പ്രീതി, ജൂഹി, തപ്സി, ഷാറുഖ്...: ഇനി പൃഥ്വി, ആസിഫ്: ഒഴുകുക കോടികളുടെ നിക്ഷേപം; ലാഭം മാത്രമല്ല താരങ്ങളുടെ ലക്ഷ്യം

ഒരു ഫുട്ബോൾ മൈതാനം, മത്സരം പുരോഗമിക്കുന്നതിനിടെ ഇരു ടീമുകളുടെയും ആരാധകർ ആവേശത്തോടെ ആർപ്പുവിളിക്കുന്നു. ഗാലറിയുടെ വിഐപി ബോക്സിൽ ടീം ഉടമകളായ പൃഥ്വിരാജും ആസിഫ് അലിയും ഇരിക്കുന്നു. ക്യാമറക്കണ്ണുകൾ ഇവർക്ക് നേരെ തിരിയുമ്പോൾ ചിരിയോടെ ഇരുവരും കൈവീശുന്നു, കാണികൾ കൂടുതൽ ആവേശത്തിലാകുന്നു... – ഏതെങ്കിലും സ്പോർട്സ് സിനിമയ്ക്കു വേണ്ടിയുള്ള തിരക്കഥയിലെ സീൻ അല്ല ഇത്. ഒരു മാസത്തിനിപ്പുറം കേരളത്തിൽ യഥാർഥത്തിൽ അരങ്ങേറാൻ പോകുന്ന ഒരു രംഗത്തിന്റെ ഏകദേശ വിവരണം മാത്രമാണ്.

അതെ, കേരളത്തിന്റെ ഹൃദയത്തുടിപ്പായ കാൽപ്പന്തുകളിയെയും അങ്ങനെ സിനിമയിൽ എടുത്തിരിക്കുകയാണ്. സംസ്ഥാനത്തെ ആദ്യത്തെ പ്രഫഷനൽ ഫ്രാഞ്ചൈസി ഫുട്ബോൾ ലീഗായ ‘സൂപ്പർ ലീഗ് കേരള’യ്ക്കു (എസ്‌എൽകെ) ‘സെലിബ്രറ്റി’ സ്റ്റാറ്റസ് നൽകിയാണ് പൃഥ്വിരാജും ആസിഫ് അലിയും ലീഗിന്റെ ഭാഗമാകുന്നത്. 2024 സെപ്റ്റംബർ ആദ്യവാരം കിക്കോഫ് നടത്താൻ ഒരുങ്ങുന്ന ലീഗിലേക്കു ചലച്ചിത്ര രംഗത്തു നിന്നു കോടികളുടെ നിക്ഷേപമാണ് ഒഴുകുന്നത്. നടനും സംവിധായകനും നിർമാതാവുമായ പൃഥ്വിരാജാണു ലീഗിലെ ആദ്യ ‘താര’ നിക്ഷേപകൻ. ‘ഫോഴ്സ കൊച്ചി എഫ്സി’യുടെ സഹ ഉടമ ആയാണ് അദ്ദേഹം മലയാള ചലച്ചിത്ര ലോകത്തിനു മുന്നിൽ പുതിയ നിക്ഷേപ സാധ്യത തുറന്നത്.

അതിനു പിന്നാലെ, ചലച്ചിത്ര നിർമാതാവും വിതരണക്കാരനുമായ ലിസ്റ്റിൻ സ്റ്റീഫൻ ‘തൃശൂർ റോർ’ ടീമിന്റെ ഭൂരിപക്ഷ ഓഹരി പങ്കാളിയായി. ‌‌‌എസ്എൽകെ ടീമായ കണ്ണൂർ വാരിയേഴ്‌സിലാണ് ആസിഫ് അലി നിക്ഷേപം നടത്തിയത്. കേരളത്തിലെ ആറു നഗരങ്ങൾ കേന്ദ്രീകരിച്ച് ആറു പ്രഫഷനൽ ക്ലബ്ബുകളുമായാണ് ലീഗിന്റെ തുടക്കം. തിരുവനന്തപുരം, എറണാകുളം, തൃശൂർ, കോഴിക്കോട്, കണ്ണൂർ, മലപ്പുറം ജില്ലകൾ കേന്ദ്രീകരിച്ചു രൂപീകരിച്ച 6 ക്ലബ്ബുകളാണ് ആദ്യ ലീഗിൽ കരുത്തു പരീക്ഷിക്കുക. ഐഎസ്എൽ മാതൃകയിലാകും ലീഗ് മത്സരങ്ങൾ.

