽ മുംബൈ ഇന്ത്യൻസിനെ നയിച്ചപ്പോൾ പട്ടികയിൽ ഒന്നാം സ്ഥാനത്തുള്ള ധോണി 226 മത്സരങ്ങളിലാണ് ചെന്നൈ സൂപ്പർ കിങ്സിനെ നയിച്ചത്.

∙ ഐപിഎൽ പ്രതിഫല കണക്കിൽ മുന്നിൽ നിൽക്കുന്ന താരവും രോഹിത് തന്നെയാണ്. 178.6 കോടി രൂപയാണ് ഐപിഎൽ താരലേലത്തിലൂടെ രോഹിത്തിന് ലഭിച്ചിട്ടുള്ള തുക. എം.എസ്.ധോണി (176.8 കോടി), വിരാട് കോലി (173.2 കോടി) എന്നിവരാണ് രോഹിത്തിന് തൊട്ടുപിന്നിൽ ഉള്ളത്.

∙ ചരിത്രത്തിൽ ഏറ്റവും കൂടുതൽ മത്സരങ്ങിൽ (252) കളത്തിലിറങ്ങിയിട്ടുള്ള താരങ്ങളിൽ രണ്ടാമൻ. 259 മത്സരങ്ങളിൽ പങ്കെടുത്തിട്ടുള്ള എം.എസ്.ധോണിയാണ് ഒന്നാം സ്ഥാനത്ത്. ദിനേശ് കാർത്തിക്കും 252 മത്സര പരിചയവുമായി രോഹിത്തിനൊപ്പം രണ്ടാം സ്ഥാനം പങ്കിടുന്നു. 247 മത്സരങ്ങളിൽ കളത്തിലിറങ്ങിയിട്ടുള്ള വിരാട് കോലിയാണ് മൂന്നാം സ്ഥാനത്ത്.

∙ ഏറ്റവും കൂടുതൽ റൺസ് (6,522) നേടിയിട്ടുള്ള താരങ്ങളിൽ നാലാം സ്ഥാനം. വിരാട് കോലി (7763), ശിഖർ ധവാൻ (6769), ഡേവിഡ് വാർണർ (6564) എന്നിവരാണ് രോഹിത്തിനു മുകളിലായി ആദ്യ 3 സ്ഥാനങ്ങൾ അലങ്കരിക്കുന്നത്.

∙ മുംബൈ ഇന്ത്യൻസിനായി ഏറ്റവും കൂടുതൽ റൺസ് (5,352) നേടിയിട്ടുള്ള താരം.

∙ ഏറ്റവും കൂടുതൽ സിക്സറുകൾ പറത്തിയതിൽ രണ്ടാം സ്ഥാനം (275). 357 സിക്സറുകൾ നേടിയിട്ടുള്ള ക്രിസ് ഗെയ്ൽ ആണ് ഒന്നാം സ്ഥാനത്ത്.

∙ ഏറ്റവും കൂടുതൽ ഫോറുകളിൽ നാലാം സ്ഥാനം (586). ശിഖർ ധവാൻ (768), വിരാട് കോലി (689), ഡേവിഡ് വാർണർ (663) എന്നിവരാണ് ആദ്യ മൂന്ന് സ്ഥാനങ്ങളിൽ

∙ ഏറ്റവും കൂടുതൽ 50 പ്ലസ് സ്കോറുകളിൽ നാലാം സ്ഥാനം (44). ഡേവിഡ് വാർണർ (66), വിരാട് കോലി (62), ശിഖർ ധവാൻ (53) എന്നിവരാണ് ആദ്യ മൂന്ന് സ്ഥാനങ്ങളിൽ

∙ ഒരു ടീമിനുവേണ്ടി 200ലധികം മത്സരങ്ങൾക്കായി  കളത്തിലിറങ്ങിയ മൂന്നാമത്തെ താരം. രോഹിത് മുംബൈ ഇന്ത്യൻസിനു വേണ്ടി ഈ റെക്കോർഡ് സ്വന്തമാക്കിയപ്പോൾ എം.എസ്. ധോണി ചെന്നൈയ്ക്കുവേണ്ടിയും വിരാട് കോലി ബെംഗളൂരുവിന് വേണ്ടിയും ഈ നേട്ടം കൈവരിച്ചിട്ടുണ്ട്.

