ടീം ഇന്ത്യയുടെ ‘വജ്രായുധം’; ബാറ്റർമാരുടെ ‘അന്തകൻ’; അമ്മച്ചിറകിൽ വളർന്ന ജസ്പ്രീത് ബുമ്ര

‘‘ടീം ഇന്ത്യ ട്വന്റി20 ലോകകപ്പ് കിരീടം ഉയർ‍ത്തുമ്പോൾ മുൻ‍നിരയിൽ ജസ്പ്രീത് ബുമ്ര ഉണ്ടാകും. ബാറ്റർമാരെ സമ്മർദത്തിലാക്കുന്ന ആ പ്രകടനം മികച്ചതായിരുന്നു. പാക്കിസ്ഥാനെതിരെ 15-ാം ഓവറിൽ (മുഹമ്മദ് റിസ്‌വാന്റെ) ആ വിക്കറ്റ് വീഴ്ത്തിയത് കണ്ടു. പിന്നെ 19-ാം ഓവർ, ആ ഓവറിൽ രണ്ട് ബൗണ്ടറികൾ പോയിരുന്നെങ്കിൽ എല്ലാം കൈവിട്ട്പോയേനെ, അവസാന ഓവറിൽ പാക്കിസ്ഥാന്റെ വിജയലക്ഷ്യം 10 അല്ലെങ്കിൽ 12 റൺസ് ആയിരുന്നെങ്കിൽ അവർക്ക് വിജയം സാധ്യമായിരുന്നു’’ - ഇന്ത്യയുടെ പേസർ ജസ്പ്രീത് ബുമ്രയെ കുറിച്ച് ടീം ഇന്ത്യയുടെ മുൻ‍ പരിശീലകൻ അനിൽ കുംബ്ലെ‌ പറഞ്ഞ വാക്കുകളാണിത്.

അതേ ദക്ഷിണാഫ്രിക്കക്കെതിരെ ഫൈനലിലും ആ അദ്ഭുതം നാം കണ്ടു, തോറ്റിടത്തു നിന്ന് 130 കോടി ജനങ്ങളെ പ്രതീക്ഷയുടെ തീരത്തേക്കും പിന്നീട് കിരീടത്തിലേക്കും കൈപിടിച്ചു കൊണ്ടുപോയ ആ അദ്ഭുത ബോളറെ ക്രിക്കറ്റ് ആരാധകർ‍ ഒരിക്കലും മറക്കില്ല. ഏത് പിച്ചിലായാലും ബുമ്രയുടെ പ്രകടനം മികച്ചതായിരിക്കും, അത് അദ്ദേഹത്തിന്റെ കരിയറിലുടനീളം നമ്മൾ കണ്ടതാണ്. എളുപ്പമല്ല അത്. ബുമ്രയുടെ പന്ത് നേരിടാൻ വരുന്ന ഏതൊരു ബാറ്ററും നേരിടുന്ന സമ്മർദം ഏറെ വലുതാണെന്നും അന്ന് കുംബ്ലെ പറഞ്ഞു. ലോകത്തെ ഏറ്റവും മികച്ച സ്പിൻ ബോളറായിരുന്ന അനിൽ കുംബ്ലെയുടെ വാക്കുകൾ തന്നെയാണ് ബുമ്രയ്ക്ക് ഏറ്റവും വലിയ അംഗീകാരവും.

