മൊറോക്കൻ തെരുവിൽ വളർന്ന പോരാളി; ക്രിസ്റ്റ്യാനോയുടെ ആരാധകൻ; നോവ ഇനി കേരളത്തിന്റെ ‘ബ്ലാസ്റ്റർ’

സെന്റർ ഫോർവേഡിന്റെ ദൗത്യവുമായി 10 മത്സരങ്ങളിലാണു താരം കളത്തിലെത്തിയത്. 5 ഗോളുകളും 2 അസിസ്റ്റുകളും കുറിച്ച ഈ റോളാകും ബ്ലാസ്റ്റേഴ്സ് മുപ്പതുകാരൻ താരത്തിനായി ഒഴിച്ചിട്ടിരിക്കുന്നതും. 2020 ൽ ആഫ്രിക്കൻ നേഷൻസ് കപ്പ് നേടിയ മൊറോക്കൻ ടീമംഗമായ സദൂയിക്കൊത്ത പങ്കാളിയായി അഡ്രിയൻ ലൂണയെന്ന പ്ലേമേക്കർ കൂടി ചേരുന്നിടത്താണ് ഈ സീസണിൽ കേരളം കാത്തിരിക്കുന്ന ‘ബ്ലാസ്റ്റ്’ സൂപ്പർ ലീഗിൽ തെളിയുന്നത്. പുതിയ ടീമിനെക്കുറിച്ചും ലക്ഷ്യത്തെക്കുറിച്ചും പ്രതീക്ഷകളെക്കുറിച്ചും നോവ സദൂയി മനസ്സ് തുറക്കുന്നു.  

? ഇന്ത്യയിൽ ഇതു മൂന്നാമത്തെ സീസണിനാണു നോവ ഒരുങ്ങുന്നത്. മികച്ചൊരു സീസൺ കൂടി ആശംസിക്കുന്നു. എഫ്സി ഗോവയ്ക്കൊപ്പം രണ്ടു തകർപ്പൻ സീസണുകൾ കളിച്ചാണു ബ്ലാസ്റ്റേഴ്സിലേക്കുള്ള താങ്കളുടെ വരവ്. രണ്ടു വർഷത്തിലേറെ നീണ്ട അനുഭവത്തിന്റെ അടിസ്ഥാനത്തിൽ ഇന്ത്യൻ ഫുട്ബോളിനെയും അതിന്റെ വെല്ലുവിളികളെയും എങ്ങനെയാണു വിലയിരുത്തുന്നത്

താങ്ക് യൂ. ഇന്ത്യൻ ഫുട്ബോളിൽ നല്ല മാറ്റങ്ങളാണ് സംഭവിക്കുന്നത്. എന്റെ ആദ്യ സീസൺ മുതൽ കഴിഞ്ഞ സീസൺ വരെയുള്ളതു മാത്രമെടുത്തു താരതമ്യം ചെയ്താലും അതിഗംഭീരമായ വളർച്ചയാണ് ഐഎസ്എലിനുള്ളത്. ലീഗിലെ പോരാട്ടം കടുകട്ടിയായി മാറിക്കൊണ്ടിരിക്കുകയാണ്. എല്ലാ ടീമും പ്ലേഓഫിലെത്തണമെന്ന വാശിയോടെയാണു കളത്തിലെത്തുന്നത്. അതുതന്നെ ഫുട്ബോളർമാരെ സംബന്ധിച്ചിടത്തോളം ഏറെ ഗുണം ചെയ്യുന്ന ഘടകമാണ്. ഇന്ത്യൻ ഫുട്ബോളിനു മൊത്തത്തിലും ഗുണം ചെയ്യും ലീഗിലെ ഈ കിടമത്സരം. 

