ഐ ലീഗിൽ ഗോകുലം കേരള എഫ്സിക്ക് ഇന്നു ചെന്നൈ സിറ്റി എതിരാളികൾ. നെഹ്റു സ്റ്റേഡിയത്തിൽ വൈകിട്ട് 5 ന് കിക്കോഫ്. ഹോട്സ്റ്റാറിലും ജിയോ ടിവിയിലും സ്റ്റാർ സ്പോർട്സിലും കാണാം
കോയമ്പത്തൂർ ∙ ഗംഭീരമായി തുടങ്ങിയ ശേഷം ഇഴഞ്ഞു നീങ്ങി പ്രേക്ഷകരെ മടുപ്പിച്ച സിനിമ പോലെയാണ് ഇപ്പോൾ ഗോകുലം കേരള എഫ്സിയുടെ സ്ഥിതി. ഐ ലീഗിൽ ഇന്റർവെൽ കഴിഞ്ഞു. രണ്ടാം പകുതിയിൽ കാണികൾ പ്രതീക്ഷിക്കുന്നത് ഞെട്ടിക്കുന്ന ക്ലൈമാക്സാണ്. പുതുവൽസരത്തിൽ തകർപ്പൻ തുടക്കം തേടി ഗോകുലം ഇന്ന് ചെന്നൈ സിറ്റി എഫ്സിയെ നേരിടുന്നു.
10 കളിയിൽ നിന്ന് 10 പോയിന്റുമായി പട്ടികയിൽ എട്ടാമതാണ് ഇപ്പോൾ ഗോകുലം. ടീം ഒരു ജയം കണ്ടിട്ട് 5 കളി കഴിഞ്ഞു. മറുഭാഗത്ത്, 21 പോയിന്റുമായി പട്ടികയിൽ ഒന്നാമതാണ് ചെന്നൈ. കോഴിക്കോട്ടെ മത്സരത്തിൽ ഗോകുലത്തെ 3-2 ന് തോൽപിച്ചതിന്റെ ആത്മവിശ്വാസവും ചെന്നൈയ്ക്കു കൂട്ടിനുണ്ട്.
