മുടി മുതൽ രക്തം വരെയെടുത്ത് ഫോഗട്ട്; ‌കുടിച്ച വെള്ളവും ‘ചതിച്ചു’; എന്നിട്ടും 100 ഗ്രാം കുറഞ്ഞില്ലേ? എന്താണ് സംഭവിച്ചത്?

ഇത്തവണത്തെ പാരിസ് ഒളിംപിക്സിൽ ഓരോ മത്സരയിനത്തിലും ഒന്ന്, രണ്ട് സ്ഥാനക്കാര്‍ക്കു ലഭിക്കുന്ന സ്വർണ, വെള്ളി മെഡലുകൾക്ക് ഓരോന്നിനും 412 ഗ്രാം വീതം ആണ് ഭാരം. എന്നാൽ വെറും 100 ഗ്രാം ഭാരത്തിന്റെ പേരിലാണ് ഇന്ത്യയ്ക്ക് ഉറപ്പായിരുന്ന ഒരു മെഡൽ നഷ്ടമായിരിക്കുന്നത്. 50 കിലോഗ്രാം ഫ്രീസ്റ്റൈൽ ഗുസ്തിയില്‍ ഇന്ത്യയുടെ വിനേഷ് ഫോഗട്ട് അയോഗ്യയാക്കപ്പെട്ടത്, അനുവദിക്കപ്പെട്ടതിനേക്കാളും 100 ഗ്രാം ശരീരഭാരം ഉണ്ടായതിന്റെ പേരിലാണ്. 140 കോടി ജനങ്ങളുടെ സ്വപ്നങ്ങൾ തകർക്കാൻ തക്ക ശേഷിയുള്ളതാണോ ഗുസ്തിയിലെ ഈ ‘100 ഗ്രാം’? എന്താണ് യഥാർഥത്തിൽ വിനേഷ് ഫോഗട്ടിന് സംഭവിച്ചത്? 2012ൽ കേരള റെസ്‌ലിങ് ടീമിന്റെ ക്യാപ്റ്റനും ഇപ്പോൾ കോട്ടയം അരുവിത്തുറ സെന്റ് ജോർജ് കോളജിലെ സ്പോർട്സ് ഡയറക്ടറുമായ ഡോ. വിയാനി ചാർലി വിശദമാക്കുന്നു. 

∙ കഠിനാധ്വാനത്തിനൊടുവിൽ...

50, 53, 57, 62, 68, 76 കിലോഗ്രാം എന്നിങ്ങനെയാണ് ഒളിംപിക്സിൽ വനിതകളുടെ ഗുസ്തി മത്സരത്തിലെ വിവിധ ഭാരവിഭാഗങ്ങൾ. ഇതിൽ 50 കിലോഗ്രാമിലാണു വിനേഷ് ഫോഗട്ട് മത്സരിച്ചിരുന്നത്. നേരത്തേ 53 കിലോഗ്രാമിൽ മത്സരിച്ചിരുന്ന താരമായിരുന്നു വിനേഷ്. പിന്നീടാണു ഭാരം കുറച്ച് 50 കിലോഗ്രാം വിഭാഗത്തിലേക്ക് എത്തിയത്. ഭാര പരിശോധന ഓരോ ഗുസ്തി മത്സരത്തിലും നിർണായകമാണ്. രാജ്യാന്തര തലത്തിലെ പുതിയ നിയമം അനുസരിച്ച് മത്സര ദിവസങ്ങളിൽ അനുവദനീയമായ ഭാരം നിലനിർത്തണം. ഓരോ ദിവസവും പരിശോധനയുമുണ്ടാകും.

സെമി ഫൈനലിൽ വിനേഷ് ക്യൂബയുടെ യുസ്നെയ്‌ലിസ് ഗുസ്മൻ ലോപസിനെ മലർത്തിയടിച്ചത് 5–0ത്തിനാണ്. അതിനു മുന്നോടിയായി നടന്ന മത്സരത്തിൽ വിനേഷ് തോൽപിച്ചത് നിലവിലെ ഒളിംപിക്സ് സ്വർണമെഡൽ ജേതാവ് യുയി സുസാക്കിയെ ആയിരുന്നു. വൻതാരങ്ങളെ ഒന്നിനു പിറകെ ഒന്നായി കീഴടക്കിയായിരുന്നു വിജയമെങ്കിലും അത് വിനേഷിന്റെ ശാരീരികക്ഷമതയിൽ ക്ഷീണമുണ്ടാക്കിയേക്കാം. അതിനാൽത്തന്നെ ഭക്ഷണ ക്രമീകരണത്തിൽ ഉൾപ്പെടെ മാറ്റവും വരുത്തിയിട്ടുണ്ടാകാം.

പ്രീക്വാർട്ടർ, ക്വാർട്ടർ, സെമി എന്നിങ്ങനെ 3 മത്സരങ്ങൾ ഒരേ ദിവസം പൂർത്തീകരിച്ച വിനേഷിന് മത്സരശേഷം ഫുഡ് സപ്ലിമെന്റുകൾ കഴിക്കേണ്ടി വരും. അത്യധികം കഠിനാധ്വാനം ചെയ്യുന്നതിനാൽ ഇത് ഒഴിവാക്കാനുമാകില്ല. പക്ഷേ ഇങ്ങനെ കഴിക്കുന്ന ഭക്ഷണം നമ്മുടെ ശരീരഭാരം വർധിപ്പിക്കും. കൃത്യം 50 കിലോഗ്രാം ഭാരം കാത്തു സൂക്ഷിക്കുന്ന വിനേഷിനെപ്പോലയുള്ളവർക്ക് ഇത്തരത്തിൽ ഭക്ഷണം കഴിക്കുമ്പോൾ ഭാരം വർധിക്കാനുള്ള സാഹചര്യമുണ്ട്.