മോളിവുഡ് ചലച്ചിത്ര മേഖലയിൽ നിന്നു കൂടുതൽ പ്രമുഖർ എസ്എൽകെ ടീമുകളിൽ നിക്ഷേപത്തിന് ഒരുങ്ങുന്നതായാണു സൂചന. ചലച്ചിത്ര താരങ്ങളുടെയും കോർപറേറ്റുകളുടെയും വരവ് കേരളത്തിലെ കായിക വികസനത്തിലും കൂടുതൽ കാണികളെ ആകർഷിക്കാനും സഹായിക്കുമെന്നാണു വിലയിരുത്തൽ. മാത്രമല്ല, ഇന്നു ലോകത്തിലെ തന്നെ ഏറ്റവും ലാഭകരമായ നിക്ഷേപങ്ങളിൽ ഒന്നായ സ്പോർട്സ് ബിസിനസിൽ പണമെറിഞ്ഞ് പണം കൊയ്യാൻ താരങ്ങൾക്കും താൽപര്യമേറെയാണ്. ഹോളിവുഡ്, ബോളിവുഡ് താരങ്ങൾ വർഷങ്ങൾക്കു മുൻപേ ഇതു തുടങ്ങിയിരുന്നു. അതേ വഴിയിൽ ഒരു കൈ നോക്കാനാണ് മോളിവുഡ് സ്റ്റാറുകളുടെയും നീക്കം.

ഇവരുടെ താരമൂല്യത്തിലൂടെ ടീമുകൾക്ക് വരുന്ന ‘ഗ്ലാമർ’ പരിവേഷമാണ് ഫ്രാഞ്ചൈസികളുടെ ലക്ഷ്യം. പൃഥ്വിരാജിന്റെ നിക്ഷേപത്തിലൂടെ മാത്രം അതുവരെ സൂപ്പർ ലീഗ് കേരളയെക്കുറിച്ച് അറിയാതിരുന്നവർ പോലും ലീഗിനെപ്പറ്റി ചർച്ച ചെയ്ത് തുടങ്ങി. അതു തന്നെയാണ് അവരുടെ ലക്ഷ്യവും. എസ്എൽകെയുടെ പ്രാരംഭ ചർച്ച തുടങ്ങിയപ്പോൾ തന്നെ ലീഗിലേക്ക് സെലിബ്രറ്റികളെ കൊണ്ടുവരുന്ന കാര്യം ചർച്ച ചെയ്തിരുന്നതായി എസ്എൽകെ സിഇഒ മാത്യു ജോസഫ് പറയുന്നു. ‘സിനിമ പ്ലസ് സ്പോർട്സ്’ എന്ന ‘ഗ്ലാമർ’ ഫോർമുല തന്നെയാണ് ഇവിടെ പ്രയോഗിച്ചത്.

ഉദാഹരണമായി ലോകത്തിലെതന്നെ ഏറ്റവും വലിയ ക്രിക്കറ്റ് ലീഗായ ഇന്ത്യൻ പ്രീമിയർ ലീഗ് (ഐപിഎൽ) ഫ്രാഞ്ചൈസിയായ കൊൽക്കത്ത നൈറ്റ് റൈഡേഴ്സിന്റെ ഉടമ ബോളിവുഡ് താരം ഷാറുഖ് ഖാന്റെ കാര്യവും അദ്ദേഹം ചൂണ്ടിക്കാട്ടുന്നു. ഷാറുഖിന്റെ സാന്നിധ്യത്തിലൂടെ കൊൽക്കത്ത ടീമിനു കിട്ടുന്ന പിന്തുണ ചില്ലറയല്ല. മൂന്നു തവണ ഐപിഎൽ കിരീടം നേടി ടീം അതിനു പ്രത്യുപകാരം ചെയ്യുകയും ചെയ്തു. ഇതുവരെ കിരീടം നേടിയിട്ടില്ലെങ്കിലും നടി പ്രീതി സിന്റയുടെ ഉടമസ്ഥതയിലുള്ള പഞ്ചാബ് ടീമിനും ആരാധകർ ഏറെയാണ്.

∙ സ്പോർട്സ് ബിസിനസിലെ സിനിമാക്കാർ

ലോകത്തിലെ തന്നെ ഏറ്റവും വലിയ രണ്ട് എന്റർടെയ്‌ൻമെന്റ് ബിസിനസുകളാണ് സ്പോർട്സും സിനിമയും. അപ്പോൾ ഇതു രണ്ടും ഒരുമിച്ചാലോ? ആ മാരക കോംബിനേഷനാണ് ഇപ്പോൾ ലോകമൊട്ടാകെ പ്രയോഗിക്കുന്നത്. ഒരു സ്പോർട്സ് താരത്തിന്റെയെങ്കിലും ബയോപിക് സിനിമ ഇറങ്ങാത്ത ഒരു വർഷം പോലും ഇപ്പോൾ കടന്നുപോകാറില്ല. അഭിനയത്തിൽ ഒരുകൈ നോക്കുന്ന കായിക താരങ്ങളും കുറവല്ല; കളിക്കളത്തിലേക്കാൾ കൂടുതൽ പ്രശസ്തി ബിഗ് സ്ക്രീനിൽനിന്ന് അവർ പ്രതീക്ഷിക്കുന്നു. സൂപ്പർ താരങ്ങൾ അല്ലാതിരുന്ന പല കളിക്കാർക്കും പലപ്പോഴും അതു ലഭിക്കാറുമുണ്ട്.

