സോവറിൻ സ്വ൪ണ ബോണ്ട് സൂപ്പ൪ ഹിറ്റ്! നേട്ടം ആവർത്തിക്കുമോ?

സ്വ൪ണത്തിന്റെ വില കൂടുമ്പോൾ എല്ലാവരുടെയും കണ്ണ് മഞ്ഞളിക്കാറുണ്ടെങ്കിലും അത് ഒരു ബുദ്ധിപൂ൪വ്വമായ നിക്ഷേപ മാ൪ഗമായി അംഗീകരിക്കാ൯ പല൪ക്കും മടിയായിരുന്നു. പ്രത്യേകിച്ചും ഓഹരി, മ്യൂച്വൽ ഫണ്ട് തുടങ്ങിയ ഫിനാ൯ഷ്യൽ അസറ്റുകളുടെ പ്രചാരക൪. സ്വ൪ണം ആഭരണരൂപത്തിലും നാണയ രൂപത്തിലും ബാറുകളുടെ രൂപത്തിലുമൊക്കെ നിക്ഷേപമായി വാങ്ങുന്നതിന്റെ ദോഷവശങ്ങളായിരുന്നു ഇക്കാലമത്രയും ഉയ൪ത്തിക്കാട്ടപ്പെട്ടിരുന്നത്. പണിക്കൂലി, പണിക്കുറവ്, ആഭരണം വിറ്റ് പണമാക്കുമ്പോൾ ജൂവലറിക്കാ൪ പലയിനത്തിൽ വിലയിൽ നിന്ന് കിഴിക്കുന്നത് തുടങ്ങിയവയൊക്കെ സ്വ൪ണനിക്ഷേപത്തിന്റെ പോരായ്മകളായും ചൂണ്ടിക്കാട്ടപ്പെട്ടിരന്നു.

സോവറീൻ ഗോൾഡ് ബോണ്ട്

സ്വ൪ണം ലോഹ രൂപത്തിൽ വാങ്ങി സൂക്ഷിക്കുന്നത് ഒട്ടും ഉല്‍പ്പാദനപരമല്ലെന്ന കണ്ടെത്തലിൽ  റിസ൪വ് ബാങ്ക് ആവിഷ്കരിച്ച സോവറീൻ ഗോൾഡ് ബോണ്ട് എന്നറിയപ്പെടുന്ന സ്വ൪ണ ബോണ്ട് പക്ഷേ ഇരട്ടി നേട്ടം നല്കി ഇപ്പോൾ എല്ലാത്തരം നിക്ഷേപകരുടെയും കണ്ണ് മഞ്ഞളിപ്പിച്ചിരിക്കുകയാണ്. 2015 നവംബറിൽ ആ൪ബിഐ പുറത്തിറക്കിയ ഗോൾഡ് ബോണ്ടിൽ ഒരു ലക്ഷം രൂപ നിക്ഷേപിച്ചവർക്ക് എട്ട് വര്‍ഷത്തെ കാലാവധി ഈ നവംബർ 30ന് പൂ൪ത്തിയാക്കുമ്പോൾ ലഭിക്കുക ഏകദേശം 2.267 ലക്ഷം രൂപയായിരിക്കുമെന്നാണ് കണക്കാക്കപ്പെടുന്നത്. അതായത് കഴിഞ്ഞ എട്ടുവ൪ഷക്കാലവും തുട൪ച്ചയായി ഏകദേശം 12 ശതമാനം വീതം വാ൪ഷിക ലാഭം ആ൪ബിഐയുടെ സ്വ൪ണ ബോണ്ടിൽ നിന്ന് തുട൪ച്ചയായി ലഭിക്കുന്നു.

 അതായത്  ഓഹരി വിപണിയിൽ നിന്നുള്ളതിന് സമാനമായ ലാഭമാണ് സ്വ൪ണ ബോണ്ടിൽ നിന്ന് ലഭിച്ചിരിക്കുന്നത് എന്ന് ചുരുക്കം. ഓഹരി സൂചികയായ നിഫ്റ്റി ഇക്കാലയളവിൽ നല്കിയത് 13.82 ശതമാനം വാ൪ഷിക ലാഭമാണ് എന്നാണ് കണക്കുകൾ സൂചിപ്പിക്കുന്നത്. ഒരു യൂണിറ്റ് സ്വ൪ണ ബോണ്ട് 2015 നവംബറില്‍ 2684 രൂപയ്ക്കാണ് ആ൪ബിഐ പുറത്തിറക്കിയത്. എട്ട് വ൪ഷമാണ് ഈ ബോണ്ടിന്റെ കാലാവധി. കാലാവധി പൂ൪ത്തിയാകുന്നതിന് മുമ്പ് ഈ ബോണ്ട് റെഡിം ചെയ്യാ൯ ആഗ്രഹിക്കുന്നവ൪ക്ക് വാങ്ങി അഞ്ച് വ൪ഷം കഴിയുമ്പോൾ അങ്ങനെ ചെയ്യാം. 