? ഗോളടിച്ചും ഗോളൊരുക്കിയും കഴിഞ്ഞ രണ്ടു സീസണുകളും തിളങ്ങിയ താരമാണല്ലോ. ആ നിലയ്ക്ക് ഐഎസ്എലിൽ നിന്നും പുറത്തു നിന്നും ഒട്ടേറെ ഓഫറുകളും കിട്ടിയിരിക്കും. ആ ഓഫറുകൾ പരിഗണിക്കാതെ എന്തുകൊണ്ടാണ് കേരള ബ്ലാസ്റ്റേഴ്സ് തിരഞ്ഞെടുത്തത്? ബ്ലാസ്റ്റേഴ്സിലേക്ക് ആകർഷിച്ച ഘടകം എന്താണ്

എഫ്സി ഗോവ വിടാനുള്ള തീരുമാനമെടുക്കുമ്പോൾ കരിയറിലെ അടുത്ത വർഷങ്ങൾ എവിടെ ചെലവഴിക്കണമെന്ന കാര്യത്തിൽ എന്റെ മനസ്സിൽ ഒരു തരത്തിലുമുള്ള സംശയവും ഉണ്ടായിരുന്നില്ല. കേരള ബ്ലാസ്റ്റേഴ്സിൽ നിന്നു സ്നേഹവും പരിഗണനയും ആദ്യ ദിനം മുതൽതന്നെ എനിക്കു കിട്ടുന്നുണ്ട്. ബ്ലാസ്റ്റേഴ്സ് കുടുംബത്തിന്റെ ഭാഗമായതിൽ ഏറെ സന്തോഷവുമുണ്ട്. കേരളത്തിലെ ആരാധകരൊരു അതിശയം തന്നെയാണ്. ബ്ലാസ്റ്റേഴ്സിനു വേണ്ടി അവർ സൃഷ്ടിക്കുന്ന അന്തരീക്ഷവും അവിശ്വസനീയമാണ്. അവർക്കു മുന്നിൽ കളിക്കാനിറങ്ങാൻ ഏതൊരു ഫുട്ബോളറും ആഗ്രഹിക്കും. ഞാനീ ക്ലബ്ബിലേക്കു വരാൻ ഇടയാക്കിയ വലിയൊരു ഘടകവും ആരാധകർ തന്നെ. 

? ലോക ഫുട്ബോളിനെ പിന്തുടരുന്ന മലയാളി ആരാധകർക്ക് ഏറെ സുപരിചിതമായ ടീമാണ് മൊറോക്കോ. കഴി‍ഞ്ഞ ലോകകപ്പിലെ മൊറോക്കോയുടെ പ്രകടനം ഇവിടെയും ആരാധകരെ സൃഷ്ടിച്ചിട്ടുണ്ട്. പ്രത്യേകിച്ചും അവരുടെ പോരാട്ടവീര്യവും ടീം ഗെയിമും. മൊറോക്കോ ടീമിലെ അംഗമായി വലിയൊരു വിജയം ആഘോഷിച്ചിട്ടുള്ള ആളാണു താങ്കൾ. എങ്ങനെയായിരുന്നു  ഫുട്ബോളിലേക്കുള്ള നോവയുടെ കടന്നുവരവ്? മൊറോക്കൻ ഫുട്ബോൾ കരിയറിൽ എങ്ങനെയുള്ള സ്വാധീനമാണുണ്ടാക്കിയത്

മൊറോക്കൻ നഗരമായ കാസബ്ലാങ്കയിലെ തെരുവുകളിൽ പന്തു തട്ടിയാണു ഞാൻ ഫുട്ബോളിലേക്കു കടന്നുവന്നത്. ഫുട്ബോളിനോടുള്ള എന്റെ പ്രണയത്തിന്റെ തുടക്കവും ആ നാടുമായി അഭേദ്യമായി ബന്ധപ്പെട്ടിരിക്കുന്നു. ഉയർച്ചയും താഴ്ചയും കടന്നുവന്ന ഒന്നാണ് എന്റെ കരിയർ. ആ തെരുവുകളും കയറ്റിറക്കങ്ങൾ നിറഞ്ഞ അനുഭവങ്ങളുമാണ് ഇന്നു നിങ്ങൾ കാണുന്ന ഫുട്ബോളറായി എന്നെ മാറ്റിയത്. 

