കരിയറിൽ 700 ഗോൾ തികച്ച് മെസ്സി; അത്‌ലറ്റിക്കോയ്ക്ക് എതിരെ ബാർസയ്ക്കു സമനില

ബാർസിലോന ∙ കരയണോ ചിരിക്കണോ? ബാർസ ആരാധകർ ധർമസങ്കടത്തിലാണ്! ഇഷ്ടതാരം ലയണൽ മെസ്സി കരിയറിൽ 700–ാം ഗോൾ തികച്ച ദിനം അവർക്ക് ആഹ്ലാദത്തിന്റേതു മാത്രമാവേണ്ടതായിരുന്നു. പക്ഷേ, സ്പാനിഷ് ലാ ലിഗ ഫുട്ബോൾ മത്സരത്തിൽ പോയിന്റ് നിലയിൽ മൂന്നാം സ്ഥാനത്തുള്ള അത്‌ലറ്റിക്കോ മഡ്രിഡിനോട് 2–2 സമനില വഴങ്ങിയതോടെ കിരീടപ്രതീക്ഷ ഏറെക്കുറെ അസ്തമിച്ച അവസ്ഥയാണ്. 5 മത്സരങ്ങൾ ശേഷിക്കെ ബാർസയ്ക്ക് 70 പോയിന്റ്. 6 മത്സരം ബാക്കിയുള്ള റയൽ മഡ്രിഡിന് 71. നാളെ ഗെറ്റാഫെയ്ക്കെതിരെ ജയിച്ചാൽ റയലിനു ലീഡ് 4 പോയിന്റ്– ഒരു മത്സരം കൊണ്ട് പിടിച്ചാൽ കിട്ടാത്ത ദൂരം!

സ്വന്തം മൈതാനമായ നൂകാംപിൽ രണ്ടു വട്ടം ലീഡ് എടുത്ത ശേഷമാണ് ബാർസ സമനില വഴങ്ങിയത്. 11–ാം മിനിറ്റിൽ മെസ്സിയുടെ ഒരു കോർണർ

സ്വന്തം പോസ്റ്റിലേക്കു തന്നെ തട്ടിയിട്ട് അത്‌ലറ്റിക്കോ താരം ഡിയേഗോ കോസ്റ്റ ബാർസയ്ക്കു ലീഡ് നൽകി. 19–ാം മിനിറ്റിൽ നാടകീയമായ പെനൽറ്റി കിക്കിലൂടെ അത്‌ലറ്റിക്കോ ഒപ്പമെത്തി. കോസ്റ്റയുടെ കിക്ക് ബാർസ ഗോൾകീപ്പർ ടെർസ്റ്റീഗൻ തടഞ്ഞെങ്കിലും കിക്ക് എടുക്കുന്നതിനു മുൻപ് മുന്നോട്ടു കയറി വന്നതിനാൽ റഫറി റീ കിക്കിനു വിസിലൂതി. ഇത്തവണ കിക്കെടുത്ത സോൾ നിഗ്വേസിനു പിഴച്ചില്ല. 50–ാം മിനിറ്റിൽ പെനൽറ്റി കിക്കിലൂടെ മെസ്സി ബാർസയ്ക്കു ലീഡ് നൽകി. എന്നാൽ 62–ാം മിനിറ്റിൽ സോളിന്റെ രണ്ടാം പെനൽറ്റി കിക്കിൽ അത്‌ലറ്റിക്കോയ്ക്കു സമനില.

കരിയറിൽ 700 ഗോൾ തികച്ച് മെസ്സി

700–ാം ഗോളിന്റെ സമ്മർദമേതുമില്ലാതെ സൗമ്യമായൊരു പനേങ്ക കിക്ക്. ആരാധകർ കാത്തിരുന്ന മെസ്സിയുടെ ഗോൾ പിറന്നത് അത്‌ലറ്റിക്കോയ്ക്കെതിരെ മത്സരത്തിന്റെ 50–ാം മിനിറ്റിൽ. കരിയറിൽ 700 ഗോൾ എന്ന നേട്ടത്തിലെത്തുന്ന ഏഴാമത്തെ താരമാണ് മെസ്സി. നിലവിൽ കളിക്കുന്നവരിൽ പോർച്ചുഗീസ് താരമായ ക്രിസ്റ്റ്യാനോ റൊണാൾഡോയ്ക്കു പിന്നിൽ രണ്ടാമനും.