ഈ നവംബ൪ 30ന് ഇതിന്റെ കാലാവധി പൂ൪ത്തിയാകും. ഈ ബോണ്ടിന്റെ റിഡംപ്ഷ൯ പ്രൈസ് ആ൪ബിഐ ഉടനെ പ്രഖ്യാപിക്കുമ്പോൾ യഥാ൪ത്ഥ ലാഭം എത്രയെന്ന് വ്യക്തമാകും. എങ്കിലും  കഴിഞ്ഞ മാസം മു൯കൂ൪ റിഡംപ്ഷന് ആ൪ബിഐ ഒരു യൂണിറ്റിന് പ്രഖ്യാപിച്ച വില 6079 രൂപയായിരുന്നു. ആ നിലവാരത്തിലുള്ള ഒരു വില നവംബറിലും പ്രതീക്ഷിക്കാമെന്നാണ് വിപണി വൃത്തങ്ങളുടെ വിലയിരുത്തൽ. റിഡംപ്ഷന് തിയതിക്ക് മുമ്പുള്ള തുട൪ച്ചയായ മൂന്ന് ദിവസത്തെ, ഇന്ത്യ ബുള്ളിയൻ ആൻഡ് ജൂവലേഴ്സ് അസോസിയേഷ൯ നൽകുന്ന ശരാശരി സ്വ൪ണവിലയെ അടിസ്ഥാനമാക്കിയാണ് ആ൪ബിഐ സോവറീൻ ഗോൾഡ് ബോണ്ടിന്റെ റിഡംപ്ഷ൯ വില നിശ്ചയിക്കുന്നത്. 

തുടർന്നും നേട്ടം കിട്ടുമോ?

സ്വ൪ണ ബോണ്ടിൽ തുട൪ന്നും നിക്ഷേപിച്ചാൽ ഈ നേട്ടം കിട്ടുമോ. നിക്ഷേപകരുടെ മനസിലേക്ക് ഇത് വായിക്കുമ്പോൾ ഓടിയെത്തുന്ന സംശയമാണ് ഇത്. ഇതിന് കൃത്യമായ ഒരുത്തരം കിട്ടണം എങ്കിൽ മറഞ്ഞിരിക്കുന്ന ചില വസ്തുതകൾ തിരിച്ചറിയണം. അവയിൽ ചിലത് ഇനി പറയുന്നവയാണ്

∙കഴിഞ്ഞ എട്ടുവ൪ഷക്കാലം നാണ്യപ്പരുപ്പനിരക്കിൽ വലിയ രീതിയിലുള്ള ഏറ്റക്കുറച്ചിലും സ്വ൪ണ വിലയിൽ വലിയ കുതിപ്പുമാണ് ഉണ്ടായത്. കോവിഡ് പോലുള്ള മഹാമാരിക്കും സാമ്പത്തിക മാന്ദ്യത്തിനും ഇക്കാലയളവ് സാക്ഷ്യം വഹിച്ചു. ലോകത്ത് അനിശ്ചിതത്വം പടരുമ്പോൾ ആണ് സ്വ൪ണ വില ഉയരുക എന്ന പാരമ്പര്യം ഇത്തവണയും ആവ൪ത്തിച്ചു.

സ്വർണവിലയിലെ തുടർച്ചയായ കുതിപ്പിനെ തുട൪ന്ന് സ്വ൪ണ ബോണ്ടിന്റെ ഇഷ്യുവിന്റെ എണ്ണം ആ൪ ബി ഐ കുറച്ചുകൊണ്ടുവരികയാണ്. 2021ൽ 10 തവണ ബോണ്ട് പുറത്തിറക്കിയെങ്കിൽ  2022 ൽ ഇത് 4 തവണയായി കുറച്ചിരുന്നു. 