? ബ്ലാസ്റ്റേഴ്സിന്റെ പുതിയ പരിശീലകൻ മികേൽ സ്റ്റോറെയ്ക്കൊപ്പം താങ്കൾ പരിശീലനം തുടങ്ങിക്കഴി‍ഞ്ഞല്ലോ. ലീഗിലെ മികച്ച കോച്ചുമാരിലൊരാളായ മനോലോ മാർക്കേസിനൊപ്പമായിരുന്നു കഴിഞ്ഞ സീസണിൽ‍ താങ്കൾ. എങ്ങനെ വിലയിരുത്തുന്നു സ്റ്റോറെ എന്ന കോച്ചിന്. സ്റ്റോറെയും മനോലോയും തമ്മിൽ എന്തെങ്കിലും സാമ്യമോ വ്യത്യാസമോ പറയാനുണ്ടോ

പരിചയസമ്പത്തേറെയുള്ള പരിശീലകനാണു മികേൽ സ്റ്റോറെ. ചെറിയ കാര്യങ്ങളിൽപ്പോലും ഏറെ ശ്രദ്ധ നൽകുന്ന പരിശീലകനാണ് അദ്ദേഹം. ആ ശൈലിയെക്കുറിച്ച് ഇപ്പോൾ കൂടുതൽ പറയാനാകില്ല. കാരണം ഞാൻ ടീമിൽ ചേർന്നിട്ട് ദിവസങ്ങൾ മാത്രമേയായിട്ടുള്ളൂ. ഇതുവരെ കണ്ടതുവച്ചു മികേലും എന്റെ പഴയ കോച്ച് മനേലോ മാർകേസും തമ്മിൽ സാമ്യങ്ങളാണേറെയും. 

? സ്വന്തം മൈതാനത്തു സ്വന്തം കാണികൾക്കു മുന്നിൽ കളിക്കുന്നതു സുഖകരമായ അനുഭവമാണെന്നു താങ്കൾ ഒരിക്കൽ പറഞ്ഞിട്ടുണ്ട്. ഗോവയിൽ താങ്കളുടെ വിജയത്തിനു പിന്നിലും കാണികളുടെ പിന്തുണയാണെന്നു വ്യക്തമാക്കിയിരുന്നു. ഐഎസ്എലിൽ ഏറ്റവും വലിയ ആരാധകസംഘമുള്ള ടീമാണു ബ്ലാസ്റ്റേഴ്സ്. അത്തരമൊരു ക്ലബ്ബിന്റെ ജഴ്സിയണിഞ്ഞു കൊച്ചി പോലൊരു മൈതാനത്തു കളിക്കുന്ന കാര്യം ആലോചിക്കുമ്പോൾ എന്താണു മനസ്സിൽ

? കേരള ബ്ലാസ്റ്റേഴ്സിൽ അഡ്രിയൻ ലൂണയ്ക്കൊപ്പമുള്ള താങ്കളുടെ വരവിനെക്കുറിച്ച് ആരാധകർക്ക് കുറച്ചൊന്നുമല്ല പ്രതീക്ഷകൾ. ലൂണ–നോവ കൂട്ടുകെട്ടിനെ കളത്തിൽ കാണാൻ അക്ഷമയോടെയാണ് അവരുടെ കാത്തിരിപ്പ്. പുതിയ പങ്കാളിക്കൊപ്പം കളത്തിലിറങ്ങുന്നതുമായി ബന്ധപ്പെട്ട് എന്താണു താങ്കളുടെ പ്രതീക്ഷകൾ

അഡ്രിയൻ ലൂണ അതിശയിപ്പിക്കുന്നൊരു ഫുട്ബോളറാണ്. ലൂണയ്ക്കൊപ്പം കളത്തിലിറങ്ങുക എന്നത് എനിക്ക് ഏറെ ആവേശമുണ്ടാക്കുന്ന ഒന്നാണ്. അദ്ദേഹത്തോടൊപ്പം ആവേശത്തോടെ ഞാൻ പ്രയത്നിക്കും. ബ്ലാസ്റ്റേഴ്സിന്റെ വിജയത്തിനു സഹായിക്കും.