∙ ഫൈനലിലെ ബുമ്ര സ്പെഷൽ

അക്‌ഷർ പട്ടേലിന്റെ ഓവറിന് ശേഷം പ്രതീക്ഷകൾ നഷ്ടപ്പെട്ട സമയത്താണ് 16-ാം ഓവർ എറിയാൻ ബുമ്ര എത്തുന്നത്. ആ ഓവറിൽ ബുമ്ര വിട്ടുകൊടുത്തത് കേവലം നാല് റൺസ് മാത്രം. അതോടെ പ്രതീക്ഷകൾ വീണ്ടുമുണർന്നു.  ഇനി എന്തെങ്കിലും ചെയ്യാൻ കഴിയുമെങ്കിൽ അത് ബുമ്രയ്ക്ക് മാത്രമായിരിക്കുമെന്ന് ആരാധകർക്ക് അറിയാമായിരുന്നു. പതിനെട്ടാം ഓവറിൽ ഒരു വിക്കറ്റ് വീഴ്ത്തിയപ്പോൾ വിട്ടുകൊടുത്തത് കേവലം രണ്ട് റൺസ്. നാല് ഓവറിൽ വിട്ടുകൊടുത്തത് 18 റൺസ്, രണ്ട് നിർണായക വിക്കറ്റും. ഇതിൽ 14 ഡോട്ട് ബോളുകളും. അവസാനം ടൂർണമെന്റിലെ താരമായും ബുമ്രയെ തിരഞ്ഞടുത്തു. ടൂർണമെന്റിൽ എട്ട് മത്സരങ്ങളിൽ നിന്ന് മൊത്തം 15 വിക്കറ്റുകളാണ് ബുമ്ര വീഴ്ത്തിയത്.

∙ ആദ്യ രണ്ട് മത്സരത്തിലും കളിയിലെ കേമൻ

ടീം ഇന്ത്യയുടെ ആദ്യ രണ്ട് മത്സരത്തിലും കളിയിലെ താരം ജസ്പ്രീത് ബുമ്രയായിരുന്നു. ബോളർമാർ നിറഞ്ഞാടിയ ന്യൂയോർ‍ക്ക് പിച്ചിൽ ബുമ്രയുടെ പ്രകടനം അദ്ഭുതപ്പെടുത്തുന്നതായിരുന്നു. ആദ്യം അയർലൻഡിനെയും പിന്നാലെ പാക്കിസ്ഥാനെയും കീഴടക്കുമ്പോൾ കളിയിലെ കേമനാര് എന്നതിന് ഒരൊറ്റ ഉത്തരമേ ഉണ്ടായിരുന്നുള്ളൂ– ജസ്പ്രീത് ബുമ്ര. ട്വന്റി20 ലോകകപ്പിൽ മുൻനിര ടീമുകളെല്ലാം അടുത്ത റൗണ്ടിലേക്ക് പ്രവേശനം നേടാൻ പാടുപെട്ടപ്പോൾ ജസ്പ്രീത് ബുമ്രയുടെ മിന്നുന്ന പ്രകടനമാണ് ഇന്ത്യയുടെ മുന്നേറ്റത്തിന് ആശ്വാസമായത്.

ഗ്രൂപ്പ് ഘട്ടത്തിൽ പ്രധാന മത്സരങ്ങളിൽ വിജയങ്ങൾ ഉറപ്പാക്കുന്നതിൽ ബുമ്ര നിർണായക പങ്കുവഹിച്ചു. പാക്കിസ്ഥാനെതിരായ അദ്ദേഹത്തിന്റെ മാച്ച് വിന്നിങ് സ്പെഷൽ വെറും 14 റൺസിന് 3 വിക്കറ്റ് വീഴ്ത്തിക്കൊണ്ടായിരുന്നു. ഇഫ്തിഖർ അഹമ്മദിന്റെ വിക്കറ്റ് വീഴ്ത്തുമ്പോൾ ആ ഓവറിൽ വിട്ടുകൊടുത്തത് മൂന്ന് റൺസ് മാത്രം. ആ നിർണായക ഓവർ ക്രിക്കറ്റ് ലോകത്തെ തന്നെ അദ്ഭുതപ്പെടുത്തി. ഈ പ്രകടനം ഇന്ത്യയെ കുറഞ്ഞ സ്‌കോറിങ് ത്രില്ലറിൽ ആറ് റൺസിന്റെ വിജയം ഉറപ്പിക്കാൻ സഹായിക്കുകയും ചെയ്തു.