∙ 17 സീസണുകളുടെ ചരിത്രത്തിലെ ഏറ്റവും മികച്ച ബോളിങ് പ്രകടനങ്ങളുടെ പട്ടികയിലെ 38–ാം സ്ഥാനവും രോഹിത്തിനൊപ്പമുണ്ട്. 2 ഓവറിൽ നിന്ന് 6 റൺസ് വിട്ടുനൽകി ഹാട്രിക് ഉൾപ്പെടെ 4 മുംബൈ വിക്കറ്റുകളാണ് 2009 മേയ് 6ന് സെഞ്ചൂറിയനിൽ ഡെക്കാൻ ചാർജേഴ്സിന് വേണ്ടി രോഹിത് സ്വന്തമാക്കിയത്.

∙ മുംബൈ ഇന്ത്യൻസിനു വേണ്ടി ഏറ്റവും കൂടുതൽ സെഞ്ചറികൾ (2) നേടിയിട്ടുള്ള താരം. മുംബൈയ്ക്കായി ഏറ്റവും കൂടുതൽ 90 പ്ലസ് റൺസ് സ്കോർ ചെയ്തിട്ടുള്ള താരവും രോഹിത്താണ്. 2 സെഞ്ചറികൾക്കൊപ്പം 2015ൽ ഈഡൻ ഗാർഡൻസിൽ കൊൽക്കത്തയ്ക്കെതിരെ പുറത്താകാതെ നേടിയ 98 റൺസും 2018ൽ വാങ്കഡെയിൽ ആർസിബിക്കെതിരെ നേടിയ 94 റൺസും ചേർത്താൽ 4 തവണയാണ് രോഹിത് 90 പ്ലസ് സ്കോർ കണ്ടെത്തിയത്.

∙ ഏറ്റവും കൂടൂതൽ തവണ (17) റൺസ് സ്കോർ ചെയ്യാതെ പുറത്തായതിന്റെ റെക്കോർഡും രോഹിത്തിനൊപ്പമുണ്ട്. ദിനേശ് കാർത്തിക്, ഗ്ലെൻ മാക്സ്‌വെൽ എന്നിവരും ഈ നെഗറ്റീവ് റെക്കോർഡ് രോഹിത്തിനൊപ്പം പങ്കിടുന്നുണ്ട്.

∙ ബാറ്ററുടെ റോളിൽ രോഹിത് നേരിട്ടത് 4970 പന്തുകൾ. സ്വന്തമാക്കിയത് 6522 റൺസ്, 2 സെഞ്ചറികൾ, 42 അർധ സെഞ്ചറികൾ, 586 ഫോറുകൾ, 275 സിക്സറുകൾ, ഉയർന്ന സ്കോർ: 109*, ആവറേജ്: 29.92, സ്ട്രൈക് റേറ്റ്: 131.23

∙ ബോളറുടെ റോളിൽ രോഹിത് എറിഞ്ഞത് 363 പന്തുകൾ. വഴങ്ങിയത് 453 റൺസ്. നേടിയത് 15 വിക്കറ്റുകൾ. മികച്ച പ്രകടനം 6 റൺസ് വഴങ്ങി 4 വിക്കറ്റുകൾ.

∙ 2008ൽ ആദ്യ സീസൺ മുതൽ 2010 സീസൺ വരെ രോഹിത് ഡെക്കാൻ ചാർജേഴ്സ് ഹൈദരാബാദിന്റെ താരമായിരുന്നു. അവിടെ നിന്നാണ് 2011ലെ മെഗാ താരലേലത്തിലൂടെ രോഹിത് മുംബൈ ഇന്ത്യൻസിൽ എത്തുന്നത്. അന്നുമുതൽ ഇന്നുവരെയും നീലക്കുപ്പായത്തിൽ മാത്രമാണ് രോഹിത് ഐപിഎൽ മത്സരങ്ങൾക്കിറങ്ങിയിട്ടുള്ളു.