∙ ഓരോ ഗ്രാമും വിലപ്പെട്ടത്

കഴിഞ്ഞ ദിവസത്തെ മത്സരത്തിനു മുന്നോടിയായുള്ള ഭാരപരിശോധനയിൽ വിനേഷ് യോഗ്യത നേടിയതാണ്. ഓഗസ്റ്റ് ഏഴിനു നടന്ന പരിശോധനയിലാണ് അയോഗ്യയാക്കപ്പെട്ടത്. നമ്മൾ കഴിക്കുന്ന ഭക്ഷണത്തിന്റെ ഭാരം നല്ല വർക്കൗട്ട് ചെയ്തു മാത്രമേ കുറയ്ക്കാൻ സാധിക്കൂ. വിനേഷ് ഇതിനു ശ്രമിച്ചിരുന്നെന്നാണു പാരിസിൽ നിന്നുള്ള വാർത്തകളിൽനിന്നു മനസ്സിലാക്കുന്നത്. സെമിയിലെ വിജയത്തിനു പിന്നാലെ ജോഗിങ്ങും സ്കിപ്പിങ്ങും സൈക്ലിങ്ങും മാത്രമല്ല അതികഠിനമായ വ്യായാമങ്ങളും വിനേഷ് നടത്തിയിരുന്നുവെന്നാണ് വിവരം. 

‘ഭക്ഷണം കഴിച്ചത് ഛർദിച്ചു കളഞ്ഞാൽപ്പോരേ, ഭാരം കുറയില്ലേ’ എന്ന് ചിലരെങ്കിലും ഈ ഘട്ടത്തിൽ സംശയമുന്നയിക്കുന്നുണ്ട്. എന്നാൽ അത്ര എളുപ്പത്തിലൊന്നും ഭാരം കുറയ്ക്കൽ നടക്കില്ലെന്നതാണ് യാഥാർഥ്യം. ഭാരം വ്യായാമം ചെയ്ത് ‘എരിച്ചു’ കളയുകതന്നെ വേണം. കുടിക്കുന്ന വെള്ളം പോലും ഭാരത്തിൽ നിർണായക ഘടകമാകുന്ന അവസ്ഥയിലാണ് ഗുസ്തി താരം നിൽക്കുന്നതെന്നോർക്കണം. 50 കിലോഗ്രാമിന് ഒരൽപം കൂടുതലോ കുറവോ എന്ന അവസ്ഥയിലായിരുന്നു വിനേഷിന്റെ ഭാരമെന്നാണറിയുന്നത്. അത്തരത്തില്‍ ഭാരം തുലാസിലേതു പോലെ നിൽക്കുമ്പോൾ ഓരോ ഗ്രാമും ‘വിലപ്പെട്ടതായി’ മാറുകയാണ്– ഡോ. വിയാനി ചാർലി വ്യക്തമാക്കുന്നു.

∙ ഈ നിയമങ്ങൾ പാലിക്കേണ്ടത് നിർബന്ധം

രാജ്യാന്തര തലത്തിലെ ഗുസ്തി മത്സരങ്ങൾ നടത്തുന്നതെല്ലാം യുണൈറ്റഡ് വേൾഡ് റെസ്‌ലിങ്ങിന്റെ (United World Wrestling– UWW) അംഗീകാരത്തോടെയാണ്. സ്വിറ്റ്‌സർലൻഡ് ആസ്ഥാനമായുള്ള യുഡബ്ല്യുഡബ്ല്യു ഭാരപരിശോധനയിൽ  അനുശാസിക്കുന്ന ചില കാര്യങ്ങളുണ്ട്. മൂന്നാം അധ്യായത്തിലെ ആർട്ടിക്കിൾ–11ൽ പറയുന്ന ആ നിബന്ധനകൾ ഇവയാണ്:

∙ ഓരോ വെയ്റ്റ് കാറ്റഗറിയിലും മത്സരം നടക്കുന്ന അന്നു രാവിലെയായിരിക്കും ഭാരപരിശോധന നടത്തുക.  ഇതോടൊപ്പം തന്നെയാണ് വൈദ്യ പരിശോധനയും. രണ്ടും 30 മിനിറ്റ് സമയമെടുത്താണ് പൂർത്തിയാക്കുക. ഓരോന്നിനും ഏകദേശം 15 മിനിറ്റ് വീതം. 

∙ രാവിലെത്തന്നെ ഗുസ്തി ലൈസൻസും അക്രഡിറ്റേഷൻ വിവരങ്ങളുമായി ആദ്യം മെഡിക്കൽ പരിശോധനയ്ക്കെത്തണം. ഇത് പൂർത്തിയായാൽ മാത്രമേ ഭാരം പരിശോധിക്കുകയുള്ളൂ.