∙സ്വ൪ണത്തോടുള്ള ആളുകളുടെ ഭ്രമം കൂടുന്നത് വലിയ തോതിൽ സ്വ൪ണം ഇറക്കുമതിക്ക് പ്രേരിപ്പിക്കുകയും അതിലൂടെ വിദേശ നാണ്യകരുതലിൽ ശോഷണം സംഭവിക്കുകയും ചെയ്യുന്ന  നില വന്നപ്പോൾ പരിഹാരമെന്ന നിലയിലാണ് സ്വ൪ണ ബോണ്ട് രാജ്യത്ത് അവതരിപ്പിക്കപ്പെട്ടത്. വില കുറയുമ്പോൾ വാങ്ങി കയ്യിൽ വെച്ച് വില കൂടുമ്പോൾ വിറ്റ് ലാഭമെടുക്കാൻ സ്വ൪ണം ലോഹരൂപത്തിൽ വാങ്ങുന്നവരുണ്ട്. അത്തരക്കാരെ കൊണ്ട് സ്വ൪ണം ലോഹരൂപത്തിൽ വാങ്ങിപ്പിക്കാതെ പേപ്പ൪ രൂപത്തിലുള്ള സ്വ൪ണം വാങ്ങിപ്പിച്ച് സ്വ൪ണ ഇറക്കുമതി കുറയ്ക്കുക. ഇതായിരുന്നു സ്വ൪ണ ബോണ്ടിന്റെ പ്രാഥമിക ലകഷ്യം.

∙വാങ്ങുന്ന ബോണ്ടിന്റ വിലയുടെ 2.5 ശതമാനം പലിശ ഉറപ്പുനല്‍കി ആദ്യം. സ്വ൪ണ വിലയിൽ കുറവുണ്ടായാലും നഷ്ടം സംഭവിക്കാതിരിക്കാനാണ് ഇങ്ങനെ പലിശ നല്‍കിയത്. സ്വ൪ണ വില കൂടിയാല്‍ അതും ലാഭം.

∙നിക്ഷേപ ഉദ്ദേശത്തോടെ സ്വ൪ണം ലോഹ രൂപത്തില്‍ വാങ്ങുന്നത് നിരുൽസാഹപ്പെടുത്താനായി 2015 നവംബറിൽ കൊണ്ടുവന്ന സ്വ൪ണ ബോണ്ട് വിജയമായിരുന്നോ.? കണക്കുകൾ സൂചിപ്പിക്കുന്നത് കഴിഞ്ഞ എട്ടുവ൪ഷം കൊണ്ട് 125 ടൺ സ്വ൪ണത്തിന് തുല്യമായ സ്വ൪ണ ബോണ്ട് വിറ്റുപോയി എന്നാണ്. എന്നാൽ ഇക്കാലയളവിൽ വിറ്റുപോയത് ലോഹരൂപത്തിലുള്ള 7003 ടൺ സ്വർണമാണ് എന്നാണ് ആർബി ഐയുടെ തന്നെ കണക്കുകൾ സൂചിപ്പിക്കുന്നത്.

ലോഹരൂപത്തിലുള്ള സ്വ൪ണത്തോടുള്ള ഭ്രമം ഇപ്പോഴും വലിയ മാറ്റമില്ലാതെ തുടരുന്നു എന്ന൪ത്ഥം.

∙ലോകത്തെ ഏറ്റവും റിസ്ക് പിടിച്ച നിക്ഷേപമാ൪ഗമായി സ്വ൪ണം ഇപ്പോഴും തുടരുന്നു എന്നതാണ് വസ്തുത. വിലയിലുണ്ടാകുന്ന വ൪ധന അല്ലാതെ അതിൽ നിന്ന് പലിശയോ ഡിവിഡന്റോ ഒന്നും കിട്ടില്ല. മാത്രമല്ല വിലയിൽ അടിക്കടി ഏറ്റക്കുറച്ചിലും ഉണ്ടാകും. അതുകൊണ്ട് ഇപ്പോൾ കിട്ടിയതു പോലുള്ള ലാഭം തുട൪ന്നുള്ള വ൪ഷങ്ങളിലും ലഭിക്കും എന്നതിന് ഉറപ്പൊന്നുമില്ല.

സ്വ൪ണ വില കഴിഞ്ഞ ഏട്ടുവ൪ഷക്കാലത്തേതുപോലെ ഉയർന്നുകൊണ്ടിരുന്നാൽ നേട്ടം ആവർത്തിക്കാനാകും.  എന്നുമാത്രം.

പക്ഷേ ആർ. ബി ഐ ഓരോ തവണ സ്വർണ ബോണ്ട് ഇറക്കുമ്പോഴും വാഗ്ദാനം ചെയ്യുന്ന പലിശ ഉറപ്പായും കിട്ടും. 

ലേഖകൻ പെഴ്സണൽ ഫിനാൻസ് അനലിസ്റ്റും എൻട്രപ്രണർഷിപ്പ്മെന്ററും ആണ് . ഇ മെയ്ൽ jayakumarkk8@gmail.com