ഒരേയൊരു വൻമതിൽ, ഒടുവിലൊരു കിരീടം; കാലവും ക്രിക്കറ്റും ചേർന്നു കടം വീട്ടുമ്പോൾ

ഒരു വർഷത്തിലേറെ നീണ്ട വ്യക്തമായ പദ്ധതിയിലൂടെയാണ് ലോകകപ്പിനുള്ള ടീമിന്റെ ഒരുക്കവുമായി ദ്രാവിഡ് മുന്നോട്ടുനീങ്ങിയത്. അണ്ടർ–19 തലത്തിലും വ്യത്യസ്തമായിരുന്നില്ല താരത്തിന്റെ സമീപനം. ടീമൊരുക്കത്തിനായി രാജ്യത്തുടനീളമുള്ള നവപ്രതിഭകളെത്തേടി ദ്രാവിഡും സംഘവും മുന്നിട്ടിറങ്ങി. ക്യാംപുകളിലും നെറ്റ്സിലും മാത്രം ഒതുങ്ങിനിൽക്കേണ്ടതല്ല തയാറെടുപ്പെന്ന പക്ഷക്കാരനാണു ദ്രാവിഡ് എന്ന കോച്ച്. ബിസിസിഐയോട് ആവശ്യപ്പെട്ട് ഇന്ത്യൻ താരങ്ങളടങ്ങിയ ബോർഡ് പ്രസിഡന്റ്സ് ടീം രൂപീകരിച്ചു അണ്ടർ–19 ടീമിനെതിരെ മൽസരിപ്പിച്ചാണു ദ്രാവിഡ് തയാറെടുപ്പു നടത്തിയത്.

ജൂനിയർ ലോകകപ്പ് എന്ന ഇളവുകൾ നൽകാതെയുള്ള വിശാലമായ മുന്നൊരുക്കത്തിൽ മൂന്നു ടീമുകൾ ഇറക്കാൻ വേണ്ടത്ര താരങ്ങളുടെ കഴിവുകൾ കോച്ച് പരീക്ഷിച്ചറിഞ്ഞു. തിരിച്ചടികളും നേട്ടങ്ങളും നേരിട്ട്, ദ്രാവിഡിന്റെ അണ്ടർ–19 കുട്ടികൾ ആരെയും കൂസാതെ ഒരു തവണ ലോകകപ്പ് ഏറ്റുവാങ്ങി. ഒരു തവണ കലാശപ്പോരാട്ടത്തിൽ കീഴടങ്ങി. 2018ൽ ഒരു പരിശീലന മൽസരം പോലുമില്ലാതെ ദക്ഷിണാഫ്രിക്കയിലേക്കു സീനിയർ ടീം പോയതു വാർത്തകളിൽ നിറഞ്ഞുനിന്നപ്പോഴാണു ന്യൂസീലൻഡിൽ ആദ്യമായി കളിക്കാനിറങ്ങുന്ന താരങ്ങളെയും കൊണ്ടു ദിവസങ്ങൾക്കു മുൻപേ ദ്രാവിഡ് അണ്ടർ–19 ലോകകപ്പിനായി യാത്ര തിരിച്ചത്.

സീനിയർ ടീമിന്റെ പരിശീലകനായപ്പോഴും ഇതേ ശൈലിയാണു ദ്രാവിഡ് പിന്തുടർന്നത്. മത്സരഫലങ്ങളെക്കാളുപരി ലോകകപ്പ് പോലുള്ള വൻലക്ഷ്യം മുൻനിർത്തിയായിരുന്നു ടീമൊരുക്കം. ടീമിന് അനിവാര്യമായ വിന്നിങ് കോംബിനേഷൻ തേടി ഒരു സംഘം താരങ്ങളെ വച്ചുള്ള പരീക്ഷണമാണു ക്രീസിൽ ഒരിക്കലും സാഹസത്തിനു മുതിർന്നിട്ടില്ലാത്ത വൻമതിൽ നടത്തിയത്. താരങ്ങളെ അടിക്കടി മാറ്റിയുള്ള സ്ക്വാഡ് പരീക്ഷണങ്ങളുടെ പേരിൽ പതിവുപോലെ വിമർശന ശരങ്ങളും ദ്രാവിഡിനു നേർക്കെത്തി. ഒടുവിൽ ലോകകിരീടം നെഞ്ചോടു ചേർത്ത സംഘമായി മാറിയതും ആ പരീക്ഷണത്തിന്റെ മറുവശമാണ്. മുഖം നോക്കാതെയായിരുന്നു കറതീർന്ന ടീം മാൻ എന്നു പേരെടുത്ത ദ്രാവിഡ് ഈ ട്വന്റി20 ലോകകപ്പിനായി ടീമിനെ ഒരുക്കിയത്. 

