സച്ചിന്റെ അവസാന ടെസ്റ്റിൽ 10 വിക്കറ്റ് നേട്ടം, മാൻ ഓഫ് ദ് മാച്ച്, അതോടെ ടീമിനു പുറത്ത്! വിരമിക്കൽ വിവാദങ്ങൾക്കിടെ ഒരു ചോദ്യം, പ്രഗ്യാൻ ഓജ എവിടെയാണ്?

എന്റെ കരിയറിലെ ഏറ്റവും മികച്ച പ്രകടനം എനിക്ക് ലഭിച്ച ആ അവസാന അവസരത്തിലാണെന്ന് എനിക്കറിയാം. പക്ഷേ, ടീമിലേക്കുള്ള സിലക്‌ഷൻ ഒരിക്കലും നമ്മുടെ കൈകളിലല്ല എന്നതല്ലേ സത്യം. അവസരം പ്രതീക്ഷിച്ചിട്ട് ലഭിക്കാത്ത സാഹചര്യം വരുമ്പോൾ അതിനെ എങ്ങനെ നേരിടണമെന്നു പോലും നമുക്ക് ഒരുപക്ഷേ പിടികിട്ടില്ല. കായിക താരമെന്ന നിലയിൽ, നമ്മുടെ കയ്യിൽ നിൽക്കുന്ന കാര്യങ്ങളിലേ നമുക്ക് എന്തെങ്കിലും ചെയ്യാനാകൂ. ഇവിടെ എനിക്ക് ചെയ്യാനാകുന്നത് നന്നായി ഒരുങ്ങുക, ടീമിനായി വിക്കറ്റെടുക്കുക എന്നതാണ്. അതു ഞാൻ വൃത്തിയായി ചെയ്തിട്ടുമുണ്ട്.

സ്പിൻ ബോളിങ്ങിലെ സൂപ്പർതാരങ്ങളായ അനിൽ കുംബ്ലെ, ഹർഭജൻ സിങ് എന്നിവർക്കൊപ്പം ഒന്നിച്ചു കളിക്കാൻ അവസരം ലഭിച്ചിരുന്നല്ലോ

∙ ഞാൻ ദേശീയ ടീമിലെത്തുന്ന സമയത്ത് അനിൽ കുംബ്ലെയായിരുന്നു ക്യാപ്റ്റൻ. ടീമിലെ മുതിർന്ന അംഗമായി ഹർഭജൻ സിങ്ങുമുണ്ടായിരുന്നു. അവർക്കൊപ്പം ചെലവഴിച്ച നാളുകളിൽ ഒരുപാടു കാര്യങ്ങൾ പഠിക്കാൻ സാധിച്ചു. വ്യത്യസ്ത സാഹര്യങ്ങളിൽ എങ്ങനെ പന്തെറിയണമെന്നും വ്യത്യസ്ത തരം പന്തുകൾ എങ്ങനെ ഫലപ്രദമായി വിനിയോഗിക്കാമെന്നതും ലോകോത്തര നിലവാരമുള്ള താരങ്ങളെ എങ്ങനെ കൈകാര്യം ചെയ്യണമെന്നുമെല്ലാം ഇവരിൽ നിന്നെല്ലാമാണ് ഞാൻ പഠിച്ചത്. ഇന്ത്യയ്ക്കായി ആയിരത്തിലധികം വിക്കറ്റുകൾ നേടിയതിന്റെ പരിചയസമ്പത്ത് ഇവർക്കുണ്ടെന്ന് ഓർക്കണം.

എന്നെ സംബന്ധിച്ച് പിഎച്ച്ഡിക്കു ചേർന്നതുപോലെയായിരുന്നു ടീമിലെത്തിയപ്പോൾ. എല്ലാവരും ഇവർക്കൊപ്പം അൽപം സമയം ചെലവഴിക്കാൻ ആഗ്രഹിച്ചിട്ടുണ്ടാകും. കളത്തിലും പുറത്തും എത്രയോ സമയം ഇവർക്കൊപ്പം ചെലവഴിക്കാൻ എനിക്കു സാധിച്ചു. ഒരു ബോളറെന്ന നിലയിൽ പണമൊന്നും നൽകാതെ പിഎച്ച്ഡി നേടിയ അനുഭവമായിരുന്നു ഇവർക്കൊപ്പം പഠിച്ചു മുന്നേറിയ കാലം.

