ഐഎസ്എൽ 8 മാസമാക്കി നീട്ടണം: ബ്ലാസ്റ്റേഴ്സ് പരിശീലകൻ സംസാരിക്കുന്നു

മാറ്റങ്ങൾക്കുവേണ്ടി മാറ്റമില്ലെന്നും ജനുവരി ട്രാൻസ്ഫർ വിൻഡോ അത്തരത്തിൽ ഉപയോഗപ്പെടുത്തില്ലെന്നും കേരള ബ്ലാസ്റ്റേഴ്സ് മുഖ്യപരിശീലകൻ ഇവാൻ വുക്കൊമനോവിച്. കെ.പി.രാഹുൽ വൈകാതെ ടീമിനൊപ്പം ചേരുമെന്നും അദ്ദേഹം പറഞ്ഞു. ഐഎസ്എൽ സീസൺ 2–ാം പകുതിയിലേക്കു കടക്കുന്ന വേളയിൽ വുക്കൊമനോവിച് ‘മനോരമ’യോടു സംസാരിക്കുന്നു.

∙ ലീഗ് ഇതുവരെ?

ഇതെന്റെ ആദ്യ സീസൺ. റഫറിമാരുടെ പിഴവുകളും അതേക്കുറിച്ചുള്ള ചർച്ചകളും കണ്ടു. കളിനിലവാരം മെച്ചപ്പെടണമെങ്കിൽ റഫറിയിങ് നല്ലതാകണം. ടീമിന്റെ പുരോഗതിയിൽ തൃപ്തിയുണ്ട്. പല കളിക്കാരും മെച്ചപ്പെട്ടു. പക്ഷേ, ഈ ലീഗ് ഹ്രസ്വകാലത്തേക്കേയുള്ളൂ. യുവകളിക്കാർ കൂടുതൽ വളരണമെങ്കിൽ ലീഗിനു കൂടുതൽ ദൈർഘ്യമുണ്ടാകണം.

∙ പോയിന്റ് പട്ടികയിലെ സ്ഥാനം?

കുറച്ചുകൂടി മുകളിലേക്കു കയറാമായിരുന്നു. മുൻ സീസണുകളിലെ പ്രകടനവും സാഹചര്യവും അറിയാവുന്ന സ്ഥിതിക്ക് ഇപ്പോഴത്തെ അധ്വാനത്തിൽ സന്തോഷം.

∙ ബ്ലാസ്റ്റേഴ്സിന്റെ കളി എതിരാളികൾക്കു മുൻകൂട്ടി കാണാനാവുന്നതായോ?

വ്യത്യസ്ത ശൈലികളിൽ കളിക്കാനാവണം. ജയിക്കാനുള്ള പ്ലാനോടുകൂടിത്തന്നെയാണ് ഓരോ കളിക്കും ഇറങ്ങുന്നത്. ചില മത്സരങ്ങളിൽ കൃത്യമായി നടപ്പാക്കാനാവും. ചിലപ്പോൾ കടുപ്പമായിരിക്കും. ഞങ്ങളുടെ കളി മറ്റുള്ളവർക്കു പ്രവചിക്കാവുന്ന തരത്തിലാണെന്നു തോന്നിയിട്ടില്ല.

∙ പ്ലേഓഫിനു മുൻപ് ഇനി 11 മത്സരങ്ങൾ. ജനുവരി ട്രാൻസ്ഫർ എങ്ങനെ ഉപയോഗപ്പെടുത്തും?

ഓരോ മത്സരത്തിനും പദ്ധതികളുണ്ട്. മാറ്റങ്ങൾക്കുവേണ്ടി മാത്രം മാറ്റം എന്നതിൽ വിശ്വസിക്കാത്തതിനാൽ ജനുവരി വിൻഡോ ഉപയോഗപ്പെടുത്തുന്നില്ല.

∙ രാഹുൽ എന്നത്തേക്കു തിരിച്ചെത്തും?

രാഹുൽ വൈകാതെ ടീമിനൊപ്പം ചേരും.

∙ 12 ദിവസത്തിനിടെ 4 കളി. ഫെബ്രുവരി 11നുശേഷം 9 ദിവസത്തിനിടെ 3 മാച്ച്. തളർച്ചയ്ക്കു സാധ്യതയില്ലേ?

അതു ഫിക്സ്ചറിന്റെ ഭാഗമാണ്. പരാതിപ്പെടാനില്ല. ലീഗ് ദൈർഘ്യമുള്ളതായിരുന്നെങ്കിൽ നന്നായേനേ. 7–8 മാസമെങ്കിലും വേണമായിരുന്നു.

English Summary: Interview with Kerala Blasters coach Ivan Vukomanovic