പരസ്യച്ചിത്രങ്ങളിൽ വരെ അഭിനയിച്ച് ശ്രദ്ധപിടിച്ചുപറ്റുന്നവരുമുണ്ട്. ഇതേകാര്യം മറിച്ചു പ്രയോഗിക്കുകയാണ് ഇപ്പോൾ സിനിമാ താരങ്ങളും. സിനിമകളിലൂടെ കിട്ടിയ പ്രശസ്തിയും താരമൂല്യവും സ്പോർട്സിൽ ഇൻവെസ്റ്റ് ചെയ്ത് ലാഭം കൊയ്യുകയാണ് അവരുടെ ലക്ഷ്യം. 2008ൽ ആരംഭിച്ച ഐപിഎലിലൂടെ ഷാറുഖ് ഖാനും പ്രീതി സിന്റയുമൊക്കെ തന്നെയാണ് ഫ്രാഞ്ചൈസി ലീഗിൽ പണം നിക്ഷേപിച്ച് ലാഭം നേടിയവരിലെ തുടക്കക്കാർ. ഇന്ത്യയിൽ ഏറ്റവും പിന്തുണയുള്ള കായികയിനം എന്ന നിലയിൽ ക്രിക്കറ്റിൽ നിക്ഷേപിക്കുന്നതിനു തന്നെയാണ് താരങ്ങൾക്ക് കൂടുതൽ താൽപര്യം. അതുവഴിയുള്ള ലാഭവും കൂടുതലാണ്.

ഷാറുഖ് ഖാനും ജൂഹി ചൗളയും ചേർന്ന് ഏകദേശം 623 കോടി രൂപയ്ക്കാണ് 2008ൽ കൊൽക്കത്ത ടീമിനെ സ്വന്തമാക്കിയത്. ഷാറുഖ് ഖാന്റെ ഏറ്റവും വലിയ നിക്ഷേപങ്ങളിലൊന്നാണ് ഈ ഐപിഎൽ ടീം. തന്റെ നിർമാണ കമ്പനിയായ റെഡ് ചില്ലീസ് എന്റർടെയ്‌മെന്റിന്റെ പേരിലാണ് താരം ടീമിനെ സ്വന്തമാക്കിയത്. പ്രതിവർഷം 300 കോടിയോളം രൂപയാണ് കൊൽക്കത്ത ടീമിന്റെ വരുമാനം. ഒരു സിനിമയ്ക്ക് 150 കോടി മുതൽ 250 കോടി വരെയാണ് ഷാറുഖ് ഖാൻ വാങ്ങുന്നത്. കഴിഞ്ഞ വർഷമിറങ്ങിയ ‘പഠാൻ’ സിനിമയുടെ 60% ലാഭവിഹിതമാണ് പ്രതിഫലത്തിന് അദ്ദേഹം വാങ്ങിയത്, അത് ഏകദേശം 200 കോടിയോളമാണ്. വർഷത്തിൽ പലപ്പോഴും ഒരു സിനിമ മാത്രം ചെയ്യുന്ന ഷാറുഖ് ഖാനെ പോലുള്ളവർക്ക് കൂടുതൽ വരുമാനം എവിടെനിന്നാണെന്ന് ഈ കണക്കുകളിൽനിന്നു തന്നെ വ്യക്തം.

ഫുട്ബോളിൽ നിക്ഷേപമുള്ള സിനിമാ താരങ്ങളും കുറവല്ല. ബോളിവുഡ് താരങ്ങളിൽ രൺബീർ കപൂർ, അഭിഷേക് ബച്ചൻ, ജോൺ ഏബ്രഹാം എന്നിവർ ഇന്ത്യൻ സൂപ്പർ ലീഗിൽ (ഐഎസ്എൽ) ടീം ഉടമകളാണ്. ഐഎസ്‍‌എലിലെ ശക്തരായ ടീമുകളിലൊന്നായ മുംബെ സിറ്റി എഫ്സിയുടെ സഹഉടമയാണ് രൺബീർ കപൂർ. രണ്ടു തവണ മുംബൈ, ഐഎസ്എൽ ചാംപ്യന്മാരായി. ചെന്നൈയിൻ എഫ്സിയുടെ ഉടമയാണ് അഭിഷേക് ബച്ചൻ. ഇന്ത്യൻ ക്രിക്കറ്റ് ടീം മുൻ ക്യാപ്റ്റനും ഐപിഎലിൽ ചെന്നൈ സൂപ്പർ കിങ്സ് താരവുമായ എം.എസ്. ധോണി, വിധാ ദാനി എന്നിവരാണ് ടീമിന്റെ സഹഉടമകൾ.