ഇന്ത്യൻ ടീമിൽ അശ്വിന്റെ ആദ്യകാല സ്പിൻ പാർട്ണർമാരിൽ ഒരാളായിരുന്നു താങ്കൾ. അശ്വിനെ എങ്ങനെ വിലയിരുത്തുന്നു?

∙ ഒരു ബോളർ പോലും അല്ലാതെ കരിയർ തുടങ്ങിയ ആളാണ് അശ്വിൻ. എന്നിട്ടും ഇന്ത്യൻ ടീമിൽ വന്ന് ടെസ്റ്റിൽ മാത്രം അഞ്ഞൂറിലധികം വിക്കറ്റെടുക്കാൻ സാധിച്ചത് ചെറിയ നേട്ടമല്ല. അശ്വിൻ ക്രിക്കറ്റിലേക്കു വരുമ്പോൾ ഒരു ബാറ്ററായിരുന്നു എന്ന് നമുക്കറിയാം. പിന്നീട് വിസ്മയകരമായ വിധത്തിലാണ് ഇന്ത്യ കണ്ട ഏറ്റവും  മികച്ച ഓഫ് സ്പിന്നർമാരിൽ ഒരാളായി അദ്ദേഹം വളർന്നത്. ഇത് വലിയൊരു നേട്ടം തന്നെയാണ്. കളത്തിൽ ഏറ്റവും ബുദ്ധിപൂർവം നിന്ന താരങ്ങളിലൊരാളാണ് അശ്വിൻ. ഓരോ നിമിഷവും സ്വയം മെച്ചപ്പെടാനും കഠിനാധ്വാനം ചെയ്യാനും അദ്ദേഹം ശ്രമിച്ചു. അതിന്റെ ഗുണവും കിട്ടിയെന്നു തന്നെ പറയണം.

അശ്വിന്റെ അപ്രതീക്ഷിത വിരമിക്കൽ പ്രഖ്യാപനം ഇന്ത്യൻ ക്രിക്കറ്റിനെ എങ്ങനെ ബാധിക്കുമെന്നാണ് കരുതുന്നത്?

∙ അശ്വിൻ വിരമിച്ച് കളം വിട്ടാലും ഇന്ത്യൻ ക്രിക്കറ്റ് എന്നും അതേപടി നിൽക്കും. ഇതിനു മുൻപും ഇത്തരം നിർണായക താരങ്ങളുടെ വിരമിക്കൽ ഘട്ടത്തിൽ ഇന്ത്യൻ ക്രിക്കറ്റ് കരുത്തോടെ പിടിച്ചുനിന്നിട്ടില്ലേ. ഇനിയും അതു തുടരും. ഓരോ താരവും ഉണ്ടാകുന്നത് ക്രിക്കറ്റ് നിമിത്തമാണ്. അല്ലാതെ താരങ്ങൾ നിമിത്തമല്ല ക്രിക്കറ്റ് ഉണ്ടായത്. അശ്വിൻ പോയാലും ഇന്ത്യൻ ടീമിൽ മികച്ച സ്പിന്നർമാർ വരും. ഇന്ത്യൻ ക്രിക്കറ്റ് ഇപ്പോഴത്തേതുപോലെ ശക്തമായി മുന്നോട്ടു പോകും. ഒരു വർഷം ഇന്ത്യൻ ക്രിക്കറ്റിന്റെ പ്രകടനം മോശമായേക്കാം. പക്ഷേ, ശക്തമായിത്തന്നെ ടീം തിരിച്ചുവരും. അതാണ് ചരിത്രം. പഴയ താരങ്ങൾ പോകും, പുതിയവർ വരും. പക്ഷേ, നമ്മുടെ ക്രിക്കറ്റ് സംവിധാനം ശക്തമായിരിക്കുന്നിടത്തോളം കാലം ഇതൊന്നും ക്രിക്കറ്റിനെ ബാധിക്കില്ല.