കെ.എൽ.രാഹുലിനെപ്പോലുള്ള സൂപ്പർ താരങ്ങളെപ്പോലും മറികടന്നു സ്ക്വാ‍ഡ് തിരഞ്ഞെടുത്ത ദ്രാവി‍ഡും സംഘവും ടൂർണമെന്റിലെ ഇലവനിലും അപ്രതീക്ഷിത മാറ്റങ്ങൾ വരുത്തി. കരിയറിൽ മിന്നും തുടക്കം കുറിച്ച യശസ്വി ജയ്സ്വാളിന്റെ സാന്നിധ്യമുള്ള ടീമിൽ ഓപ്പണർ റോളിൽ വിരാട് കോലിക്കു സ്ഥാനമാറ്റം നൽകിയാണു ഇന്ത്യ കളത്തിലെത്തിയത്. കോലി പരാജയപ്പെട്ടിട്ടും ആ പരീക്ഷണം തുടർന്നു. ബാറ്റിങ് നിരയ്ക്കു സൂപ്പർ താരമുഖം നൽകുന്നതിനു പകരം ട്വന്റി20യ്ക്കു ചേരുന്ന യൂട്ടിലിറ്റി താരങ്ങളെ ഉൾപ്പെടുത്തുന്നതിലായിരുന്നു ദ്രാവിഡിന്റെ ശ്രദ്ധ. രോഹിത് ശർമയും വിരാട് കോലിയും ഋഷഭ് പന്തും പോലുള്ള ടോപ് മാച്ച് വിന്നർമാരുടെ ടോപ് ഓർഡർ കഴിഞ്ഞുള്ള ഇന്ത്യൻ ബാറ്റർമാർ അക്ഷരാർഥത്തിൽ ട്വന്റി20യ്ക്കായുള്ള  തീപ്പൊരി താരങ്ങളായിരുന്നു. 

സൂര്യകുമാർ യാദവ്, ശിവം ദുബെ, ഹാർദിഖ് പാണ്ഡ്യ, അക്ഷർ പട്ടേൽ... കണ്ടുശീലിച്ച താരമൂല്യങ്ങളിൽ നിന്നു വഴിമാറി സൃഷ്ടിച്ച ഈ വിന്നിങ് കോംബിനേഷനിലാണു കളി മാറിയതും  ആറ്റുനോറ്റിരുന്ന കിരീടം വന്നതും. കർക്കശക്കാരനായൊരു പരിശീലകന്റെ സമ്മർദമില്ലാതെ ഒരു സീനിയർ താരമെന്ന നിലയിൽ ദ്രാവിഡ് ടീമംഗങ്ങളോട് അടുത്ത് ഇടപഴകിയതിന്റെ സ്വാധീനവും ടൂർണമെന്റിലുടനീളം ഇന്ത്യയുടെ പ്രകടനത്തിൽ പ്രതിഫലിച്ചു.

കിരീടം ഏറ്റുവാങ്ങിയ ശേഷം ബാർബഡോസിലെ ഷാംപെയ്ൻ നിമിഷങ്ങളിൽ ടീമംഗങ്ങളുടെ അരികിൽ മാത്രമായി ഒതുങ്ങി നിന്ന ദ്രാവിഡിനെത്തേടി വിരാട് കോലി കിരീടവുമായി ചെന്ന ആ നിമിഷം മറക്കാനാകുമോ? ആഘോഷക്കൂട്ടമായി നീങ്ങുന്ന ടീമിനു പിന്നാലെയായി ആഹ്ലാദത്തിന്റെ ചെറുപുഞ്ചിരിയുമായി നടന്നു നീങ്ങിയ ദ്രാവിഡിനെ എടുത്തുയർത്താൻ രോഹിത് ശർമ സഹതാരങ്ങളോടു പറയുന്ന ദൃശ്യം മറക്കാനാകുമോ? അതെല്ലാം പറഞ്ഞുവയ്ക്കുന്നത് ഒരുത്തരമാണ്. ഈ കിരീടം രാഹുൽ ദ്രാവിഡിനു കാലം കാത്തുവച്ചു നൽകിയ കനകകിരീടമാണ്. കണ്ണുചിമ്മാതെ, ഉടലും ഉയിരും ഏകാഗ്രമാക്കി ഗെയിമിനായി പകുത്തുനൽകിയ മൂന്നു ദശകത്തോളം നീണ്ട ദിനരാത്രങ്ങൾക്കു ക്രിക്കറ്റ് തിരികെ നൽകിയ ഉപഹാരം കൂടിയാണീ കിരീടത്തിളക്കം.