ബിഷൻസിങ് ബേദി, പ്രസന്ന, ചന്ദ്രശേഖർ തുടങ്ങിയവരെല്ലാം ടീമിനായി മികച്ച പ്രകടനം പുറത്തെടുത്തവരാണ്. ഇവർ പോയപ്പോൾ അനിൽ കുംബ്ലെ, ഹർഭജൻ സിങ് തുടങ്ങിയവർ വന്നു. അവർക്കു ശേഷം അശ്വിനും ജഡേജയും വന്നു, മികച്ച പ്രകടനം കാഴ്ചവച്ചു. ഇനിയും പുതിയ ആളുകൾ വരും, ഇന്ത്യൻ ക്രിക്കറ്റ് ആധിപത്യം തുടരും. പുതിയ താരങ്ങള്‍ക്കിടയിൽ കഴിവുള്ളവരുണ്ട്. വാഷിങ്ടൻ സുന്ദർ, അക്ഷർ പട്ടേൽ, കുൽദീപ് യാദവ് തുടങ്ങിയവർ ഇതിനകം ശ്രദ്ധ നേടിയവരാണ്. ആഭ്യന്തര ക്രിക്കറ്റിൽ മാനവ് സുതർ, തനുഷ് കൊട്ടിയൻ തുടങ്ങിയവരുണ്ട്.  ഇപ്പോൾ ഇന്ത്യൻ ടീമിലേക്ക് എത്തുന്ന സ്പിൻ ബോളർമാരെ ശ്രദ്ധിച്ചിട്ടുണ്ടോ? അവരെല്ലാം മികച്ച രീതിയിൽ ബാറ്റു ചെയ്യാനും സാധിക്കുന്നവരാണ്. അതാണ് ക്രിക്കറ്റിൽ വന്നിട്ടുള്ള പ്രധാന മാറ്റം. ഇന്ന് ഇന്ത്യയ്‌ക്കായി കളിക്കാൻ ആഗ്രഹിക്കുന്ന സ്പിൻ ബോളർമാർ, കുറച്ചു ബാറ്റിങ് കൂടി അറിഞ്ഞേ മതിയാകൂ.

രവിചന്ദ്രൻ അശ്വിന്റെ വിരമിക്കൽ പ്രഖ്യാപനം വിവാദങ്ങൾക്കും കാരണമായല്ലോ. അർഹിച്ച യാത്രയയപ്പ് ലഭിച്ചില്ലെന്നാണ് വിമർശനം.

∙ എവിടെനിന്നാണ് ഇത്തരം വിവാദങ്ങളൊക്കെ വരുന്നത് എന്ന് എനിക്കറിയില്ല. വിരമിക്കാനുള്ള തീരുമാനം അശ്വിന്റേതാണ്. ഇത്തരം തീരുമാനങ്ങൾ തികച്ചും വ്യക്തിപരമാണ്. ടീമിലേക്കുള്ള തിരഞ്ഞെടുപ്പ് സിലക്ടർമാരുടെ ചുമതലയാണ്. കളി നിർത്താനുള്ള തീരുമാനം താരത്തിന്റേതാണ്. അശ്വിൻ വിരമിക്കൽ പ്രഖ്യാപിച്ച വാർത്താ സമ്മേളനവും അദ്ദേഹത്തിന്റെ പ്രസ്താവനകളും ഞാൻ കണ്ടിരുന്നു. അതിലൊന്നും അദ്ദേഹത്തിന് എന്തെങ്കിലും വിധത്തിലുള്ള ആശയക്കുഴപ്പം ഉണ്ടായിരുന്നതായി എനിക്കു തോന്നിയിട്ടില്ല. അദ്ദേഹത്തിന് ജീവിതത്തിന്റെ അടുത്ത ഘട്ടത്തിലേക്ക് കടക്കേണ്ടതുണ്ട്. അതുകൊണ്ട് അദ്ദേഹം അത്തരമൊരു തീരുമാനം കൈക്കൊണ്ടു, അതിനെ നാം ബഹുമാനിച്ചേ തീരൂ. അതിൽ വിവാദത്തിന്റെ കാര്യമൊന്നും ഞാൻ കാണുന്നില്ല.

ടൂർണമെന്റിനിടെ വിരമിക്കണോ ടൂർണമെന്റ് കഴിഞ്ഞ് വിരമിക്കണോ എന്നുള്ളതെല്ലാം ആ കളിക്കാരന്റെ തിരഞ്ഞെടുപ്പാണ്. ഇന്ത്യൻ ക്രിക്കറ്റിനായി എത്രയോ മത്സരങ്ങൾ ജയിച്ച ബോളറാണ് അശ്വിൻ. എത്രയോ മത്സരങ്ങളിൽ അദ്ദേഹം ഈ രാജ്യത്തെയും ആരാധകരെയും അഭിമാനപൂരിതരാക്കിയിരിക്കുന്നു. ഈ സാഹചര്യത്തിൽ ഇത്തരം വിവാദങ്ങൾ കുത്തിപ്പൊക്കുന്നത് ഇന്ത്യൻ ക്രിക്കറ്റിനും ആർ.അശ്വിനും ഒട്ടും നല്ലതല്ല. അത് അവരെ അപമാനിക്കുന്നതിനു തുല്യമാണ്.

സൂപ്പർതാരങ്ങൾ വിരമിക്കുമ്പോഴെല്ലാം എന്തുകൊണ്ടാണ് വലിയ വിവാദങ്ങൾ തലപൊക്കുന്നത്? അത് സംവിധാനത്തിന്റെ പോരായ്മയാണോ?

∙ ഇന്ത്യയിൽ ക്രിക്കറ്റ് എന്നത് ഒരു മതമാണ്. ആളുകൾക്ക് ക്രിക്കറ്റിനോടും ക്രിക്കറ്റ് താരങ്ങളോടും അത്രമാത്രം വൈകാരിക അടുപ്പമുണ്ട്. അവർ സ്നേഹിക്കുന്ന താരങ്ങൾ വിരമിക്കുന്ന ഘട്ടത്തിൽ, അതിനെ എങ്ങനെ കൈകാര്യം ചെയ്യണമെന്ന കാര്യത്തിൽ ആശയക്കുഴപ്പം സ്വാഭാവികമാണ്. അവർ അതിന്റെ വ്യത്യസ്ത തലങ്ങൾ പരിശോധിക്കാൻ ശ്രമിക്കും, അതിനെ പല രീതികളിൽ നോക്കിക്കാണാനും ശ്രമിക്കും. അതെല്ലാം ഇന്ത്യയിലെ ക്രിക്കറ്റിന്റെ പ്രത്യേക സാഹചര്യത്തിൽ സ്വാഭാവികമാണ്. ഇന്ത്യൻ ക്രിക്കറ്റിൽ വിടവാങ്ങൽ മത്സരം ലഭിച്ചിരുന്നെങ്കിൽ എന്നു നമുക്കു തോന്നിപ്പോകുന്ന കളിക്കാരുണ്ടാകും.

പക്ഷേ ഒരിക്കൽ അവർ തീരുമാനമെടുത്താൽ കഴിഞ്ഞാൽ, അതിനെ ബഹുമാനിക്കുക, അംഗീകരിക്കുക. എന്താണ് സംഭവിച്ചത് എന്നും, അവരുടെ മനസ്സിലൂടെ കടന്നുപോകുന്നത് എന്താണെന്നും നമുക്കറിയില്ല. അവരുടെ ചിന്തകളും കണക്കുകൂട്ടലുകളും അവർക്കു മാത്രമേ അറിയൂ. അത് മനസ്സിലാക്കാതെ നമ്മൾ അനാവശ്യമായി അഭിപ്രായം പറഞ്ഞിട്ട് എന്താണ് കാര്യം? അവർക്കു കുറച്ചുകൂടി കളിക്കാമായിരുന്നു, വിടവാങ്ങൽ മത്സരം കൊടുക്കാമായിരുന്നു എന്നെല്ലാം നമ്മളാണ് ചിന്തിക്കുന്നത്. അവരുടെ മനസ്സിലെന്താണെന്ന് ആർക്കറിയാം.

താങ്കളുടെ കരിയറും പാതിവഴിയിൽ അവസാനിച്ചതാണ്. അതിൽ നിർഭാഗ്യമുണ്ട് എന്ന് കരുതുന്നുണ്ടോ?

∙ താരതമ്യേന ചെറിയ പ്രായത്തിൽ ഇന്ത്യയ്ക്കായി അവസാന മത്സരം കളിച്ചയാളാണ് ഞാൻ. അതുകൊണ്ട് എനിക്ക് ഭാഗ്യമില്ല എന്നൊന്നും ഞാൻ പറയില്ല. ഇന്ത്യയ്‌ക്കായി കളിക്കാൻ ഭാഗ്യം ലഭിച്ചയാളല്ലേ ഞാൻ? ടീമിനായി വിക്കറ്റുകൾ വീഴ്ത്താനും മാൻ ഓഫ് ദ് മാച്ച് പുരസ്കാരങ്ങൾ നേടാനും എനിക്കു സാധിച്ചു. ഇന്ത്യൻ ക്രിക്കറ്റുമായി ബന്ധപ്പെട്ട് എത്രയോ സുന്ദരമായ ഓർമകൾ എനിക്കുണ്ട്.